?God i Gat Wan Prapa Nem Blong Hem?

Ansa we plante man oli givim:

▪ “Nem blong hem, God nomo.”

▪ “Hem i no gat wan prapa nem blong hem.”

?Jisas i talem wanem?

▪ “Taem yufala i prea bambae yufala i prea olsem. ‘Papa blong mifala. Yu yu stap long heven. Nem blong yu i tabu.’” (Matiu 6:9) Tingting blong Jisas se God i gat wan prapa nem blong hem.

▪ “Mi mi bin talemaot nem bilong yu long olgeta. Mo bambae mi mi save stap mekem olsem bakegen, bilong bambae olgeta ia oli save laeklaekem tumas ol man, olsem yu yu bin laekem mi tumas. Bambae mi mi mekem olsem bilong bambae laef bilong mi i save joen long laef bilong olgeta.” (Jon 17:26, Gud Nyus Bilong Jisas Krais) Jisas i talemaot nem blong God long olgeta man.

▪ “Bambae yufala i no save luk mi, gogo yufala i save talem se, ‘Hae God [“Jeova,” NW], yu blesem man ya we i kam long nem blong yu.’” (Luk 13:35; Ol Sam 118:26) Yes, Jisas i yusum prapa nem blong God.

GOD hem wan i talemaot prapa nem blong hem long yumi. Long Baebol, hem i talem se: “Mi mi Jeova, hemia nao nem blong mi.” * (Aesea 42:8, American Standard Version) Nem blong God long Hibru lanwis, oli tanem i kam Jehovah long Inglis mo Jeova long Bislama, mo plante man oli savegud long tufala nem ya. Ating yu yu sapraes blong save se spesel Hibru nem ya i stap plante taosen taem long ol olfala hanraet blong Baebol. Nem ya i kamaot moa long ol hanraet ya i bitim olgeta narafala nem long Baebol.

Samfala we oli harem kwestin ya, “?Wanem prapa nem blong God?” oli talem nomo se “God.” Be hemia i sem mak long ol man we oli harem kwestin ya, “?Hu i winim eleksen?” nao oli talem nomo se “Man we i stanap long eleksen.” Tugeta ansa ya oli no givim save mo oli no klia, from we “God” mo “Man we i stanap long eleksen,” tufala tugeta i no prapa nem blong wan man.

?From wanem God i talemaot nem blong hem long yumi? Hem i mekem olsem blong yumi gat rod blong save hem moa. Tingbaot: Maet yumi singaot wan man se Masta, Bos, Papa, no Abu, i dipen se man ya i hu. Ol nem ya oli soemaot wan samting long saed blong man ya. Be prapa nem blong man ya i mekem yumi tingbaot evri samting we yumi save long saed blong hem. Long sem fasin, ol nem ya Masta, God we i gat Olgeta Paoa, Papa, mo Man we i wokem olgeta samting, oli pulum yumi blong tingbaot ol defdefren wok we God i mekem. Be prapa nem blong hem Jeova, hemia nomo i mekem yumi tingbaot evri samting we yumi save long saed blong God. ?Olsem wanem bambae yu savegud God sipos yu no save prapa nem blong hem?

I impoten blong save prapa nem blong God, mo i impoten tu blong yusum nem ya. ?From wanem? From we long Baebol Jeova i talem se: “Olgeta man we oli singaot long mi long nem blong mi, mi bambae mi sevem olgeta.”—Rom 10:13; Joel 2:32.

[Futnot]

[Tok blong makem poen long pej 6]

Maet yumi singaot wan man se Masta, Bos, Papa, no Abu, i dipen se man ya i hu. Be prapa nem blong man ya i mekem yumi tingbaot evri samting we yumi save long saed blong hem