Lav We Kraes i Soemaot i Pulum Yumi Blong Lavem Narafala

‘Oltaem Jisas i stap lavem ol man blong hem, we olgeta oli stap long wol ya, . . . gogo hem i givim laef blong hem from olgeta.’—JON 13:1.

1, 2. (a) ?From wanem lav we Jisas i soemaot i nambawan? (b) ?Long stadi ya, bambae yumi tokbaot wanem samting long saed blong lav?

JISAS i givim eksampol we i stretgud olgeta, long saed blong lav. Evri samting long saed blong Jisas—ol toktok mo fasin blong hem, tijing blong hem, mo ded blong hem olsem wan sakrefaes—i soemaot lav. Go kasem en blong laef blong hem long wol, hem i soemaot lav long olgeta man we hem i mitim, antap moa, ol disaepol blong hem.

² Nambawan eksampol blong Jisas blong lavem ol man, i wan hae mak we ol man blong hem oli mas traehad blong kasem. Mo tu, eksampol blong hem i pulum yumi blong wantem soemaot semkaen lav ya long ol Kristin brata sista blong yumi, wetem ol narafala man tu. Long stadi ya, bambae yumi tokbaot samting we ol elda long kongregesen oli save lanem long Jisas, long saed blong lav we oli mas soemaot long olgeta we oli mekem mastik, no maet oli mekem bigfala sin. Bambae yumi tokbaot tu, olsem wanem lav we Jisas i soemaot i save pulum ol Kristin blong givhan long ol narafala we oli kasem hadtaem, disasta, mo sik.

3. ?Nating se Pita i mekem bigfala sin, Jisas i mekem wanem long hem?

³ Long naet bifo we Jisas i ded, Pita, we Jisas hem wan i bin jusum hem blong i kam aposol, i giaman tri taem se i no save Jisas. (Mak 14:66-72) Be Jisas i talem finis se Pita bambae i kambak long hem, mo taem samting ya i hapen, Jisas i fogivim hem. Jisas i putum sam bigfala wok long han blong Pita. (Luk 22:32; Wok 2:14; 8:14-17; 10:44, 45) ?Wanem tingting blong Jisas long olgeta we oli mekem bigfala sin? ?Yumi lanem wanem from?

Soemaot Tingting Blong Kraes Long Olgeta We Oli Mekem Sin

4. ?Wanem samting i save hapen we i mekem se ol Kristin oli mas soemaot tingting blong Kraes?

⁴ Plante samting oli stap hapen long laef we oli  mekem se yumi mas soemaot tingting blong Kraes. Tingbaot olsem wanem yumi harem nogud taem narafala i mekem bigfala sin, nating se hem i wan famle blong yumi no wan long kongregesen. Long ol las dei ya we wol blong Setan i stap go from en blong hem olgeta, sore tumas, spirit blong wol i stap pulum plante moa Kristin blong oli foldaon long rabis fasin. Nating se yumi yangfala no yumi olfala, be tingting blong ol man blong wol we oli mekem rabis fasin no oli agri wetem ol rabis fasin, i save kasem yumi. Tingting ya i save mekem se yumi no moa strong blong wokbaot long stret rod. Long faswan handred yia, Kristin kongregesen i mas putumaot samfala, mo i mas stretem samfala. Sem mak tede. (1 Kor. 5:11-13; 1 Tim. 5:20, NW) Be taem ol elda we oli stretem ol Kristin ya oli soemaot lav olsem Kraes, samting ya i save gat bigfala paoa long man ya we i mekem sin.

5. ?Olsem wanem ol elda oli save soemaot tingting blong Kraes long ol Kristin we oli mekem sin?

⁵ Oltaem ol elda oli mas strong blong mekem ol stret fasin blong Jeova oli stanap, olsem Jisas i bin mekem. Taem ol elda oli mekem olsem, oli mas soemaot kwaet fasin, kaen fasin, mo lav, olsem Jeova. Taem ‘tingting blong man i kam nogud’ no ‘tingting blong hem i foldaon’ from sin we hem i mekem, nao hem i tanem tingting blong hem fulwan, ating i no had blong ol elda oli ‘stretem hem long kwaet fasin.’ (Sam 34:18; Gal. 6:1) ?Be olsem wanem sipos man we i mekem sin i stronghed mo i no sore nating, no maet i sore smol nomo?

6. ?Taem ol elda oli stap stretem man we i mekem sin, oli no mas mekem wanem? ?From wanem?

⁶ Taem man ya we i mekem sin i no wantem lesin long advaes blong Baebol mo i traem blong putum sin blong hem i go long narafala, ol elda mo ol narafala tu oli save harem se oli kros long hem. Oli save ol trabol we man ya i mekem finis, taswe maet oli wantem talemaot stret ol filing blong olgeta long saed blong samting we hem i mekem mo tingting we hem i stap soemaot. Be fasin kros i no gat gudfala frut blong hem, mo man we i kros i no soemaot “tingting blong Kraes.” (1 Kor. 2:16; ridim Jemes 1:19, 20.) Jisas i tok strong long sam man long taem blong hem blong givim woning long olgeta, be neva hem i tok olsem we hem i no laekem olgeta nating, mo neva hem i yusum ol tok blong stikim olgeta. (1 Pita 2:23) Defren olgeta, hem i livim rod i open, blong ol man we oli mekem sin oli save tanem tingting blong olgeta mo kambak long Jeova. Yes, wan bigfala risen from wanem Jisas i kam long wol, i blong “sevem ol man nogud.”—1 Tim. 1:15.

7, 8. ?Wanem i mas lidim ol elda, taem oli jajem wan man we i mekem sin insaed long kongregesen?

 ⁷ ?Eksampol blong Jisas i mas pulum yumi blong tingting olsem wanem long olgeta we kongregesen i stretem? Tingbaot se Baebol i putumap plan ya we ol elda oli mas jajem man we i mekem sin insaed long kongregesen. Samting ya i protekem ol sipsip blong God, mo maet i givhan long man ya we oli stretem, blong i tanem tingting blong hem. (2 Kor. 2:6-8) Sore tumas we samfala oli no tanem tingting blong olgeta, nao kongregesen i mas putumaot olgeta. Be yumi glad se plante long olgeta oli kambak bakegen long Jeova mo kongregesen blong hem. Taem ol elda oli soemaot tingting blong Kraes, oli mekem i moa isi blong man i tingting gud long sin we hem i bin mekem, tanem tingting blong hem, mo kambak insaed long kongregesen. Biaen, sam long ol man ya we oli bin mekem bigfala sin, bambae oli tingbaot fasin blong ol elda blong soem respek mo lav long olgeta, nating we maet oli no moa rimemba ol advaes blong Baebol we ol elda oli bin givim.

⁸ Taswe, nating we wan man i no wantem lesin long advaes blong Baebol, be ol elda oli mas soemaot ol fasin we oli olsem “frut blong spirit.” Bigwan blong ol fasin ya, hemia lav olsem Kraes i gat. (Gal. 5:22, 23, NW) Ol elda oli no mas hareap blong putumaot wan man we i mekem sin. Oli mas soemaot se oli wantem we man ya i kambak long Jeova. Olsemia, biaen, taem wan man we i mekem sin i tanem tingting blong hem, olsem plante oli mekem, bambae hem i gat bigfala tangkiu long Jeova. Mo bambae hem i gat tangkiu tu long ol “man we oli olsem presen” long kongregesen, from we oli bin mekem rod i moa isi blong hem i kambak insaed long kongregesen.—Efes. 4:8, 11, 12, NW.

Soemaot Lav Olsem Kraes Long Taem Blong En

9. Talem wan samting we Jisas i mekem blong soemaot lav long ol disaepol blong hem.

⁹ Luk i raetemdaon wan nambawan stori blong samting we Jisas i mekem blong soemaot lav. Jisas i save se wan dei ol soldia blong Rom bambae oli raonem taon ya Jerusalem bifo we oli spolem. Long taem ya, bambae i no moa gat man i save aot long taon ya. Taswe, Jisas, we i lavem ol disaepol blong hem, i givim woning long olgeta se: “Taem we yufala i luk ol soldia oli stap kam plante raonabaot long taon ya Jerusalem, blong oli blokem ol man oli stap insaed, yufala i mas save we bambae i no longtaem oli save spolemgud ples ya.” ?Olgeta oli mas mekem wanem? Jisas i talemaot klia, samting we oli mas mekem, i se: “Yufala we i stap long Judia, yufala i mas ronwe blong go haed long ol hil. Mo yufala we i stap insaed long taon ya, yufala i mas aot. Mo yufala we i stap long ol ples raonabaot long taon ya, yufala i no mas go insaed long taon ya bakegen, from we taem ya i taem we God bambae i panisim olgeta man nogud long hem, blong mekem tok blong hem we oli raetem long Baebol i kamtru.” (Luk 21:20-22) Long yia 66 K.T. * ami blong Rom i raonem Jerusalem. Afta, ol man we oli gat fasin obei oli folem tok blong Jisas.

10, 11. ?Taem yumi tingbaot ol faswan Kristin we oli aot long Jerusalem oli ronwe, olsem wanem samting ya i save givhan long yumi blong rere from taem blong “bigfala trabol”?

¹⁰ Taem ol Kristin oli aot long Jerusalem oli ronwe, oli mas soemaot lav long narafala olsem we Kraes i bin soemaot long olgeta. I sua se oli mas rere blong serem samting we oli gat wetem narafala. Be profet tok ya blong Jisas i no long saed blong taem ya we ol ami oli spolem olfala taon ya nomo, hem i gat bigfala mining moa. Jisas i talem se: “Bambae i gat bigfala trabol tumas, we neva man i luk olsem bifo, i stat long taem we God i mekem wol ya, i kam kasem tede. Mo bambae i no moa gat bigfala trabol olsem bakegen samtaem.” (Mat. 24:17, 18, 21) Long taem blong “bigfala trabol” ya we i no kasem wol ya yet, mo bifo long taem ya, maet yumi tu yumi fesem sam hadtaem mo yumi sot long plante samting. Sipos yumi gat tingting blong Kraes, bambae yumi save stanap strong tru long trabol ya.

¹¹ Long taem ya, bambae yumi mas folem eksampol blong Jisas we i lavem ol narafala mo i no tingbaot hem wan nomo. Pol i givim advaes long saed ya i se: “Yumi mas tingbaot ol fasin we ol Kristin brata mo sista blong yumi oli wantem, nao yumi mas mekem i gud long olgeta, blong mekem olgeta oli strong moa long bilif blong olgeta, from we Kraes i no folem ol fasin we hem nomo i wantem. . . . God nomo i save mekem tingting blong man i longfala, mo i save leftemap tingting blong hem. Mo prea blong mi, we hem bambae i givhan long yufala, blong bambae yufala evriwan i kam we yufala i gat sem tingting nomo, . . . blong Jisas Kraes.”—Rom 15:2, 3, 5.

12. ?Wanem kaen lav we yumi mas wokem naoia, mo from wanem?

 ¹² Pita, we Jisas i lavem hem tumas, hem tu i talem long ol Kristin se oli mas ‘lavem ol brata blong olgeta long fasin we i stret gud,’ mo oli mas “obei long trutok.” Mo tu, oli mas ‘lavlavem olgeta long olgeta tingting blong olgeta, long fasin we i no save jenis.’ (1 Pita 1:22) Tede, bitim olgeta taem bifo, yumi mas wokem ol fasin ya we Kraes i soemaot. Yumi luk finis se ol trabol we ol man blong God oli fesem i stap kam strong moa. I no mas gat wan long yumi we i putum tingting blong hem i stap strong long eni samting long olfala wol ya. Bigfala trabol long saed blong mane we i bin kamaot long fulwol i no longtaem, i soemaot samting ya i klia nomo. (Ridim 1 Jon 2:15-17.) Taem en blong rabis fasin blong wol ya i stap kam klosap moa, yumi mas kam klosap moa long Jeova mo long ol Kristin brata sista blong yumi. Yumi mas frengud wetem ol narafala long kongregesen, long fasin we i no giaman. Pol i givim advaes ya se: “Yufala i mas lavlavem yufala olsem we yufala i wan brata nomo . . . mo oltaem yufala i mas rere blong ona long yufala.” (Rom 12:10) Mo Pita i makem poen ya moa, i se: “Antap long ol narafala samting, yufala i mas lavlavem yufala. Yufala i no mas kam slak long samting ya, from we man we i stap lavem narafala man, oltaem hem i save fogivim hem from ol sin blong hem.”—1 Pita 4:8.

13-15. ?Olsem wanem sam brata oli soemaot lav olsem Kraes long taem blong disasta?

¹³ Long olgeta ples blong wol, ol man oli save ol Witnes blong Jeova from lav ya we oli soemaot olsem Kraes. Tingbaot ol Witnes we oli go blong givhan long samfala we oli singaot help long yia 2005, taem bigfala ren mo hariken i spolemgud plante ples long saot blong Yunaeted Stet. Eksampol blong lav we Jisas i soemaot i pulum bitim 20,000 volontia blong lego ol naes haos mo gudfala wok blong olgeta, blong halpem ol Kristin brata blong olgeta we oli kasem bigfala trabol.

¹⁴ Long wan ples, win i mekem ol bigbigfala wef long solwota we oli hae olsem 10 meta, mo taem oli kamso oli kavremap graon go kasem 80 kilomita longwe long mak blong solwota. Taem solwota ya i godaon, oli luk we long ples we i gat 100 haos long hem, bitim 30 haos i brobrok olgeta. Ol Witnes we oli kam long plante kantri oli karem ol tul blong olgeta mo ol samting blong bildim haos, mo oli yusum gudhan blong olgeta blong mekem enikaen wok we i gat nid blong mekem. Tu wido woman we tufala i stret sista, tufala i fulumap olting blong tufala long smol trak blong tufala, mo tufala i ron bitim 3,000 kilomita blong givhan long ol Kristin brata sista ya. Wan long tufala sista ya i no moa gobak long ples blong hem, hem i mekem wok blong fultaem paenia, mo i stap givhan yet long komiti we i bildim ol haos ya bakegen.

¹⁵ Ol volontia ya oli bildim mo wokem gud bakegen 5,600 haos evriwan, hemia blong ol Witnes mo blong sam narafala tu. ?Wanem filing blong ol Witnes taem oli kasem help ya we i soemaot bigfala lav? Wan Kristin sista we hariken i spolemgud haos blong hem, i muv i go long wan smol haos we i gat fo wil blong hem, ruf blong hem i lik, mo i no gat ples blong kuk. Ol brata oli bildim wan naesfala smol haos we i naf long hem. Taem sista ya i stanap fored long naesfala niu haos blong hem, hem i krae wetem glad, mo hat blong hem i fulap long tangkiu long Jeova mo long ol Kristin brata blong hem. Plante Witnes we oli muv i go long ol narafala haos taem hariken i spolem haos blong olgeta, oli stap  long ol haos ya bitim wan yia afta we ol brata oli bildim niufala haos blong olgeta. ?From wanem? From we oli letem ol brata ya we oli kam blong bildim ol haos oli stap fastaem long niufala haos blong olgeta. !Fasin blong olgeta i wan nambawan eksampol blong tingting we i olsem tingting blong Kraes!

Soemaot Tingting Blong Kraes Long Ol Sikman

16, 17. ?Olsem wanem yumi save soemaot tingting blong Kraes long ol sikman?

¹⁶ I no plante long yumi we i bin kasem bigfala trabol long wan disasta. Be klosap yumi evriwan i stap kasem sik, maet yumi wan no wan long famle. Tingting we Kraes i soemaot long ol sikman i givim eksampol long yumi. Lav i pulum hem blong sore long ol sikman. Taem ol man oli karem ol sikman blong olgeta oli kam long hem, hem i ‘mekem olgeta oli gud bakegen.’—Mat. 8:16; 14:14.

¹⁷ Tede, ol Kristin oli no gat paoa blong mekem merikel olsem Jisas. Be oli save sore long ol sikman, olsem Jisas. ?Olsem wanem oli soemaot fasin ya blong Kraes? Ol elda oli soemaot se oli gat tingting blong Kraes taem oli mekem plan mo lukaot long wok ya blong halpem ol sikman long kongregesen. Long rod ya, oli folem tok blong Matiu 25:39, 40. * (Ridim.)

18. ?Olsem wanem tufala Kristin sista i soemaot trufala lav long narafala? ?Wanem i kamaot from?

¹⁸ I no ol elda nomo we oli save mekem i gud long ol narafala. Tingbaot woman ya Charlene, we i gat 44 yia blong hem. Hem i kasem kansa mo dokta i talem long hem se bambae hem i save laef ten dei nomo. Tu Kristin sista, Sharon mo Nicolette, tufala i luk we sista ya i nidim bigfala help mo we gudfala hasban blong hem i no naf blong mekem evri samting blong hem. Ale tufala i talem se tufala i rere blong givhan long sista ya fultaem, long ol laswan dei blong laef blong hem. Sista ya i gohed blong laef sikis wik, be tufala sista ya i soemaot lav long hem go kasem en. Sharon i talem se: “I no isi nating taem yu save se wan sikman bambae i no save kamgud. Be Jeova i mekem mitufala i strong. Help we mitufala i givim long sista ya i mekem se mitufala i kam klosap moa long Jeova mo long mitufala.” Hasban blong Charlene i talem se: “Neva bambae mi fogetem kaen fasin mo bigfala help we tufala gudfala sista ya i givim. Stret tingting we i pusum tufala blong mekem wok ya mo fasin blong tufala blong leftemap tingting blong narafala, i mekem laswan traem blong gudfala waef blong mi, Charlene, i isi moa. Mo tufala i halpem mi bigwan olsem we mi rili nidim, hemia long saed blong bodi mo filing. Bambae mi talem tangkiu long tufala gogo i no save finis. Fasin blong tufala blong lego evri samting long laef blong tufala blong halpem woman blong mi, i mekem bilif blong mi long Jeova i strong moa, mo i mekem se mi lavem moa fulwan kampani blong ol Kristin brata mo sista.”

19, 20. (a) ?Yumi tokbaot wanem faef samting long saed blong tingting blong Kraes? (b) ?Naoia yu yu gat strong tingting blong mekem wanem?

¹⁹ Long trifala stadi ya, yumi bin tokbaot faef samting long saed blong tingting blong Kraes, mo olsem wanem yumi save tingting olsem hem mo folem ol samting we hem i mekem. Yumi mas ‘kwaet man, mo tingting blong yumi i mas stap daon,’ olsem Jisas. (Mat. 11:29) Mo tu, yumi mas traehad blong soemaot kaen fasin long ol narafala, nating se oli mekem plante mastik mo oli gat plante slak fasin. Yumi no mas fraet blong obei long olgeta samting we Jeova i askem, nating se yumi kasem trabol.

²⁰ Laswan samting se, yumi mas soemaot lav olsem Kraes long olgeta Kristin brata blong yumi, mo yumi mas “lavem olgeta olwe” olsem Kraes i bin mekem. Lav ya i pruvum se yumi ol trufala man blong Jisas. (Jon 13:1, 34, 35) Yes, “oltaem, yufala i mas lavlavem yufala, olsem we yufala i wan brata nomo.” (Hib. 13:1) !Yu no mas holemtaet lav blong yu! !Yusum laef blong yu blong presem Jeova mo halpem ol narafala! Jeova bambae i blesem yu sipos yu traehad wetem fulhat blong yu.

[Ol futnot]

?Yu Yu Save Eksplenem?

• ?Olsem wanem ol elda oli save soemaot tingting blong Kraes long ol man we oli mekem sin?

• ?From wanem i impoten moa long taem blong en ya blong gat lav olsem Kraes?

• ?Olsem wanem yumi save soemaot tingting blong Kraes long ol sikman?

[Kwestin]

[Tok blong pija long pej 19]

Ol elda oli wantem se olgeta we oli mekem sin oli kambak bakegen long Jeova

[Tok blong pija long pej 21]

Ol man oli save ol Witnes blong Jeova from fasin blong olgeta blong soemaot lav olsem Kraes