!Strong Tingting We Yumi Mas Gat Long Saed Blong Haos Blong Jeova!

“Mi mi wantem tumas we evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet.”—JON 2:17.

1, 2. ?Long yia 30 K.T., Jisas i mekem wanem insaed long tempol mo from wanem?

TINGBAOT samting ya. Hemia taem blong Pasova, long yia 30 K.T. Sikis manis i pas finis we Jisas i statem minista wok blong hem long wol. Naoia hem i stap wokbaot i go long Jerusalem. Long Jerusalem, Jisas i go long Yad blong ol Hiten man we i stap long tempol. Long ples ya hem i luk “plante man we oli stap salem buluk mo sipsip mo nawimba, blong ol man oli pem blong mekem sakrefaes. Mo i gat ol man tu we oli stap sidaon biaen long ol tebol blong olgeta, oli stap jenisim mane blong ol man blong ol narafala ples.” Ale, Jisas i tekem sam rop, i mekem wip long hem mo i ronemaot olgeta anamol, mo ol man ya tu we oli salem ol anamol ya. Jisas i kafsaedem tebol blong ol man ya tu we oli stap jenisim mane, mo i sakem mane blong olgeta i go olbaot.—Jon 2:13-16.

² Aksen blong Jisas i soemaot se hem i intres bigwan long tempol. Hem i talem se: “!Yufala i no mekem haos blong Papa blong mi i kam olsem ples blong mekem maket!” Taem ol disaepol blong Jisas oli luk samting ya, oli tingbaot Sam ya we Deved i raetemdaon plante handred yia bifo finis se: “Mi mi wantem tumas se evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet.”—Jon 2:16, 17; Sam 69:9.

3. (a) ?Wanem ya strong tingting we i olsem faea we i stap laet? (b) ?Wanem kwestin we yumi save askem?

³ Strong tingting we Jisas i gat se hem i intres bigwan long haos blong God, hemia nao we i pulum hem blong tekem wan aksen olsem. Yes strong tingting ya we i olsem faea we i stap laet, hem i minim se man i “wantem tumas mo i intres bigwan blong mekem wan samting.” Long ol yia 2000, bitim seven milian Kristin oli soemaot se oli intres bigwan long haos blong God. Maet yumi askem se, ‘?Olsem wanem mi save mekem we strong tingting we mi gat long saed blong haos blong Jeova i olsem faea we i stap laet oltaem?’ Blong givhan long yumi blong kasem ansa blong kwestin ya, i gud yumi luk fastaem se haos blong God tede i minim wanem. Biaen, bambae yumi luk eksampol blong ol gudfala man blong God long Baebol, we oli soemaot strong tingting long saed blong haos blong God. Eksampol blong olgeta i blong “tijim yumi” mo i save pulum yumi blong gat strong tingting.—Rom 15:4.

Haos Blong God—Bifo Mo Naoia

4. ?Oli yusum tempol ya we Solomon i bildim blong mekem wanem?

⁴ Long Isrel bifo, haos blong God hemia tempol long Jerusalem. I tru se Jeova i no laef long Jerusalem. Hem i talem se: “!Ol man blong mi! Heven i olsem bigfala jea blong mi, we mi mi King, mi sidaon long hem blong rul, mo wol i olsem ples blong mi, blong mi putum leg blong mi antap long hem. ?Yufala i ting se yufala i save wokem wanem kaen haos, blong mi mi go stap long hem? ?Yufala i ting se yufala i save wokem wanem kaen ples, blong mi mi go spel long hem?” (Aes. 66:1) Nating se i olsem, tempol we Solomon i bildim taem hem i stap rul, i stamba ples blong mekem wosip long Jeova mo hem i ples we man i go long hem blong prea i go long Jeova.—1 King 8:27-30.

5. ?Wosip long tempol blong Solomon bifo i pija blong wanem rod we Jeova i stanemap long taem blong yumi?

⁵ Tede, haos blong Jeova i no wan haos we ol man oli wokem we i stap long Jerusalem no narafala ples. Defren olgeta, hemia rod we Jeova i stanemap blong yumi save kam klosap long hem mo wosipim hem tru long ransom sakrefaes blong Jisas Kraes. Olgeta gudfala man blong God long wol ya oli joengud  blong wosip long Jeova long tempol ya long saed blong spirit.—Aes. 60:4, 8, 13; Wok 17:24; Hib. 8:5; 9:24.

6. ?Weswan long ol king blong Juda we oli soemaot strong tingting blong sapotem trufala wosip?

⁶ Afta we Isrel i seraot long tu kingdom long 997 B.K.T., * 4 long ol 19 king we oli rul long Juda, long saot, oli soemaot strong tingting blong sapotem trufala wosip. Long olgeta ya i gat, Asa, Jeosafat, Hesekia, mo Josaea. ?Wanem ol impoten lesen we yumi save lanem long eksampol blong olgeta ya?

Wok Wetem Fulhat Mo Kasem Blesing

7, 8. (a) ?Wanem kaen wok we Jeova i stap blesem? (b) ?Wanem lesen we i olsem woning we yumi lanem long eksampol blong King Asa?

⁷ Long taem blong rul blong King Asa, Jeova i givim wok long ol profet blong lukaot long neson blong Hem blong i stap tru long Hem. Baebol i talem long yumi se Asa i lesin long profet Asaria, pikinini blong Oded. (Ridim 2 Kronikel 15:1-8.) Ol jenis we Asa i mekem long taem blong hem, i joenem ol man Juda mo wan bigfala namba blong ol man long kingdom blong Isrel blong oli kam long wan bigfala asembli long Jerusalem. Nao evriwan oli talemaot se bambae oli mekem wosip long Jeova nomo. Yumi ridim se: “Oli mekem wan strong promes bakegen long hem we oli singaot i go antap se, ‘Hae God, long nem blong yu, mifala i talem se bambae mifala i holem promes ya olwe.’ Nao olgeta evriwan oli singaot bigwan mo oli blu trampet. Nao olgeta man Juda oli glad tumas, from we oli mekem promes ya wetem Hae God long olgeta tingting blong olgeta. Olgeta oli glad blong lukaot hem, mo oltaem hem i stap mekem we olgeta oli faenem hem, nao i mekem we oli stap gud, oli gat pis long evri ples.” (2 Kron. 15:9-15) Tede tu, yumi sua se Jeova bambae i blesem yumi. Jeova bambae i blesem yumi taem yumi mekem wok blong hem wetem fulhat blong yumi.—Mak 12:30.

⁸ Sore tumas we biaen, Asa i kros tumas taem profet Hanani i stretem hem. (2 Kron. 16:7-10) ?Yumi soem wanem fasin taem Jeova i givim advaes blong lidim yumi tru long ol elda? ?Yumi obei long ol advaes we oli givim we oli kamaot long Baebol? ?Yumi blokem fasin ya blong kam kros taem yumi kasem advaes?

9. ?Wanem samting we Jeosafat mo ol man Juda oli fesem, mo oli mekem wanem?

⁹ Jeosafat i rul olsem king long Juda long ol yia 900 B.K.T. Hem wetem olgeta man Juda oli fesem ami blong Amon, Moab, mo ol kantri long ol hil blong Seiri. ?Nating se Jeosafat i fraet, hem i mekem wanem? Hem mo ol man blong hem wetem ol woman mo pikinini blong olgeta oli hivap wanples long haos blong Jeova blong prea. (Ridim 2 Kronikel 20:3-6.) Jeosafat i talem ol tok we oli klosap sem mak long ol tok we Solomon i talem, long taem we oli givim tempol i go long Jeova, i se: “!Yu yu God blong mifala! Plis yu panisim olgeta, from we mifala i no naf nating long fes blong olgeta ya we oli stap kam blong mekem faet long mifala. Mifala i no save se bambae mifala i mekem olsem wanem, be mifala i stap luk long yu blong yu halpem mifala.” (2 Kron. 20:12, 13) Taem Jeosafat i prea wetem ol man we “oli stap stanap long fran blong haos blong God,” spirit blong Jeova i kam long Livaet ya Jahasiel, i givim paoa long hem blong talemaot ol tok blong leftemap tingting blong ol man blong God blong oli gat strong tingting mo oli no fraet.—Ridim 2 Kronikel 20:14-17.

10. (a) ?Jeosafat mo ol man long kingdom blong Juda oli kasem advaes olsem wanem? (b) ?Olsem wanem yumi soem se yumi gat tangkiu from ol samting we Jeova i yusum blong lidim yumi tede?

¹⁰ Yes, long taem bifo, Jeosafat mo ol man long kingdom blong Juda oli kasem advaes we i kam long Jeova tru long Jahasiel blong lidim olgeta. Tede, yumi kasem ol tok blong givhan mo lidim yumi, tru long grup ya we i olsem slef we i stret mo waes. From samting ya, oltaem yumi wantem blong joengud mo respektem ol elda we oli wok had blong lukaot long yumi mo givim ol advaes we i kamaot long “slef ya we i stret mo waes” blong lidim yumi.—Mat. 24:45, NW; 1 Tes. 5:12, 13.

11, 12. ?Yumi save lanem wanem lesen long stori blong Jeosafat mo ol man Juda?

¹¹ Jeosafat mo ol man blong hem oli joen wanples blong lukaot help blong Jeova. Long sem fasin, yumi tu yumi no mas lego ol miting blong kongregesen we yumi gat wetem ol brata mo sista blong yumi. Sipos samtaem yumi luk se yumi no save wanem blong mekem taem yumi fesem wan bigfala traem, i gud yumi folem eksampol blong Jeosafat mo ol man Juda, mo yumi lukluk i go long Jeova long prea, mo trastem Hem fulwan. (Prov. 3:5, 6; Fil. 4:6, 7) Nating sipos yumi stap yumi wan long wan ples, prea we yumi mekem long Jeova i joenem yumi wetem ‘ol brata blong yumi we oli stap kasem trabol long evri ples long wol.’—1 Pita 5:9.

 ¹² Jeosafat mo ol man blong hem oli folem advaes we God i givim long Jahasiel blong lidim olgeta. ?Wanem frut i kamaot from samting ya? Oli winim faet mo oli gobak long Jerusalem we oli “glad tumas” mo “oli stap kilim gita mo oli stap blu long trampet, nao olgeta evriwan oli maj i go long haos blong Hae God.” (2 Kron. 20:27, 28) Yumi tu yumi respektem rod we Jeova i yusum blong givim advaes blong lidim yumi mo yumi joen blong presem hem.

Lukaot Gud Long Ol Ples Blong Mekem Miting Blong Yumi

13. ?Wanem wok we Hesekia i mekem long stat blong rul blong hem?

¹³ Long faswan manis blong rul blong hem, Hesekia i soemaot se hem i strong blong sapotem wosip blong Jeova taem hem i openem mo riperem tempol bakegen. Hem i givim wok long ol pris mo ol Livaet blong oli klinim haos blong God. Oli mekem wok ya long 16 dei. (Ridim 2 Kronikel 29:16-18.) Traehad ya i mekem yumi tingbaot bakegen ol wok blong lukaotgud mo riperem ol ples blong miting blong yumi. Olsem nao ol ples blong miting blong yumi oli soemaot se yumi wantem tumas blong mekem wosip long Jeova. ?Yu yu harem ol stori we oli soemaot se ol man oli sapraes long strong tingting blong ol brata mo sista we oli mekem ol wok ya? Yes, ol traehad blong olgeta oli presem Jeova bigwan.

14, 15. ?Tede, wanem wok we i presem Jeova bigwan? Givim sam eksampol.

¹⁴ Long wan taon long not blong Inglan, ol brata oli wantem wokemgud bakegen Haos Kingdom blong olgeta. Be wan man we haos blong hem i stap klosap long Haos Kingdom i no agri long wok ya. Ale, ol brata oli soem kaen fasin long man ya. Oli luk se i nidim blong riperem wol we i olsem fenis we i seraotem Haos Kingdom mo yad blong man ya, ale oli talem long hem se bambae oli riperem wol ya i fri nomo. Ol brata oli wok had mo oli riperem wol ya fulwan. Oli mekemgud wok blong olgeta. From samting ya, man ya i jenisim tingting blong hem. Naoia man ya i stap long yad blong hem be hem i wajem gud yad blong Haos Kingdom tu se i no gat wan samting i spolem.

¹⁵ Ol man blong Jeova oli joen long wok blong bildim ol haos wosip long fulwol. Ol volontia we oli wantem mekem wok ya, oli joen fultaem blong bildim ol Haos Kingdom, Haos Asembli mo ol Haos Betel raon long wol. Brata ya Sam, mo waef blong hem, Ruth, tufala i go long plante kantri long Yurop mo Afrika blong givhan long wok blong bildim ol haos wosip. Long evri ples we tufala i go, tufala i harem gud blong prij wetem ol brata long ol kongregesen blong ol ples ya. Sam i tokbaot wanem samting we i pulum hem blong joen long wok ya, i se: “Eksampol blong olgeta we oli wok long ol haos  Betel long ples blong mi mo long ol narafala kantri, i pulum mi blong mekem wok ya. Taem mi luk strong tingting we oli gat mo glad we oli kasem long wok blong olgeta, samting ya i pulum mi blong wantem mekem olsem olgeta.”

Obei Long Ol Tok We Jeova i Givim Blong Tijim Yumi

16, 17. ?Wanem wok we ol man blong God oli wantem tumas blong joen long hem, mo wanem gudfala frut i kamaot from?

¹⁶ Antap long wok ya blong riperem tempol, Hesekia i statem bakegen lafet blong Pasova we Loa blong Jeova i talem se oli mas mekem evri yia. (Ridim 2 Kronikel 30:1, 4, 5.) Hesekia mo ol man long Jerusalem oli singaot olgeta man long Isrel mo olgeta tu we oli stap long kingdom long not, oli kam joen blong mekem lafet ya. Oli sanem sam man oli karem ol leta i go long ol defren distrik blong singaot olgeta oli kam long spesel taem ya.—2 Kron. 30:6-9.

¹⁷ Long ol yia we oli jes pas, yumi bin joen long wan wok we i klosap sem mak. Yumi yusum wan pepa we i pulum tingting blong ol man long teritori blong yumi blong oli kam joen wetem yumi blong tingbaot bakegen Kakae Blong Masta. Olsem nao yumi obei long oda blong Jisas. (Luk 22:19, 20) Yumi kasem ol advaes long Miting Blong Kingdom Wok mo yumi joen long wok ya wetem strong tingting. !Yes, Jeova i rili blesem traehad ya! Las yia, klosap seven milian man oli joen long wok ya blong givimaot pepa ya blong singaot ol man, mo 17,790,631 man oli bin kam long Memoriol blong tingbaot ded blong Kraes.

18. ?From wanem strong tingting we yumi gat blong sapotem trufala wosip i impoten long yumi?

¹⁸ Baebol i tokbaot Hesekia i se: “Hae God i God blong ol laen blong Isrel, mo king ya i trastem hem. I no gat wan king long Juda we i rul fastaem long hem no biaen long hem, we i olsem hem. Hem i putum tingting blong hem i stap strong long Hae God, mo oltaem nomo i stap obei long hem, mo i stap holemgud ol loa we hem i bin givim long Moses bifo.” (2 King 18:5, 6) I gud yumi folem eksampol blong hem. Strong tingting we yumi gat blong sapotem trufala wosip bambae i halpem yumi blong ‘fasgud long Jeova,’ nao bambae yumi save kasem laef blong olwe long fiuja.—Dut. 30:16, NW.

Obei Kwiktaem Long Ol Advaes Blong Lidim Yumi

19. ?Wanem bigfala traehad we yumi strong blong mekem long taem blong Memoriol?

¹⁹ Taem Josaea i rul olsem king, hem i mekemrere ol samting blong kingdom blong Juda i mekem lafet blong Pasova bakegen. (2 King 23:21-23; 2 Kron. 35:1-19) Yumi tu, yumi meksua se yumi reregud from ol distrik asembli, seket asembli, spesel dei asembli mo Memoriol. Long sam kantri, ol brata oli rere blong lusum laef blong olgeta blong oli save joen wanples blong tingbaot ded blong Jisas. Ol elda oli luk se i rili impoten blong meksua se evriwan long kongregesen i stap. Mo tu, oli givhan long ol brata sista we oli olfala mo oli sik, blong oli kam long Memoriol.

20. (a) ?Wanem i hapen long taem we King Josaea i stap rul, mo hem i mekem wanem? (b) ?Wanem lesen we yumi lanem long stori ya we yumi wantem tingting gud long hem?

²⁰ Taem King Josaea i talem long ol man blong oli go klinim haos blong God, mo wokem i gud bakegen, Hae Pris Hilkia i “faenem buk ya we nem blong hem Buk blong Loa blong Hae God, we i gat Loa i stap long hem we Hae God i bin givim long Moses bifo.” Ale hem i givim buk ya long Safan, sekretari blong king. Nao Safan i ridimaot ol tok blong buk ya long king Josaea. (Ridim 2 Kronikel 34:14-18.) ?Wanem samting i kamaot? Wantaem nomo, king i terem klos blong hem blong soemaot se hem i harem nogud mo i talem long ol man blong oli go luk wan profet blong Jeova blong faenemaot tingting blong Hem. Tru long woman profet ya, Hulda, God i talemaot se hem i no laekem nating sam long ol fasin blong wosip we ol man Juda oli stap mekem. Nating se i olsem, Jeova i luk bigfala traehad we King Josaea i mekem blong finisim olgeta rabis fasin ya blong wosip long aedol. Taswe Jeova i mekem i gud long  Josaea, mo i talem se panis ya we bambae hem i tekem i kamtru long neson ya, bambae i no kamtru long taem blong Josaea. (2 Kron. 34:19-28) ?Yumi save lanem wanem long eksampol ya? I sua se yumi wantem mekem sem samting olsem Josaea. Yumi kwik blong folem ol advaes we Jeova i talem blong lidim yumi, mo yumi tingting gud long wanem samting i save hapen long yumi sipos yumi letem ol man blong apostasi mo olgeta we oli no stap tru long Jeova, oli spolem wosip blong yumi. Mo yumi save sua se Jeova bambae i luk strong tingting we yumi gat blong sapotem trufala wosip, sem mak olsem King Josaea.

21, 22. (a) ?From wanem yumi mas soemaot strong tingting blong sapotem trufala wosip blong Jeova? (b) ?Bambae yumi tokbaot wanem long nekis stadi?

²¹ Ol fo king ya blong Juda hemia, Asa, Jeosafat, Hesekia, mo Josaea, oli soemaot gudfala eksampol we yumi save folem blong gat strong tingting long saed blong haos blong God mo wosip blong hem. Strong tingting ya i mas pulum yumi blong trastem Jeova mo sapotem fulwan wosip blong Hem. Yumi stap folem wan rod we i waes mo i lidim yumi blong kasem glad, sipos yumi obei long ol tok we Jeova i talem blong lidim yumi, mo yumi kwik blong folem ol advaes we yumi kasem long ol elda long kongregesen.

²² Long nekis stadi bambae yumi tokbaot strong tingting we yumi gat blong sapotem wok blong prij, mo bambae i leftemap tingting blong ol yangfala blong oli mekem wok blong Papa blong yumi long Heven, wetem strong tingting. Mo tu, bambae yumi tokbaot olsem wanem yumi save blokem wan long ol trik ya blong Setan we i save spolem gud yumi. Taem yumi gat strong tingting mo folem ol samting ya we Jeova i tijim yumi long hem, yumi stap folem eksampol blong Jisas, Pikinini ya blong Jeova. Baebol i tokbaot Jisas se: “Mi mi wantem tumas se evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet.”—Sam 69:9; 119:111, 129; 1 Pita 2:21.

[Futnot]

?Yu Yu Rimemba?

• ?Jeova i stap blesem wanem kaen wok, mo from wanem?

• ?Olsem wanem yumi save soemaot se yumi trastem Jeova?

• ?Olsem wanem strong tingting we i olsem faea we i laet i save pulum yumi blong obei long ol advaes we Jeova i givim blong lidim yumi?

[Kwestin]

[Tok blong pija long pej 13]

?Olsem wanem Asa, Jeosafat, Hesekia mo Josaea oli soemaot strong tingting we oli gat long saed blong haos blong Jeova?