Wan Kwestin

Jisas i prij long evri ples long kantri blong Isrel. ?Be from wanem aposol Pita i talem se ol man Jiu mo ol lida blong olgeta oli ‘no save samting we oli mekem long Jisas’ taem oli agensem Jisas, oli talem se hem i mas ded?—Wok 3:17.

Taem aposol Pita i stap toktok long wan grup blong ol man Jiu long saed blong wanem we oli mekem long ded blong Mesaea, hem i talem se: “Mi save we ol samting ya we yufala i bin mekem long Jisas, mo we ol haeman blong yufala tu oli mekem, yufala evriwan i mekem from we yufala i no save.” (Wok 3:13-17) Maet sam man Jiu oli no kasem save long ol tijing blong Jisas mo se hem nao i Mesaea. Sam narafala, maet tingting we i pusum olgeta blong no wantem luksave se Jisas i Mesaea, hemia se oli no wantem mekem God i glad, oli ting nogud long Jisas, oli jalus mo oli no laekem Jisas nating.

Tingbaot olsem wanem fasin ya blong no wantem mekem God i glad i gat paoa long tingting we plante man oli gat long ol tijing blong Jisas. Plante taem, Jisas i yusum ol pijatok blong tijim ol man, mo hem i eksplenem ol pijatok ya long olgeta we oli wantem lanem mo save samting. Samfala we oli lesin long Jisas, oli gowe, oli no traehad blong kasem save samting we hem i stap tijim. Wan taem, sam disaepol tu oli gowe long Jisas from we oli no kasem save wan pijatok we Jisas i talem. (Jon 6:52-66) Olgeta ya oli no luksave se ol pijatok we Jisas i yusum, oli blong soemaot sipos olgeta we oli lesin oli rere blong jenisim tingting blong olgeta mo fasin blong olgeta, no nogat. (Aes. 6:9, 10; 44:18; Mat. 13:10-15) Mo tu oli no tingbaot se wan profet tok i bin talem se Mesaea bambae i yusum ol pijatok long tijing blong hem.—Sam 78:2.

Samfala oli ting nogud long Jisas, nao oli sakemaot ol tijing blong hem. Taem Jisas i stap tij insaed long haos blong prea long taon blong hem, Nasaret, ol man oli “sapraes tumas.” Be oli no agri se Jisas i Mesaea. Defren olgeta, oli askem kwestin long saed blong laef blong Jisas se: “?Hem i kasem ol samting ya wea? . . . Hem i man blong wokem haos, i pikinini blong Meri. Hem i brata blong Jemes, mo Josef, mo Judas, mo Saemon. Mo ol sista blong hem tu oli stap wetem yumi.” (Mak 6:1-3) Ol man Nasaret oli luk ol tijing blong Jisas se oli no impoten from we hem i gruap long wan famle we i pua.

?Olsem wanem long ol lida blong skul? Plante long olgeta oli no tinghae long ol tijing blong Jisas. (Jon 7:47-52) Mo tu oli sakemaot ol tijing blong Jisas from we oli jalus se plante man oli wantem lesin long Jisas. (Mak 15:10) Mo plante haeman oli soemaot se oli no glad long Jisas taem hem i talemaot klia long olgeta se oli gat tu fes mo oli stap trikim ol man. (Mat. 23:13-36) I stret nomo we Jisas i tok strong long olgeta from we olgeta nomo oli wantem mekem se oli no luksave se Jisas i Mesaea. Jisas i talem se: “Sore tumas long yufala. I olsem we yufala i haedem ki blong doa blong haos we waes i stap insaed long hem, nao yufala i no go insaed, mo yufala i stap blokem ol narafala man tu we oli wantem go insaed.”—Luk 11:37-52.

Blong tri yia haf, Jisas i talemaot gud nius long Isrel. Hem i trenem plante narafala blong oli joen long wok ya tu. (Luk 9:1, 2; 10:1, 16, 17) Jisas mo ol disaepol blong hem oli strong blong mekem wok ya. From samting ya, ol Farisi oli komplen se: “Yufala i luk. . . . olgeta man evriwan oli biaen long hem.” (Jon 12:19) Taswe, plante man Jiu oli gat save long saed blong Jisas. Nating se i olsem, oli wantem stap olsem se ‘oli no save wan samting’ long saed blong Jisas se hem i Mesaea. Oli no mekem save mo lav blong olgeta long Mesaea i kam bigwan moa. Samfala oli joen blong kilim Jisas i ded. Taswe, aposol Pita i pulum tingting blong plante long olgeta se: “Yufala i mas tanem tingting blong yufala from ol sin blong yufala, mo yufala i mas luk long God blong hem bambae i tekemaot ol sin blong yufala. Sipos yufala i mekem olsem, Hae God bambae i save givim niufala paoa long laef blong yufala. Mo hem bambae i save sanem Jisas i kambak, we hem i Mesaea blong yufala, we God i jusumaot hem finis.” (Wok 3:19, 20) I gud blong tingbaot se plante taosen man Jiu wetem “plante pris tu” oli stat blong bilif. Oli no moa mekem olsem se oli no luksave Mesaea. Defren olgeta, oli tanem tingting blong olgeta, mo Jeova i glad long olgeta.—Wok 2:41; 4:4; 5:14; 6:7.