?I Gat Rod Blong Kasem Save Long Baebol?

“Evri Sande, mifala long famle i sidaon tugeta blong ridim Baebol. Mi mi no laekem tumas blong ridim Baebol. Mi bilif se Baebol i Tok blong God, be mi faenem i had blong kasem save long plante samting long hem.”—Steven, Inglan.

“Taem mi gat 17 yia, mi traem blong ridim Baebol. Mi faenem i had blong kasem save long hem, ale mi lego.”—Valvanera, Spen.

“Mi ridim Baebol fulwan from we mi ting se mi, we mi wan Katolik, mi mas ridim. !Mi tekem tri yia blong finisim! Be mi kasem save long smol samting nomo.”—Jo-Anne, Ostrelia.

TEDE, Baebol i stap yet olsem buk we ol man oli ridim moa i bitim ol narafala buk. Mo Baebol i stap yet olsem buk we ol stoa oli salem moa i bitim ol narafala buk. Plante moa man oli save kasem wan Baebol. Baebol i stap long plante moa lanwis. Mo ol man oli save kasem Baebol long CD mo DVD tu, i no long buk nomo. Nating se i olsem, plante man we oli gat wan Baebol oli faenem i had blong kasem save long hem. ?Olsem wanem long yu? ?Yu tu yu gat problem ya?

?God i Wantem We Yumi Kasem Save Long Tok Blong Hem?

Baebol i talem se: “Olgeta tok blong Baebol oli kamaot long God fastaem.” (2 Timoti 3:16) Yes, Jeova God i givim Baebol long yumi. ?Yu ting se hem i wantem we yumi kasem save long Tok blong hem? ?Maet hem i minim nomo se Baebol i mas wan buk we i had blong kasem save long hem? ?Hem i wantem we samfala nomo, olsem ol lida blong skul mo ol man blong hae save, oli kasem save long Baebol?

Traem tingting long ol vas ya blong Baebol:

“Ol loa ya we mi mi stap givim long yufala tede oli no strong tumas, mo oli no stap longwe we yufala i no save go blong tekem.”—Dutronome 30:11.

“Taem mining blong ol tok blong yu i klia, hem i givim laet long man, mo i mekem man we i no gat save i kam waes.”—Ol Sam 119:130.

‘Long taem ya, tabu spirit i mekem Jisas i harem gud tumas, nao hem i prea, i talem se, “Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli savegud.”’—Luk 10:21.

!Ol vas ya oli soemaot klia se God i wantem we yumi kasem save long Tok blong hem! Nating se i olsem, plante man we oli rili wantem kasem save long Baebol, oli faenem i had tumas. ?Wanem i save givhan long olgeta? Ol haf we oli kam biaen oli tokbaot tri samting we oli save givhan long yu blong kasem save long Baebol.