4 Sakemaot Fasin Blong Gat Tu Tingting

“?Man, from wanem yu gat tu tingting olsem? !Bilif blong yu i smol tumas!”—Matiu 14:31.

?WANEM SAMTING I SAVE BLOKEM BILIF BLONG YU? Samtaem ol disaepol blong Jisas tu oli gat tu tingting. (Matiu 14:30; Luk 24:36-39; Jon 20:24, 25) Baebol i talem stret se sipos man i no gat bilif hemia i olsem ‘sin we i stap holemtaet hem.’ (Hibrus 12:1) Aposol Pol i raetem se: “I no olgeta man evriwan we oli bilif.” (2 Tesalonaeka 3:2) Hemia i no min se sam man oli no naf blong gat bilif. Be i soem se plante man oli no traehad blong gat bilif. God bambae i blesem traehad we man i mekem blong gat bilif.

?OLSEM WANEM BLONG NO LETEM SAMTING YA I WINIM YU? Yu mas luksave wanem ol samting we oli mekem we yu gat tu tingting. Tingbaot disaepol ya Tomas. Hem i no bilif se Jisas i laef bakegen long ded, nating se ol narafala disaepol oli talem long hem se oli bin luk Jisas. Tomas i wantem wan pruf. ?Jisas i mekem wanem? Hem i givim pruf we Tomas i nidim blong mekem bilif blong hem i strong.—Jon 20:24-29.

 Jeova God i givim Baebol blong yumi save faenem ansa long ol kwestin we oli mekem se yumi gat tu tingting. Plante man oli no moa bilif long God from we oli luk se i gat tumas faet, tumas rabis fasin, mo tumas man we oli safa long wol. Oli blemem God from ol trabol ya. ?Baebol i talem wanem long saed ya?

God i no yusum ol gavman blong man blong rulum wol. Jisas i tokbaot spirit man ya we nem blong hem Setan, se hem nao i “masta blong wol ya.” (Jon 14:30) Setan i wantem givim olgeta kingdom blong wol ya long Jisas, sipos Jisas i bodaon long hem, i wosip long hem. Setan i talem se: “Bambae mi mi putum olgeta kantri ya, wetem olgeta gudgudfala samting blong olgeta, oli stap long han blong yu. Olgeta samting ya oli stap long han blong mi finis, mo mi mi save givim long hu man we mi wantem givim long hem.” Jisas i save se Setan i gat bigfala paoa antap long wol ya, taswe hem i no tok agensem paoa ya we Setan i gat, be hem i tok agensem wan narafala samting we Setan i no gat raet long hem, hem i se: “Baebol i talem se, ‘Yu mas mekem wosip long Hae God we i God blong yu, mo bambae yu mas mekem wok blong hem nomo.’” (Luk 4:5-8) Setan wetem ol gavman blong man, olgeta ya nao oli gat fol from ol trabol we oli stap kamaot long wol, i no fol blong God.—Revelesen 12:9, 12.

I no longtaem bambae Jeova God i karemaot stamba blong fasin safa. Hem i stanemap wan Kingdom finis, hemia wan gavman long heven, we Pikinini blong hem Jisas Kraes nao i King blong hem, mo Kingdom ya bambae i rulum ol man. (Matiu 6:9, 10; 1 Korin 15:20-28) Olsem ol profet tok blong Baebol i bin talem, gud nius long saed blong Kingdom ya, ol man oli stap talemaot finis long olgeta ples long wol. (Matiu 24:14) I no longtaem Kingdom ya bambae i karemaot olgeta man we oli agens long hem mo bambae i finisim stamba samting we i mekem ol man oli safa.—Daniel 2:44; Matiu 25:31-33, 46; Revelesen 21:3, 4.

?WANEM GUDFALA SAMTING WE YU SAVE KASEM? Ol man we oli gat tu tingting oli olsem “wan kenu we solwota i stap sakem i go olbaot, mo win i stap karem i go” from we oli letem ‘ol giaman tijing blong ol man ya we oli save wokem ol trik’ i stap lidim olgeta i go krangke. (Efesas 4:14; 2 Pita 2:1) Be ol man we oli stap lukaot stret ansa blong ol kwestin blong olgeta, oli save “stanap strong long bilif” blong olgeta.—1 Korin 16:13.

Ol Witnes blong Jeova, we oli wokem magasin ya, oli wantem halpem yu blong faenem ansa long ol kwestin we maet i stap blokem bilif blong yu. Oli singaot yu blong kam long miting blong olgeta mo blong yu wan yu faenemaot moa long saed blong ol tijing blong olgeta. Sipos yu mekem olsem, i sua we bilif blong yu long God bambae i kam strong moa.

Blong kasem moa save long saed ya, ridim japta 8, “?Wanem Ya Kingdom Blong God?” mo japta 11, “?From Wanem God i Letem Man i Safa?” long buk ya ?Wanem Samting We Baebol i Rili Tijim? *

[Futnot]

[Tok blong pija long pej 9]

Ol man we oli faenem stret ansa long ol kwestin blong olgeta oli stap wokem wan strong fandesen blong bilif blong olgeta