?Yu Mas Mekem Wanem Blong Kasem Save Long Baebol?

 3. Yu Mas Glad Blong Kasem Help Blong Narafala

Edward John Eyre i wan man blong wokbaot olbaot blong faenem ol niufala ples. Taem hem i wokbaot krosem draeples ya Nullabor Plain, ol Abrojinis oli tijim hem olsem wanem blong faenem wota long ol bigfala hif sanbij mo long tri ya yukaliptus. Save ya we Masta Eyre i glad blong kasem long olgeta we oli savegud kantri ya, i sevem laef blong hem biaen.

STORI ya i soemaot se blong finisim wan wok we i had, plante taem yumi nidim help blong narafala we i savegud wok ya. I sem mak taem yu stat blong ridim Baebol.

Jisas i no ting se ol man blong hem oli naf blong kasem save long Baebol, olgeta nomo. Wan taem, “hem i openem tingting blong olgeta blong oli savegud ol tok blong Baebol.” (Luk 24:45) Jisas i save se ol man blong ridim Baebol bambae oli nidim help blong oli kasem save long ol tijing blong Baebol.

?Hu i Save Givim Help?

Jisas i talem long ol trufala man blong hem se oli mas givim help ya. Bifo we Jisas i go antap long heven, hem i talem long olgeta se: “Yufala i mas go long ol man long olgeta ples long wol, blong pulum olgeta oli kam man blong mi . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Faswan wok blong ol Kristin i blong tijim ol narafala. Hemia i min se oli mas eksplenem long olgeta olsem wanem blong folem ol tingting blong Baebol evri dei long laef blong olgeta. Yes, ol trufala Kristin oli halpem ol narafala blong oli kasem save long Baebol.

I no longtaem afta we Jisas i givim wok ya long ol man blong hem, wan samting i hapen we i pulum tingting blong yumi. Baebol i stori long saed blong wan haeman blong Itiopia we i stap ridim profet tok blong Aesea. Man ya i faenem wan haf we i had blong kasem save long hem. Stori blong Baebol i talem se vas we i mekem tingting blong hem i fasfas, hemia: “Hem i olsem wan sipsip we  oli tekem blong kilim blong kakae. Hem i olsem wan smol sipsip nomo, we oli stap katemaot hea blong hem, be hem i no save krae. Hem i no talem wan samting nating. Olgeta oli mekem sem long hem, mo taem oli jajem hem, oli mekem i no stret long hem. I no gat man i save talem se man ya i gat pikinini blong hem, from we olgeta oli katem laef blong hem long wol ya, i sotfala nomo.”—Ol Wok 8:32, 33; Aesea 53:7, 8.

Haeman ya i askem long Filip, wan Kristin we i savegud Baebol, i se: “?Hu man ya we profet ya i stap tokbaot? ?Hem i stap tokbaot hem nomo, no i stap tokbaot wan narafala man?” (Ol Wok 8:34) Man Itiopia ya we i rili wantem kasem save long Baebol i jes go finis long Jerusalem blong mekem wosip, mo ating hem i prea long God blong i lidim hem. I klia se taem hem i ridim Baebol hem i rili wantem kasem save long hem, mo i ridim wetem tingting daon. Nating se i olsem, haeman ya i no kasem save long profet tok ya. Ale, wetem tingting daon, hem i askem long Filip blong i halpem hem. Taem Filip i eksplenem mining blong tok ya long hem, hem i glad we i glad, nao hem i kam wan Kristin.—Ol Wok 8:35-39.

Ol Witnes blong Jeova tede oli gohed blong mekem sem wok we Filip mo ol narafala Kristin long  taem bifo oli mekem. Long bitim 235 kantri, ol Witnes oli halpem ol narafala blong kasem save long samting we Baebol i rili tijim, mo oli no kasem pei from. Blong halpem ol man, oli mekem Baebol stadi long olgeta. Blong stadi Baebol sloslo olsem, oli tekem wan kwestin no wan poen, nao oli skelemgud ol tok we Baebol i talem long saed ya. *—Lukluk bokis ya “Ol Stret Ansa Long Ol Kwestin Blong Baebol.”

“Mi Faenem Ansa Blong Olgeta Kwestin Blong Mi”

Steven, Valvanera, mo Jo-Anne, we yumi tokbaot long fas haf blong magasin ya, trifala i stat blong stadi Baebol wetem ol Witnes blong Jeova. Steven i talem se: “Mi mi sapraes bigwan se taem mifala i skelem sam tingting mo stori blong Baebol, trutok we mi stap lukaotem i stap long klia ples nomo. Bifo we mi stadi Baebol wetem ol Witnes, i no gat wan man we i soem long mi olsem wanem blong skelem ol save ya. Mi harem gud tumas blong faenemaot se blong kasem save long Baebol, i no nid blong ol man oli gohed blong raorao long hem mo tokbaot ol defdefren tingting long saed ya.”

Tingting blong Valvanera i klosap sem mak. Hem i talem se: “Evri samting we mi mi lanem long Baebol stadi blong mi i klia, mo i isi blong luksave se i tru. Mi lanem blong bilif long samting from we i gat klia save mo pruf, i no from we Jos i talem se mi mas bilivim.” Jo-Anne i talem se: “Taem mi faenem ansa blong olgeta kwestin blong mi long Baebol, mi mi gat bigfala ona mo respek long Man ya we i givim Baebol long yumi. Mi luk se longtaem finis, hem i tingbaot blong raetemdaon ol gudfala ansa blong evri kwestin we ol man bambae oli askem.”

?Olsem wanem? ?Yu yu save wan Witnes blong Jeova? Sipos yes, i gud yu askem long hem blong i soemaot long yu olsem wanem oli mekem Baebol stadi long ol man. Sipos yu no save wan Witnes blong Jeova, plis raet i kam long wan long ol adres long pej 4 blong magasin ya. Sipos tabu spirit blong God i halpem yu, mo yu openem tingting blong yu, mo wan man we i savegud Baebol i tijim yu, ale Tok blong God bambae i no stap olsem wan buk we i had blong kasem save long hem. !I gat rod blong yu yu kasem save long Baebol!

[Futnot]

[Bokis blong pija long pej 6]

Ol Stret Ansa Long Ol Kwestin Blong Baebol

Sam long ol kwestin we ol Witnes blong Jeova oli halpem ol man blong faenem ansa blong olgeta long Baebol stadi, hemia:

• ?Wanem stamba tingting blong God long saed blong wol ya?

• ?Ol dedman oli stap wea?

• ?Yumi stap finis long “ol las dei”?

• ?From wanem God i letem man i safa?

• ?Olsem wanem blong mekem famle blong mi i hapi?

[Tok blong makem poen long pej 7]

Blong kasem save long Baebol . . . yu mas prea blong askem God blong givim spirit blong hem, yu mas ridim Baebol wetem tingting we i open, mo yu mas glad bong kasem help blong narafala