?God i Stap Tingbaot Mi?
?God i Stap Tingbaot Mi?
Ansa we plante man oli givim:
▪ “God i hae tumas, hem i no save tingbaot ol trabol blong mi.”
▪ “Mi no ting se God i stap wari long mi.”
?Jisas i talem wanem?
▪ “Ol smosmol pijin ya we man i stap salem olgeta, wan handred twanti vatu long faef, be i no gat wan long olgeta we God i fogetem samtaem. Yufala i luk. Ol hea blong hed blong yufala, be hem i kaontem evriwan. Yufala i no fraet. Long fes blong hem, yufala i gud moa, i winim plante smosmol pijin ya.” (Luk 12:6, 7) Yes, Jisas i tijim ol man se God i stap tingbaot yumi.
▪ “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya.” (Matiu 6:31, 32) Jisas i suagud se God i save ol samting we yumi wanwan i nidim.
BAEBOL i talem stret se God i stap tingbaot yumi. (Ol Sam 55:22; 1 Pita 5:7) ?Sipos God i stap tingbaot yumi, from wanem yumi stap safa? ?Sipos God i lavem yumi mo i gat Olgeta Paoa, from wanem hem i no mekem wan samting blong finisim ol trabol we i mekem man i safa?
Ansa blong tufala kwestin ya i stanap long wan samting we plante man oli no save long hem—Setan nao i stap rulum rabis wol ya. Taem Setan i traem pulum Jisas blong mekem samting we hem i wantem, hem i talem long Jisas se bambae i givim olgeta kingdom blong wol long hem: “Bambae mi mi putum olgeta kantri ya, wetem olgeta gudgudfala samting blong olgeta, oli stap long han blong yu. Olgeta samting ya oli stap long han blong mi finis, mo mi mi save givim long hu man we mi wantem givim long hem.”—Luk 4:5-7.
?Hu i mekem se Setan i kam rula blong wol? Faswan papa mama blong yumi, Adam mo Iv, tufala i tanem baksaed long God mo tufala i lesin long Setan. Taem tufala i mekem olsem, tufala i jusum Setan blong i kam rula blong tufala. Afta long samting ya, Jeova God i mekem tingting blong hem i longfala, mo i letem taem i pas blong soemaot se rul blong Setan i nogud olgeta. Jeova i no fosem man blong wosipim hem. Be hem i mekem rod blong yumi save kambak long hem sipos yumi wantem.—Rom 5:10.
Yes, God i stap tingbaot yumi, taswe hem i mekem plan se Jisas bambae i tekemaot yumi long rul blong Setan. I no longtaem, bambae Jisas i “brekem paoa blong Setan, we i holem paoa blong ded.” (Hibrus 2:14) Taem hem i mekem olsem, bambae hem i “brekemdaon ol wok we Setan i mekem.”—1 Jon 3:8.
Wol ya bambae i kam paradaes bakegen. Long taem ya, God “bambae i ravemaot wota blong ae blong [ol man]. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4, 5. *
[Futnot]
^ par. 12 Blong kasem save moa long kwestin ya, ?from wanem God i letem man i safa?, ridim japta 11 blong buk ya we ol Witnes blong Jeova oli wokem, ?Wanem Samting We Baebol i Rili Tijim?
[Tok blong makem poen long pej 8]
Wol ya bambae i kam paradaes bakegen