!Baebol Stadi Blong Famle i Halpem Yumi Blong Kasem Laef!

TINGBAOT “faet long bigfala Dei blong God ya we i gat olgeta paoa.” !Ol man bambae oli fraet tumas! (Rev. 16:14) Profet Maeka i yusum ol pijatok blong talemaot samting we bambae i hapen long taem ya, i se: “Ol hil ya bambae oli ronaot, olsem kandel we i stap klosap long faea. Bambae oli ron bigwan olsem wota, oli folem ol krik i kamdaon, olsem wota we i aot long hil, i ron bigwan i kam.” (Maeka 1:4) ?Wanem bambae i hapen long ol man we oli no wosipim Jeova? Tok blong God i talem se: “Long taem ya, ol dedbodi blong ol man ya we mi bambae mi kilim olgeta, bambae oli finisim olgeta ples long wol.”—Jer. 25:33.

Ol hed blong famle oli mas tinghevi long ol toktok ya we i givim woning long yumi. Plante long ol hed blong ol famle oli ol papa no mama we olgeta nomo oli mas lukaot long ol pikinini. I gud yufala evriwan i tingbaot se, ‘Ol pikinini blong mi we oli bigwan naf blong kasem save, ?bambae oli laef tru long Amagedon?’ Baebol i promes se sipos bilif blong olgeta i strong mo oli traehad kasem mak we oli naf blong mekem blong stap klosap long Jeova, bambae oli stap sef.—Mat. 24:21.

?From Wanem i Impoten Blong Gat Wan Taem Blong Baebol Stadi Blong Famle?

Sipos yu wan papa no wan mama, yu mas mekem bes blong yu blong ‘stretem mo trenem tingting’ blong ol pikinini blong yu, “olsem we Jeova i wantem.” (Efes. 6:4, NW) Wan long ol samting we i impoten moa long ol narafala samting, hemia blong stadi Baebol wetem ol pikinini blong yu. Yumi wantem tumas se ol yangfala blong yumi oli olsem ol Kristin long Filipae. Pol i talem gudfala toktok long olgeta ya from we oli glad blong obei long Jeova. Hem i se: “Ol fren blong mi. Bifo, long taem ya we mi stap yet wetem yufala, yufala i stap obei long mi, mo naoia we mi no moa stap wetem yufala, i gud moa blong yufala i obei long mi. Yufala i mas gohed blong wok had, we yufala i ona long God, mo yufala i fraet tu long hem. Yufala i mas mekem olsem, blong yufala i save finisim wok ya we hem i stap mekem blong sevem yufala.”—Fil. 2:12.

?Olsem wanem? ?Ol pikinini blong yu oli obei long ol loa blong Jeova taem yu yu no stap wetem olgeta? ?Olsem taem oli stap long skul? ?Wanem samting we yu save mekem blong halpem ol pikinini blong yu blong bilif fulwan se ol loa blong Jeova oli waes mo oli save lidim olgeta long stret rod long taem we yu yu no stap?

Baebol stadi blong famle i save givhan bigwan long saed ya. Taswe, bambae yumi tokbaot tri samting we yu save mekem blong Baebol stadi blong famle i wokgud.

Mekem Baebol Stadi Blong Famle Evri Wik

Baebol i soemaot we God i putum wan stret taem blong ol pikinini blong hem, ol enjel, oli kam stanap long fes blong hem. (Job 1:6) I gud yu mekem sem samting wetem ol pikinini blong yu. Putum wan stret dei mo taem long naet we bambae yufala i mekem Baebol Stadi blong Famle, mo biaen, no mestem blong mekem stadi long taem ya evri wik. Wanwan taem, sam samting we yufala i no plan from i save hapen stret long taem blong stadi. Taswe, i gud we yu ting rere long wan taem we yufala i save mekem stadi sipos samting olsem i hapen.

Taem ol manis oli pas, yu mas blokem tingting ya se i oraet blong yufala i mekem stadi sam samtaem nomo. Tingbaot oltaem, se ol pikinini blong yu oli ol Baebol stadi we oli impoten tumas long yu. Mo, Setan i stap raon long olgeta blong kakae olgeta. (1 Pita 5:8) Sipos yu no mekem Baebol Stadi blong Famle long naet we yufala i putum, be yufala i spenem taem ya blong wajem televisin no mekem sam narafala samting olsem we oli no impoten, Setan i winim yufala.—Efes. 5:15, 16; 6:12, NW; Fil. 1:10, NW.

Stadi Long Ol Save We Famle Bambae i Yusum Long Laef Blong Olgeta Evri Dei

Baebol Stadi blong Famle i no blong tijim famle blong save samting nomo, hem i go moa. Yu mas traehad blong mekem se stadi i halpem yufala evriwan long laef blong yufala. ?Olsem wanem yu save mekem samting ya? Tingbaot ol samting we pikinini blong yu bambae i mekem long ol dei mo wik we bambae i kam. Ale jusum ol save we i stret long ol samting ya, blong yufala i stadi long hem. Ating wan samting we ol pikinini blong yu bambae oli mekem sam dei biaen long stadi blong yufala, hemia blong go long wok blong prij. Yu save tingbaot blong mekem ol pleplei, blong  rere from wok blong prij. Ol yangfala oli laekem blong mekem samting we oli gat gudhan long hem. Sipos oli mekem ol pleplei blong savegud fastok blong olgeta mo blong save ol tok we oli save talem taem man i traem blokem storian blong olgeta, samting ya bambae i givhan long olgeta blong no fraet taem oli joen long ol defren haf blong wok blong prij.—2 Tim. 2:15.

Yu save mekem sam narafala pleplei we oli givhan long pikinini blong yu blong save wanem blong talem taem ol narafala pikinini oli traem pulum hem. Yufala i save mekem stadi long buk ya, Ol Kwestin We Ol Yangfala Oli Askem—Ol Ansa We Oli Wok Gud, buk 1, japta 9. Long pej 76 mo 77, aninit long smol stamba tok ya, “?Bambae Mi Mekem Wanem?” i gat sam eksampol mo sam kwestin we oli save pulum pikinini blong yu blong tingbaot toktok we bambae i isi long hem blong talem taem i mas ansa long ol narafala pikinini. Pulum pikinini blong yu blong mekem sam pleplei wetem yu no wetem wan fren blong hem we i bigman, blong rerem gud ol toktok we bambae hem i talem. Wanwan taem i gud blong mekem ol pleplei ya long Baebol Stadi blong Famle.

Baebol Stadi blong Famle i givim janis long ol papa mama blong tokbaot ol mak we ol pikinini oli save putum blong kam klosap moa long Jeova mo mekem wok blong hem. Long Wekap! blong Julae-Septemba 2006, haf ya we i se, “Ol Yangfala Oli Askem . . . ?Bambae Mi Mekem Wanem Long Laef Blong Mi?” i tokbaot ol nambawan save long saed ya. Taem yufala i stap tokbaot haf ya, givhan long pikinini blong yu blong luksave se beswan rod blong folem long laef hemia blong putum wok blong Jeova long fasples long laef blong hem. Pulum pikinini blong yu blong wantem mekem wok blong paenia, wok long Betel, joen long Ministeriol Trening Skul, no blong mekem wok blong Jeova fultaem long wan narafala rod.

Be wan samting blong lukaot long hem, se: Sam papa mama oli wantem se pikinini blong olgeta i gat wan gudfala laef, nao oli tingting tumas long wok we oli wantem pikinini blong olgeta i mekem long fiuja, be oli no talem ol gudfala tok long pikinini from ol gudfala samting we hem i stap mekem finis. I tru se i gud we yu pulum pikinini blong yu blong putum ol gudfala mak olsem wok long Betel mo wok blong misinari. Be taem yu mekem samting ya, lukaotgud blong yu no mekem pikinini blong yu i kros from we oltaem yu tokbaot samting we yu yu wantem hem blong mekem, mo lukaotgud we yu no mekem tingting blong hem i foldaon. (Kol. 3:21) Yu mas tingbaot oltaem se boe no gel blong yu i mas lavem Jeova long hat blong hem from we hem i wantem, i no from we yu nomo yu wantem olsem. (Mat. 22:37) Taswe, lukluk ol gudfala samting we pikinini blong yu i stap mekem mo talem ol gudfala toktok long hem from. Mo traehad blong no tingting oltaem long samting we hem i no stap mekem. Pulum hem blong gat tangkiu from ol samting we Jeova i mekem. Ale letem hat blong pikinini ya i pulum hem blong mekem samting from we hem i luksave se Jeova i gud tumas.

Mekem Se Baebol Stadi Blong Famle i Wan Gudfala Taem

Namba tri samting blong mekem Baebol Stadi blong Famle i wokgud, hemia se famle i mas harem gud long stadi. ?Olsem wanem blong mekem samting ya? Samtaem yufala i save lesin long wan drama no wajem wan DVD we ol Witnes blong Jeova oli wokem, mo yufala i save storian long hem. Long sam narafala taem, yufala i save ridim wan haf blong Baebol tugeta, mo mekem we wanwan memba long famle oli ridim toktok blong wan man long riding.

Long ol magasin ya, Wajtaoa mo Wekap! i gat sam haf we oli nambawan blong yusum long famle stadi. Wan haf we yufala i save yusum long ol Wekap! i stap long pej 31, stamba blong hem i se, “?Bambae Yu Yu Ansa Olsem Wanem?” Evri tu manis, i gat wan haf long Wajtaoa (hemia we i blong pablik long Franis mo  Inglis) we ol pikinini oli save mekem wan stadi long hem, i se “For Our Young People”. Long manis we haf ya i no stap long Wajtaoa, i gat wan narafala haf we i blong ol smol pikinini, stamba blong hem i se, “Teach Your Children”.

Ol papa mama blong ol yangfala we oli gat samwe 13 kasem 17 yia bambae oli intres long ol haf ya, “Ol Yangfala Oli Askem,” we oli stap long ol Wekap!, mo tu, ol haf long buk ya Ol Yangfala Oli Askem, Buk 1. Taem yufala i yusum buk ya, no mestem bokis ya we i se, “Ol Kwestin Blong Tokbaot” long en blong evri japta. Bokis ya i no blong tingtingbak nomo. Yufala i save yusum ol kwestin long hem olsem wan plan blong famle stadi blong yufala.

Be lukaot we long taem blong stadi, yu no askem tumas kwestin long pikinini blong yu, olsem wan polis. Tingbaot advaes ya we slef we i stret mo waes i givim long ol yangfala, se i gud oli gat wan buk blong olgeta blong raetemdaon prapa tingting mo filing blong olgeta long saed blong ol save we famle i tokbaot, mo long saed blong samting we oli save mekem blong folem ol save ya long laef blong olgeta. Sipos pikinini blong yu i folem advaes ya, yu no mas traem fosem hem blong ridimaot samting we hem i raetem long buk blong hem. From we sipos yu mekem olsem, bambae pikinini blong yu i no moa raetem samting we i rili stap long hat blong hem. Yu mas glad blong no lukluk long buk ya.

Sipos yu holem wan gudfala program blong mekem Baebol Stadi blong Famle evri wik, yu stadi long ol save we famle bambae i yusum long laef blong olgeta evri dei, mo yu mekem se Baebol Stadi blong Famle i wan gudfala taem, bambae Jeova i blesem bigwan ol traehad blong yu. Spesel taem ya we famle i spenem tugeta bambae i givhan long olgeta blong mekem bilif blong olgeta i stap strong mo oli stap klosap long Jeova oltaem.

[Bokis blong pija long pej 31]

Pulum Intres Blong Ol Pikinini

“Taem mitufala i stadi wetem ol smol gel blong mitufala, mi wetem hasban blong mi, mitufala i tokbaot ol save we bambae mifala i lukluk long hem long miting, mo biaen mitufala i askem long ol gel blong mitufala blong dro wan pija blong ol samting we mitufala i bin tokbaot. Samtaem, mifala i aktem sam samting we i hapen long wan Baebol stori, no mifala i mekem ol pleplei blong rerem gud ol fastok blong wok blong prij. Mitufala i mekem se stadi i stret long yia blong olgeta, i pulum intres blong olgeta, i leftemap tingting blong olgeta, mo tu i wan gudfala taem we oli harem gud long hem.”—J.M., Yunaeted Stet.

“Blong givhan long pikinini boe blong wan Baebol studen, blong i kasem save olsem wanem ol man bifo oli yusum ol skrol, mifala i yusum kompiuta blong printim buk blong Aesea afta we mifala i karemaot finis ol namba we i soem japta mo vas. Ale mifala i joejoenem ol pej mo fasem tufala en blong olgeta long tufala paep. Biaen pikinini ya i traem mekem olsem Jisas i mekem long haos prea long Nasaret. Long Luk 4:16-21 i talem se Jisas i ‘openem skrol ya [blong Aesea] mo i faenem’ haf we hem i wantem ridim. (Aes. 61:1, 2, NW) Be taem pikinini ya i traem mekem sem mak, i had long hem blong faenem Aesea 61 long skrol ya we i longlongfala mo i no gat ol namba blong ol japta mo vas long hem. Smol boe ya i sapraes long gudhan we Jisas i gat blong yusum ol skrol, nao i talem se: ‘!Man, Jisas i savegud a!’”—Y.T., Japan.

[Tok blong pija long pej 30]

Ol pleplei oli save givhan long pikinini blong yu blong save wanem blong talem taem ol narafala pikinini oli traem pulum hem

[Tok blong pija long pej 31]

Traehad blong mekem se Baebol Stadi blong Famle i wan naet we yufala i harem gud long hem