Wan Kwestin

?Wetaem oli sakemaot Setan long heven?—Rev. 12:1-9.

Nating se Baebol i no talem stret taem we oli sakemaot Setan long heven, be hem i talem sam samting we i bin hapen we i halpem yumi blong faenemaot se raonabaot long wanem taem nao, oli sakemaot Setan. Faswan long ol samting ya, hemia se Kingdom blong Mesaea i stanap long heven. Biaen, “i gat bigfala faet i stat long heven,” we i mekem se oli winim Setan mo oli sakemaot hem long heven.

Baebol i makem klia se 1914 nao hemia yia we ‘rul blong ol man we oli no laen blong Isrel’ i finis, mo Kingdom i stanap. * (Luk 21:24) ?Olsem wanem? ?Faet long heven we i mekem se oli sakemaot Setan, i kamaot smoltaem biaen we Kingdom i stanap, no longtaem biaen?

Revelesen 12:4 i talem se: “Hem [Setan] i kam stanap stret long fes blong woman ya blong taem woman ya i bonem pikinini blong hem, be bigfala algita ya bambae i save kakae pikinini ya.” Vas ya i soemaot se Setan i traem blong spolem kwiktaem niufala Kingdom ya, jes afta we i stanap. Be Jeova i blokem Setan blong i no mekem rabis samting ya we hem i wantem mekem. Nating se Jeova i blokem hem, hem i gohed nomo blong traem evri rod blong spolem Kingdom ya. From samting ya, “Maekel wetem ol enjel blong hem” oli tekem aksen kwiktaem blong sakemaot “[algita ya] wetem olgeta enjel blong hem” oli aot long heven. Olsem nao, oli no save spolem Kingdom blong God. Samting ya i soemaot se faet ya long heven we i sakemaot Setan, i hapen smoltaem afta we Kingdom i stanap long 1914.

Wan narafala samting blong tingbaot, hemia se Baebol i soemaot klia we ol Kristin we tabu spirit i makemaot olgeta, oli laef bakegen smoltaem afta we Kingdom i stanap. * (Rev. 20:6) Baebol i no talem se ol brata ya blong Jisas we tabu spirit i makemaot olgeta oli bin joen wetem Jisas blong faet agensem algita ya mo ol enjel blong hem. Samting ya i soemaot se faet ya long heven we i mekem se oli sakemaot Setan mo ol enjel blong hem, i finis bifo we ol brata blong Kraes oli stat blong laef bakegen.

I tru se Baebol i no talem wanem taem stret we oli sakemaot Setan mo ol enjel blong hem long heven. Nating se i olsem, i klia se samting ya i hapen smoltaem afta we Jisas i kam King long heven long yia 1914.

[Ol futnot]