Folem Fasin Blong Jisas Blong Tijim Man Wetem Lav

“!I no gat man we i save tok olsem man ya samtaem!”—JON 7:46.

1. ?Tijing blong Jisas i gat paoa olsem wanem long ol man we oli lesin long hem?

!TINGBAOT ol man we oli gat janis blong harem tijing blong Jisas! !Oli mas glad tumas long fasin blong hem blong tij! Baebol i talem sam tok we i soemaot se tijing blong hem i gat bigfala paoa long ol man we oli gat janis blong save hem. Wan eksampol blong sam tok olsem, hemia long Gospel blong Luk we i talem se ol man long ples blong Jisas, “oli glad tumas long ol tok blong hem, mo oli sapraes tu from we tok blong hem i gud tumas.” Matiu i talem se taem Jisas i mekem Bigfala Toktok blong hem antap long hil, ol man “oli sapraes tumas long tok blong hem.” Mo Jon i talem se taem ol soldia oli go blong holem Jisas, oli kambak we oli no holem hem nating, mo oli talem se: “!I no gat man we i save tok olsem man ya samtaem!”—Luk 4:22; Mat. 7:28; Jon 7:46.

2. ?Wanem ol fasin blong tijim man we Jisas i yusum?

² Ol soldia ya oli no giaman. Jisas i beswan Tija we i laef samtaem, i no gat kwestin long saed ya. Hem i tij long fasin we i klia, i isi blong man i kasem save, mo i pulum man blong tingting gud mo luksave trutok we hem i eksplenem. Hem i savegud rod blong yusum ol pijatok mo kwestin blong tijim man. Hem i jenisim fasin blong hem blong tij blong mekem i stret long ol man wanwan, nating se oli haeman no oli man nating nomo. Hem i tijim ol dip trutok be i mekem i isi long man blong kasem save long olgeta. Be i no ol samting ya nomo we i mekem se Jisas i beswan Tija we i laef samtaem.

Fasin We i Moa Impoten Hemia Lav

3. ?Olsem wanem Jisas i wan tija we i defren long ol lida blong skul long taem blong hem?

³ I sua se ol tija blong Loa mo ol Farisi oli gat hed. Ating sam long olgeta oli gat bigfala save mo oli savegud fasin blong tijim narafala man. ?Wanem i mekem se fasin blong Jisas blong tij i defren long fasin blong olgeta? Ol lida blong skul long taem ya oli ting nating long ol man we oli no gat haenem. Oli luklukdaon long olgeta, oli talem se “God i kros long olgeta.” (Jon 7:49) Be Jisas i sore tumas long ol man ya from we “oli trabol tumas, oli no moa gat paoa, oli olsem ol sipsip we i no gat man blong lukaot long olgeta.” (Mat. 9:36) Jisas i soem se i laekem ol man, hem i gat sore, mo i kaen. Mo tu, long saed blong ol lida blong skul, oli no lavem God tru. (Jon 5:42) Be Jisas i lavem Papa blong hem mo i haremgud tumas blong mekem samting we Papa blong hem i wantem. Ol lida blong skul oli twistim tok blong God blong mekem i laenap wetem tingting blong olgeta nomo. Be Jisas i lavem “tok blong God.” Hem i tijim ol narafala long tok ya, i eksplenem gud, i holemstrong tok ya taem narafala i agensem, mo i folem gud long laef blong hem. (Luk 11:28) Tru ya, evri samting we Kraes i talem mo i  mekem i stanap long lav. Lav nao i stamba blong ol tijing we hem i givim, ol samting we hem i mekem long narafala, mo fasin blong hem blong tijim man.

4, 5. (a) ?From wanem i impoten blong tijim man wetem lav? (b) ?Taem yumi tijim man, from wanem i impoten tu blong gat save mo blong savegud fasin blong tij?

⁴ ?Olsem wanem long yumi? From we yumi ol man blong Kraes, yumi wantem folem fasin blong hem blong prij mo fasin blong laef blong hem tu. (1 Pita 2:21) Taswe, yumi givimaot save blong Baebol long ol narafala, mo tu, yumi traehad blong soemaot ol fasin blong Jeova, antap moa fasin lav. Nating se yumi gat plante save no smol nomo, nating se yumi savegud fasin blong tij no yumi no savegud, be lav we yumi soemaot bambae i givhan bigwan blong mekem se ol tijing oli kasem hat blong man we yumi prij long hem. Blong rili mekemgud wok ya blong pulum ol man oli kam disaepol blong Jisas, yumi mas folem fasin blong hem blong tijim man wetem lav.

⁵ I tru, blong kam wan gudfala tija, yumi mas gat save mo yumi mas savegud fasin blong tijim narafala. Jisas i givhan long ol disaepol blong hem blong oli gat tufala fasin ya evriwan. Tede, Jeova i yusum ogenaesesen blong hem blong halpem yumi blong gat tufala fasin ya. (Ridim Aesea 54:13; Luk 12:42.) Nating se i olsem, yumi no mas tijim man wetem tingting blong yumi nomo, be wetem hat blong yumi tu. Taem yumi gat save, mo yumi savegud fasin blong tij, mo yumi gat lav, nao yumi mekem trifala i wok wantaem, wok blong yumi i save karem plante frut. Oraet, ?long wanem rod nao yumi save soemaot lav taem yumi tijim man? ?Olsem wanem Jisas mo ol disaepol blong hem oli soem lav? Bambae yumi luk.

Yumi Mas Lavem Jeova

6. ?Yumi toktok olsem wanem long saed blong wan man we yumi lavem?

⁶ Yumi haremgud blong tokbaot ol samting we yumi laekem. Taem yumi tokbaot samting we yumi laekem tumas, ol tok blong yumi i laef, fes mo fasin blong yumi i soemaot glad mo lav. Hemia i tru moa taem yumi tokbaot wan man no woman we yumi lavem. Yumi wantem tumas blong talemaot long ol narafala, ol save we yumi gat long saed blong hem. Yumi talem ol gudfala toktok long saed blong hem, yumi ona long hem, mo yumi tekem saed blong hem taem narafala i agensem hem. Yumi mekem olsem from we yumi wantem we ol narafala oli laekem hem mo ol fasin blong hem olsem we yumi laekem.

7. ?Lav we Jisas i gat long God i pulum hem blong mekem wanem?

⁷ Blong halpem narafala blong lavem Jeova, fastaem yumi wan yumi mas save Jeova mo lavem hem. Yes, blong mekem trufala wosip long God, yumi mas lavem hem. (Mat. 22:36-38) Jisas i givim wan eksampol we i stretgud olgeta. Hem i lavem Jeova wetem olgeta hat, tingting, laef, mo paoa blong hem. Ating Jisas i stap plante milian milian yia wetem Papa blong hem long heven. Taswe Jisas i savegud Papa blong hem. ?Wanem i kamaot from? Jisas i talem se: “Mi lavem Papa blong mi.” (Jon 14:31) Long evri samting we Jisas i talem mo i mekem, hem i soemaot se hem i lavem Papa blong hem. Lav ya i pulum hem oltaem blong mekem samting we God i glad long hem. (Jon 8:29) Lav ya i pusum hem blong tok agens long ol lida blong skul we oli stap talem se oli man blong God be oli gat tu fes. Lav ya i pulum hem blong tokbaot Jeova tu mo blong halpem ol narafala blong save God mo lavem hem.

8. ?Lav we ol disaepol oli gat long God i pulum olgeta blong mekem wanem?

⁸ Ol disaepol long faswan handred yia oli folem fasin blong Jisas blong lavem Jeova. Lav ya i pulum olgeta blong wok strong blong talemaot gud nius, we oli no fraet nating. Oli fulumap Jerusalem wetem tijing blong olgeta, nating se ol lida blong skul we oli gat paoa oli agensem olgeta. Ol disaepol ya oli no save stap kwaet, oli gohed nomo blong tokbaot ol samting we oli luk mo oli harem. (Wok 4:20; 5:28) Oli save se Jeova i stap wetem olgeta mo se bambae i blesem olgeta. !Mo hemia nao samting we i hapen, hem i blesem olgeta bigwan! Afta we Jisas i ded, i no 30 yia yet be aposol Pol i raetem se oli talemaot gud nius finis “long olgeta man long wol.”—Kol. 1:23.

9. ?Olsem wanem yumi save mekem lav blong yumi long God i kam strong moa?

⁹ Sipos yumi rili wantem kam wan gudfala tija, yumi tu yumi mas meksua se yumi mekem lav blong yumi long God i kam strong moa oltaem. ?Olsem wanem yumi save mekem samting ya? Yumi toktok oltaem long God long prea. Mo tu, yumi mekem lav blong yumi long God i kam strong moa taem yumi stadi long Tok blong hem, yumi ridim ol buk we oli eksplenem Baebol, mo yumi go long ol Kristin miting. Taem save blong yumi long saed blong God i kam plante, hat blong yumi i kam  fulap long lav blong hem. Nao taem yumi soemaot se yumi lavem God long ol toktok mo wok blong yumi, ol narafala oli luksave samting ya mo maet i pulum olgeta blong wantem kam klosap long Jeova.—Ridim Ol Sam 104:33, 34.

Yumi Mas Laekem Ol Save We Yumi Tijim Narafala Long Hem

10. ?Wanem wan samting we i save mekem se man i kam wan gudfala tija?

¹⁰ Wan samting we i mekem se man i kam wan gudfala tija, hemia se i laekem ol save we i tijim narafala long hem. Hem i mas bilif se ol save ya i tru, i impoten, mo i save givhan long man. Sipos wan tija i tinghae long ol save we hem i stap tijim narafala long hem, bambae studen i luk se hem i glad blong tokbaot ol save ya, mo glad ya bambae i gat paoa long studen ya. Be sipos wan tija i no rili tinghae long ol save we hem i stap givimaot, ol studen blong hem tu bambae oli no ting se ol save ya i impoten. Yu no mas fogetem se eksampol blong yu we yu tija blong Tok blong God, hem i impoten tumas. Jisas i talem se: “Sipos hem [studen] i tren gogo i finisim trening blong hem, bambae hem i kam sem mak wetem tija blong hem.”—Luk 6:40.

11. ?From wanem Jisas i laekem ol save we hem i tijim narafala long hem?

¹¹ Jisas i laekem ol save we hem i tijim man long hem. Hem i save se hem i gat wan gudfala samting tumas blong givim long ol man, hemia trutok long saed blong Papa blong hem long heven. Hemia “ol tok ya we i blong God nomo” mo “ol tok blong laef ya we i no save finis.” (Jon 3:34; 6:68) Trutok we Jisas i tijim man long hem i olsem wan strong laet we i mekem ol nogud samting oli kam long klia ples mo i soemaot ol samting we oli gud. Trutok ya i givim hop long ol man we oli gat tingting daon, mo i mekem olgeta oli haremgud. Hemia ol man we ol lida blong giaman skul oli trikim olgeta mo we Setan i holem olgeta long han blong hem. (Wok 10:38) I no ol tijing blong Jisas nomo we oli soemaot se hem i laekem trutok, be ol samting we hem i mekem tu.

12. ?Wanem filing blong aposol Pol long saed blong gud nius?

¹² Ol disaepol oli folem fasin blong Jisas, oli laekem trutok long saed blong Jeova mo Jisas, mo oli tinghae long trutok ya. From samting ya, ol man we oli agensem olgeta oli no save mekem tingting blong olgeta i foldaon we oli no moa wantem serem ol trutok ya wetem ol narafala. Pol i raet long ol Kristin long Rom se: “Mi mi wantem tumas blong talemaot gud nius ya . . . Mi mi no sem nating long gud nius ya, from we hem i paoa blong God blong sevem olgeta man we oli bilif long hem.” (Rom 1:15, 16) Pol i luk se i wan bigfala ona blong talemaot trutok. Hem i raetem se: “Long gladhat blong God, hem i givhan long mi blong mi mekem gudfala wok ya. Hem i putumap mi blong mi go long ol man we oli no laen blong Isrel blong talemaot gud nius blong ol gudgudfala samting ya blong Kraes, we i no gat man i save kaontem.” (Efes. 3:8) I isi blong tingbaot olsem wanem Pol i mas glad blong tijim ol narafala long saed blong Jeova mo ol plan blong hem.

13. ?Wanem ol risen we yumi gat blong laekem gud nius?

¹³ Gud nius we yumi faenem long Tok blong God i save mekem se yumi savegud Man ya we i Wokem yumi, mo yumi frengud wetem hem mo lavem hem. Gud nius ya i holem ansa blong ol impoten kwestin long saed blong laef, mo i gat paoa blong jenisim fasin blong yumi, mo blong givim hop long yumi, mo blong mekem yumi strong taem yumi kasem trabol. Antap long hemia, gud nius ya i soemaot rod blong kasem wan nambawan laef we i no save finis. I no gat wan narafala save we i moa gud mo i moa impoten i bitim gud nius ya. Hem i olsem wan sas presen we yumi kasem, mo i karem bigfala glad i kam long yumi. Mo presen ya i givim moa glad long yumi taem yumi serem wetem narafala.—Wok 20:35.

14. ?Olsem wanem yumi save laekem moa ol save we yumi tijim narafala long hem?

¹⁴ ?Wanem i save mekem se yu laekem moa gud nius ya? Taem yu stap ridim Tok blong God, i gud we wanwan taem yu stop smol blong tingtingbak long samting we yu ridim finis. Maet yu tingbaot se yu stap wokbaot wetem Jisas taem hem i stap prij long wol, no yu stap mekem ol trip wetem aposol Pol. Maet yu tingbaot olsem wanem laef blong yu bambae i defren sipos yu stap finis long niufala wol. Tingting gud long ol blesing we yu kasem from we yu stap obei long gud nius. Sipos yu gohed oltaem blong laekem gud nius, ol man we yu tijim olgeta bambae oli luksave samting ya. Taswe i impoten tumas we yumi tingting dip long wanem we yumi lanem, mo yumi lukaotgud long ol tok we yumi tijim narafala long hem.—Ridim 1 Timoti 4:15, 16.

 Yumi Mas Lavem Ol Man

15. ?From wanem tija i mas lavem ol studen blong hem?

¹⁵ Wan gudfala tija i mekem se ol studen blong hem oli haremgud, nao oli no fraet blong talemaot tingting blong olgeta, mo oli wantem lanem plante moa samting. Wan tija we i lavem ol studen blong hem i givim save long olgeta from we hem i rili kea long olgeta. Hem i mekem se tijing blong hem i laenap wetem nid blong olgeta mo i stret long save we oli gat finis. Hem i tingbaot samting we oli naf blong kasem mo mekem, mo laef blong olgeta wanwan. Taem ol tija oli gat lav olsem, ol studen oli luksave. Tija ya i haremgud blong tij, mo ol studen blong hem oli haremgud blong lanem plante samting.

16. ?Olsem wanem Jisas i soem se hem i lavem ol man?

¹⁶ Lav ya nao we Jisas i soemaot long ol man. Hem i soemaot lav ya long nambawan fasin taem hem i givim laef blong hem we i stretgud blong sevem olgeta. (Jon 15:13) Taem Jisas i stap prij, hem i rere oltaem blong givhan long ol man long saed blong bodi, mo blong tijim olgeta long saed blong God. Hem i no ting se ol man oli mas kam long hem, be hem i wokbaot plante handred kilometa blong serem gud nius wetem olgeta. (Mat. 4:23-25; Luk 8:1, NW) Jisas i gat longfala tingting mo i kasem save long tingting mo laef blong man. Taem hem i mas stretem ol disaepol blong hem, hem i mekem wetem lav. (Mak 9:33-37) Hem i pulum olgeta blong kamgud moa taem i soemaot se i trastem olgeta blong oli kam ol gudfala man blong talemaot gud nius. I no gat wan tija samtaem we i lavem ol man olsem Jisas. From we hem i lavem ol disaepol blong hem, olgeta oli lavem hem tu, mo oli obei long ol tok blong hem.—Ridim Jon 14:15.

17. ?Olsem wanem ol disaepol blong Jisas oli soemaot se oli lavem ol man?

¹⁷ Ol disaepol blong Jisas oli folem fasin blong hem blong soemaot bigfala lav mo kaengud fasin taem oli prij. Oli stanap strong taem ol narafala oli mekem i nogud long olgeta mo oli rere blong ded tu, blong karem gud nius i go long ol narafala mo givhan long olgeta. !Oli rili lavem ol man we oli halpem olgeta blong bilif long gud nius! Ol tok we aposol Pol i raetem oli tajem hat blong yumi, hem i se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nius ya nomo long yufala. Mifala i rere tu blong lego laef blong mifala from we mifala i lavem yufala, mo mifala i wantem tumas blong givhan long yufala.”—1 Tes. 2:7, 8.

18, 19. (a) ?From wanem yumi rere blong lego plante samting blong mekem wok blong prij? (b) Talem wan eksampol blong soemaot se ol narafala oli luk lav ya we yumi gat.

¹⁸ Sem mak long taem blong yumi. Ol Witnes blong Jeova oli prij long evri ples blong wol blong faenem olgeta we oli rili wantem save God mo mekem wok blong hem. Long ol 17 yia we oli jes pas, yumi spenem bitim wan bilian aoa evri yia blong talemaot gud nius mo pulum ol man oli kam disaepol. Mo yumi gohed yet long wok ya. Yumi glad blong gohed, nating se yumi mas lego taem, paoa, mane mo olting blong yumi, blong mekem wok blong prij. Olsem Jisas, yumi savegud se Papa blong yumi long heven i lavem ol man, mo i wantem se oli kasem save long trutok we i save lidim olgeta blong  gat laef blong olwe. (Jon 17:3; 1 Tim. 2:3, 4) Lav i pulum yumi blong givhan long ol man we hat blong olgeta i stret blong oli save Jeova mo lavem hem olsem yumi.

¹⁹ Ol narafala oli luk lav ya we yumi gat. Tingbaot wan sista we hem i mekem wok blong paenia long Yunaeted Stet. Hem i stap raetem ol leta blong leftemap tingting blong olgeta we oli lusum wan famle no fren long ded. Wan man i raetbak long hem i se: “Taem mi kasem leta blong yu, mi mi sapraes from we mi no ting se bambae i gat wan man we i glad blong raetem leta i go long man we i no save hem nating, blong halpem hem blong pastru long wan hadtaem. Mi mi luksave se yu yu lavem ol narafala man mo yu lavem God ya we i stap lidim ol man oli go long rod blong laef.”

20. ?From wanem i impoten tumas blong tijim man wetem lav?

²⁰ Wan man blong raetem buk i talem waestok ya se, sipos man i gat lav mo i savegud wok blong hem, tufala samting ya tugeta i save mekem se wok blong hem i nambawan tumas. Taem yumi tijim man, yumi traem halpem hem blong savegud Jeova long tingting blong hem mo lavem Jeova long hat blong hem. Yes, blong rili kam ol gudfala tija, yumi mas gat trifala lav ya: Yumi mas lavem God, lavem trutok, mo lavem ol man. Taem yumi traehad blong gat lav olsem, mo yumi soemaot long wok blong prij, yumi kasem bigfala glad, from we yumi givim presen long ol man. Yumi haremgud tu from we yumi save se yumi stap folem fasin blong Jisas, mo yumi stap mekem Jeova i glad.

?Bambae Yu Yu Ansa Olsem Wanem?

• ?Taem yumi tijim narafala long gud nius, from wanem i impoten blong . . .

lavem God?

lavem trutok we yumi tijim man long hem?

lavem ol man we yumi tijim olgeta?

[Kwestin]

[Tok blong pija long pej 19]

?Wanem i mekem se fasin blong Jisas blong tij i defren long hemia blong ol tija blong Loa mo ol Farisi?

[Tok blong pija long pej 22]

Blong tij gud, yumi mas gat save long Baebol, yumi mas savegud fasin blong tij, mo samting we i impoten moa, yumi mas gat lav