?Wanem Ya Bilif?

?YU YU save se bilif i minim wanem? Sam man oli talem se man we i bilif, hem i blaen from we hem i folem nomo ol samting we oli tijim long hem, mo hem i no traem faenemaot sipos ol tijing ya oli tru. Henry L. Mencken i wan man Amerika we i stap raetem ol sot stori long niuspepa, mo ol toktok blong hem oli gat bigfala paoa long tingting blong plante man. Man ya i talem se bilif i min se “man i no yusum tingting blong hem, be i trastem nomo se wan samting i tru mo wan samting i hapen, nating se maet samting ya i no tru mo i no hapen nating.”

Be samting we Baebol i talem long saed blong bilif i defren olgeta long tingting blong ol man. Baebol i no talem se man we i gat bilif hem i blaen mo i no stap yusum tingting blong hem. Nogat. Tok blong God i talem se: “Sipos man i gat bilif, hem i sua se olgeta samting we hem i stap putum tingting blong hem i strong long olgeta, bambae oli mas kamtru. Hem i sua from we i gat pruf i stap se ol samting ya oli tru, nating we hem i no save luk olgeta.”—Hibrus 11:1, NW.

From we i gat defdefren tingting long saed blong bilif se hem i minim wanem, ale i gud yumi traem faenem ansa blong ol kwestin ya:

• ?Wanem samting we Baebol i talem long saed blong bilif, we i defren long wanem we ol man oli talem?

• ?From wanem i impoten blong gat bilif ya we Baebol i tokbaot?

• ?Olsem wanem yu save mekem we bilif blong yu long God i strong?

Pepa We i Givim Raet, Mo Strong Pruf

Taem Pol i raetem buk blong Hibrus we i stap long Baebol, ol man oli toktok lanwis Grik mo oli savegud tok ya we long Bislama yumi talem se “olgeta samting ya we hem i putum tingting blong hem i stap strong long olgeta, bambae oli kamtru.” Tok ya i stap plante taem long ol kontrak blong bisnes we ol man oli mekem bifo, mo hem i wan tok blong soemaot se wan man i gat raet long wan samting. Taswe, wan buk i talem se narafala rod blong tanem tok blong Hibrus 11:1 i olsem: “Sipos man i gat bilif, hem i gat pepa we i givim raet long hem blong kasem olgeta samting ya we hem i putum tingting blong hem i strong long olgeta.”

Sipos yu pem wan samting long wan bigfala stoa mo biaen yu wet se bambae oli karem samting ya i kam long haos blong yu, ating yu gat fasin ya we i olsem bilif. Taem yu pem samting ya, ol man blong kampani ya oli givim wan risit long yu. Risit ya hem i olsem wan pepa we i givim raet long yu blong kasem samting ya we yu pem finis. Taem yu gat risit ya yu sua se bambae yu kasem samting ya. Sipos yu lusum risit ya no yu sakem, i olsem se yu lusum raet blong kasem samting ya we yu pem finis. Long sem fasin, taem wan man i bilif se God bambae i mekem ol promes blong hem oli kamtru, man ya i sua blong kasem samting ya we hem i putum tingting blong hem i stap strong long hem. Be man we i no gat bilif, no we i lusum bilif, hem i no gat raet blong kasem ol samting we God i promes blong givim.—Jemes 1:5-8.

Narafala tok we i stap long Hibrus 11:1, we yumi tanem i kam “i gat pruf i stap se ol samting ya oli tru,” i soemaot se fastaem maet man i ting se wan samting i olsem, be biaen i gat pruf i kamaot we i soem se samting ya i no olsem. Tingbaot wan eksampol we i soem samting ya, hemia san. Long lukluk blong yumi, i olsem se san nao i stap goraon long wol from we yumi wajem we hem i girap long is i krosem skae, nao i godaon long wes. Be ol man blong stadi long ol sta oli faenem se i no san we i stap goraon long wol, be wol nao we i stap tantanem hem wan i goraon long san. Taem yu gat save ya mo yu agri se hem i tru, i olsem we yu gat pruf, ale yu bilif, no yu sua, se wol i stap tantanem hem wan i goraon long san—nating se long ae blong yu, i luk olsem se san nao i stap muf i goraon long wol. Bilif we yu gat long saed blong save ya i no min se yu blaen mo yu no luksave samting we i tru. Defren olgeta, bilif ya i minim se yu yu naf blong luksave samting olsem we i rili stap, mo yu no bilif nomo long samting we ae blong yu i save luk.

 ?Wan Bilif We i Strong i Impoten Olsem Wanem?

Baebol i talem se yumi mas gat bilif ya we i stanap long strong pruf, nating se yumi mas jenisim tingting we yumi gat long sam samting. Bilif olsem i impoten tumas. Aposol Pol i raetem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.”—Hibrus 11:6.

I gat plante samting i save blokem man blong gat wan bilif we i strong. Be sipos yu folem wanwan long ol fofala poen we oli stap long ol pej we i kam biaen, bambae yu save gat wan bilif we i strong.