?Mane i Stamba Blong Trufala Glad?

SONIA i bon long kantri ya Spen. Taem hem i wan pikinini, hem i stap go wetem mama blong hem long ol miting blong ol Witnes blong Jeova. Be taem hem i kam bigwan, hem i muv i go long London, wan taon we i stap long kantri ya Inglan, mo biaen hem i stat wok long wan kampani we i stap putum bigfala mane long ol bisnes.

Sonia i laekem tumas wok blong hem. Hem i stap winim plante mane mo hem i stap lukaot long ol mane blong ol kastoma blong hem we oli putum i go long ol bisnes. Wok ya i nambawan mo hem i gat gudhan blong mekem wok ya. Oltaem nomo, Sonia i wok 18 aoa long wan dei, mo i gat sam naet we hem i slip tu no tri aoa nomo. Laef blong hem i blong wok nomo. Ale, wantaem nomo, laef blong hem i jenis. Sonia i kasem sik ya strok, maet hemia i kamaot from fasin blong laef we i gat tumas wari long hem. Long taem ya, hem i gat 30 yia nomo.

Wan saed bodi blong Sonia i ded, mo ol dokta oli no save se bambae hem i save toktok bakegen no nogat. Wantaem nomo, mama blong hem i kam long Inglan, blong i lukaot long hem. Taem Sonia i stat wokbaot bakegen, mama blong hem i talem long hem se, “Mi mas go long ol miting, mo yu mas kam wetem mi from we mi no save livim yu yu stap yu wan.” Sonia i glad nomo blong go. ?Wanem i kamaot from samting ya?

Sonia i tingtingbak se: “Evri samting we mi harem i tru nomo. I gud tumas. Plante man oli kam talem halo long mi long faswan taem ya we mi go long Haos Kingdom, mo mi glad tumas blong stadi Baebol wetem wan long olgeta. Ol fren blong mi blong bifo, oli no moa stap kam luk mi, be ol niufala fren blong mi oli kaen mo oli kea long mi.”

Sloslo, Sonia i save toktok bakegen, mo long semtaem save blong hem long saed blong Baebol i gru kwik. I no wan yia yet, be hem i tekem baptaes. Plante long ol fren blong hem oli mekem wok blong fultaem paenia, mo hem i luk se olgeta ya oli rili glad. Sonia i tingting se, ‘Mi tu, mi wantem kam olsem. Mi wantem givim beswan blong mi long Jeova.’ Naoia Sonia i mekem wok blong prij fultaem.

?Sonia i lanem wanem from ol samting we i kamaot long laef blong hem? “I tru se mi stap winim plante mane, be wari mo filing ya se mi no sefgud long wok i mekem se mi wari mo mi no glad. Mi luksave naoia se samting we i impoten tumas long laef hemia blong mi gat wan gudfala fasin fren wetem Papa blong mi long heven, Jeova. Naoia mi rili glad.”

Aposol Pol i raetem se: “Fasin blong laekem mane tumas, hem i stamba blong olgeta fasin nogud. Mo i gat sam man we oli strong blong folem fasin ya, nao oli gowe finis long fasin blong bilif. Mo oli stap mekem ol samting we olgeta tu oli harem nogud tumas from.” (1 Timoti 6:10) From ol samting we i kamaot long laef blong hem, Sonia i save talem se ol tok ya oli tru nomo.