Kam Klosap Long God

Bigfala Pruf We i Soemaot Lav Blong God

Jenesis 22:1-18

EBRAHAM i lavem God. Man ya blong God i lavem Aesak tu, pikinini blong hem we i bon taem hem i olfala finis. Taem Aesak i gat 25 yia nomo, Ebraham i kasem wan traem. Bambae hem i mas mekem wan samting we i agensem filing we wan papa i gat long pikinini blong hem. God i talem long Ebraham blong i kilim pikinini blong hem olsem wan sakrefaes. Be long en blong stori ya, Aesak i no ded. Taem Ebraham i leftemap naef blong hem blong stikim Aesak, God i sanem wan enjel blong blokem hem. Stori ya blong Baebol we i stap long Jenesis 22:1-18, i soemaot bigfala lav we God i gat long yumi.

Vas 1 i talem se: “God i traem bilif blong Ebraham.” Ebraham i wan man blong bilif, be naoia bilif blong hem bambae i kasem wan traem we neva i bin kasem bifo. God i talem se: “Pikinini ya blong yu Aesak, hem i wan nomo we yu yu gat, mo yu yu lavem hem tumas. Mi wantem blong yu tekem hem . . . Nao . . . bambae mi mi soemaot wan hil long yu, mo long hil ya, bambae yu kilim pikinini ya, yu bonem hem long faea, blong mekem sakrefaes long hem blong mekem wosip long mi.” (Vas 2) Tingbaot se God i no save letem wan samting i traem ol man blong hem, we i strong tumas long olgeta. Taswe, traem ya i soemaot se Jeova i trastem Ebraham.—1 Korin 10:13.

Ebraham i obei wantaem nomo. Yumi ridim se: “Nao long nekis dei, long eli moning, hem i go katem faeawud blong bonem sakrefaes, mo i putum long baksaed blong dongki blong hem. Nao i tekem pikinini blong hem wetem tu man blong wok blong hem, nao oli aot, oli stap wokbaot blong go long ples ya we God i talem long hem.” (Vas 3) I klia se Ebraham i no talemaot traem ya long wan man nating.

Long trifala dei we oli stap wokbaot, hem i gat i naf taem blong tingting gud. Be tingting blong Ebraham i no kam slak. Ol toktok we hem i talem oli soemaot bilif blong hem. Taem hem i luk hil ya longwe, hem i talem long tufala man blong wok blong hem se: “Yutufala i stap wet long ples ya . . . Mi wetem Aesak, bambae mitufala i go long ples ya longwe, blong mekem wosip. Nao biaen, bambae mitufala i kambak long yutufala bakegen.” Taem Aesak i askem wehem sipsip blong sakrefaes, Ebraham i talem se, “God nomo bambae i givim smol sipsip blong sakrefaes.” (Vas 5, 8) Ebraham i save se boe blong hem bambae i kambak wetem hem. ?From wanem? From we “Ebraham i stap tingbaot we God i save mekem [Aesak] i laef bakegen long ded.”—Hibrus 11:19.

Antap long hil ya, taem Ebraham i tekem ‘naef blong stikim Aesak i ded,’ wan enjel i blokem han blong hem. Nao God i givim wan man sipsip we hon blong hem i fas long han blong wan smol tri, blong Ebraham i bonem long olta ya, we “sipsip ya i tekem ples blong pikinini blong hem.” (Vas 10-13) Long lukluk blong God, i olsem we Ebraham i kilim Aesak finis olsem wan sakrefaes. (Hibrus 11:17) Wan man blong hae save i talem se: “Long tingting blong God, fasin ya we Ebraham i rere blong mekem samting, i sem mak olsem we hem i mekem samting ya finis.”

Fasin blong Jeova blong trastem Ebraham i win. Mo Ebraham i kasem gudfala frut taem hem i trastem Jeova, from we Jeova i talemaot bakegen mo i givim moa save long saed blong promes ya we hem i mekem wetem Ebraham. Promes ya bambae i karem blesing i kam long olgeta man long wol.—Vas 15-18.

Long en blong stori ya, God i no letem Ebraham i kilim Aesak i ded. Be biaen, God bambae i givim stret pikinini blong hem olsem wan sakrefaes. Fasin ya we Ebraham i rere blong givim Aesak olsem wan sakrefaes i pija blong sakrefaes we God i mekem taem hem i letem stret pikinini blong hem, Jisas, wan nomo we hem i gat, blong i ded from ol sin blong yumi. (Jon 3:16) Sakrefaes blong Jisas i wan bigfala pruf blong soemaot lav we Jeova i gat long yumi. From God i mekem sakrefaes ya blong yumi, i gud yumi askem yumi wan se, ‘?wanem sakrefaes we mi mi rere blong givim blong mekem God i glad?’