Long Wol Ya We i No Moa Gat Lav, Yumi Mas Holemtaet Fasin Fren Blong Yumi Wetem Narafala

“Loa ya we mi mi givim long yufala i olsem, se yufala i mas lavlavem yufala.”—JON 15:17.

1. ?From wanem ol Kristin long faswan handred yia oli mas gohed blong frengud tugeta?

LONG laswan naet blong Jisas long wol ya, hem i pulum ol disaepol we oli stap tru long hem blong oli gohed blong frengud tugeta. Bifo we hem i mekem samting ya, long semfala naet, hem i talem long ol disaepol blong hem se, from we oli lavlavem olgeta, bambae ol man oli luksave se oli ol man blong hem. (Jon 13:35) Fasin blong ol aposol blong frengud tugeta bambae i givhan long olgeta blong stanap strong taem oli kasem traem, mo bambae i halpem olgeta blong oli finisim wok we Jisas i givim long olgeta smoltaem biaen. Yes, ol man oli save ol Kristin long faswan handred yia from fasin blong olgeta blong fasgud long God mo long ol Kristin brata sista blong olgeta. I no gat samting i save seraotem olgeta.

2. (a) ?Yumi gat strong tingting blong mekem wanem, mo from wanem? (b) ?Wanem ol kwestin we bambae yumi tokbaot?

² !Tede i gud tumas blong joen long wan ogenaesesen we ol memba blong hem long fulwol oli folem eksampol blong ol Kristin ya long faswan handred yia! Yumi gat strong tingting blong obei long tok blong Jisas blong soem trufala lav long ol Kristin brata sista blong yumi. Be long taem ya blong ol  las dei, bighaf blong ol man oli no stap tru long narafala man mo oli no gat filing long narafala man. (2 Tim. 3:1, 3, NW) Oli fren wetem narafala, be oli no ol trufala fren, oli tingbaot samting we olgeta nomo oli save kasem. Be ol man oli mas luk se yumi ol trufala Kristin yumi defren. Taswe, i gud yumi tingbaot ol kwestin ya se: ?Fasin blong frengud wetem narafala i stanap long wanem? ?Olsem wanem yumi save gat ol trufala fren? ?Wanem i save mekem se yumi no moa fren wetem narafala? ?Mo olsem wanem blong holemtaet fasin fren blong yumi wetem olgeta we oli save mekem yumi strong?

?Fasin Blong Frengud Wetem Narafala i Stanap Long Wanem?

3, 4. ?Fasin blong frengud wetem narafala longtaem i stanap long wanem, mo from wanem i olsem?

³ Fasin blong frengud wetem narafala longtaem, i stanap long lav we man i gat long Jeova. King Solomon i talem se: “Wan enemi i save kam we wan man nomo i no save winim, be tu man i save joen blong winim hem. Mo rop ya we oli tantanem tri rop i go wanples, hem i no save brok kwik.” (Pri. 4:12) Taem yu mo fren blong yu, yutufala i fren wetem Jeova, hemia i olsem tri rop we oli tantanem i go wanples. Fasin fren blong yutufala bambae i stap longtaem olsem rop ya we i stap strong blong longtaem.

⁴ I tru, ol man we oli no lavem Jeova oli gat ol fren blong olgeta tu, mo oli glad long ol fren ya. Be taem ol man oli frengud tugeta from we oli lavem Jeova, bambae i no gat wan samting we i save seraotem olgeta. Sipos wan Kristin i talem sam toktok no i mekem wan samting we i mekem fren blong hem i harem nogud, bambae tufala i stretem samting ya long fasin we i mekem Jeova i glad. Taem ol man we oli agensem God oli traem mekem ol man blong God oli seraot, oli faenemaot se ol trufala Kristin oli frengud, we i no gat rod blong pulum olgeta blong seraot. Long ol yia we oli pas, ol man blong Jeova oli soem se oli rere blong ded bitim we oli letem ol brata sista blong olgeta oli go long han blong ol enemi blong olgeta.—Ridim 1 Jon 3:16.

5. ?From wanem fasin fren blong Rut mo Nomi i stap strong blong longtaem?

⁵ I tru nomo se taem yumi fren wetem olgeta we oli lavem Jeova, yumi save harem gud moa. Hemia wan samting we yumi save sua long hem. Tingbaot eksampol blong Rut mo Nomi. Fasin fren blong tufala i wan long ol beswan eksampol long Baebol we yumi save folem. ?From wanem tufala i frengud tugeta blong longtaem? Rut i talemaot ansa blong kwestin ya taem hem i talem long Nomi se: “Ol man ples blong yu bambae oli man ples blong mi, mo God blong yu bambae i God blong mi. . . . Tru mi talem long yu, i no gat wan samting we bambae i save tekemaot mi long yu, ded nomo bambae i save tekemaot mi. Sipos mi brekem tok ya blong mi, i gud Hae God i givim panis long mi.” (Rut 1:16, 17) I klia se Rut mo Nomi tugeta i lavem God tumas, mo tufala i soemaot lav ya tru long fasin we tufala i mekem long tufala. From samting ya, Jeova i blesem tufala.

?Olsem Wanem Blong Gat Ol Trufala Fren?

6-8. (a) ?Wanem samting we yu mas mekem sipos yu wantem gat ol trufala fren? (b) ?Yu save mekem wanem blong soem se yu wantem kam fren blong narafala?

⁶ Eksampol blong Rut mo Nomi i soem se fasin blong frengud wetem narafala i no kamaot olsem nomo. Fasin fren ya i kamaot from we yu mo narafala ya i lavem Jeova. Hemia i olsem fandesen blong fasin fren blong yutufala. Mo tu, fasin fren ya i kamaot from we yutufala i wok had blong frengud tugeta, mo yutufala wanwan i tingbaot samting we narawan i wantem. Nating se yumi ol stret brata mo sista we yumi wosipim Jeova olsem wan Kristin famle, be yumi mas wok had tu blong gat fasin ya blong frengud tugeta. Ale, ?olsem wanem yu save gat ol trufala fren?

⁷ Yu nao yu mas mekem wan samting blong soem se yu wantem kam fren blong narafala. Aposol Pol i pulum ol fren blong hem long kongregesen blong Rom se: ‘Oltaem yufala i mas rere blong tekem ol Kristin man oli kam insaed long haos blong yufala.’ (Rom 12:13) Yu no mas ting se sipos yu askem long narafala blong kam wan taem long haos blong yu, hemia i naf blong mekem we yutufala i kam gudfala fren. Yu mas mekem ol smosmol samting oltaem blong mekem se yutufala i frengud. I sem mak sipos yu stap wokbaot folem wan rod, yu tekem plante step wetem leg blong yu nao sloslo samting ya i mekem we yu kasem ples we yu wantem go long hem. Long sem fasin, i no gat wan we i save tekem ples blong yu blong soem kaen fasin long narafala, yu nomo yu mas mekem. (Ridim Ol Proveb 3:27.) Maet yu save singaot ol defdefren man we oli  stap long kongregesen, blong oli kam long haos blong yu, nao yufala i kakae smol tugeta.?Olsem wanem? ?Fasin ya blong tekem man i kam long haos, hem i save kam wan fasin we yu yu mekem oltaem long olgeta we oli stap long kongregesen blong yu?

⁸ Wan narafala samting we yu save mekem blong soem se yu wantem kam fren blong narafala, hemia blong askem long ol defdefren brata sista blong joen long wok blong prij wetem yu. Taem yu stanap long doa blong wan strenja mo yu harem brata no sista blong yu i talemaot samting we i stap long hat blong hem long saed blong lav blong hem long Jeova, samting ya nomo i save pulum yu blong kam klosap moa long brata no sista ya.

9, 10. ?Wanem eksampol we Pol i soem long yumi? ?Mo olsem wanem yumi save folem eksampol blong hem?

⁹ Mekem lav blong yu i kam bigwan moa. (Ridim 2 Korin 6:12, 13. *) ?Olsem wanem? ?Samtaem yu yu harem olsem se i no gat man long kongregesen blong yu we yu save kam fren blong hem? Sipos yes, maet hemia from we yu ting se i gat sam man nomo we oli stret long yu. Aposol Pol i soem gudfala eksampol blong man we i mekem lav blong hem i kam bigwan moa. I gat wan taem long laef blong hem we hem i ting se i no save frengud wetem ol man blong ol narafala neson. Be biaen, hem i kam ‘aposol blong ol man we oli no laen blong Isrel.’—Rom 11:13.

¹⁰ Pol i no jusum blong kam fren blong olgeta nomo we oli gat sem yia olsem hem. Tingbaot Timoti, hem i yangfala moa long Pol mo laef blong hem i defren olgeta long laef blong Pol. Be nating, Pol i frengud wetem hem. Tede, plante yangfala oli tinghae long janis we oli gat blong frengud wetem ol olfala long kongregesen. Vanessa i gat samwe 20 yia blong hem, mo hem i talem se: “Wan fren blong mi we mi laekem hem tumas, hem i gat 50 yia blong hem. Mi talem long hem evri samting we mi talem long ol fren blong mi we oli gat sem yia olsem mi. Mo hem i tingbaot mi oltaem.” ?Olsem wanem yu save fren wetem olgeta we oli no gat sem yia olsem yu? Vanessa i talem se: “Mi mi traehad blong fren wetem sista ya, mi no wet nomo blong hem i kam fren wetem mi.” ?Yu yu glad blong fren wetem olgeta we oli no gat sem yia olsem yu? I sua se Jeova bambae i blesem ol traehad blong yu.

11. ?Yumi lanem wanem samting long eksampol blong Jonatan mo Deved?

¹¹ Stap tru. Solomon i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Prov. 17:17, NW) Taem Solomon i raetem ol tok ya, maet hem i stap tingbaot olsem wanem papa blong hem Deved i bin frengud wetem Jonatan. (1 Saml. 18:1) King Sol i wantem se pikinini blong hem, Jonatan, i rul long Isrel taem hem i ded. Be Jonatan i glad nomo we Jeova i jusum Deved blong hem i kam king. Jonatan i no olsem papa blong hem Sol, hem i no jalus long Deved. Hem i  no harem nogud from we ol man oli presem Deved, mo hem i no bilivim ol giaman tok we Sol i sakem blong spolem nem blong Deved. (1 Saml. 20:24-34) ?Olsem wanem? ?Yumi olsem Jonatan? ?Yumi glad taem ol fren blong yumi oli kasem wan wok long kongregesen? ?Yumi leftemap tingting blong olgeta mo givhan long olgeta taem oli kasem ol traem? ?Taem yumi harem ol nogud toktok we i spolem fren blong yumi, yumi kwik blong bilif long ol toktok ya, no yumi stap tru long fren blong yumi mo yumi toktok blong sapotem hem, olsem Jonatan i mekem?

Taem Yumi No Moa Fren Wetem Narafala

12-14. ?Wanem traem we ol Baebol studen oli kasem? ?Mo olsem wanem yumi save givhan long olgeta?

¹² Taem wan man we i stadi Baebol i stat blong mekem sam jenis long laef blong hem, hem i save kasem bigfala traem long ol fren blong hem. Maet hem i gat sam fren we hem i laekem kampani blong olgeta, be oli no folem ol rul blong Baebol long saed blong klin fasin. Maet bifo, hem i kampani wetem olgeta ya oltaem. Be naoia, hem i luksave se ol samting we ol fren blong hem oli mekem oli save pulum hem blong mekem i no stret, mo from samting ya, hem i harem se hem i no mas joen tumas wetem olgeta. (1 Kor. 15:33) Nating se i olsem, hem i save harem tu se sipos hem i no joen wetem olgeta, hem i no stap tru long olgeta.

¹³ Sipos yu yu stap stadi Baebol mo yu kasem traem olsem, i gud yu tingbaot se sipos ol fren blong yu oli ol trufala fren, bambae oli glad we yu stap traehad blong mekem laef blong yu i kam moa gud. Maet bambae olgeta tu oli wantem save Jeova. Be ol giaman fren oli defren olgeta. Bambae oli “tok nogud” long yu from we yu yu no moa go joen wetem olgeta long “ol fasin blong olgeta we oli no tingbaot wan samting.” (1 Pita 4:3, 4) Blong talem stret, i no yu we yu no stap tru long olgeta, be olgeta nao we oli no stap tru long yu.

¹⁴ Olgeta we oli no lavem Jeova bambae oli no moa gohed blong fren wetem man ya we i stap stadi Baebol. Long taem olsem, ol memba blong kongregesen oli mas kam fren blong Baebol studen ya, olsem nao Baebol studen ya bambae i no harem se hem i no moa gat fren. (Gal. 6:10) ?Yu yu save gud ol Baebol studen we oli stap kam long miting? ?Samtaem yu mekem sam samting blong joen wetem olgeta mo leftemap tingting blong olgeta?

15, 16. (a) ?Yumi mas mekem wanem sipos wan fren i lego Jeova? (b) ?Olsem wanem yumi save soem se lav blong yumi long God i tru?

¹⁵ ?Be olsem wanem sipos wan fren blong yu we i stap long kongregesen i tanem baksaed long Jeova, mo kongregesen i putumaot hem? Samting ya i save mekem yu yu harem nogud tumas. Wan sista i talem filing blong hem taem wan gudfala fren blong hem i lego Jeova, hem i se: “Mi mi harem olsem se wan samting insaed long mi i ded. Mi ting se fren blong mi i strong long trutok, be nogat. Maet hem i stap mekem wok blong Jeova from we famle blong hem nomo i wantem olsem. Ale samting ya i pulum mi blong tingbaot mi wan se, wanem samting nao i stap pusum mi blong mekem wok blong Jeova. ?Ol risen from wanem mi mekem wok blong Jeova, oli stret?” ?Wanem i givhan long sista ya long taem ya? Hem i talem se: “Mi putum ol trabol blong mi long Jeova. Mi mi gat strong tingting blong soem long Jeova se mi lavem hem from ol gudfala fasin blong hem, i no from ol fren nomo we hem i givim long mi long ogenaesesen blong hem.”

¹⁶ Sipos yumi fren wetem olgeta we oli jusum blong kam fren blong wol, bambae yumi no save stap olsem fren blong God. Disaepol Jemes i talem se: “?Weswe? ?Yufala i no save se man we i wantem tumas ol fasin blong wol, hem i kam enemi blong God? Taem yufala i wantem tumas ol fasin blong wol, be semtaem nomo yufala i kam enemi blong God.” (Jem. 4:4) Yumi trastem Jeova se sipos wan fren blong yumi i lego Hem be yumi gohed blong stap tru long Jeova, bambae Jeova i halpem yumi. Ale long rod ya yumi soem se yumi rili lavem Jeova. (Ridim Ol Sam 18:25.) Sista ya, we toktok blong hem i stap long haf antap, i talem se: “Samting ya i tijim mi se, yumi no save fosem wan man blong lavem Jeova, mo yumi no save fosem wan man blong lavem yumi tu. Hemia i jus blong wanwan man.” ?Be olsem wanem blong holemtaet fasin fren blong yumi wetem olgeta insaed long Kristin kongregesen we oli stap givhan long yumi blong stanap strong?

Holemtaet Fasin Blong Frengud Wetem Narafala

17. ?Wanem fasin we ol gudfala fren oli mas gat taem oli toktok tugeta?

¹⁷ Fasin blong ol fren blong toktok gud tugeta, i mekem se oli frengud oltaem. Taem yu ridim ol  stori long Baebol we oli tokbaot Rut mo Nomi, Deved mo Jonatan, Pol mo Timoti, bambae yu luksave we ol gudfala fren oli save tokbaot eni samting tugeta, be oli toktok wetem respek. Pol i tokbaot fasin blong yumi blong toktok long narafala, i se: “Yufala i mas toktok gud long olgeta, long ol tok we olgeta oli save glad long hem.” Long vas ya, Pol i stap tokbaot fasin blong yumi blong toktok wetem “ol man we oli no bilif long Kraes,” i min se ol man we oli no ol Kristin brata blong yumi. (Kol. 4:5, 6) !Tru ya, sipos i stret blong soem respek taem yumi toktok long ol man we oli no bilif, i stret blong mekem olsem tu long ol fren blong yumi long kongregesen!

18, 19. ?Yumi mas gat wanem tingting long advaes we yumi kasem long wan Kristin fren? ?Mo eksampol blong ol elda long Efesas i tijim yumi long wanem samting?

¹⁸ Wan gudfala fren i respektem tingting blong ol fren blong hem. Taswe hem i toktok long ol fren blong hem wetem kaen fasin mo hem i tok tru. King ya Solomon we i gat bigfala waes, i talem se: “Senta mo oel we smel blong hem i naes, tufala i save mekem yu yu harem gud, olsem we gudfala advaes blong fren blong yu i save mekem tingting blong yu i glad.” (Prov. 27:9, futnot) ?Yu yu gat tingting olsem long advaes we fren blong yu i givim long yu? (Ridim Ol Sam 141:5. *) Taem wan fren i talemaot long yu se hem i wari long yu from se yu stap folem wan rod we i nogud, ?yu yu mekem wanem? ?Yu yu gat tingting ya se fren ya i kaengud blong talem ol tok ya, no yu yu kam kros long hem?

¹⁹ Aposol Pol i frengud wetem ol elda long kongregesen blong Efesas. Ating hem i save sam long olgeta taem oli jes stat blong bilif long Kraes. Be long laswan miting blong hem wetem olgeta, hem i tok stret long olgeta blong givim sam advaes long olgeta. ?Oli mekem wanem? Ol fren blong Pol oli no kam kros. Defren olgeta, oli luksave se hem i intres long olgeta, mo oli krae bigwan from we hem i talem long olgeta se bambae oli no moa save luk hem bakegen.—Wok 20:17, 29, 30, 36-38.

20. ?Wan fren we i gat lav bambae i mekem wanem?

²⁰ Man we i frengud wetem narafala i glad blong lesin long advaes, mo i glad tu blong givim advaes long fren blong hem. I tru, yumi mas luksave se i gat sam taem we yumi mas ‘lukaot long ol bisnes blong yumi nomo.’ (1 Tes. 4:11) Mo yumi mas kasem save se bambae yumi evriwan i “talemaot olgeta fasin blong yumi long fes blong God.” (Rom 14:12) Be wan fren we i gat lav bambae i pulum narafala we hem i fren wetem blong tingbaot ol rul blong Jeova, sipos hem i luk se i gat nid. (1 Kor. 7:39) Tingbaot. ?Bambae yu mekem wanem sipos yu luk we wan fren blong yu we i no mared, i laekem wan man no woman we i no wan Witnes blong Jeova? ?Bambae yu fraet blong talemaot long hem se yu yu wari long hem, from we yu ting se maet bambae hem i no moa wantem fren wetem yu? Sipos fren blong yu i no lesin long advaes blong yu, ?bambae yu mekem wanem? Wan trufala fren bambae i askem help blong ol elda, blong oli givhan long narafala ya we i stap folem rod we i no stret. Samting ya i no isi blong mekem, taswe fren ya i no mas fraet. Be sipos tufala we i frengud, tufala tugeta i lavem Jeova, bambae i no gat samting we i save spolem fasin fren blong tufala.

21. ?Samtaem yumi evriwan i mekem wanem? ?From wanem i impoten we yumi holemtaet fasin blong frengud longtaem wetem ol narafala long kongregesen?

²¹ Ridim Kolosi 3:13, 14. Samtaem yumi mekem wan samting nao fren blong yumi i “gat sam poen agens” long yumi from. Mo hem tu bambae i mekem samting we yumi kam kros from. Jemes i talem se: “Plante taem, yumi evriwan i mekem i no stret.” (Jem. 3:2) Be samting we i soem se yumi ol trufala fren, i no hamas taem yumi sin agensem yumi, be hemia sipos yumi fofogivim yumi fulwan from ol sin blong yumi. !Yes, i impoten tumas blong frengud wetem narafala longtaem! Yumi save mekem samting ya taem yumi no fraet blong talemaot tingting blong yumi long fren blong yumi mo yumi glad blong fogivim hem. Sipos yumi soem lav olsem, bambae lav ya i ‘joenemgud yumi blong yumi kam wan.’

[Ol futnot]

?Bambae Yu Yu Ansa Olsem Wanem?

• ?Olsem wanem blong gat ol trufala fren?

• ?Wanem i save mekem se yumi no moa fren wetem narafala?

• ?Yumi mas mekem wanem blong gohed blong frengud wetem ol narafala?

[Kwestin]

[Tok blong pija long pej 26]

?Yu yu gat fasin ya blong tekem man i kam long haos blong yu?