Sid Blong Trutok i Kasem Olgeta Ples Farawe

RIPABLIK blong Tuva i stap long saot blong Rasia olgeta, klosap long graon blong Saebiria, mo long saot mo is blong Tuva, hemia kantri ya Mongolia. Plante man long Tuva oli laef long ol vilej farawe, mo i no isi blong karem gud nius blong Kingdom i go long olgeta. Wan grup blong ol man Tuva we oli laef long ol vilej ya, oli bin kam long wan miting blong olgeta long Kyzyl, hemia kapital blong Tuva. Maria i wan paenia we i stap long Kyzyl. Hem i harem se grup ya i stap long taon, mo hem i luksave se miting ya i givim gudfala janis long hem blong talemaot gud nius long olgeta ya we maet oli bin harem gud nius wanwan taem nomo.

Maria i storebaot samting we i hapen i se: “Skul we mi mi tij long hem, i mekem plan blong holem wan miting long saed blong fasin blong dring tumas alkol mo blong blokem olgeta fasin blong yusum drag. I gat samwe 50 man we oli laef long Tuva long ol vilej ya farawe, we oli kam long miting ya. Long grup ya, i gat ol tija, ol man we oli stadi long fasin blong man, ol man blong gavman we oli stap jekemap sipos ol pikinini oli stap kasem samting we oli nidim, mo sam narafala bakegen.” Miting ya i givim janis long Maria blong prij, be i no isi long hem blong mekem olsem. Hem i eksplenem se: “Mi mi wan woman blong sem, mo mi faenem i had blong tekem janis blong prij long ol man. Be mi prea long Jeova blong hem i givhan long mi blong mi no fraet long man, mo blong mi yusum janis ya we mi gat blong prij long ol man.” ?Olsem wanem? ?Hem i winim fasin ya blong fraet?

Maria i gohed i talem se: “Mi faenem wan Wekap! we i tokbaot sik ya we man i fraet we i fraet long sam samting, no blong mekem sam samting (phobia). Mi stap tingbaot se, ‘Maet man blong stadi long tingting blong man i intres blong ridim haf ya,’ ale mi tekem magasin ya i go long skul. Long dei ya nomo, wan long ol tija we i kam long miting ya, i kam luk mi long ofis, mo mi givim magasin ya long hem. Hem i glad blong tekem magasin ya. Mo hem i talem long mi se hem tu i gat sik we magasin ya i tokbaot. Long nekis dei, mi givim buk ya, Ol Kwestin We Ol Yangfala Oli Askem—Ol Ansa We Oli Wok Gud, Buk 1 long hem. Hem i glad tumas blong tekem buk ya, mo from samting ya, mi stap tingting se maet ol narafala tija tu bambae oli intres long buk ya. Ale, mi karem wan katon blong buk ya, Ol Kwestin We Ol Yangfala Oli Askem, mo sam narafala buk tu i go long skul.” I no longtaem, katon i emti. Maria i tokbaot wanem i hapen i se: “Sam fren blong tija ya we mi mi givim buk ya, Ol Kwestin We Ol Yangfala Oli Askem, long hem, oli kam long ofis blong mi mo oli askem se: ‘?Oli givimaot ol buk ya long weples?’” !Oli kam long stret ples!

Sarede hem i las dei blong miting ya. Hemia dei we Maria i no wok, ale hem i putum ol buk long sam tebol long ofis blong hem. Mo hem i raetem tok ya long blakbod se: “!Ol Tija! Yufala i save tekem ol buk ya mo yufala i save tekem blong ol fren blong yufala tu we maet oli laekem blong ridim olgeta. Ol gudfala buk ya bambae oli halpem yufala blong gohed gud long wok blong yufala mo mekem famle blong yufala i stap strong long bilif.” ?Wanem samting i kamaot? “Mi go long ofis blong mi long dei ya nomo mo mi luk we oli bin karem klosap olgeta buk ya evriwan. Kwiktaem nomo mi go tekem sam moa buk mo magasin i kam.” Long en blong miting ya, Maria i givimaot 380 magasin, 173 buk mo 34 buklet. Taem ol tija ya oli gobak blong wok long ol ples blong olgeta farawe, oli karem ol magasin ya i go wetem olgeta. Maria i talem se, “!Mi mi glad tumas we ol sid blong trutok oli kasem olgeta ples blong Tuva we oli stap farawe!”—Prija 11:6.

[Map blong pija long pej 32]

(Lukluk niuspepa)

RASIA

RIPABLIK BLONG TUVA