Wan Kwestin

Baebol i tokbaot “Buk blong Jasara” mo wan buk we nem blong hem “Ol Stori blong ol Faet we Hae God i Mekem.” (Jos. 10:13; Nam. 21:14) Tufala buk ya i no stap wetem ol narafala buk we oli stap long Baebol tede. ?Olsem wanem? ?Tabu spirit i bin pulum ol man blong raetem tufala buk ya be biaen tufala buk ya i lus?

I no gat pruf blong talem se tabu spirit nao i bin pulum ol man blong raetem tufala buk ya mo biaen tufala buk ya i lus. Ol man we tabu spirit i pulum olgeta blong raetem ol buk we oli stap long Baebol, oli yusum plante save we i stap long ol narafala hanraet. Sam long ol hanraet ya oli pat blong Baebol, be ol man bifo oli bin talem nem blong ol hanraet ya i defren long nem we yumi save long hem tede. Fas Kronikel 29:29 i tokbaot wan buk we hem i “buk blong ol ripot blong trifala profet ya, Profet Samuel, mo Profet Natan, mo Profet Gad.” Maet buk ya hem i minim ol buk we tede yumi ridim long Baebol hemia 1 Samuel mo 2 Samuel, no maet hemia buk blong Jajes.

Be sam long ol hanraet ya we ol man blong raetem Baebol oli bin tokbaot, maet oli gat ol nem we oli klosap sem mak wetem ol buk blong Baebol be oli no stap long Baebol. Tingbaot fofala olfala buk ya: “Ol Stori blong Laef blong Ol King blong Juda,” “Ol Stori blong ol King blong Juda mo blong ol King blong Isrel,” “Ol Stori blong ol King blong Isrel,” “Ol Stori blong Laef blong ol King blong Isrel mo blong ol King blong Juda.” Maet ol nem ya oli lelebet sem mak long nem blong 1 King mo 2 King we i stap long Baebol, be fofala buk ya oli no kamaot long God mo oli no stap insaed long Baebol. (1 King 14:29; 2 Kron. 16:11; 20:34; 27:7) Ating ol buk ya oli ol hanraet blong storebaot ol samting we i bin hapen long taem we profet Jeremaea mo Esra tufala i bin raetem buk blong tufala we i stap long Baebol.

Yes i tru ol man we oli raetem ol buk blong Baebol oli bin tokbaot mo jekem ol save we oli stap long sam narafala hanraet long taem blong olgeta nating se ol hanraet ya oli no kamaot long God. Buk blong Esta long japta 10 vas 2 i tokbaot “Ol Stori blong ol King blong Pesia mo Media.” Mo Luk tu, bifo we hem i raetem Gospel blong hem, hem i talem se hem i “stap luklukgud longtaem finis long olgeta samting ya, i stat long stat blong hem.” Maet Luk i stap tokbaot sam hanraet we oli stap long taem blong hem we oli save halpem hem blong save nem blong olgeta bubu long laen blong Jisas, nao hem i save raetem lis blong nem blong olgeta ya long Gospel blong hem. (Luk 1:3; 3:23-38) Ol hanraet ya we Luk i yusum blong faenem ol nem ya long olgeta, oli no kamaot long God, be Gospel we Luk i raetem wetem ol nem ya long hem, tabu spirit i pulum hem blong raetem. Mo ol save long Gospel ya we hem i raetem oli impoten tumas long yumi tede.

Tufala buk ya we yumi askem kwestin long saed blong tufala—“Buk blong Jasara” mo “Ol Stori blong ol Faet we Hae God i Mekem”—ating hemia tu hanraet blong bifo, be tabu spirit i no pulum ol man blong raetem tufala buk ya. Taswe Jeova i no lukaotgud long tufala buk ya blong tufala i stap kam kasem taem blong yumi. From we Baebol i tokbaot tufala buk ya, ol man we oli gat plante save long ol samting we Baebol i tokbaot, oli ting se maet hemia tu hanraet blong ol naesfala toktok mo sing we oli storebaot ol faet we Isrel i mekem agensem ol enemi blong hem. (2 Saml. 1:17-27) Wan buk we i givim ol save long saed blong Baebol i talem se maet tufala buk ya oli “buk we ol man blong singsing long Isrel bifo oli bin wokem blong holemgud olgeta naesfala toktok mo singsing blong neson blong olgeta.” Sam man we God i bin yusum olgeta blong mekem wok blong profet mo we oli bin luk ol vison, oli bin raetem sam buk. Be i no Jeova we i pulum olgeta blong raetem ol buk ya mo hem i no jusum buk blong olgeta ya se bambae i stap wetem ol narafala buk long Baebol we oli ‘stret gud blong tijim trutok, blokem ol krangke tok, stretem ol krangke fasin, mo blong tijim ol stret fasin’ long ol man tede.—2 Tim. 3:16; 2 Kron. 9:29; 12:15; 13:22.

I tru se sam man we oli raetem Baebol maet oli tokbaot sam narafala buk mo maet oli tokbaot save we i stap long ol narafala buk ya, be samting ya i no min se ol narafala buk ya tu oli kamaot long God. Jeova God i lukaotgud long olgeta hanraet we oli holem ol “tok blong God blong yumi,” mo ol tok ya ‘bambae oli stap olwe, gogo i no save finis.’ (Aes. 40:8) Yes, olgeta 66 buk we Jeova i jusum se bambae oli pat blong Baebol tede, oli stret long wanem we yumi nidim blong “yumi save kam waes long olgeta samting, nao bambae yumi savegud ol rod blong mekem ol gudfala wok.”—2 Tim. 3:16, 17.