Kam Klosap Long God

‘Mi Mi Jeova, Mi God Blong Yufala, Mi Tabu, Mi Klingud’

Levitikas Japta 19

“!HAE God ya [“Jeova,” NW] we i God blong yumi, hem i tabu we i tabu, we i tabu!” (Revelesen 4:8) Baebol i eksplenem se Jeova i tabu, hemia i min se Jeova i klin we i klin, i no gat wan samting we i save mekem hem i kam doti, mo tu, i no gat wan man nating we i bitim Jeova long saed blong fasin tabu ya blong hem. God i stap longwe long sin, mo hem i no save kam doti from sin. ?Hemia i min se ol sinman oli no save gat wan fasin fren wetem God ya we i tabu tumas? !Si, oli save gat wan fasin fren wetem God ya we i tabu tumas! I gud yumi tingbaot ol toktok we i stap long Levitikas japta 19. Ol toktok blong hem i save leftemap tingting blong yumi.

Jeova i givim tok blong hem long Moses blong “hem i go talemaot long ol laen blong Isrel.” Ol toktok we i kamaot biaen i go stret long evriwan long neson ya. ?Wanem samting we Moses i mas talem long olgeta? God i talem se: “Mi mi Hae God [“Jeova,” NW], mi God blong yufala, mo yufala i mas tabu, yufala i mas klin gud, olsem we mi mi tabu, mi klin gud.” (Vas 2) Wanwan man Isrel i mas gat ol fasin we oli klin, oli tabu. Toktok ya “ yufala i mas” i soem se hemia i no wan advaes be i wan oda. ?Olsem wanem? ?Samting we God i askem, i hadwok tumas blong ol man oli mekem?

Makem se Jeova i talem se yumi mas tabu from we hem i tabu. Hem i no talem tok ya blong minim se yumi mas kam sem mak long hem, be hem i talem tok ya blong soemaot risen from wanem yumi mas obei long loa ya. Ol man we oli wosipim Jeova long Isrel oli no stret gud, taswe long ples ya, Jeova i no talem long olgeta blong oli mas tabu olsem we hem i tabu. Neva bambae oli naf blong mekem olsem. Jeova, ‘God ya we i tabu we i tabu,’ hem nomo i tabu i bitim eni man long wol ya. (Ol Proveb 30:3) Be from we Jeova i tabu, hem i wantem se ol man we oli mekem wosip long hem oli mas tabu, go kasem mak we ol sinman oli naf blong kasem. ?Long wanem rod oli save soem se oli tabu?

Afta we Jeova i givim loa ya long Moses se ol man blong hem oli mas tabu, hem i talemaot ol samting we oli mas mekem we i joen long evri haf blong laef blong olgeta. Wanwan man Isrel i mas obei long ol rul ya blong gudfala fasin: oli mas soem respek long ol papa mama mo ol olfala (Vas 3, 32); oli mas keagud long man we sora blong olgeta i fas, ol man we oli no save lukluk, mo ol narafala man we oli stap long trabol (Vas 9, 10, 14); oli no mas giaman mo oli mas mekem i sem mak long evri man (Vas 11-13, 15, 35, 36); mo oli mas laekem ol man raonabaot long olgeta olsem we oli laekem olgeta wan. (Vas 18) Taem oli obei long ol rul ya mo ol narafala rul we i stap, ol man Isrel oli soemaot se ‘oli kam tabu, oli kam man blong God.’—Namba 15:40.

Loa long saed blong fasin tabu i givhan long yumi blong luksave tingting mo ol fasin blong Jeova God. Yumi lanem se blong gat wan gudfala fasin fren wetem hem, yumi mas traehad blong mekem laef blong yumi i laenap wetem ol loa blong hem long saed blong fasin blong stap tabu. (1 Pita 1:15, 16) Taem yumi folem ol loa ya, yumi save gat wan laef we yumi harem gud long hem oltaem.—Aesea 48:17.

Loa blong stap tabu i soem se Jeova i trastem ol man we oli wosipim hem. Neva Jeova i askem yumi blong mekem samting we yumi no naf blong mekem. (Ol Sam 103:13, 14) Hem i save se taem hem i wokem yumi ol man, yumi naf blong tekem fasin blong hem. Taswe hem i save se yumi naf tu blong gat ol fasin we oli klingud, oli tabu. (Jenesis 1:26) ?Olsem wanem? ?Samting ya i pusum yu blong wantem lanem moa olsem wanem yu save kam klosap moa long tabu God, Jeova?

[Tok blong pija long pej 23]

Yumi naf blong gat ol fasin we oli klin, oli tabu