Folem Fasin Blong Jisas Mo Prij Wetem Strong Tingting

“God blong yumi i mekem tingting blong mifala i strong blong kam talemaot gud nius blong hem long yufala.”—1 TES. 2:2.

1. ?From wanem gud nius blong Kingdom i beswan nius?

!YUMI laekem tumas blong harem gud nius! Beswan nius, hemia gud nius blong Kingdom blong God. Gud nius ya i holem promes ya se fasin safa, sik, soa, krae, mo ded, bambae oli finis. Gud nius ya i soemaot rod blong kasem laef we i no save finis, i talem stamba tingting blong God, mo i soem olsem wanem yumi save frengud wetem God mo lavem hem. Olgeta man oli mas glad blong harem nius ya we Jisas i talemaot long ol man. Be sore tumas, plante man oli no glad blong harem gud nius ya.

2. Eksplenem tok blong Jisas se: “Mi kam blong mekem ol man oli seraot.”

² Jisas i talem long ol disaepol blong hem se: “I nogud yufala i ting se mi mi kam blong mekem olgeta man long wol oli stap kwaet. Mi mi no kam blong putum pis nomo, mi kam blong mekem ol man oli seraot tu, oli faet. Mi kam blong mekem yang boe i agens long papa blong hem mo yang gel i agens long mama blong hem, mo yang woman i agens long mama blong man blong hem. Bambae man i gat ol enemi blong hem, we olgeta oli famle blong hem nomo.” (Mat. 10:34-36) Bighaf blong ol man oli no bilif long gud nius ya, oli sakemaot nomo. Samfala oli kam enemi blong ol man we oli talemaot gud nius ya, nating se oli prapa famle blong olgeta.

3. ?Yumi mas gat wanem fasin blong gohed long wok blong prij?

³ Yumi talemaot semfala trutok we Jisas i talemaot. Mo taem ol man tede oli harem trutok ya, plante oli agensem yumi olsem ol man long taem blong Jisas. Yumi save se bambae i mas olsem. Jisas i talem long ol disaepol blong hem se: “I no gat man blong  wok we i hae moa long masta blong hem. Nao from we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20) Long plante kantri, ol man oli no ronem mo kilim yumi, be oli luklukdaon long yumi mo oli no wantem lesin long tok we yumi talemaot. From samting ya, yumi mas gat strong bilif mo fasin blong no fraet, blong yumi save gohed blong talemaot gud nius wetem strong tingting.—Ridim 2 Pita 1:5-8.

4. ?From wanem Pol i mas ‘mekem tingting blong hem i strong’ blong prij?

⁴ Samtaem, ating yu faenem se i had blong joen long wok blong prij, no maet i gat wan haf blong wok blong prij we yu fraet blong mekem. Be i no yu nomo we i harem olsemia. Aposol Pol i wan man we i gat strong tingting blong prij, i no fraet nating, mo i savegud trutok. Be hem tu i faenem i had samtaem blong prij. Pol i raet long ol Kristin long Tesalonaeka, i se: “Yufala i save we taem mifala i stap yet long Filipae, ol man oli mekem i nogud long mifala, mo oli tok nogud tumas long mifala tu. Be God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.” (1 Tes. 2:2) Long Filipae, ol haeman oli wipim Pol mo fren blong hem Saelas, oli sakem tufala long kalabus, mo oli lokem leg blong tufala long wan wud we i olsem bigfala hankaf. (Wok 16:16-24) Nating se oli mekem olsem, be Pol mo Saelas tufala i ‘mekem tingting blong tufala i strong’ blong gohed blong prij. ?Olsem wanem yumi save mekem sem mak? Blong ansa long kwestin ya, bambae yumi tokbaot wanem samting i mekem ol man blong God bifo oli gat strong tingting blong tokbaot trutok long saed blong Jeova. I gud yumi luksave olsem wanem yumi save folem eksampol blong olgeta.

Oli Mas Gat Strong Tingting Taem Ol Man i Agensem Olgeta

5. ?From wanem ol man we oli stap tru long Jeova long taem bifo oli mas gat strong tingting?

⁵ Nambawan eksampol blong man we i no fraet mo i gat strong tingting, hemia Jisas Kraes. Be stat long taem bifo olgeta, ol man we oli stap tru long Jeova oli mas gat strong tingting. ?From wanem? Taem fasin stronghed i kamaot long Iden, Jeova i talem se ol man blong Setan bambae oli no laekem nating ol man blong God, bambae oli agensem olgeta. (Jen. 3:15) I no longtaem, fasin agens ya i kamaot klia, taem stret brata blong gudfala man ya Ebel i kilim Ebel i ded. Biaen, i gat Inok, we hem tu i laef bifo we Bigfala Wota i ron, mo i stap tru long God. Be ol man oli agensem Inok tu. Inok i talemaot profet tok se God bambae i kam wetem ol tabu enjel blong hem blong mekem jajmen i kamtru long ol man we oli no obei long Hem. (Jud 14, 15) Plante man oli no wantem harem tok ya. Oli no laekem nating Inok, mo sipos Jeova i no bin sotem laef blong Inok, bambae ol man oli kilim hem i ded. !Tru ya, Inok i gat strong tingting!—Jen. 5:21-24.

6. ?From wanem Moses i mas gat strong tingting blong toktok long Fero?

⁶ Tingbaot strong tingting blong Moses, taem hem i mas toktok long Fero we i king blong Ijip. Ol man oli ting se ol god oli sanem Fero, be i no hemia nomo, oli ting se Fero tu i wan god. Oli talem se hem i pikinini blong god blong san we nem blong hem Ra. Mo tu, maet Fero ya i mekem sem mak olsem sam narafala Fero, we oli wosipim olgeta wan bakegen. Taem Fero i tok, ol man oli mas obei, hem nao i stap putum ol loa we ol man oli mas folem. Hem i gat paoa, hem i flas mo i stronghed, taswe i no gat wan man we i traem talem long hem wanem we hem i mas mekem. Be traem tingbaot se Moses i go stanap fored long king ya bakegen mo bakegen. Moses i wan man blong lukaot long sipsip, hemia wan wok we i daon nomo. Antap long samting ya, king i no singaot Moses i kam, mo king i no wantem luk hem nating. ?Ale, Moses i talem wanem long Fero? Hem i talemaot ol bigfala trabol we bambae God i mekem long Ijip. ?Mo Moses i askem Fero blong mekem wanem? !Hem i askem Fero blong letem ol milian slef blong hem oli go fri! ?Yu ting se Moses i mas gat strong tingting blong mekem wok ya? !Yes i mas!—Nam. 12:3; Hib. 11:27.

7, 8. (a) ?Wanem trabol i kasem plante gudfala man blong God long taem bifo? (b) ?From wanem plante man we oli laef bifo long taem blong Kraes oli gat strong tingting blong mekem trufala wosip?

⁷ Long ol handred yia afta long taem blong Moses, ol profet mo ol narafala man blong God oli gohed blong mekem trufala wosip we oli no fraet nating. Ol man long wol blong Setan oli no mekem i gud long olgeta. Pol i talem se: “Sam long olgeta, ol man oli stonem olgeta long ston gogo oli ded, mo sam long olgeta, ol man oli tekem so, oli katem  bodi blong olgeta long tu haf, blong kilim olgeta. Mo sam long olgeta, ol man oli kilim olgeta long naef blong faet. Mo sam long olgeta oli stap wokbaot, we oli no gat klos, oli putum ol skin blong sipsip mo nani nomo. Olgeta oli pua tumas, mo oltaem ol man oli stap spolem olgeta, oli stap mekem i nogud tumas long olgeta.” (Hib. 11:37) ?Wanem i givhan long ol gudfala man ya blong God blong oli stanap strong? Bifo we aposol Pol i raetem tok ya antap, hem i tokbaot wanem samting i givim paoa long Ebel, Ebraham, Sera, mo plante narafala we oli stanap strong. Hem i talem se: “Olgeta man ya oli stap bilif strong long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we ol samting ya oli stap longwe yet long olgeta, be oli glad tumas blong luk.” (Hib. 11:13) Ol profet olsem Elaeja, Jeremaea, mo plante narafala man blong God bifo long taem blong Kraes, olgeta tu oli gat strong tingting blong mekem trufala wosip. Yumi save se samting we vas ya i tokbaot i givhan long olgeta tu blong oli stanap strong, hemia se oli putum tingting blong olgeta i stap strong long ol promes blong Jeova.—Taet. 1:2.

⁸ Ol man ya we oli stap tru long God bifo long taem blong Kraes, oli putum tingting blong olgeta long wan gudfala taem long fiuja we bambae i fulap long ol blesing. Taem bambae oli laef bakegen, wok blong Jisas Kraes olsem Hae Pris mo ol 144,000 pris we oli wok aninit long Kraes, bambae i mekem ol man ya oli kam stretgud, bambae ‘oli fri olgeta, we oli no moa mekem sin.’ (Rom 8:21) Mo tu, Jeremaea mo plante narafala man blong God we oli wok wetem strong tingting long taem bifo, oli no fraet, from we oli trastem promes we Jeova i talem long Jeremaea se: “Bambae oli stap tok agens long yu. Be . . . bambae oli no save winim yu, from we mi bambae mi stap wetem yu, mi blokemgud yu. Mi mi Hae God, mo hemia tok blong mi.” (Jer. 1:19) Tede, taem yumi tingbaot ol promes blong God long fiuja, mo promes blong hem blong protektem yumi naoia long ol samting we oli save spolem fasin fren blong yumi wetem hem, yumi tu yumi save kam strong.—Prov. 2:7; ridim 2 Korin 4:17, 18.

Lav i Pulum Jisas Blong Prij Wetem Strong Tingting

9, 10. ?Olsem wanem Jisas i soemaot strong tingting long fored blong (a) ol lida blong skul, (b) ol soldia, (c) hae pris, (d) Paelat?

⁹ Man we i givim eksampol long yumi, Jisas, i soemaot strong tingting long plante defren rod. Olsem, taem hem i toktok long ol haeman we oli gat paoa mo oli no laekem hem nating, hem i no mekem tok blong hem i sofsof blong oli glad long hem, be hem i talemaot klia evri samting we God i wantem se ol man oli kasem save long hem. Long saed blong ol lida blong skul, Jisas i no fraet blong mekem flas fasin blong olgeta mo ol giaman tijing blong olgeta oli kam long klia ples, nating se ol man ya oli gat bigfala paoa. Jisas i talem klia mo stret long olgeta se God bambae i jajem olgeta. Wan taem, hem i talem se: “Ol tija blong Loa mo ol Farisi. Sore tumas long yufala. Yufala i gat tu fes. Yufala i olsem gref blong dedman we man i pentem i waet gud. Afsaed, i waet gud, i naes, be insaed i fulap long bun blong dedman, wetem bodi blong hem we i roten i stap. Long sem fasin, taem man i luk yufala, hem i ting se yufala i stret man, be long insaed, yufala i fulap long giaman mo ol fasin we i no stret.”—Mat. 23:27, 28.

¹⁰ Taem ol soldia oli raonem Jisas long garen blong Getsemane, Jisas i no fraet blong talemaot long olgeta se hem nao man ya we oli stap lukaotem. (Jon 18:3-8) Biaen, oli lidim hem i go stanap fored long kaonsel ya Sanhedrin, nao hae pris i kwestinim hem. Jisas i save se hae pris ya i stap lukaot wan eskius blong kilim hem i ded, be hem i no  fraet blong talemaot klia se hem i Kraes, mo i Pikinini blong God. Hem i talem tu se bambae oli luk hem i stap ‘sidaon long raet saed blong God ya we i gat olgeta paoa, mo bambae oli luk we hem i kamaot long klaod long skae, i kamdaon.’ (Mak 14:53, 57-65) Smoltaem biaen, oli fasem tufala han blong Jisas, oli tekem hem i go stanap fored long Paelat, man ya we i save mekem hem i go fri. Be taem Paelat i talemaot ol poen we ol man oli putum agens long Jisas, Jisas i stap kwaet nomo. (Mak 15:1-5) Blong mekem ol samting ya, Jisas i mas wan man we i no fraet nating.

11. ?Olsem wanem strong tingting i joen wetem lav?

¹¹ Be Jisas i no stap kwaet oltaem, i gat wan samting we hem i talem long Paelat. Hem i se: “Mi mi bon, mo mi kam long wol ya blong wan samting nomo, blong mi witnes long trutok.” (Jon 18:37, NW) Jeova i givim wok long Jisas blong talemaot gud nius. Jisas i haremgud tumas blong mekem wok ya from we hem i lavem Papa blong hem long heven. (Luk 4:18, 19) Jisas i lavem ol man tu. Hem i save se laef blong olgeta i no isi. Yumi tu, yumi prij wetem strong tingting mo fasin blong no fraet, from we yumi lavem God mo yumi lavem ol man raonabaot long yumi.—Mat. 22:36-40.

Tabu Spirit i Givim Paoa Long Yumi Blong Prij Wetem Strong Tingting

12. ?Wanem i givim glad long ol faswan disaepol?

¹² Long ol wik we oli kam biaen long ded blong Jisas, ol disaepol blong hem oli gat wan gudfala risen blong glad. Jeova i joenem plante niufala disaepol long grup blong olgeta. !Long wan dei nomo, samwe long 3,000 Jiu mo proselaet oli baptaes, hemia olgeta we oli aot long ol defren kantri oli kam long Jerusalem blong mekem lafet blong Pentekos! !Ating olgeta man Jerusalem oli stap tokbaot samting ya! Baebol i talem se: “God i stap yusum ol aposol blong i wokem plante samting blong sapraes, mo plante saen blong paoa blong hem tu, nao olgeta man oli seksek tumas long ol samting ya.”—Wok 2:41, 43.

13. ?From wanem ol brata oli prea blong God i mekem tingting blong olgeta i strong? ?Mo wanem i hapen?

¹³ Ol lida blong skul oli kros tumas. Nao oli holem Pita mo Jon, oli sakem tufala long kalabus blong wan naet, mo oli tok strong long tufala se tufala i no moa tokbaot Jisas. Taem tufala i aot long kalabus, tufala i go luk ol brata, tufala i talemaot ol samting we i hapen, nao olgeta evriwan oli joen blong prea long saed blong trabol ya. Oli askem long Jeova se: “Plis yu givhan long mifala, blong bambae mifala i talemaot ol tok blong yu, we tingting blong mifala i strong.” ?Wanem i hapen? ‘Tabu spirit i kam fulap long olgeta, nao oli stat talemaot tok blong God we oli no fraet nating.’—Wok 4:24-31.

14. ?Olsem wanem tabu spirit i givhan long yumi long wok blong prij?

¹⁴ Vas ya i soem se tabu spirit blong Jeova nao i givim paoa long ol disaepol ya blong talemaot tok blong God wetem strong tingting. Fasin ya we yumi no fraet blong talemaot trutok long ol man mo long olgeta tu we oli agensem yumi, hemia i no kamaot long paoa blong yumi. Jeova i save givim tabu spirit long yumi, mo bambae hem i mekem olsem sipos yumi askem long hem. Wetem help blong Jeova, yumi tu yumi save gat strong tingting we yumi nidim blong stanap strong taem ol narafala oli agensem yumi.—Ridim Ol Sam 138:3.

Ol Kristin Tede Oli Prij Wetem Strong Tingting

15. ?Olsem wanem trutok i mekem ol man oli seraot tede?

¹⁵ Tede tu, trutok i mekem ol man oli seraot, olsem i hapen long taem bifo. Samfala oli glad blong harem trutok, be plante oli no laekem mo oli no  respektem wosip blong yumi. Samfala oli tok agens long yumi, jikim yumi, mo oli no laekem yumi nating, olsem Jisas i talem. (Mat. 10:22) Samtaem ol niuspepa, radio, mo televisin, oli talem plante giaman toktok blong spolem yumi mo blong givim rong tingting long ol man long saed blong yumi. (Sam 109:1-3) Nating se i olsem, ol man blong Jeova oli gohed blong talemaot gud nius wetem strong tingting, long olgeta ples blong wol.

16. Talem wan stori we i soem se strong tingting blong yumi i save jenisim tingting blong samfala we yumi prij long olgeta.

¹⁶ Taem ol man oli luk strong tingting we yumi gat, samting ya i save mekem se oli jenisim tingting blong olgeta long saed blong gud nius blong Kingdom. Wan Kristin sista long kantri ya Kyrgystan i talem se: “Mi mi stap prij, nao wan man i talem long mi se: ‘Mi mi bilif long God, be mi no bilif long God blong ol Kristin. !Sipos yu kam stanap long get blong mi bakegen, bambae mi singaot dog blong mi blong ronem yu!’ Mi lukluk i go biaen long man ya, nao mi sek long wan bigfala buldog we oli fasem i stap. Nating se i olsem, mi gobak long haos ya taem mifala i givimaot Kingdom Nius namba 37, ‘!Klosap Nao Ol Giaman Skul Oli Lus!’ Mi ting se maet mi mitim wan narafala memba blong famle ya, be nogat, man ya nomo i openem doa. Mi mekem wan kwik prea long Jeova, nao mi talem se: ‘Halo. Mi mi tingbaot storian blong yumitu tri dei i pas, mo mi tingbaot dog blong yu tu. Be mi no save bitim haos blong yu, mi mas kam luk yu from we mi tu mi bilif long wan trufala God, olsem yu. I no longtaem, God bambae i panisim ol skul we oli spolem nem blong hem. Yu save lanem moa long saed ya sipos yu ridim pepa ya.’ Mi sek we man ya i karem Kingdom Nius ya. Ale mi aot blong go long narafala haos. Sam minit biaen, man ya i resis i kam biaen long mi, mo i holem Kingdom Nius long han blong hem. Hem i talem se: ‘Mi mi ridim finis. ?Mi mas mekem wanem blong God i no panisim mi?’” Witnes ya i statem wan Baebol stadi wetem man ya, mo hem i joen long ol Kristin miting.

17. ?Olsem wanem strong tingting blong wan Kristin sista i givim paoa long wan Baebol studen we i fraet?

¹⁷ Strong tingting blong yumi i save pulum narafala tu blong i gat strong tingting. Long Rasia, wan Kristin sista i stap ron long bas, ale hem i soemaot magasin long woman we i sidaon klosap long hem. Wantaem nomo, wan narafala man long bas ya i stanap, i pulumaot magasin ya long han blong sista, i skwisim, mo i sakem i go long floa. Hem i swea long sista ya long bigfala voes, i talem se sista bambae i givim adres blong hem long hem, mo bambae i no moa prij long vilej. Sista ya i mekem wan smol prea long Jeova blong askem help blong hem, mo i tingbaot tok blong Jisas se: “Yufala i no fraet long olgeta ya we oli save kilim bodi blong yufala i ded, be oli no save kilim sol.” (Mat. 10:28, NW) Nao long kwaet fasin, sista i stanap mo i talem long man ya se, “Bambae mi mi no givim adres blong mi long yu, mo bambae mi gohed nomo blong prij long vilej.” Afta, hem i aot long bas. Be sista ya i no save se wan woman we hem i stap mekem Baebol stadi long hem i stap long bas ya tu. Woman ya i no stap kam long ol Kristin miting from we hem i fraet long tingting blong ol narafala man. Be taem hem i luk strong tingting we sista ya i soemaot, hem i mekem desisen blong go long ol miting.

18. ?Wanem bambae i givhan long yu blong prij wetem strong tingting, olsem Jisas?

¹⁸ Ol man blong wol ya oli stap longwe long God. Taswe, blong prij olsem Jisas, yu mas gat strong tingting. ?Wanem i save givhan long yu? Yu mas lukluk i go long fiuja nomo. Meksua se lav blong yu long Jeova mo ol man raonabaot long yu i stap strong. Prea long Jeova blong i halpem yu blong yu no fraet. Oltaem yu mas rimemba se, yu no stap yu wan. Jisas i stap wetem yu. (Mat. 28:20) Tabu spirit bambae i mekem yu yu strong. Mo Jeova bambae i blesem yu mo i givhan long yu. From samting ya, yumi save mekem tingting blong yumi i strong blong talem se: “Jeova i stap givhan long mi, mi mi no save fraet. ?Ol man oli save mekem wanem long mi?”—Hib. 13:6, NW.

?Bambae Yu Yu Ansa Olsem Wanem?

• ?From wanem ol man blong God oli mas gat strong tingting?

• ?Long saed blong strong tingting, yumi lanem wanem long . . .

ol gudfala man blong God bifo long taem blong Kraes?

Jisas Kraes?

ol faswan Kristin?

ol Kristin tede?

[Kwestin]

[Tok blong pija long pej 25]

Jisas i no fraet blong mekem nogud fasin blong ol lida blong skul i kam long klia ples

[Tok blong pija long pej 26]

Jeova i save mekem tingting blong yumi i strong blong prij