Skul We i Gud i Tijim Ol Man Blong Lavlavem Olgeta

BAEBOL i talem se: “Man we i no save lavem narafala man, hem i no save God, from we God i stamba blong fasin ya blong lavem man.” (1 Jon 4:8) Taswe, skul we i gud i mas tijim ol man blong lavlavem olgeta olsem wan brata nomo.

Plante skul oli mekem gudfala wok blong lukaot long ol sikman, ol olfala, mo givhan long ol puaman. Oli pulum ol memba blong olgeta blong folem tok we aposol Jon i raetem se: “?Sipos yu gat plante samting, mo yu luk wan Kristin brata no sista blong yu we i sot long sam samting, be yu no givhan long hem, olsem wanem yu save talem se yu yu lavem God? Ol pikinini blong mi. I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.”—1 Jon 3:17, 18.

Be traem tingbaot: ?Wanem i stap hapen taem i gat faet? ?I stret blong obei long tok blong God blong “lavem ol man we oli stap raonabaot long yu” long taem ya nomo we i gat pis? ?Olsem wanem taem ol man blong politik no king i talem se bambae kantri i faet agensem narafala kantri? ?I no moa nid blong obei long tok ya?—Matiu 22:39.

Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Taem yu stap ansa long ol kwestin we oli kam biaen, traem tingbaot se: ‘?Ol memba blong skul ya we mi mi stap skelem, oli lavem ol man oltaem? ?Oli soemaot lav ya long ol samting we oli mekem, i no long ol toktok blong olgeta nomo?’

LONG SAED BLONG: Faet.

?BAEBOL I TALEM WANEM?: Jisas i stanemap wan rul blong ol man blong hem oli folem, i se: “Mi mi talem long yufala, se yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.”—Matiu 5:44.

Taem ol soldia oli kam blong holem Jisas, aposol Pita i pulumaot naef blong faet blong hem blong blokem olgeta. Be Jisas i talem long hem se: “Yu putumbak naef blong yu long paos blong hem. Man we i stap tekem naef blong faet, hem bambae i ded long naef blong faet.”—Matiu 26:52.

Aposol Jon i raetem se: “Fasin blong man i stap soemaot i klia, se hu i pikinini blong God, mo hu i pikinini blong Setan. Man we i no stap mekem ol fasin we i stret, no we i no lavem Kristin brata no sista blong hem, hem i no pikinini blong God, hem i pikinini blong Setan. Tok we yufala i harem taem gud nius i kamtru long yufala fastaem, i talem se yumi mas lavlavem yumi. I nogud yumi kam olsem man ya Ken bifo. Hem i wan man blong Setan, nao hem i kilim brata blong hem i ded.”—1 Jon 3:10-12.

 KWESTIN: ?Skul ya we mi stap skelem, i pulum ol memba blong hem blong joen long faet?

LONG SAED BLONG: Politik.

?BAEBOL I TALEM WANEM?: Samfala we oli luk ol merikel we Jisas i mekem, oli wantem se hem i kam wan bigman blong politik long ples blong olgeta. ?Wanem tingting blong Jisas? “Jisas i save we ol man ya oli wantem kam tekem hem blong fosem hem, blong i kam King blong olgeta. Nao hem i aot long olgeta, i go wokbaot long hil, hem wan.”—Jon 6:15.

Taem ol soldia oli holem Jisas mo sam man oli putum ol giaman tok agens long hem se hem i stap pulum ol man blong agensem gavman, Jisas i ansa long olgeta se: “Mi mi no king olsem ol king blong wol ya. Sipos mi king olsem ol king blong wol ya, bambae ol man blong mi oli save faet blong blokem olgeta ya we oli wantem putum mi long han blong ol lida ya blong ol laen blong Isrel, be mi mi no king olsem.”—Jon 18:36.

Taem Jisas i stap prea long God from ol disaepol blong hem, hem i talem se: “Mi mi talemaot ol tok blong yu long olgeta. Mo ol man blong wol ya oli no laekem olgeta, oli stap agens long olgeta, from we olgeta oli no man blong wol, olsem we mi mi no man blong wol.”—Jon 17:14.

KWESTIN: ?Skul ya we mi stap skelem, i pulum ol memba blong hem blong folem eksampol blong Jisas we i no joen long politik, nating se ol man blong politik bambae oli no laekem olgeta from?

LONG SAED BLONG: Jajem man long tingting we i no stret.

?BAEBOL I TALEM WANEM?: Taem sam man Jiu we oli no sakomsaes oli kam Kristin, aposol Pita i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.

Long leta we Jemes i raetem long ol Kristin long faswan handred yia, hem i talem se: ‘Ol brata mo sista. Yufala i bilif finis long Jisas Kraes, Masta blong yumi long heven. Oraet, be yufala i no save mekem fasin ya we yufala i stap ona long ol rijman, be yufala i stap luk ol puaman olsem rabis nomo. Sipos tu man i kam insaed long haos blong prea blong yufala, wan we klos blong hem i flas gud mo hem i putum gol ring long fingga blong hem, mo narawan we i puaman, we klos blong hem i brobrok, i nogud yu ona long man ya we klos blong hem i flas gud, nao yu tekem hem i go long nambawan ples, yu talem long hem se, “Fren. Hemia ples blong yu, yu kam sidaon long hem,” be yu talem long puaman ya se, “Yu stanap nomo, no yu kam sidaon long floa.” Taem we yufala i stap mekem ol fasin olsem, yufala i stap folem tu rod ya, mo yufala i stap jajem man long tingting we i no stret nating.’—Jemes 2:1-4.

KWESTIN: ?Skul ya we mi stap skelem, i tijim ol man se God i mekem i sem mak long olgeta man? ?Skul ya i tijim ol memba blong hem se oli no mas tingting nogud long wan man from kala blong skin blong hem no from we hem i puaman?

[Tok blong makem poen long pej 6]

?Weswan skul nao i tijim ol man blong hem blong stretem ol tingting we i stap mekem ol man oli seraot, hemia ol tingting long saed blong politik, kala, mo mane?