!Ol Kristin Famle, Folem Eksampol Blong Jisas!

“Kraes . . . i soemaot fasin ya long yufala, blong bambae yufala i biaen long hem.”—1 PITA 2:21.

1. (a) ?Pikinini blong God i mekem wanem wok taem God i wokem olgeta samting? (b) ?Wanem filing we Jisas i gat long ol man?

TAEM God i wokem heven mo wol, fasbon Pikinini blong hem i stap klosap long hem “olsem nambawan man blong wok blong hem.” Fastaem Jeova i plan blong mekem ol defdefren anamol mo tri we oli plante we oli plante. Biaen hem i wokem olgeta, mo i mekemrere Paradaes blong i kam hom blong ol man we hem i wokem olgeta long pija blong hem. Long ol yia ya, Pikinini blong hem i wokgud wetem hem. Pikinini ya blong God we biaen ol man oli save hem se Jisas, hem i lavem tumas ol man. “Samting we [hem i] laekem moa hemia ol pikinini blong man.”—Prov. 8:27-31, NW; Jen. 1:26, 27.

2. (a) ?Jeova i givim wanem blong halpem ol sinman? (b) ?Baebol i givim advaes blong halpem ol man long wanem haf blong laef blong olgeta?

² Afta we faswan man mo woman i sin, Jeova i mekem rod blong pemaot ol man long sin. Hemia i wan impoten samting long plan blong Jeova. Blong pemaot ol man long sin, Jeova i givim ransom sakrefaes blong Jisas. (Rom 5:8) Mo Jeova i givim Tok blong hem, Baebol, blong givhan long ol man blong oli save beswan rod blong winim ol trabol blong sin we Adam i pasem long olgeta. (Sam 119:105) Tok blong Jeova i givim advaes we i blong halpem ol man blong oli joengud mo oli hapi long famle blong olgeta. Long saed blong mared, buk blong Jenesis i talem se man i mas “joengud wetem waef blong hem. Mo tufala i mas kam olsem wan bodi nomo.”—Jen. 2:24, NW.

3. (a) ?Jisas i tijim wanem long saed blong mared? (b) ?Bambae yumi tokbaot wanem long stadi ya?

³ Long wok we Jisas i mekem taem i stap long wol, hem i pulum ol man blong tingbaot se man mo woman we i mared, tufala i mas holem promes blong tufala. Mo hem i tijim ol man long ol rul we oli save givhan long ol memba blong famle. Ol rul ya oli halpem ol memba blong famle blong sakemaot ol nogud tingting mo fasin we oli save spolem mared blong hasban mo waef, mo glad we i stap long famle. (Mat. 5:27-37; 7:12) Long stadi ya, bambae yumi tokbaot ol tijing mo eksampol blong Jisas taem hem i stap long wol, mo olsem wanem oli save halpem ol hasban, waef, papa mama, mo ol pikinini, blong oli stap glad mo harem gud long laef.

?Olsem Wanem Kristin Hasban i Ona Long Waef Blong Hem?

4. ?Wanem i sem mak long saed blong wok we Jisas i mekem mo wok blong ol Kristin hasban?

⁴ God i putumap hasban blong i hed blong famle, sem mak olsem we Jisas i Hed blong kongregesen. Aposol Pol i talem se: “Man i hed blong  woman blong hem, olsem we Kraes i hed blong kongregesen, i sevem bodi ya. Ol hasban, yufala i mas gohed blong laekem waef blong yufala, olsem we Kraes i laekem kongregesen tumas, ale, hem i givim laef blong hem blong sevem kongregesen ya.” (Efes. 5:23, 25, NW) Yes, fasin we Jisas i mekem long ol man blong hem i soem fasin we ol Kristin man oli mas mekem long waef blong olgeta. I gud yumi luk long sam fasin we Jisas i soem taem hem i mekem wok we God i givim long hem.

5. ?Olsem wanem Jisas i mekem wok blong hed long ol disaepol blong hem?

⁵ Jisas i wan ‘kwaet man, mo tingting blong hem i stap daon.’ (Mat. 11:29) Mo tu hem i wan man we i kwik blong tekem aksen taem i nidim. Hem i neva les blong mekem ol wok we oli stap long han blong hem. (Mak 6:34; Jon 2:14-17) Hem i stretem ol disaepol blong hem long kaen fasin, nating se samtaem hem i mas stretem olgeta from sem samting bakegen mo bakegen. (Mat. 20:21-28; Mak 9:33-37; Luk 22:24-27) Jisas i no tok strong long olgeta, i no daonem olgeta, mo tu hem i no givim tingting long olgeta se i no gat man i lavem olgeta mo se oli no naf blong mekem samting we hem i stap tijim olgeta long hem. Defren olgeta, hem i talem gudfala toktok long olgeta mo i leftemap tingting blong olgeta. (Luk 10:17-21) !Tru ya, i isi blong luksave olsem wanem lav mo kaen fasin we Jisas i mekem long ol disaepol blong hem bambae i pulum olgeta blong respektem hem!

6. (a) ?Ol hasban oli save lanem wanem long fasin we Jisas i mekem long ol disaepol blong hem? (b) ?Pita i givim wanem advaes long ol hasban?

⁶ Eksampol blong Jisas i tijim ol hasban se ol Kristin hed blong famle oli no mas ting se posisen blong olgeta i min se oli save mekem i strong long waef blong olgeta. Defren olgeta, Kristin hed blong famle i mas respektem waef blong hem mo i mas soem lav we i stanap long fasin blong tingbaot waef blong hem fastaem. Aposol Pita i givim advaes long ol hasban se, taem oli stap wetem waef blong olgeta, oli mas folem “sem fasin” olsem Jisas blong lavem hem, mo oli mas ‘ona long woman blong olgeta.’ (Ridim 1 Pita 3:7. *) ?Ale, olsem wanem hasban i save mekem wok blong hem olsem hed blong famle, mo soem ona long waef blong hem tu?

7. ?Wanem samting we hasban i save mekem blong ona long waef blong hem? Talem sam eksampol.

⁷ Wan rod blong hasban i ona long waef blong hem, hemia blong lesin gud long ol tingting blong hem mo tingbaot filing blong hem bifo we hem i mekem ol desisen blong famle. Maet hem i mas mekem desisen blong oli muv i go long wan narafala ples no blong hem i jenisim wok blong hem. Maet i gat sam samting long saed blong laef blong famle we hasban i mas mekem desisen long hem, olsem weples famle bambae i go spel long hem no olsem wanem famle i save lukaot moa long mane blong olgeta, blong oli save pem samting we oli nidim nating se praes blong olting i go antap. Ol desisen olsem, ful famle i mas folem. From samting ya, i gud we hasban i askem tingting blong waef blong hem. Olsem nao, hem i mekem i gud long waef blong hem mo i soem kaen fasin. Mo taem hem i save tingting blong waef blong hem, samting ya bambae i givhan long hem blong mekem wan desisen  we i stret, we i soem se i tingbaot ol narafala, mo bambae i isi moa long waef blong hem blong folem desisen ya. (Prov. 15:22) Kristin hasban we i ona long waef blong hem i winim lav mo respek blong waef blong hem, mo samting we i moa impoten, se hem i mekem Jeova i glad.—Efes. 5:28, 29.

?Olsem Wanem Waef i Soemaot Bigfala Respek Long Hasban Blong Hem?

8. ?From wanem ol waef oli no mas folem eksampol blong Iv?

⁸ Jisas i soemaot fasin we ol Kristin waef tu oli mas folem. Eksampol blong Jisas blong stap daon aninit long hemia we i hed blong hem, i stret gud olgeta. !Tingting blong hem long saed blong Man we i Hed blong hem i defren olgeta long tingting we faswan waef long wol ya i soemaot! Iv i no soemaot wan gudfala eksampol blong ol waef oli folem. Jeova i givim wok long Adam blong i hed blong Iv, ale Jeova i yusum Adam blong i talemaot ol save blong Hem long Iv. Be Iv i no respektem plan ya we Jeova i stanemap. Hem i no obei long ol save we Adam i talem long hem. (Jen. 2:16, 17; 3:3; 1 Kor. 11:3) I tru se Setan i trikim Iv, be Iv tu i mekem i no stret from we hem i no toktok wetem hasban blong hem fastaem, blong luk sipos i stret blong bilivim tok blong voes ya we i giaman long hem se i stap talem samting we God “i save” finis long hem. Hem i mekem wok we i blong hasban blong hem, hemia se i lidim man blong hem.—Jen. 3:5, 6; 1 Tim. 2:14.

9. ?Jisas i soemaot wanem eksampol blong stap daon long man we i Hed blong hem?

⁹ Fasin we Jisas i soemaot i defren olgeta. Eksampol blong hem blong stap daon long Hed blong hem i stret gud olgeta. Tingting blong hem mo fasin we hem i mekem long laef blong hem i soemaot we “hem i no ting se hem i mas traem kam olsem we hem i sem mak wetem God, no gat.” Be “hem nomo i lego ol samting blong laef ya, nao i kam olsem man blong wok nomo.” (Fil. 2:5-7, NW) Tede Jisas i wan King we i stap rul, be hem i gat sem tingting yet. Tingting blong hem i stap daon, hem i obei long Papa blong hem long olgeta samting, mo hem i glad tumas we Papa blong hem i Hed blong hem.—Mat. 20:23; Jon 5:30; 1 Kor. 15:28.

10. ?Olsem wanem waef i save sapotem hasban blong hem olsem hed blong famle?

¹⁰ I gud we Kristin waef i folem fasin blong Jisas taem hem i sapotem hasban blong hem olsem hed blong famle. (Ridim 1 Pita 2:21; 3:1, 2.) Tingbaot wan taem we waef i save mekem samting ya. Pikinini boe blong yu i kam blong askem long yu sipos hem i save go samples. From we yu mo hasban blong yu i no tokbaot samting ya yet, i stret we yu askem long pikinini blong yu se, “?Yu askem finis long papa blong yu?” Ale sipos pikinini blong yu i no askem yet, i gud we yu tokbaot samting ya fastaem wetem hasban blong yu bifo we yu ansa long pikinini. Antap long samting ya, Kristin waef i no mas talem tok we i agensem tok blong hasban blong hem mo we i agensem tingting blong man blong hem, taem hem i stap wetem ol pikinini. Sipos hem i no agri wetem hasban blong hem long wan samting, hem i mas toktok wetem hasban blong hem taem tufala nomo i stap.—Efes. 6:4.

Eksampol Blong Jisas Long Ol Papa Mama

11. ?Wanem eksampol we Jisas i givim long ol papa mama?

¹¹ Nating se Jisas i no mared mo i no gat pikinini, hem i soemaot ol fasin we oli nambawan blong ol Kristin papa mama oli folem. ?Olsem wanem hem i  mekem olsem? Long toktok mo fasin blong hem, hem i tijim ol disaepol blong hem wetem lav mo longfala tingting. Hem i soem long olgeta olsem wanem blong mekem wok we hem i givim long olgeta. (Luk 8:1) Fasin we Jisas i soem mo tingting we hem i gat long ol disaepol blong hem i tijim olgeta long fasin we oli mas mekem long olgeta.—Ridim Jon 13:14-17.

12, 13. ?Ol papa mama oli mas mekem wanem sipos oli wantem se pikinini blong olgeta i fraetgud long God?

¹² Plante taem ol pikinini oli tekem fasin blong papa mama blong olgeta, nomata se oli ol gudfala fasin no nogat. Taswe, yufala ol papa mama, tingbaot ol kwestin ya: ‘?Mitufala i stap tijim wanem long ol pikinini blong mitufala? ?Oli luk we mitufala i spenem plante taem blong lukluk televisin mo harem gud long ol pleplei, no oli luk we mitufala i spenem taem blong stadi Baebol mo joen long wok blong prij? ?Wanem i rili stap long fasples long laef blong famle blong mifala? ?Mitufala i givim gudfala eksampol blong tingbaot trufala wosip fastaem long laef blong mitufala mo long ol desisen blong mitufala?’ Sipos papa mama i wantem tijim ol pikinini blong tufala blong oli fraet long God, ol loa blong God oli mas stap fastaem long hat blong tufala.—Dut. 6:6.

¹³ Taem papa mama i traehad evri dei blong mekem ol rul blong Baebol oli wok long laef blong tufala, ol pikinini oli luksave samting ya. Ol tok blong papa mama mo ol save we tufala i tijim ol pikinini long hem bambae oli gat paoa long ol pikinini blong tufala. Be sipos ol pikinini oli luk we papa mama i no folem ol rul we tufala i tijim long olgeta, ol pikinini oli save gat tingting se ol rul blong Baebol oli no impoten tumas mo oli no wokgud, nao ating bambae ol pikinini oli no stanap strong taem oli kasem traem.

14, 15. ?Ol papa mama oli mas tijim ol pikinini blong oli wantem mekem wanem? ?Wanem wan rod we oli save mekem samting ya?

¹⁴ Ol Kristin papa mama oli save se wok blong olgeta i no blong lukaot long ol pikinini long saed blong bodi nomo. Wok blong olgeta i go moa. From samting ya, i no waes nating blong tijim pikinini blong traehad from ol mak we oli givhan long hem nomo long saed blong bodi. (Pri. 7:12) Jisas i tijim ol disaepol blong hem se oli mas putum ol fasin mo mak we God i glad long olgeta oli stap fastaem long laef blong olgeta. (Mat. 6:33) Taswe blong folem eksampol blong Jisas, ol Kristin papa mama oli mas traehad tu blong tijim ol pikinini, blong oli wantem mekem moa long wok blong God.

¹⁵ Wan rod blong papa mama i mekem samting ya, hemia blong tekem evri janis blong ol pikinini oli save kampani wetem ol brata sista we oli mekem wok blong God fultaem. Tingbaot sipos ol yangfala oli savegud ol paenia mo seket elda wetem waef blong hem. Samting ya i save givhan bigwan long olgeta. Ol brata sista we oli visitim ples blong yufala, olsem ol misinari, olgeta we oli wok long Betel, mo olgeta we oli wok blong bildim ol haos wosip long ol defren ples long wol, oli save toktok wetem bigfala glad long saed blong ol blesing we oli kasem long wok blong Jeova. Ating olgeta ya oli gat ol nambawan stori blong talem. Eksampol blong olgeta blong lego sam samting we olgeta nomo oli wantem blong mekem wok blong God, i save givhan bigwan long ol pikinini blong yu. Samting ya i save halpem olgeta blong mekem ol desisen we oli waes, blong putum ol mak blong mekem moa long wok blong God, mo blong oli skul kasem mak we  oli naf blong faenem wan wok we i save givhan long olgeta blong oli mekem wok blong God fultaem.

Ol Pikinini—?Wanem Bambae i Givhan Long Yufala Blong Folem Eksampol Blong Jisas?

16. ?Olsem wanem Jisas i ona long papa mama blong hem long wol mo long Papa blong hem we i stap long heven?

¹⁶ Eksampol blong Jisas i nambawan blong yufala ol pikinini tu. God i givim wok long Josef mo Meri blong lukaot long Jisas, mo Jisas i obei long tufala. (Ridim Luk 2:51.) Hem i save se tufala i sinman, be God i givim wok long tufala blong lukaot long hem. From samting ya, hem i mas ona long tufala. (Dut. 5:16; Mat. 15:4) Ale taem Jisas i kam bigman, oltaem hem i mekem samting we Papa blong hem long heven i glad long hem. Hemia i min se hem i mas agensem ol traem we oli pulum hem blong mekem i no stret. (Mat. 4:1-10) Maet samtaem yufala ol yangfala i kasem ol traem we oli pulum yufala blong no obei long papa mama blong yufala. ?Ale, wanem i save givhan long yufala blong folem eksampol blong Jisas?

17, 18. (a) ?Ol yangfala oli kasem wanem traem long skul? (b) ?Ol yangfala oli save tingbaot wanem blong givhan long olgeta blong winim ol traem?

¹⁷ Ating ol fren blong yu long skul oli no tinghae long ol rul blong Baebol. Maet oli traem pulum yu blong mekem sam samting we i no stret, mo sipos yu no wantem mekem, oli jikim yu from. ?Olsem wanem? ?Ol fren blong yu long skul oli singaot yu long ol nogud nem from we yu no mekem sam samting wetem olgeta? Sipos yes, ?yu yu mekem wanem? Yu save se sipos yu fraet mo yu sem nao yu joenem olgeta long nogud samting ya we oli mekem, bambae yu mekem papa mama blong yu i harem nogud mo Jeova tu. Tingbaot wanem i save hapen long yu sipos yu folem olgeta. Maet yu wantem kasem sam mak olsem wok blong paenia, kam man blong givhan, wok long ples we i nidim moa pablisa blong talemaot Kingdom, no wok long Betel. ?Be sipos yu kampani wetem ol fren blong skul, hemia bambae i givhan long yu blong kasem ol mak ya?

¹⁸ ?Samtaem yufala ol yangfala long Kristin kongregesen, yufala i luk se sam samting i hapen we i traem bilif blong yufala? ?Yu yu mekem wanem long taem olsem? Tingbaot fasin we Jisas i soemaot long yu blong yu folem. Hem i no letem ol traem oli pulum hem blong mekem i no stret, be hem i gat strong tingting blong mekem samting we i stret. Sipos yu tingbaot strong tingting ya we Jisas i gat, bambae samting ya i givhan long yu blong talem stret long ol fren blong yu long skul se yu no wantem joenem olgeta blong mekem samting we yu save se i no stret. Olsem Jisas, putum tingting blong yu i stap strong long mak ya blong harem gud long ful laef blong yu long wok blong Jeova mo blong obei long hem.—Hib. 12:2.

Samting We i Mekem Famle i Glad

19. ?Wanem beswan fasin blong laef we i karem trufala glad long laef?

¹⁹ Jeova God mo Jisas Kraes tufala i wantem se ol man oli kasem laef we i beswan. Nating se yumi sinman, be i gat rod blong yumi save glad naoia. (Aes. 48:17, 18; Mat. 5:3) Jisas i tijim ol trutok long saed blong God, mo ol trutok ya oli stamba blong glad. Be i no hemia nomo we Jisas i tijim long ol disaepol blong hem. Hem i tijim olgeta tu long beswan fasin blong laef we man i save folem. Mo antap long ol samting ya, eksampol blong hem i soemaot olsem wanem blong skelemgud ol samting long laef mo gat wan tingting we i stret. Yumi evriwan, nomata wanem wok blong yumi long famle, yumi save harem gud blong folem eksampol blong Jisas. !Ale, yufala ol hasban, ol waef, ol papa mama, mo ol pikinini, yufala evriwan i mas folem eksampol blong Jisas! Blong famle blong yu i harem gud long laef mo stap glad, yu mas bilif long ol samting we Jisas i tijim, mo folem eksampol blong hem.

[Futnot]

?Bambae Yu Yu Ansa Olsem Wanem?

• ?Olsem wanem ol hasban oli mas mekem wok we God i givim long olgeta?

• ?Olsem wanem waef i save folem eksampol blong Jisas?

• ?Ol papa mama oli lanem wanem long fasin we Jisas i mekem long ol disaepol blong hem?

• ?Ol yangfala oli lanem wanem long eksampol blong Jisas?

[Kwestin]

[Tok blong pija long pej 14]

?Hasban we i gat lav bambae i mekem wanem bifo we hem i mekem wan desisen blong famle i folem?

[Tok blong pija long pej 15]

?Wetaem waef i gat janis blong sapotem hasban blong hem olsem hed blong famle?

[Tok blong pija long pej 16]

Ol pikinini oli folem ol gudfala fasin blong papa mama blong olgeta