Luksave Jisas, Bigfala Moses

“Hae God ya i God blong yumi, mo hem bambae i putumap wan profet blong yufala olsem we i putumap mi. Profet ya bambae i wan long yufala. Yufala i mas lesin gud long olgeta tok we bambae hem i talem long yufala.”—WOK 3:22.

1. ?Olsem wanem Jisas i gat paoa long laef blong ol man long ol yia we oli pas finis?

TU TAOSEN yia bifo, wan pikinini boe i bon nao ol enjel long heven oli glad tumas, ale oli singsing blong presem God, mo sam man blong lukaot long ol sipsip oli harem singsing ya. (Luk 2:8-14) Toti yia biaen, pikinini ya we i kam bigman finis, i statem wan wok we i gohed blong tri yia haf nomo, be long ol yia we i kam biaen, wok ya i gat bigfala paoa long laef blong ol man. Philip Schaff, we i wan man blong raetem histri long ol yia 18 handred, i tokbaot yangfala man ya i se: “Hem i no raetem wan buk nating. Be plante buk, ol tok we ol lida blong skul oli givim, ol singsing, mo toktok, wetem ol sinema mo ol naes pija, oli stanap long ol wok mo ol tok blong hem. Ol samting we oli raetem long saed blong yangfala man ya oli plante moa i bitim ol samting we oli raetem long saed blong ol haeman blong bifo mo tede.” Yangfala man ya, hemia Jisas Kraes.

2. ?Aposol Jon i talem wanem long saed blong Jisas mo wok blong prij we hem i mekem?

² Aposol Jon i raetem wan buk long saed blong wok blong prij we Jisas i mekem, mo long en blong buk ya, hem i talem se: “I gat plante narafala samting we Jisas i mekem. Mo sipos ol man oli raetemdaon ol samting ya evriwan long ol buk, mi mi ting se bambae i no gat i naf rum long wol ya blong holem ol buk ya.” (Jon 21:25) Jon i save se hem i naf blong raetem wan smol haf nomo blong olgeta samting we Jisas i talem mo mekem long ol tri yia haf ya. Nating se i olsem, ol stori ya blong bifo we Jon i raetem long Gospel blong hem, oli nambawan tumas.

3. ?Olsem wanem yumi save kasem save moa long wok we Jisas i mekem long stamba tingting blong God?

³ Ol stori we oli stap long ol fofala Gospel oli impoten tumas, be i gat sam narafala stori long Baebol tu we oli soemaot sam smosmol save long laef blong Jisas, we oli save mekem bilif blong yumi i strong. Olsem nao, Baebol i tokbaot stori blong sam man blong God we oli laef bifo long taem blong Jisas. Long ol stori ya, i gat sam save we oli givhan long yumi blong kasem save moa long wok we Jisas i mekem blong stamba tingting blong God i kamtru. I gud yumi tokbaot sam long ol man ya.

Ol Man Blong God Bifo We Oli Pija Blong Jisas

4, 5. ?Hu olgeta we oli pija blong Jisas? ?Long wanem rod oli pija blong Jisas?

⁴ Jon mo trifala narafala man blong raetem Gospel, oli tokbaot Moses, Deved, mo Solomon se oli pija blong Jisas, Man ya we God i Makemaot hem mo man ya we God i jusumaot hem blong i King. ?Olsem wanem ol man ya blong God bifo oli soemaot sam save long saed blong Jisas? ?Wanem samting we yumi save lanem long stori blong olgeta?

⁵ Baebol i talem se Moses i wan profet, hem i man we God i yusum blong karem loa i go long ol man, mo i wan man blong sevem man. Jisas tu i mekem ol wok ya. Deved i wan man blong lukaot long sipsip mo hem i wan king we i winim ol enemi blong Isrel. Jisas tu i wan man blong lukaot sipsip mo i wan king we i win long faet. (Esik. 37:24, 25) Taem Solomon i stap fasgud yet long God, hem i wan king we i waes, mo aninit long rul blong hem, ol man Isrel oli harem gud long pis. (1 King 4:25, 29) Jisas tu i gat bigfala waes mo Baebol i singaot hem se “Pikinini ya blong King, we Hem i Stamba blong Pis.” (Aes. 9:6) I klia se wok we Jisas i mekem i sem mak long wok we ol man ya bifo oli bin mekem, be ples we Jisas i gat long stamba tingting blong God, i hae moa. Fastaem, i gud yumi skelem wok blong Jisas wetem wok blong Moses, mo yumi luk olsem wanem samting ya i save givhan long yumi blong kasem save moa long wok we Jisas i mekem long stamba tingting blong God.

Moses—Wan Man We i Mekem Rere Rod Blong Jisas

6. ?Olsem wanem aposol Pita i eksplenem se i impoten blong lesin long Jisas?

⁶ Long yia 33 K.T., * smoltaem afta long dei blong Pentekos, aposol Pita i talem wan profet tok blong  Moses we i kamtru long saed blong Jisas. Pita i stap stanap long fored blong wan bigfala hip blong ol man Jiu we oli stap wosip long haos blong God. Ol man ya “oli sapraes tumas” taem oli luk we Pita mo Jon tufala i mekem leg blong wan man i kamgud bakegen, ale oli resis i kam blong luk. Man ya i no save wokbaot from we leg blong hem i nogud finis taem hem i bon i kam, ale hem i stap asaskem mane long ol man. Pita i eksplenem se Jisas nao i mekem merikel ya tru long paoa blong tabu spirit blong Jeova. Biaen, hem i talem tok we i stap long Hibru haf blong Baebol, i se: “Moses i talem se, ‘Hae God ya i God blong yumi, mo hem bambae i putumap wan profet blong yufala olsem we i putumap mi. Profet ya bambae i wan long yufala. Yufala i mas lesin gud long olgeta tok we bambae hem i talem long yufala.’”—Wok 3:11, 22, 23; ridim Dutronome 18:15, 18, 19.

7. ?From wanem ol man we oli lesin long Pita oli kasem save long tok we hem i talem long saed blong wan profet we i hae moa long Moses?

⁷ Ol man we oli lesin long Pita oli savegud ol tok ya blong Moses. Olgeta ya oli man Jiu mo oli tinghae long Moses. (Dut. 34:10) Oli wantem tumas blong luk profet ya we i hae moa long Moses, mo oli stap wet blong hem i kamtru. Profet ya bambae i wan mesaea, wan we God i makemaot hem olsem i bin makemaot Moses. Be tu, profet ya bambae hem i Mesaea ya “we God i jusumaot hem.”—Luk 23:35; Hib. 11:26.

Ol Samting Long Saed Blong Jisas Mo Moses We Oli Sem Mak

8. ?Wanem sam samting long laef blong Moses mo Jisas we oli sem mak?

⁸ Sam samting long laef blong Jisas taem hem i stap long wol, i sem mak long laef blong Moses. Tingbaot, taem Moses mo Jisas tufala i bebi yet, tufala i mas ronwe long wan king we rul blong hem i strong tumas, sipos no bambae tufala i ded. (Eks. 1:22–2:10; Mat. 2:7-14) Mo tu, God i “singaot” tufala “oli aot long Ijip i kam.” Profet Hosea i talem se: “Ol laen blong Isrel. Bifo, taem ol bubu blong yufala oli olsem smol pikinini yet, mi mi lavem olgeta tumas. Mi mi stap singaot olgeta, se ‘Pikinini blong mi’, mo mi singaot olgeta oli aot long Ijip i kam.” (Hos. 11:1) Taem Hosea i talem tok ya, hem i stap tokbaot taem ya we God i yusum Moses olsem wan lida we hem i putumap, blong lidim neson blong Isrel i aot long Ijip. (Eks. 4:22, 23; 12:29-37) Be ol tok ya blong Hosea oli no jes tokbaot ol samting we oli hapen finis bifo. Hem i stap tokbaot ol samting we bambae oli kamtru plante yia biaen tu. Tok ya blong hem i wan profet tok we i kamtru taem Josef mo Meri tufala i kambak long Ijip wetem Jisas, afta we King Herod i ded.—Mat. 2:15, 19-23.

9. (a) ?Wanem ol merikel we Moses mo Jisas oli mekem? (b) Talem sam narafala samting long saed blong Jisas mo Moses, we oli sem mak. (Lukluk bokis ya  “Sam Narafala Samting Long Saed Blong Jisas Mo Moses We Oli Sem Mak,” long pej 25.)

⁹ Moses mo Jisas, tufala tugeta i mekem ol merikel we i soemaot se Jeova i stap givhan long tufala. Folem Baebol, Moses i faswan man long wol we i mekem merikel. (Eks. 4:1-9) Tingbaot ol merikel we Moses i mekem wetem wota. Taem Moses i toktok, ol wota long Nael Reva wetem ol raonwota mo ol narafala wota long ples ya oli kam blad, Solwota blong Red Si i seraot long tu haf, mo wota i kamaot long ston long draeples. (Eks. 7:19-21; 14:21; 17:5-7) Jisas tu i mekem ol merikel wetem wota. Faswan merikel we hem i wokem, hem i jenisim wota i kam waen long wan lafet blong mared. (Jon 2:1-11) Biaen, hem i kwaetem wota blong bigfala lugun blong Galili we i raf we i raf. !Mo wan taem, hem i wokbaot antap long wota! (Mat. 8:23-27; 14:23-25) Yu save luk sam narafala samting we oli sem mak long saed blong Moses mo Bigfala Moses ya, Jisas, long bokis long pej 26.

Luksave Jisas Olsem Wan Profet

10. ?Wanem wok blong wan trufala profet? ?From wanem Moses i wan trufala profet?

¹⁰ Plante man oli ting se wan profet i wan man we i talemaot samting we bambae i kamtru long fiuja, be hemia i wan smolhaf nomo blong ol wok we wan profet i mas mekem. Wan trufala profet i wan man we Jeova i yusum blong talemaot ol tok blong Hem, hem i wan man we i talemaot “ol bigbigfala wok ya we God i mekem.” (Wok 2:11, 16, 17) Hem i save talemaot plante defdefren samting, olsem i talemaot profet tok blong ol samting we bambae oli kamtru long fiuja, i talemaot sam samting we i joen wetem stamba tingting blong God, mo i talemaot jajmen blong God tu. Moses i wan profet olsem. Bifo we wanwan long ol Ten Trabol i kasem Ijip, Moses i talemaot finis wanwan long olgeta. Long hil ya Sinae, hem i talemaot kontrak blong Loa long ol man Isrel. Mo hem i tijim neson blong Isrel blong oli folem ol samting we God i wantem. Nating se i olsem, wan narafala profet bambae i kamtru biaen, we i hae moa long Moses.

11. ?Olsem wanem Jisas i mekem wok olsem wan profet we i hae moa long Moses?

 ¹¹ Biaen, long faswan handred yia B.K.T., * Sekaraea i mekem wok olsem wan profet taem hem i talemaot stamba tingting we God i gat long saed blong boe blong hem, Jon. (Luk 1:76) Sam yia biaen, boe ya i kam Jon Baptaes, mo hem i talemaot se Jisas Kraes, profet ya we i hae moa long Moses mo we ol man oli stap wet long hem, bambae i kamtru. (Jon 1:23-36) Jisas i wan profet we i talemaot plante samting we bambae oli kamtru long ol yia afta. Tingbaot, hem i talemaot prapa ded blong hem, i talemaot olsem wanem bambae hem i ded, weples bambae hem i ded, mo hu olgeta we bambae oli kilim hem i ded. (Mat. 20:17-19) Jisas i bin talemaot tu se bambae Jerusalem wetem haos tempol blong hem oli lus, mo ol man oli sapraes taem oli harem samting ya. (Mak 13:1, 2) Hem i talem ol profet tok we oli stret tu long taem blong yumi tede.—Mat. 24:3-41.

12. (a) ?Olsem wanem Jisas i stanemap fandesen blong wok blong prij long fulwol? (b) ?From wanem tede yumi folem eksampol blong Jisas?

¹² Antap long wok blong profet, Jisas i wan man blong prij mo i wan tija. Hem i prij blong talemaot gud nius blong Kingdom blong God. Hem i no fraet nating blong toktok, mo i no gat man we i save mekem olsem hem. (Luk 4:16-21, 43) Taem hem i tij, i no gat man we i save tij olsem hem. Samfala man we oli lesin long hem, oli talem se: “!I no gat man we i save tok olsem man ya samtaem!” (Jon 7:46) Jisas i wok strong long wok ya blong talemaot gud nius, mo eksampol blong hem i pulum ol man we oli biaen long hem, blong oli wok strong tu long ol wok blong  Kingdom. Long rod ya, hem i stanemap fandesen blong wok ya blong prij mo tij we i gohed long fulwol, mo wok ya i stap gohed yet tede. (Mat. 28:18-20; Wok 5:42) Long las yia, i gat samwe seven milian man we oli biaen long Kraes, mo oli spenem samwe long 1,500,000,000 aoa long wok ya blong talemaot gud nius blong Kingdom mo tijim trutok blong Baebol long ol man we oli intres. ?Olsem wanem long yu? ?Yu tu yu mekem bes blong yu blong joen oltaem long wok ya?

13. ?Wanem bambae i givhan long yumi blong “yumi wekap”?

¹³ I kliagud se promes ya blong Jeova blong leftemap wan profet we i olsem Moses, i kamtru. ?Olsem wanem save ya i gat paoa long yu? ?Hem i mekem se yu yu trastem moa ol profet tok we oli tokbaot ol samting we bambae oli kamtru i no longtaem? Yes, taem yumi tingting dip long eksampol blong Bigfala Moses, hemia i pulum yumi blong “yumi wekap, we hed blong yumi i klia gud,” blong yumi tingbaot ol samting we klosap nao bambae God i mekem.—1 Tes. 5:2, 6.

Tinghae Long Kraes Olsem Man Blong Karem Loa i Go Long Ol Man

14. ?Olsem wanem God i yusum Moses blong toktok wetem ol man Isrel?

¹⁴ Olsem Moses, Jisas tu i wan man blong karem Loa i go long ol man. Taem Jeova i stanemap kontrak blong Loa wetem neson blong Isrel, hem i yusum Moses blong toktok wetem olgeta. Sipos ol pikinini blong Jekob oli obei long ol loa blong God, bambae oli gohed blong stap olsem ol nambawan man blong hem, wan kongregesen blong hem. (Eks. 19:3-8) Kontrak blong Loa ya i stat blong wok long yia 1513 B.K.T. mo i go kasem faswan handred yia K.T.

15. ?Olsem wanem Jisas i wan man blong karem Loa we i hae moa long Moses?

¹⁵ Long yia 33 K.T., Jeova i stanemap wan kontrak we i gud moa wetem wan niufala Isrel, hemia “Isrel blong God.” Niufala Isrel ya i kam wan kongregesen blong ol Kristin we tabu spirit i makemaot olgeta, we i stap long fulwol. (Gal. 6:16, NW) Taem God i yusum Moses blong karem Loa blong Hem long ol man Isrel, Hem i raetem Loa ya long ston, be Loa ya we Jisas i givimaot long “Isrel blong God” i hae moa long Loa blong Moses. Loa ya, God i raetemdaon long hat blong ol man. (Ridim 1 Timoti 2:5; Hibrus 8:10.) Long rod ya, “Isrel blong God” i kam ol nambawan man blong God, ‘wan neson we i karem frut’ blong Kingdom blong Mesaea. (Mat. 21:43, NW) Ol memba blong neson ya long saed blong spirit, oli stap insaed long niufala kontrak ya. Be kontrak ya i givhan long sam narafala man tu. Wan bigfala hip blong man we yumi no save kaontem olgeta, wetem olgeta ya tu we oli stap slip yet long ded, bambae oli kasem ol blesing blong olwe we oli kamaot from nambawan kontrak ya.

Tinghae Long Kraes Olsem Man Blong Sevem Man

16. (a) ?Olsem wanem Jeova i yusum Moses blong sevem ol man Isrel? (b) ?Folem Eksodas 14:13, hu i Stamba blong sevem man?

¹⁶ Long laswan naet bifo we ol man Isrel oli aot long Ijip, sam long ol pikinini blong olgeta oli stap long wan bigfala denja. Klosap nao enjel blong God bambae i pastru long Ijip, blong kilim olgeta fasbon pikinini blong olgeta. Jeova i talem long Moses se olgeta fasbon blong Isrel bambae oli sef nomo sipos ol man Isrel oli tekem blad blong sipsip we oli kilim blong mekem lafet blong Pasova, mo oli ravem long tufala pos blong doa blong olgeta. (Eks. 12:1-13, 21-23) Mo samting ya i kamtru stret olsem Jeova i talem. Biaen, ful neson blong Isrel oli stap long wan bigfala denja, oli fas long wan trap. Oli stap long wan ples we, long fored blong olgeta i gat solwota blong Red Si, mo biaen long olgeta, i gat ol kat blong faet blong ol man Ijip. Long taem ya bakegen, Jeova i yusum Moses blong sevem olgeta. Moses i mekem wan merikel nao solwota ya i seraot long tu haf.—Eks. 14:13, 21.

 17, 18. ?Olsem wanem Jisas i man blong sevem man we i hae moa long Moses?

¹⁷ Ol wok ya we Moses i mekem blong sevem ol man Isrel, oli bigwan tumas. Nating se i olsem, wok we Jeova i mekem blong sevem ol man tru long Jisas, i bigwan moa. Jisas nao i rod ya blong sevem ol man we oli obei long God, blong oli kam fri from ol sin blong olgeta. (Rom 5:12, 18) Mo taem oli kam fri, oli “fri gogo i no save finis.” (Hib. 9:11, 12) Nem ya Jisas i minim “Jeova i Sevem Ol Man.” Jisas we i olsem Man blong Sevem yumi, no Sevia blong yumi, i mekem  yumi fri from ol sin we yumi bin mekem bifo. Mo tu, hem i openem rod blong yumi gat wan gudfala fiuja we yumi save harem gud long hem. Taem Jisas i mekem ol man we oli biaen long hem, oli kam fri from sin blong olgeta, hem i sevem olgeta long kros blong God mo hem i givhan long olgeta blong oli gat wan gudfala fasin fren wetem Jeova.—Mat. 1:21.

¹⁸ Rod ya we Jisas i mekem blong tekemaot sin, i mekem se long stret taem blong hem, ol trabol we oli kamaot from sin, olsem sik mo ded tu, bambae oli finis olgeta. Blong kasem save long samting ya, tingbaot wanem samting i hapen taem Jisas i go long haos blong wan man we nem blong hem Jaeras. Gel blong Jaeras we i gat 12 yia blong hem, i ded. Jisas i toktok gud long Jaeras i se: “Yu no harem nogud. Yu bilif long mi nomo, nao gel blong yu bambae i oraet [“sef,” NW].” (Luk 8:41, 42, 49, 50) !Stret olsem we Jisas i talem, gel ya i laef bakegen! ?Yu yu save tingbaot glad we papa mama blong gel ya oli kasem? Sipos yes, yu yu naf blong tingbaot glad ya we i bigwan olgeta, we yumi save kasem taem “ol dedman bambae oli harem voes blong [Jisas], nao bambae oli aot long beregraon blong olgeta.” (Jon 5:28, 29) !Yes, Jisas i rili Man blong Sevem man, hem i Sevia blong yumi!—Ridim Ol Wok 5:31; Taet. 1:4; Rev. 7:10.

19, 20. (a) ?Taem yumi tingting dip long wok we Jisas, Bigfala Moses, i mekem, olsem wanem samting ya i save gat paoa long yumi? (b) ?Nekis stadi bambae i tokbaot wanem?

¹⁹ Yumi save se Jeova i save yusum yumi blong givhan long ol man, blong oli kasem gudfala samting from wok ya we Jisas i mekem blong sevem ol man. Samting ya i mas pusum yumi blong joen long wok blong prij mo tijim ol man. (Aes. 61:1-3) Mo tu, taem yumi tingting dip long wok we Bigfala Moses ya, Jisas, i mekem, bambae yumi trastem moa se hem i save sevem ol man blong hem taem bambae hem i kam blong mekem jajmen blong God i kamtru long ol rabis man.—Mat. 25:31-34, 41, 46; Rev. 7:9, 14.

²⁰ Yes, Jisas i Bigfala Moses ya. Hem i mekem plante nambawan samting we Moses i neva save mekem. Ol tok we Jisas i talem olsem wan profet, mo ol wok we hem i mekem olsem man blong karem Loa, oli gat paoa long laef blong olgeta man long wol. Olsem wan Sevia, Jisas i no sevem ol man blong smoltaem nomo, be hem i sevem olgeta blong olwe. Be ol stori blong ol man blong God bifo oli soemaot plante moa samting we yumi save lanem long saed blong Jisas. Nekis stadi bambae i tokbaot olsem wanem Jisas i Bigfala Deved mo Bigfala Solomon.

[Ol futnot]

?Yu Yu Save Eksplenem?

?Olsem wanem Jisas i hae moa long Moses taem hem i wok olsem

• wan profet?

• man blong karem Loa?

• wan Sevia?

[Kwestin]

[Bokis/Foto blong pija long pej 25]

Sam Narafala Samting Long Saed Blong Jisas Mo Moses We Oli Sem Mak

◻ Tufala tugeta i lego hae posisen we tufala i bin gat, blong tufala i save mekem wok blong Jeova mo ol man blong hem.—2 Kor. 8:9; Fil. 2:5-8, NW; Hib. 11:24-26.

◻ Tufala tugeta i wok olsem ‘kraes’ no man we God i makemaot—Mak 14:61, 62; Jon 4:25, 26; Hib. 11:26.

◻ Tufala tugeta i wok long nem blong Jeova.—Eks. 3:13-16; Jon 5:43; 17:4, 6, 26.

◻ Tufala tugeta i gat tingting daon.—Nam. 12:3; Mat. 11:28-30.

◻ Tufala tugeta i givim kakae long bigfala hip blong man.—Eks. 16:12; Jon 6:48-51.

◻ Tufala tugeta i wok olsem jaj mo man blong givim Loa.—Eks. 18:13; Mal. 4:4; Jon 5:22, 23; 15:10.

◻ God i givim wok long tufala tugeta blong oli lidim ol man blong God.—Nam. 12:7; Hib. 3:2-6.

◻ Baebol i tokbaot tufala tugeta se tufala i witnes blong Jeova.—Hib. 11:24-29; 12:1; Rev. 1:5.

◻ Afta we Moses mo Jisas i ded, God i haedem bodi blong tufala.—Dut. 34:5, 6; Luk 24:1-3; Wok 2:31; 1 Kor. 15:50; Jud 9.