Ol Samting We Jeova i Wokem Oli Soemaot Waes Blong Hem

‘Yumi no save luk ol fasin ya blong hem stret long ae blong yumi. Be hem i bin mekem ol fasin ya blong hem oli klia, blong yumi luk, long ol samting blong wol ya we hem i bin mekem.’—ROM 1:20.

1. ?Waes blong wol i mekem wanem long plante man tede?

TEDE plante man oli yusum tok ya “waes” blong talem eni samting, we maet i no trufala waes tu. Samfala oli talem se wan man i waes sipos hem i gat save long plante samting. Be ol man ya we wol i talem se oli waes, oli no naf blong givim advaes we man i save trastem blong faenem trufala mining blong laef. Defren olgeta, taem ol man oli folem waes blong olgeta ya, oli olsem “kenu we solwota i stap sakem i go olbaot, mo win i stap karem i go,” from we ‘ol giaman tijing blong ol man ya i stap lidim olgeta oli go krangke.’—Efes. 4:14.

2, 3. (a) ?From wanem Jeova, “hem nomo i waes gud”? (b) ?Olsem wanem waes we i kamaot long God i defren long waes blong man?

² Ol man we oli kasem trufala waes oli no olsem ol man blong wol ya, from we Jeova i stamba blong trufala waes ya we oli kasem. Baebol i talem se Jeova, “hem nomo i waes gud.” (Rom 16:27) Jeova i gat save long evri samting long saed blong heven mo wol, hem i save olsem wanem blong wokem ol samting ya mo wanem histri blong olgeta. Olgeta samting raonabaot long yumi oli gat loa we i bos long olgeta, mo ol man oli nidim ol loa ya taem oli wantem faenemaot moa save long wan samting. Jeova nao i wokem ol loa ya. Taswe taem ol man oli wokem wan niu samting wetem save blong olgeta, Jeova i no sapraes long samting ya. Mo hem i no intres blong faenemaot moa long saed blong save blong ol man, we oli ting se save blong olgeta i hae. “Olgeta fasin we ol man blong wol oli stap talem se oli waes, be long fes blong God oli krangke nomo.”—1 Kor. 3:19.

³ Baebol i talem se Jeova ‘i save mekem ol man blong hem oli waes.’ (Prov. 2:6) Waes we God i givim i no olsem waes blong man we i no suagud. Waes we i kamaot long God i pulum man blong skelem mo luksave samting we i stret long samting we i no stret. Waes ya i stanap long save we i stret, mo hem i minim tu se man i naf blong kasem save trufala mining blong ol samting. (Ridim Jemes 3:17.) Aposol Pol i sapraes tumas long waes blong Jeova. Hem i raetem se: “!Tru! !Ol gudgudfala fasin blong God, waes mo save blong hem, oli dip tumas, oli bitim mak! !Man i no naf blong skelem ol jajmen blong hem, mo i no naf blong faenemaot ol rod blong hem!” (Rom 11:33, NW) From we Jeova i waes olgeta, yumi trastem se ol loa blong hem oli stretgud blong lidim yumi blong yumi gat wan gudfala laef. Yes i tru, Jeova i save gud moa i bitim eni narafala man, wanem samting we yumi nidim blong yumi save harem gud.—Prov. 3:5, 6.

Jisas—‘Nambawan Man Blong Wok Blong God’

4. ?Wanem wan rod blong luk we Jeova i waes?

⁴ Taem yumi luk ol samting we Jeova i wokem,  yumi luk we Jeova i waes, mo yumi luk plante narafala nambawan fasin blong hem tu. (Ridim Rom 1:20.) Olgeta wok blong Jeova, stat long hemia we i bigbigwan i go kasem hemia we i smol olgeta, oli soemaot sam samting long saed blong fasin blong Jeova. Sipos yumi lukluk long ol samting antap long heven no aninit long graon, bambae yumi faenem plante plante pruf se i gat wan God i stap we hem i Wokem evri samting, we hem i waes olgeta mo we i gat lav. Yumi save lanem fulap samting long saed blong Jeova sipos yumi tingting smol long ol samting ya we hem i wokem.—Sam 19:1; Aes. 40:26.

5, 6. (a) ?Hu i joen tu long wok blong mekem evri samting wetem Jeova? (b) ?Bambae yumi tokbaot wanem long stadi ya, mo from wanem?

⁵ Taem Jeova i “mekem skae mo graon” hem i no stap hem wan nomo. (Jen. 1:1) Baebol i soemaot se longtaem bifo we God i wokem olgeta samting we i stap, hem i wokem wan spirit man, ale hem wetem spirit man ya, tufala tugeta i wokem “olgeta narafala samting.” Spirit man ya, hem i stret Pikinini blong God, wan nomo we hem i gat. Hem i “fasbon long ol samting we God i wokem.” Hem nao we biaen i kam man ya Jisas we i bin laef long wol. (Kol. 1:15-17, NW) Jisas i gat waes olsem Jeova. Proveb japta 8 i tokbaot Jisas se hem i olsem waes fasin stret. Japta ya long Baebol i tokbaot Jisas tu se hem i olsem “nambawan man blong wok” blong God.—Prov. 8:12, 22-31, NW.

⁶ Taswe ol samting raonabaot long yumi we yumi save luk, oli soemaot waes blong Jeova mo blong Jisas tu, we i Nambawan Man blong Wok blong God. I gat plante lesen we yumi save lanem long ol samting ya raonabaot long yumi. I gud naoia yumi tokbaot fo samting we God i wokem we Ol Proveb 30:24-28 i tokbaot se “oli waes we i waes.” *

Wan Lesen Blong Fasin Blong Wok Strong

7, 8. ?Wanem save long saed blong anis we yu yu sapraes long hem?

⁷ Taem yumi lukluk ol samting we God i wokem se oli olsem wanem mo olsem wanem oli wok, yumi save lanem plante samting nating we sam long ol samting ya oli “smosmol nomo.” Tingbaot waes blong wan long ol smosmol samting ya, hemia anis.—Ridim Ol Proveb 30:24, 25.

⁸ Sam man we oli stadi long saed blong ol anis oli talem se namba blong ol anis i 200,000 taem moa bigwan i bitim namba blong ol man. Ol anis oli bisi tumas blong mekem wok antap mo aninit long graon. Ol anis oli laef long ol grup olsem ol komuniti, mo long bighaf blong ol komuniti blong olgeta i gat tri kaen anis i stap. I gat kwin, ol man anis, mo ol wokman. Wanwan long trifala kaen anis ya i gat wok blong hem blong mekem blong lukaot long evriwan insaed long komuniti blong olgeta. Wan anis long  Saot Amerika, we oli kolem anis we i stap katem lif, hem i gat fasin olsem wan gudfala man blong wokem garen. Smol anis ya i stap wokem wan garen blong nalumlum aninit long graon. Hem i save putum gudfala graon i go raon long nalumlum ya, i save katemaot sam haf blong nalumlum ya blong go planem long narafala ples, i save katkatem ol gru blong nalumlum ya tu blong mekem we nalumlum ya i karem moa kakae. Ol man we oli wajem fasin blong smol anis ya we i gat gudhan blong wokem garen, oli talem se hem i save gud olsem wanem blong skelem ol kakae long garen blong hem blong mekem we i gat inaf kakae blong fidim olgeta anis long komuniti blong hem. *

9, 10. ?Olsem wanem yumi save folem fasin blong anis blong wok strong?

⁹ ?Yumi save lanem wanem long fasin blong ol anis? Yumi lanem se yumi mas wok had sipos yumi wantem we wok blong yumi i karem gudfala frut. Baebol i talem se: “I moa gud ol lesman oli lanem fasin blong anis. Ol anis oli no gat lida, no jif, no gavman blong olgeta, be long gudtaem, oli stap putumgud kakae blong olgeta i stap rere, blong oli save kakae long hadtaem.” (Prov. 6:6-8) Jeova mo Jisas we i Nambawan Man blong Wok blong God, tufala tugeta oli man blong wok. Jisas i talem se: “Oltaem Papa blong mi i stap wok, mo mi tu mi mas wok.”—Jon 5:17.

¹⁰ I gud yumi folem fasin blong God mo Kraes, mo yumi tu yumi wok had. Nomata wanem wok we yumi gat insaed long ogenaesesen blong God, yumi evriwan i mas “wok strong long ol wok ya blong Masta blong yumi.” (1 Kor. 15:58) Taswe i gud yumi folem advaes ya we Pol i givim long ol Kristin long Rom se: “Yufala i mas wok had, i nogud yufala i stap les. Mo yufala i mas mekem wok blong Masta blong yumi, we tingting blong yufala i glad long hem oltaem.” (Rom 12:11) Ol traehad we yumi mekem long wok blong Jeova oli no blong nating, from we Baebol i promes se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.”—Hib. 6:10.

Blokem Samting We i Save Spolem Fasin Fren Blong Yumi Wetem Jeova

11. Tokbaot sam samting long saed blong baja.

¹¹ Wan narafala smol anamol, hemia baja. Anamol ya tu i save tijim sam impoten samting long yumi. (Ridim Ol Proveb 30:26.) Baja i olsem rabet lelebet, be i bigwan moa, sora blong hem i raon mo i sot mo leg blong hem tu, i sot nomo. Anamol ya i laef long ol ples blong ston. From we anamol ya i save luklukgud ol samting, hem i save luk kwiktaem we trabol i kam, mo from we hem i laef long ples blong ston, i gat plante hol insaed long ston we hem i save go haed long hem taem narafala anamol i wantem kakae hem. Ol baja oli laef wanples long wan komuniti, samting ya i mekem se oli save givgivhan long olgeta long taem blong trabol, mo i mekem we oli save stap wom long kolkol taem. *

12, 13. ?Wanem lesen we yumi save lanem long anamol ya baja?

¹² ?Yumi save lanem wanem long fasin blong anamol ya baja? Faswan samting, yumi luk we i no isi blong narafala anamol i kasem hem. From we hem i save luklukgud ol samting, hem i save luksave denja taem i stap farawe yet, mo hem i stap klosap long ples we i gat ol hol blong ston we hem i save go haed long hem. Long sem fasin, tingting blong yumi i mas klia gud blong luksave denja we i stap long wol blong Setan. Aposol Pita i givim advaes long ol Kristin se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.” (1 Pita 5:8) Taem Jisas i stap long wol, hem i lukaotgud, oltaem hem i rere blong blokem ol samting we Setan i save mekem blong tekemaot hem long Jeova. (Mat. 4:1-11) !Jisas i wan gudfala eksampol we ol man blong hem oli save folem!

¹³ Wan rod blong lukaotgud hemia blong yusum ol samting we Jeova i givim blong protektem yumi. Yumi no mas ting nating long fasin blong stadi long Tok blong God mo blong kam long ol miting. (Luk 4:4; Hib. 10:24, 25) Olsem baja we i laef long komuniti, yumi tu yumi mas joen wetem ol Kristin brata sista blong yumi blong ‘bambae bilif blong olgeta i save givhan long yumi, olsem we bilif blong yumi i save givhan long olgeta.’ (Rom 1:12) Taem yumi yusum ol samting we Jeova i givim blong protektem yumi, yumi soem se yumi agri wetem toktok we Deved i raetem long Ol Sam se: “Hae God [“Jeova,” NW] i God blong mi. Hem i wan gudfala ples blong haed blong mi, mo hem i stap lukaot gud long mi. Hem i stap  blokemgud mi, mo i wan strong sefples blong mi.”—Sam 18:2.

Gohed Strong Nating Se Man i Agensem Yumi

14. ?Nating se wan lokis i no save mekem yumi fraet, olsem wanem long wan hip lokis taem oli flae wanples?

¹⁴ Yumi save lanem samting tu long anamol ya lokis. Wan lokis we i longfala olsem 5 sentimeta, maet i no save mekem yumi fraet, be taem plante taosen lokis oli hivap wanples oli stap flae i kam, ating man i save fraet. (Ridim Ol Proveb 30:27.) Ol smosmol bebet ya oli save kakae bigwan. Taswe taem wan bigfala hip blong olgeta i kamtru long wan bigfala garen, kwiktaem nomo oli save kakae flatem evri samting. Baebol i tokbaot noes we ol bebet olsem lokis oli save mekem taem oli flae wanples, se i sem mak long noes blong plante kat blong faet mo olsem noes blong faea we i stap bonem waetgras. (Joel 2:3, 5) Ol man oli laetem ol bigfala faea blong kilim ol hip lokis ya i ded be oli no save winim. ?From wanem? From we ded bodi blong ol lokis i kilim faea ya i ded, mekem se ol narafala lokis oli save gohed nomo blong flae i go. Oli no gat king no lida, be oli muf i go olsem wan ami we i gat plan blong hem, mo ami ya i save winim eni samting we i traem blokem hem. *—Joel 2:25.

15, 16. ?Olsem wanem ol man blong talemaot Kingdom long taem blong yumi oli sem mak long wan hip lokis?

¹⁵ Profet Joel i talem se wok we ol man blong Jeova oli mekem i sem mak long ol lokis. Hem i raetem se: “Oli ron olsem ol man we oli gat paoa. Oli klaem i go antap long ol stonwol olsem ol man blong faet. Mo evriwan oli stap go long prapa rod blong olgeta, mo oli no jenisim rod blong olgeta. Mo oli no stap puspusum olgeta. Oli stap gohed nomo olsem wan strong man. Mo sipos ara i kilim sam long olgeta oli foldaon, ol narafala oli no stop long resis blong olgeta.”—Joel 2:7, 8, NW.

¹⁶ !Profet tok ya i eksplenem gud wok we ol man blong talemaot Kingdom blong God oli mekem long taem blong yumi! Nating se ol man oli agensem olgeta olsem we oli traem putum wan “stonwol” blong blokem olgeta, be bambae oli no save stopem wok blong prij we oli stap mekem. Ol man blong talemaot Kingdom oli folem fasin blong Jisas, we hem i gohed strong blong mekem ol samting we God i wantem, nating se plante man oli no laekem hem nating. (Aes. 53:3) I tru, i gat sam Kristin  we oli ded from bilif blong olgeta, i olsem we ‘ara i kilim olgeta oli foldaon.’ Nating se i olsem, wok blong prij i gohed nomo, mo namba blong ol man blong talemaot Kingdom i gohed blong kam bigwan moa. Blong talem stret, plante taem ol trabol ya we man i mekem blong agensem gud nius, oli mekem gud nius i go kasem plante moa man, we maet oli no save harem nius ya blong Kingdom sipos i no bin gat trabol olsem. (Wok 8:1, 4) ?Taem yu yu mekem wok blong prij, yu gat fasin olsem lokis? ?Yu gohed strong long wok ya nating se ol man oli no wantem save long gud nius, mo oli agensem yu bigwan?—Hib. 10:39.

“Holemstrong Ol Gudfala Fasin”

17. ?Olsem wanem lised ya bigae i save wokbaot long siling we i smut mo narafala samting be i no foldaon?

¹⁷ Smol lised ya bigae i save wokbaot i go long eni ples be i no foldaon. (Ridim Ol Proveb 30:28.) Ol man blong saens oli sapraes tumas long smol anamol ya we i save resis i go antap long wan wol, i krosem siling nating se siling ya i smut olsem wanem, be i no glis mo i no foldaon nating. ?Bigae i mekem samting ya olsem wanem? Hem i no gat wan spesel samting olsem glu. Nogat. Aninit long wanwan smol fingga long leg blong bigae i gat ol laen, mo insaed long wanwan laen ya i gat plante handred samting olsem hea. Wanwan smosmol hea ya i luk olsem brum we i gat klosap 2,000 hea bakegen long hem we en blong olgeta i raon. Wan paoa we oli kolem intermolecular force, i kamaot long ol smosmol hea ya mo i strong naf blong holem bodi blong bigae i stap hang long enikaen siling nomo nating se i glas tu. Paoa ya i strong naf blong holem samting we i bigwan moa i bitim bigae tu. Ol man oli sapraes long fasin ya blong bigae, ale oli traem wokem sam samting we i sem mak long leg blong hem. Oli wokem ol samting olsem plasta we i save fas long skin nating se wota i wasem. *

18. ?Olsem wanem blong meksua se yumi “holemstrong ol gudfala fasin” oltaem?

¹⁸ ?Yumi save lanem wanem long fasin blong lised ya bigae? Baebol i givim advaes ya long yumi se: “Oltaem yufala i mas agens long ol rabis fasin, be yufala i mas holemstrong ol gudfala fasin.” (Rom 12:9) I gat plante nogud samting long wol blong Setan we oli save pulum yumi blong yumi no moa holemstrong long ol gudfala fasin we God i tijim yumi blong folem. Wan long ol samting ya hemia ol fren we oli no folem ol loa blong God—maet oli fren long skul, long wok, no wan samting olsem televisin no buk we yumi lukluk mo ridim long taem blong spel. Ol fren olsemia oli save spolem strong tingting we yumi gat blong wantem mekem fasin we i stret. !Yu no mas letem samting ya i hapen long yu! Tok blong God i givim woning ya se: “I nogud yu ting se yu yu wan waes man.” (Prov. 3:7) I moagud yu folem advaes ya we i waes, we Moses i bin givim long ol man blong God bifo, hem i se: “Oltaem yumi mas tinghevi long [“Jeova God,” NW], mo yumi mas onagud long hem, mo yumi mas mekem ol samting we hem i talem. Yumi mas mekem we tingting blong yumi i stap strong long hem nomo.” (Dut. 10:20) Taem yumi mekem tingting blong yumi i stap strong long Jeova, i olsem we yumi holemstrong long hem, ale yumi stap folem fasin blong Jisas we Baebol i tokbaot hem se: “Yu yu laekem ol fasin we i stret, be ol fasin we i nogud yu agens long olgeta.”—Hib. 1:9.

Ol Lesen We Yumi Lanem Long Ol Samting We God i Wokem

19. (a) ?Wanem ol fasin blong Jeova we yu yu luksave long ol samting we hem i wokem? (b) ?Olsem wanem waes we i kamaot long God i save mekem i gud long yumi?

¹⁹ Olsem yumi tokbaot finis, yumi luk klia ol fasin blong Jeova long ol samting we hem i wokem. Be ol samting ya we Jeova i wokem oli save tijim plante lesen tu long yumi. Moa we yumi lukluk ol samting we Jeova i wokem, moa we bambae yumi sapraes long waes blong hem. Sipos yumi gohed blong tingbaot waes we i kamaot long God, bambae yumi hapi moa naoia mo waes ya i save lukaotgud long yumi long taem we i stap kam. (Pri. 7:12) Yes, bambae yumi wan yumi luk se tok blong Ol Proveb 3:13, 18 (NW) i tru tumas taem hem i talem se: “Man we i faenem waes, hem i hapi, mo man we i kasem fasin luksave, hem tu i hapi. Hem i wan tri blong laef long olgeta we oli kasem, mo olgeta we oli holemtaet long hem oli save hapi.”

[Ol futnot]

?Yu Yu Tingbaot?

?Wanem lesen we yumi lanem long . . .

• anis?

• baja?

• lokis?

• lised ya bigae?

[Kwestin]

[Tok blong pija long pej 17]

?Yu yu wok had olsem smol anis ya?

[Tok blong pija long pej 18]

Ol baja oli laef long komuniti, samting ya nao i protektem olgeta. ?Yu tu yu stap joen wetem ol brata sista?

[Tok blong pija long pej 20]

Ol Kristin man blong talemaot gud nius oli olsem ol lokis we oli gohed strong long wok blong olgeta

[Tok blong pija long pej 20]

Olsem bigae we i hang strong long ples we hem i wokbaot long hem, ol Kristin oli holemstrong long ol gudfala fasin

[Credit Line]

Stockbyte/Getty Images