Luksave Jisas, Bigfala Deved Mo Bigfala Solomon

“Yufala i luk, mi mi waes moa long King Solomon.”—MAT. 12:42.

1, 2. ?Folem tingting blong man, from wanem i wan sapraes we Jeova i talem long Samuel blong makemaot Deved blong i kam king?

DEVED i no luk olsem wan king nating. Defren olgeta, taem profet Samuel i luk hem, hem i ting se hem i wan boe nomo we i stap lukaot long ol sipsip. Mo tu, taon ya we boe ya i kamaot long hem, Betlehem, i wan smol taon nomo. Baebol i tokbaot taon ya se hem i “wan taon we i smol tumas, [hem i] no save stap wetem ol taosen blong Juda.” (Maeka 5:2, NW) Nating se i olsem, profet Samuel i rere blong makemaot boe ya we i luk olsem se i wan boe olbaot nomo, mo we i kamaot long wan taon we i smol tumas, blong hem i kam nekis king long Isrel.

² Samuel i no ting se Jeova i jusumaot yangfala Deved blong i kam king. Deved i laswan long ol eit boe blong Jese. Mo taem Samuel i kamtru long haos blong Jese blong makemaot wan long ol pikinini boe blong hem blong i kam nekis king blong Isrel, Deved i no stap. Be samting we i impoten, hemia se Jeova i jusumaot Deved.—1 Saml. 16:1-10.

3. (a) ?Taem Jeova i luk wan man, wanem samting we hem i luk se i impoten moa? (b) ?Taem Samuel i kafsaedem oel long Deved blong makemaot hem olsem king, wanem samting i hapen?

 ³ Jeova i luk samting we Samuel i no save luk. God i naf blong luksave samting we i stap long hat blong Deved, mo hem i glad long Deved. God i ting se ol samting we oli stap long tingting no hat blong man oli impoten, be i no ol samting long saed blong bodi blong man. (Ridim 1 Samuel 16:7.) Taem Samuel i luk se Jeova i no jusum wan long ol seven boe blong Jese, hem i sanem tok blong oli go singaot laswan boe blong Jese we i stap lukaot long ol sipsip, blong i kam. Baebol i talem se: ‘Nao Jese i sanem wan man i go tekem hem i kam. Boe ya i naes, bodi blong hem i strong mo fes blong hem i saen. Nem blong hem Deved, mo Hae God i talem long profet se, “!Hemia nao! !Yu girap, yu makemaot hem se bambae i kam king!” Nao profet i tekem olifoel, i kafsaedem i go long hed blong hem blong makemaot hem. Hem i mekem samting ya long fes blong ol brata ya blong hem, mo wantaem nomo, spirit blong Hae God i kam long Deved, i holem hem, mo i stat long dei ya, spirit ya i stap oltaem long hem.’—1 Saml. 16:12, 13.

Deved i Pija Blong Jisas

4, 5. (a) Tokbaot sam samting long saed blong Jisas mo Deved we oli sem mak. (b) ?From wanem yumi save singaot Jisas se Bigfala Deved?

⁴ Samwe long 1,100 yia afta long taem blong Deved, Jisas i bon long taon ya Betlehem, olsem Deved bifo. Mo long tingting blong plante man, Jisas tu i no luk olsem wan king nating. Hemia i min se hem i no king ya we plante man Isrel oli putum tingting blong olgeta i stap strong long hem. Nating se i olsem, Jeova i jusumaot hem, olsem we i bin jusumaot Deved bifo. Jeova i laekem Jisas, sem mak olsem we hem i laekem Deved. * (Luk 3:22) ‘Spirit blong Jeova i kam long’ Jisas tu.

⁵ I gat plante moa samting long saed blong Jisas mo Deved we oli sem mak. Olsem nao, Deved i harem nogud from we man blong givim advaes long hem, Ahitofel, i tanem baksaed long hem mo i agensem hem. Jisas tu i harem nogud from we aposol blong hem, Judas Iskariot, i salem hem i go long han blong ol rabis man. (Sam 41:9; Jon 13:18) Deved mo Jisas tugeta oli gat wan strong tingting long saed blong ples blong wosip blong Jeova. (Sam 27:4; 69:9; Jon 2:17) Mo tu, Jisas i man ya we i kamaot long laen blong Deved we i stret blong tekem ples blong hem olsem king. Bifo we Jisas i bon, wan enjel i talem long mama blong hem se: “Jeova God bambae i givim bigfala jea blong king long hem, we i bigfala jea blong King Deved, papa blong hem.” (Luk 1:32, NW; Mat. 1:1) Olgeta promes long saed blong Mesaea oli kamtru long Jisas. From samting ya, Jisas i hae moa long Deved. Hem i Bigfala Deved, Mesaea King ya we longtaem finis i kam, ol man oli stap wet long hem.—Jon 7:42.

Folem King Ya We i Man Blong Lukaot Long Sipsip

6. ?Long wanem rod Deved i wan gudfala man blong lukaot long sipsip?

⁶ Jisas i wan man blong lukaot long sipsip tu. ?Wanem ol samting we oli soemaot se wan man i wan gudfala man blong lukaot long sipsip? Man ya i no mas fraet blong lukluk long nid blong ol sipsip, hem i mas fidim mo lukaot gud long olgeta, mo hem i mas fasgud long wok ya. (Sam 23:2-4) Taem Deved i wan yangfala, hem i lukaotgud long ol sipsip blong papa blong hem. Taem wan laeon mo wan bea i kam blong kakae ol sipsip, Deved i no fraet mo i putum laef blong hem long denja blong protektem ol sipsip ya.—1 Saml. 17:34, 35.

7. (a) ?Wanem samting i rerem Deved blong i mekemgud ol wok blong hem olsem king? (b) ?Olsem wanem Jisas i pruvum se hem i Gudfala Man blong Lukaot long Sipsip?

⁷ OI yia we Deved i spenem long ol open ples mo long ol hil blong lukaot long ol sipsip, i rerem hem from ol bigfala wok we hem i mas mekem blong lukaot long neson blong Isrel. * (Sam 78:70, 71) Jisas tu i pruvum se hem i wan gudfala man blong lukaot long ol sipsip. Hem i kasem paoa long Jeova, mo Jeova i lidim hem taem hem i stap lukaot long ol “smol kampani blong ol sipsip” mo ol “narafala sipsip.” (Luk 12:32, NW; Jon 10:16) Long rod ya, Jisas i soemaot se hem i Gudfala Man blong Lukaot long Sipsip. Hem i savegud ol sipsip blong hem mo i singaot olgeta wanwan  long nem blong olgeta. Hem i lavem tumas ol sipsip blong hem, mo taem hem i stap long wol, hem i rere blong lego sam samting blong lukaot long olgeta mo sevem olgeta. (Jon 10:3, 11, 14, 15) Taem Jisas i wok olsem Gudfala Man blong Lukaot long Sipsip, hem i mekem wan samting we Deved i neva save mekem. Ransom sakrefaes blong hem i openem rod blong ol man oli kam fri long ded. I no gat wan samting i save blokem hem long wok ya blong lukaot long “smol kampani” blong ol sipsip blong hem, blong oli kasem laef ya we i no save finis samtaem long heven. Mo i no gat wan samting i save blokem hem long wok ya blong lidim “ol narafala sipsip” blong hem, blong oli kasem laef blong olwe long wan niufala wol we stret fasin nomo i stap long hem, mo we i no gat ol man we fasin blong olgeta i olsem wael dog long hem.—Ridim Jon 10:27-29.

Folem King Ya We i Win Long Faet

8. ?Olsem wanem Deved i soemaot se hem i wan king we i win long faet?

⁸ King Deved i wan strong man blong faet we i protektem kantri blong ol man blong God, “mo long evri ples we hem i go mekem faet long hem, Hae God i stap mekem hem i win.” Aninit long rul blong Deved, boda blong neson blong Isrel i kam bigwan moa, i stat long reva blong Ijip mo i go kasem Yufretes reva. (2 Saml. 8:1-14) Wetem help blong Jeova, Deved i kam wan king we i gat bigfala paoa. Baebol i talem se: “Nao nius blong ol bigbigfala samting ya we [Deved] i mekem i go olbaot long olgeta ples, mo Hae God i mekem ol man long olgeta kantri oli fraet long hem.”—1 Kron. 14:17.

9. Eksplenem olsem wanem Jisas, Man ya we God i Jusumaot blong kam King, i win long faet.

⁹ Olsem King Deved, Jisas tu i no wan man blong fraet taem hem i stap long wol ya. Jisas i Man ya we God i Jusumaot blong kam King. Hem i soemaot se hem i gat moa paoa bitim ol rabis enjel, mo hem i sevem ol man we oli stap aninit long paoa blong ol rabis enjel. (Mak 5:2, 6-13; Luk 4:36) Bigfala enemi ya, Devel Setan, i no gat paoa antap long Jisas. Wetem help blong Jeova, Jisas i winim wol ya we i stap long paoa blong Setan.—Jon 14:30; 16:33; 1 Jon 5:19.

10, 11. ?Wanem wok we Jisas i mekem long heven olsem King we i Go blong Faet?

¹⁰ Samwe 60 yia afta we Jisas i ded, i laef bakegen, mo i gobak long heven, aposol Jon i kasem wan vison we i soemaot wok we Jisas bambae i mekem long heven, olsem wan King we i Go blong Faet. Jon i raetem se: “Mi luk wan waet hos i kamtru. Man we i stap sidaon long hem i holem bonara blong hem, mo i putum gudfala hat blong flasem hem, olsem hat blong man we i win finis long faet. Hem i raed long hos i go, olsem man we i win finis long faet, nao i go blong faet bakegen, blong bambae i win bakegen.” (Rev. 6:2) Man we i sidaon long waet hos ya hem i Jisas. Long 1914, hem “i putum gudfala hat blong flasem hem,” taem hem i kam King long Kingdom blong heven. Biaen, ‘hem i raed long hos i go blong faet blong i win bakegen.’ Yes, olsem Deved, Jisas i wan king we i win long faet. Smoltaem afta we God i putumap Jisas olsem King long Kingdom blong God, hem i faet wetem Setan mo i winim hem, ale i sakemaot hem wetem ol rabis enjel blong hem oli kamdaon long wol. (Rev. 12:7-9) Bambae hem i gohed blong raed long hos mo faet gogo kasem we hem “i win” fulwan, mo i spolem fulwan rabis wol blong Setan.—Ridim Revelesen 19:11, 19-21.

¹¹ Jisas i wan king we i gat sore, sem mak olsem Deved bifo, mo bambae hem i protektem “bigfala kampani” long taem blong Amagedon. (Rev. 7:9, 14, NW) Mo tu, aninit long rul blong Jisas mo ol 144,000 man we oli laef bakegen mo oli rul wetem hem, bambae “olgeta man we oli ded oli laef bakegen, ol man we oli stret, wetem ol man we oli no stret.” (Wok 24:15) Olgeta we oli laef bakegen long wol ya, bambae oli gat janis ya blong laef gogo i no save finis. !Hemia wan nambawan fiuja blong olgeta! I gud we yumi evriwan i gat strong tingting blong “mekem ol samting we i gud,” blong bambae yumi save stap laef taem wol ya i fulap wetem ol man we oli stret mo oli glad, ol man we oli stap aninit long rul blong Bigfala Deved.—Sam 37:27-29.

Solomon i Askem Waes Mo God i Ansa Long Prea Blong Hem

12. ?Solomon i prea from wanem samting?

¹² Boe blong Deved tu, Solomon, i pija blong Jisas. * Taem Solomon i kam king, Jeova i kamtru long hem long wan drim mo i talem se bambae Hem i givim eni samting we Solomon i askem. Solomon i save askem long God blong i givim plante moa sas samting, paoa, mo wan longfala laef long hem. Be Solomon i no tingbaot hem wan nomo. Defren  olgeta, hem i askem long Jeova se: “Plis, mi wantem blong yu givim waes mo save long mi, blong mi save rul long ol man ya long stret fasin. Sipos no, mi luk se bambae mi no save rul long olgeta.” (2 Kron. 1:7-10) Jeova i ansa long prea blong Solomon.—Ridim 2 Kronikel 1:11, 12.

13. ?Olsem wanem waes blong Solomon i bitim waes blong ol narafala man? ?Waes blong hem i kamaot long hu?

¹³ Taem Solomon i gohed blong stap tru long Jeova, i no gat wan narafala man long taem blong hem we i save talem ol waes tok olsem hem. Solomon i talemaot “tri taosen waes tok.” (1 King 4:30, 32, 34) Solomon i raetemdaon plante long ol waes tok ya, mo tede yet, olgeta we oli stap traem blong faenem waes, oli tinghae long ol waes tok ya. Kwin blong Seba i mekem wan trip blong 2,400 kilometa, blong “askem ol strong kwestin” long Solomon, blong traem waes blong hem. Kwin ya i sapraes tumas long ol tok blong Solomon mo long plante samting we kingdom blong hem i gat. (1 King 10:1-9) Baebol i soemaot hu i stamba blong waes ya we Solomon i kasem, i se: “Nao olgeta man long wol oli wantem kam harem ol waestok we God i givim long hem.”—1 King 10:24.

Folem King Ya We i Waes

14. ?Olsem wanem Jisas i “waes moa long King Solomon”?

¹⁴ I gat wan man nomo long wol ya we i waes moa i bitim Solomon. Hemia Jisas Kraes, we i tokbaot hem wan se hem i “waes moa long King Solomon.” (Mat. 12:42) Jisas i talem “ol tok blong laef ya we i no save finis.” (Jon 6:68) Olsem nao, Bigfala Toktok blong Jisas antap long Hil i ademap sam moa smosmol save mo stamba trutok, long sam waes tok blong Solomon. Solomon i tokbaot plante samting we oli mekem man we i wosipim Jeova i harem gud. (Prov. 3:13; 8:32, 33; 14:21; 16:20) Jisas i makem strong se trufala glad i kamaot from ol samting we oli joen wetem wosip blong Jeova mo ol promes blong God we oli stap kamtru. Hem i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud, from we God i King blong olgeta.” (Mat. 5:3) Olgeta we oli folem ol stamba trutok we oli kamaot long ol tijing blong Jisas long laef blong olgeta, oli stap klosap moa long God, we i “stamba blong laef.” (Sam 36:9; Prov. 22:11; Mat. 5:8) Kraes i soemaot “waes blong God.” (1 Kor. 1:24, 30) Jisas Kraes i Mesaea King mo hem i gat ‘spirit’ya we i “mekem hem i waes.”—Aes. 11:2.

15. ?Olsem wanem yumi save harem gud long waes blong God?

¹⁵ ?Olsem wanem yumi, we yumi folem Bigfala Solomon, yumi save harem gud long waes we i kamaot long God? Tok blong Jeova i soemaot waes blong Hem, from samting ya, yumi mas traehad blong fanem waes ya. Yumi mekem olsem taem yumi stadi gud long Baebol, antap moa ol tok blong Jisas, mo yumi tingting dip long ol samting we yumi ridim. (Prov. 2:1-5) Mo tu, yumi mas gohed blong askem waes long God. Tok blong God i mekem yumi sua se taem yumi prea wetem fulhat blong yumi blong askem spirit blong God blong i givhan long yumi, God bambae i ansa long yumi. (Jem. 1:5) Wetem help blong tabu spirit, bambae yumi faenem waes we i nambawan, we i kamaot long Tok blong God. Ol waes ya oli save givhan long yumi blong winim ol traem mo blong tekem ol desisen we oli waes. (Luk 11:13) Baebol i talem tu se Solomon i “man ya we i singaot ol man oli kam wanples,” mo i stap “tijim save tu long ol man oltaem.” (Pri. 12:9, 10, NW) Jisas tu, we i Hed blong Kristin kongregesen, i wan man we i singaot ol man blong hem oli kam wanples. (Jon 10:16; Kol. 1:18) Taswe, i gud we yumi joen long ol miting blong kongregesen, we long ples ya Jisas i ‘tijim yumi oltaem.’

16. ?Wanem samting long saed blong Solomon mo Jisas we i sem mak?

¹⁶ Solomon i wan king we i mekem plante wok. Hem i mekem plan blong bildim plante samting long kantri blong Isrel, i lukaot long wok blong bildim ol haos blong king, ol rod, ol rod blong wota, ol haos blong putum ol samting, ol haos blong putum ol samting blong faet, mo ol taon. Ol defren samting ya we hem i bildim, oli givhan long ful neson ya we hem i rul long hem. Jisas tu i wan man blong bildim ol samting. Hem i bildim kongregesen blong hem  antap long “ston.” (Mat. 16:18) Bambae hem i lukaot wok ya tu blong bildim ol samting long niufala wol.—Aes. 65:21, 22.

Folem King Blong Pis

17. (a) ?Wanem wan nambawan samting long rul blong Solomon? (b) ?Wanem samting we Solomon i no naf blong mekem?

¹⁷ Nem ya Solomon, i kamaot long wan tok we i minim “pis.” King Solomon i stap long Jerusalem mo i rul. Nem ya Jerusalem i minim “Ples Blong Pis We i Gat Tu Haf Blong Hem.” Long ol 40 yia we Solomon i rul, ful neson blong Isrel i stap long pis, hemia wan samting we i neva hapen bifo. Baebol i tokbaot ol yia ya, i se: “Oltaem long laef blong [Solomon] we hem i stap rul, ol man Juda mo ol man Isrel oli stap gud, i stat long Dan long not, i go kasem Bereseba long saot, mo evri famle oli save stap gud aninit long ol grep blong olgeta mo ol figtri blong olgeta.” (1 King 4:25) Be nating se Solomon i gat bigfala waes, hem i no naf blong mekem ol man blong hem oli kam fri long sik, sin, mo ded. Defren olgeta, Jisas we i Bigfala Solomon, hem bambae i mekem ol man blong hem oli fri long ol samting ya.—Ridim Rom 8:19-21.

18. ?Long Kristin kongregesen, wanem samting we i mekem yumi harem gud?

¹⁸ Tede tu, yumi gat pis insaed long Kristin kongregesen. Yes, yumi harem gud from we yumi gat pis wetem God mo wetem ol narafala, i olsem se yumi stap long wan trufala paradaes long saed blong spirit. Tingting gud long toktok we profet Aesea i talem long saed blong laef ya we yumi stap long hem tede: “Ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.” (Aes. 2:3, 4) Taem yumi letem spirit blong God i lidim yumi, yumi stap givhan blong mekem se pis ya i stap long kongregesen.

19, 20. ?Wanem ol samting we yumi save harem gud long olgeta?

¹⁹ Be long fiuja, laef bambae i gud moa. Taem ol man we oli obei long God oli harem gud long pis we bambae i stap aninit long rul blong Jisas, sloslo bambae oli “fri olgeta, we bambae oli no moa mekem sin,” gogo kasem we oli kam ol man we oli stretgud olgeta. (Rom 8:21) Long en blong Wan Taosen Yia Rul blong Kraes, taem oli gotru long laswan traem, “ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Sam 37:11; Rev. 20:7-10) !I tru nomo, rul blong Jisas Kraes bambae i bitim rul blong Solomon long plante rod we yumi no naf yet blong kasem save long olgeta!

²⁰ Olsem we ol man Isrel oli harem gud long taem we Moses, Deved, mo Solomon oli lidim olgeta, yumi tu bambae yumi harem gud moa aninit long rul blong Jisas. (1 King 8:66) !Yumi talem bigfala tangkiu long Jeova from we hem i yusum Pikinini blong hem, wan nomo we hem i gat, blong givhan long yumi! !Yes, Jisas nao hem i Bigfala Moses, Deved, mo Solomon!

[Ol futnot]

?Yu Yu Save Eksplenem?

• ?Long wanem rod Jisas i Bigfala Deved?

• ?Long wanem rod Jisas i Bigfala Solomon?

• ?Yu yu tinghae long wanem samting long saed blong Jisas, we i Bigfala Deved mo Bigfala Solomon tu?

[Kwestin]

[Tok blong pija long pej 30]

Waes we God i givim long Solomon i pija blong waes ya we Bigfala Solomon i gat

[Tok blong pija long pej 31]

!Rul blong Jisas bambae i bitim rul blong Solomon mo rul blong Deved long plante rod we yumi no naf yet blong kasem save long olgeta!