Laef Blong Olwe Long Wol—?Wan Promes We i Stret Long Ol Kristin?
Laef Blong Olwe Long Wol—?Wan Promes We i Stret Long Ol Kristin?
“[God] bambae i ravemaot wota blong ae blong olgeta. Nao bambae i no moa gat man i ded.”—REV. 21:4.
1, 2. ?Olsem wanem yumi save se plante man Isrel long faswan handred yia oli putum tingting blong olgeta i stap strong long laef blong olwe long wol?
WAN yangfala man we i rij mo i gat haenem i resis i go long Jisas, i nildaon long fored blong hem, mo i askem se: “Tija. Yu yu wan gudfala man. ?Bambae mi mas mekem olsem wanem blong kasem laef ya we i no save finis?” (Mak 10:17) Yangfala man ya i stap askem blong kasem laef we i no save finis, ?be long weples? ?Long heven no long wol? Olsem yumi bin luk long laswan stadi, plante handred yia bifo long taem blong Jisas, God i mekem promes ya blong laef bakegen mo laef blong olwe long wol, we ol man Isrel oli putum tingting blong olgeta i stap strong long hem. Plante man Isrel we oli laef long faswan handred yia K.T., * olgeta tu oli putum tingting blong olgeta i stap strong long promes ya.
2 I luk olsem se Mata we i wan fren blong Jisas, i tingbaot laef bakegen long wol taem hem i tokbaot brata blong hem we i ded, i se: ‘Mi mi save we bambae long las dei, hem i save laef bakegen long taem ya we olgeta man bambae oli laef bakegen.’ (Jon 11:24) I tru, long taem ya ol Sadusi oli no bilif se ol dedman bambae oli laef bakegen. (Mak 12:18) Be wan man we nem blong hem George Foot Moore, i raetem long wan buk blong hem (Judaism in the First Centuries of the Christian Era), se: “Ol buk we ol man oli raetem long ol tu handred yia bifo long taem blong Kraes, oli soemaot se ol man long taem ya oli wet long wan bigfala taem blong jenis long fiuja, we ol man blong bifo bambae oli laef bakegen long wol.” Rijman ya we i go toktok wetem Jisas i wantem kasem laef blong olwe long wol.
3. ?Wanem ol kwestin we bambae yumi tokbaot long stadi ya?
3 Tede, plante jos mo man blong stadi long Baebol oli talem se Jisas i no tijim we man bambae i laef blong olwe long wol. Bighaf blong ol man oli bilif se taem oli ded, bambae oli gohed blong laef long wan ples blong ol spirit man, mo oli putum tingting blong olgeta i stap strong long laef ya. From samting ya, taem ol man oli ridim Kristin Grik haf blong Baebol, mo oli faenem tok ya “laef we i no save finis,” plante long olgeta oli ting se hemia i minim laef long heven. ?Be samting ya i tru? Taem Jisas i tokbaot laef we i no save finis, ?hem i minim wanem? ?Ol disaepol blong hem oli bilif long wanem? ?Kristin Grik haf blong Baebol i tijim yumi se yumi save putum tingting blong yumi i stap strong long laef we i no save finis long wol?
Laef We i No Save Finis “Long Niufala Wol”
4. ?Wanem ol samting we bambae oli hapen “long niufala wol ya we bambae i kam”?
4 Baebol i talem se ol Kristin we tabu spirit i makemaot olgeta, bambae oli laef bakegen long heven blong rul antap long wol. (Luk 12:32; Rev. 5:9, 10; 14:1-3) Be i no oltaem we Jisas i tingbaot smol grup ya taem hem i tokbaot laef we i no save finis. Tingbaot tok we Jisas i talem long ol disaepol blong hem, taem yangfala rijman ya i gowe long hem, from we Jisas i askem long man ya blong lego olgeta samting, mo biaen long hem. (Ridim Matiu 19:28, 29.) Jisas i talem long ol disaepol blong hem se olgeta bambae oli stap long grup ya we i rul olsem king. Mo bambae oli jajem “ol twelef laen blong Isrel,” hemia olgeta man we oli no stap long grup ya blong rul long heven. (1 Kor. 6:2) Mo tu, Jisas i tokbaot wan presen we bambae hem i givim long ol man we oli folem hem. Ol man ya tu ‘bambae oli gat laef we i no save finis.’ Olgeta samting ya bambae i hapen “long niufala wol ya we bambae i kam.”
5. ?Olsem wanem bambae yu eksplenem “niufala wol” ya we Jisas i tokbaot long Matiu 19:28?
5 ?Jisas i minim wanem taem hem i tokbaot “niufala wol”? Taem Jisas i yusum tok ya “niufala wol,” hem i no eksplenem mining blong hem. Taswe, i klia se hem i stap tokbaot wan samting we ol man Isrel oli putum tingting blong olgeta i stap strong long hem plante handred yia finis. Bambae olgeta samting long wol i kam niuwan bakegen, bambae i kam sem mak olsem garen blong Iden taem Adam mo Iv i no mekem sin yet. Promes ya blong God blong “mekem niufala heven mo niufala wol” bambae i kamtru long niufala wol ya we bambae i kam.—Aes. 65:17.
6. ?Yumi lanem wanem long pijatok ya blong ol sipsip mo nani, long saed blong laef olwe we yumi putum tingting blong yumi i stap strong long hem?
6 Taem Jisas i stap tokbaot en blong ol fasin blong wol ya, hem i tokbaot bakegen laef we i no save finis. (Mat. 24:1-3) Hem i talem se: “Long taem ya we mi, mi Pikinini blong Man bambae mi King mi gat olgeta paoa, bambae mi kamtru wetem olgeta enjel blong heven, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i stap seraot ol sipsip blong hem long ol nani blong hem.” Olgeta we hem i jajem olgeta, “bambae oli go blong kasem panis ya we i no save finis [“lus blong olwe,” NW]. Be ol stret man ya bambae oli go blong kasem laef ya we i no save finis.” “Ol stret man ya” we bambae oli kasem laef we i no save finis, hemia ol man we oli stap tru long ol “brata” blong Jisas we tabu spirit i makemaot olgeta, mo we oli givhan long olgeta. (Mat. 25:31-34, 40, 41, 45, 46) God i jusum ol tabu brata ya blong Jisas, blong oli rul long Kingdom blong heven. From samting ya, “ol stret man ya” i mas minim ol man we bambae oli laef long wol ya, aninit long rul blong Kingdom ya. Baebol i talemaot profet tok ya se: “Bambae hem [King we Jeova i jusumaot] i king long olgeta ples, i stat long solwota narasaed, i go kasem solwota narasaed, i stat long Yufretes Reva, i go kasem en blong wol.” (Sam 72:8) Ol man we oli stap aninit long rul blong Kingdom ya bambae oli haremgud blong laef olwe long wol.
?Gospel Blong Jon i Soemaot Wanem?
7, 8. ?Jisas i toktok long Nikodimas long saed blong wanem tufala promes?
7 Long Gospel blong Matiu, Mak, mo Luk, Jisas i yusum tok ya “laef we i no save finis” long ol taem ya we yumi tokbaot finis. Mo Gospel blong Jon i soemaot se Jisas i tokbaot laef blong olwe samwe long 17 taem. I gud yumi tokbaot sam long ol taem ya blong luk wanem samting Jisas i talem long saed blong laef blong olwe long wol, we yumi putum tingting blong yumi i stap strong long hem.
8 Folem Gospel blong Jon, faswan taem we Jisas i tokbaot laef we i no save finis, hemia taem hem i toktok long wan Farisi we nem blong hem, Nikodimas. Jisas i talem long Nikodimas se: “Tru mi talem long yu, sipos man i no bon bakegen, bambae hem i no save luk Kingdom blong God.” Yes, olgeta we oli go insaed long Kingdom blong heven oli mas “bon bakegen.” (Jon 3:3-5, NW) Jisas i no stop long ples ya. Biaen, hem i tokbaot gudfala fiuja ya we i stap long fored blong olgeta man. (Ridim Jon 3:16.) Jisas i stap tokbaot laef we i no save finis long heven, we ol man blong hem we tabu spirit i makemaot olgeta bambae oli kasem, mo laef we i no save finis we ol narafala man blong hem bambae oli kasem long wol.
9. ?Jisas i tokbaot wanem promes long wan woman Sameria?
9 Afta we Jisas i toktok wetem Nikodimas long Jerusalem, Jisas i wokbaot i go long Galili, we i stap long not. Taem Jisas i kasem Sameria, stret long wel blong Jekob we i stap klosap long taon blong Saeka, hem i mitim wan woman. Hem i talem long woman ya se: “Man we i dring wota ya we mi bambae mi givim long hem, bambae hem i no save tosta bakegen samtaem. Wota ya we mi bambae mi givim long hem i save kam olsem wan springwota we i save ron oltaem insaed long hem, blong givim laef ya long hem we i no save finis.” (Jon 4:5, 6, 14) Wota ya i saen blong ol samting we God i mekem blong givim laef we i no save finis long ol man bakegen, hemia laef we i no save finis long wol tu. Long buk blong Revelesen, yumi ridim tok we God i talem se: “Man we i tosta, bambae mi mi givim wota long hem we hem i no pem, we i kam long springwota we i gat laef long hem.” (Rev. 21:5, 6; 22:17) Taswe, Jisas i stap tokbaot laef we i no save finis long woman Sameria. Laef ya i no blong olgeta ya nomo we tabu spirit i makemaot olgeta mo we bambae oli rul long Kingdom, be i blong ol man ya tu we oli bilif long God mo ol promes blong hem, mo we oli putum tingting blong olgeta i stap strong long laef blong olwe long wol.
10. ?Afta we Jisas i mekem wan man i kamgud bakegen long bigfala wota blong Betsata, hem i talem wanem long saed blong laef we i no save finis, long ol man Isrel we oli agensem hem?
10 Wan yia biaen, Jisas i go long Jerusalem bakegen. Long ples ya, hem i mekem wan sikman we i stap long saed blong bigfala wota blong Betsata, i kamgud bakegen. Taem ol man Isrel oli tok agensem samting we hem i mekem, hem i eksplenem se: “Mi mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i stap mekem.” Afta we Jisas i talem long olgeta se Papa blong hem ‘i putum wok ya blong jajem man long han blong hem,’ hem i gohed i se: “Man we i harem tok blong mi, mo i bilif long Papa blong mi we i sanem mi mi kam, hem i gat laef we i no save finis.” Jisas i talem bakegen se: “I gat taem i stap kam we ol dedman bambae oli harem voes blong mi [Pikinini blong man], nao bambae oli aot long beregraon blong olgeta. Olgeta we bifo oli stap mekem ol gudfala fasin, oli mas stanap bakegen blong kasem laef. Be olgeta we bifo oli stap mekem ol rabis fasin, oli mas stanap bakegen blong pas long bigfala kot ya, blong mi save jajem olgeta.” (Jon 5:1-9, 19, 22, 24-29) Jisas i stap talem long ol man Isrel we oli agensem hem, se God i jusumaot hem nao blong mekem promes ya we oli stap putum tingting blong olgeta i stap strong long hem, i kamtru. Promes ya hemia laef we i no save finis long wol. Mo Jisas i talem long olgeta se blong mekem promes ya i kamtru, bambae hem i mekem ol dedman oli girap bakegen.
11. ?Olsem wanem yumi save se tok blong Jisas long Jon 6:48-51 i stap tokbaot promes ya blong laef olwe long wol tu?
11 Long Galili, plante taosen man oli folem Jisas from we oli wantem se hem i mekem merikel mo givim kakae long olgeta. Jisas i toktok long olgeta long saed blong wan narafala kakae, hemia ‘kakae ya we i blong givim laef.’ (Ridim Jon 6:40, 48-51.) Hem i talem se: “Kakae ya we mi bambae mi givim, hem i mit blong bodi blong mi.” Jisas i givim laef blong hem blong sevem olgeta ya we bambae oli rul wetem hem long Kingdom blong heven, be i no hemia nomo. Hem i givim laef blong hem tu “blong ol man long wol oli gat laef.” “Man we i kakae kakae ya,” hemia i min se sipos wan man i bilif long paoa blong sakrefaes blong Jisas blong pemaot ol man, hem i save putum tingting blong hem i stap strong long laef we i no save finis. Yes, taem Jisas i tokbaot “laef gogo i no save finis,” hem i stap tokbaot promes ya we longtaem finis i kam, ol man Isrel oli putum tingting blong olgeta i stap strong long hem, hemia blong laef olwe long wol, aninit long rul blong Mesaea.
12. ?Jisas i stap tokbaot wanem, taem hem i talem long ol enemi blong hem se bambae ‘hem i givim laef we i no save finis long ol sipsip blong hem’?
12 Biaen, long Lafet blong Dedekesen long Jerusalem, Jisas i talem long ol enemi blong hem, se: “Yufala i no save bilif long mi, from we yufala i no sipsip blong mi. Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi. Mo mi mi givim laef ya long olgeta we i no save finis.” (Jon 10:26-28) ?Olsem wanem? ?Jisas i stap tokbaot laef long heven nomo, no hem i stap tokbaot laef we i no save finis long paradaes long wol tu? I no longtaem bifo long hemia, Jisas i talem ol tok blong leftemap tingting blong ol man blong hem, i se: “Smol kampani blong ol sipsip, yufala i no fraet, from we Papa blong yufala hem i glad tumas blong givim kingdom long yufala.” (Luk 12:32, NW) Be long semfala Lafet ya blong Dedekesen, Jisas i talem se: “Mi gat ol narafala sipsip bakegen we oli no blong yad ya. Bambae mi mas tekem olgeta tu oli kam.” (Jon 10:16) Taswe, taem Jisas i toktok long ol enemi ya blong hem, hem i stap tokbaot laef long heven we “smol kampani” bambae i kasem, mo laef olwe long wol we ol milian “narafala sipsip” bambae oli kasem.
Wan Promes We i No Nid Blong Eksplenem
13. ?Jisas i minim wanem taem hem i talem se: “Bambae yu yu stap wetem mi long Paradaes”?
13 Taem Jisas i stap hang long pos mo i harem nogud bitim mak, hem i soemaot se promes ya bambae i mas kamtru, mo i no gat man we i save blokem. Wan man nogud we i stap hang klosap long Jisas, i talem se: “Jisas, taem we bambae yu kasem kingdom blong yu, plis yu tingbaot mi bakegen.” Jisas i promes long hem se: “Tru mi mi talem long yu tede, se bambae yu yu stap wetem mi long Paradaes.” (Luk 23:42, 43, NW) I klia se man ya i wan man Isrel, taswe i no nid blong Jisas i eksplenem Paradaes long hem. Man ya i save finis promes ya blong laef olwe long wan niufala wol we bambae i kam.
14. (a) ?Wanem i soemaot se i hadwok blong ol aposol oli kasem save long toktok blong Jisas long saed blong laef long heven? (b) ?Wetaem ol man blong Jisas oli kasem save gud long promes ya blong laef long heven?
14 Samting we i gat nid blong eksplenem, hemia tok we Jisas i talem long saed blong promes ya blong laef long heven. Taem hem i talem long ol disaepol blong hem se bambae hem i go long heven blong mekemrere ples blong olgeta, oli no kasem save se hem i minim wanem. (Ridim Jon 14:2-5.) Sam taem biaen, Jisas i talem long olgeta se: ‘Mi mi gat plante narafala samting yet blong talem long yufala. Be naoia yufala i no save kasem olgeta evriwan, oli strong tumas yet long yufala. Be taem spirit ya we i stamba blong trutok i kam, hem bambae i save tijim yufala long olgeta tok we i tru.’ (Jon 16:12, 13) Long dei blong Pentekos long yia 33 K.T., spirit blong God i makemaot ol man blong Jisas blong oli kam ol king we bambae oli rul long Kingdom. Afta long taem ya nomo, oli jes kasem save se jea blong king blong olgeta bambae i stap long heven. (1 Kor. 15:49; Kol. 1:5; 1 Pita 1:3, 4) Long taem ya, janis ya blong kasem laef long heven i wan niufala save, mo olgeta leta we tabu spirit i pulum ol man blong raetem long Kristin Grik haf blong Baebol, oli tokbaot niufala save ya. ?Be olsem wanem? ?Ol leta ya oli mekem se ol man oli save putum tingting blong olgeta i stap strong bakegen long promes blong laef olwe long wol?
?Ol Leta We Oli Kamaot Long God, Oli Talem Wanem?
15, 16. ?Olsem wanem leta blong Hibrus mo ol tok blong Pita oli soemaot se bambae i gat laef blong olwe long wol?
15 Long leta blong Hibrus we aposol Pol i raetem, hem i singaot ol Kristin brata sista blong hem se “ol tabu brata, olgeta we God i jusumaot olgeta blong oli go long heven.” Be hem i talem tu se God i putum “niufala wol ya we bambae i kamtru” i stap aninit long han blong Jisas. (Hib. 2:3, 5; 3:1, NW) Long Kristin Grik haf blong Baebol, oltaem tok ya “niufala wol ya” i minim wol blong yumi we i fulap long ol man. Taswe, “niufala wol ya we bambae i kamtru,” hem i niufala fasin blong laef blong ol man, long wol ya we bambae i stap aninit long rul blong Jisas Kraes. Long taem ya nao, Jisas bambae i mekem promes ya blong God i kamtru, we i talem se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Sam 37:29.
16 Tabu spirit i pulum aposol Pita tu blong raetem samting we bambae i hapen long ol man long fiuja. Hem i raetem se: ‘Skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala dei ya we God bambae i jajem ol man we oli no obei long hem, nao bambae oli lus.’ (2 Pita 3:7) ?Wanem bambae i tekem ples blong gavman blong man, we i olsem skae, mo ol rabis man we oli stap tede? (Ridim 2 Pita 3:13.) Samting we bambae i tekem ples blong olgeta, hemia “niufala skae,” we i minim Kingdom blong God we Mesaea i rul long hem, mo “niufala wol,” we i minim ol stret man we oli folem trufala wosip.
17. ?Olsem wanem Revelesen 21:1-4 i tokbaot promes ya we ol man oli putum tingting blong olgeta i stap strong long hem?
17 Laswan buk blong Baebol i tokbaot wan vison we i tajem hat blong yumi. Vison ya i soemaot olgeta man we oli kam stretgud olgeta bakegen. (Ridim Revelesen 21:1-4.) Hemia nao samting we ol man we oli bilif long God mo ol promes blong hem, oli putum tingting blong olgeta i stap strong long hem, stat long taem we faswan man mo woman tufala i mekem sin long garen blong Iden. Ol stret man bambae oli laef blong olwe long Paradaes long wol mo oli no save kam olfala bakegen. Promes ya i stanap long Hibru haf blong Baebol mo Kristin Grik haf blong Baebol tugeta, mo promes ya i gohed blong givim paoa long ol man blong Jeova kam kasem tede.—Rev. 22:1, 2.
[Futnot]
^ par. 1 K.T. i minim Kristin Taem.
?Yu Yu Save Eksplenem?
• ?Jisas i minim wanem taem hem i talem tok ya “niufala wol”?
• ?Jisas i toktok long Nikodimas long saed blong wanem?
• ?Jisas i mekem wanem promes long man nogud ya we i hang long pos klosap long hem?
• ?Olsem wanem leta blong Hibrus mo ol tok blong Pita oli soemaot se bambae ol man oli save laef blong olwe long wol?
[Kwestin]
[Tok blong pija long pej 15]
Ol man we oli olsem sipsip bambae oli kasem laef blong olwe long wol
[Tok blong pija long pej 16]
Jisas i toktok long ol man long saed blong laef ya we i no save finis long wol