Kwestin Blong Olgeta We Oli Ridim Magasin Ya

?Olsem Wanem Jisas Mo Papa Blong Hem, Tufala i Wan Nomo?

“Mi wetem Papa blong mi, mitufala i wan nomo.” (Jon 10:30) Sam man oli yusum vas ya blong talem se Jisas mo Papa blong hem tufala i haf blong Triniti. ?Olsem wanem? ?Hemia nao mining blong tok blong Jisas?

Yumi save lukluk ol vas raonabaot. Long vas 25, Jisas i talem se hem i mekem ol wok blong hem long nem blong Papa blong hem. Vas 27 go kasem 29 i stap tokbaot ol man we oli olsem sipsip, we Papa blong Jisas i givim long hem. Sipos Jisas mo Papa blong hem tufala i sem man nomo, ol man we oli lesin long Jisas bambae oli no kasem save long tufala vas ya. Be samting we Jisas i talem i olsem: ‘Mi wetem Papa blong mi, mitufala i joengud nao bambae i no gat man i save pulumaot ol sipsip ya long han blong mi, olsem we i no gat man i save pulumaot olgeta long han blong Papa blong mi.’ I olsem wan pikinini we i talem long enemi blong papa blong hem se, ‘sipos yu faetem papa blong mi, yu stap faetem mi tu.’ I no gat man we i save ting se pikinini ya mo papa blong hem, tufala i semfala man nomo. Be bambae oli luksave gudfala fasin joen blong tufala.

Jisas mo Papa blong hem, Jeova God, tufala i “wan” nomo, from we tufala i gat wan stamba tingting, mo tufala i gat sem tingting long saed blong ol fasin we oli gud mo ol fasin we oli nogud. Defren olgeta long Devel Setan mo faswan man mo woman Adam mo Iv, Jisas i neva ting se hem i no nidim God. Jisas i eksplenem se: “Mi mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i mekem. Ol samting we Papa blong mi i mekem, mi tu mi mas mekem.”—Jon 5:19; 14:10; 17:8.

Gudfala fasin joen we God mo Pikinini blong hem Jisas, i gat, i no min se tufala i sem man. Tufala i tu defren man. Wanwan long tufala i gat prapa fasin blong hem, we i defren long narawan. Jisas i gat prapa filing, tingting, mo save blong hem, mo hem i fri blong mekem samting we hem nomo i wantem. Nating se i olsem, hem i jusum blong mekem samting we Papa blong hem nomo i wantem. Long Luk 22:42, yumi ridim tok we Jisas i talem long Papa blong hem, se: “Yu no mekem olsem we mi mi wantem, yu mekem olsem we yu nomo yu wantem.” Tok ya blong Jisas i blong nating nomo sipos hem i no naf blong mekem desisen we i defren long Papa blong hem. Sipos Jisas mo Papa blong hem, tufala i wan man nomo, ?from wanem Jisas i prea long God? ?From wanem hem i talem wetem tingting daon se hem i no save sam samting be Papa blong hem nomo i save?—Matiu 24:36.

Ol memba blong plante defdefren skul oli wosipim ol god we oli stap faet mo we oli stap raorao wetem ol prapa famle blong olgeta. Tingbaot kastom stori blong ol man Gris long saed blong god ya, Cronus. Hem i winim papa blong hem, Uranus, mo i kakae prapa pikinini blong hem bakegen. !Hemia i defren olgeta long God mo Pikinini blong hem, Jisas! !Tufala i joengud from we tufala i lavlavem tufala! Fasin ya blong tufala blong joengud, i pulum yumi blong lavem tufala. I tru, yumi gat nambawan ona ya blong joengud wetem tufala Man ya we tufala i hae olgeta long heven mo wol. Jisas i prea long saed blong ol man blong hem se: “Mi mi prea, blong olgeta evriwan oli save stap wan nomo. Papa. Laef blong yu i joen gud long laef blong mi, mo laef blong mi i joen gud long laef blong yu. Mo long sem fasin, mi mi prea blong laef blong olgeta ya i save joen gud long laef blong yumitufala.”—Jon 17:20, 21.

Taswe taem Jisas i talem se, “mi wetem Papa blong mi, mitufala i wan nomo,” hem i no stap tokbaot wan Triniti we mining blong hem i no klia. Be hem i stap tokbaot nambawan fasin joengud ya we tu man i gat, we i strong moa i bitim fasin joengud blong ol narafala man.