“Yufala i Fren Blong Mi”
“Yufala i Fren Blong Mi”
“Sipos yufala i stap mekem ol samting we mi mi talem long yufala, yufala i fren blong mi.”—JON 15:14.
1, 2. (a) ?Wanem ol defdefren samting we ol fren blong Jisas oli mekem long laef blong olgeta? (b) ?From wanem i impoten tumas we yumi kam fren blong Jisas?
LONG naet blong Pasova, ol man we oli sidaon wetem Jisas long rum ya antap long wan haos long Jerusalem, oli bin mekem ol defdefren samting long laef blong olgeta. Bifo, Pita mo Andru we tufala i brata, tufala i man blong pulum fis. Matiu i man blong tekem mane blong takis, wan wok we ol man Jiu oli ting nogud long hem. Ating sam long ol man ya, olsem Jemes mo Jon, oli save Jisas taem hem i yangfala. Be maet sam narafala, olsem Nataniel, oli save hem sam yia nomo. (Jon 1:43-50) Nating se i olsem, olgeta evriwan we oli stap long naet ya, oli sua fulwan se Jisas hem i Mesaea we God i promes blong sanem i kam, hem i Pikinini blong God ya we i laef. (Jon 6:68, 69) Jisas i talem toktok long olgeta we ating i tajem hat blong olgeta, hem i se: “Mi stap singaot yufala, se ol fren blong mi, from we olgeta samting ya we mi mi harem long Papa blong mi, mi talemaot finis long yufala.”—Jon 15:15.
2 Ol tok ya we Jisas i talem long ol aposol blong hem we oli stap tru long hem, i stret long ol Kristin tede we tabu spirit i makemaot olgeta, mo i stret tu, long ol “narafala sipsip” we oli kampani wetem olgeta. (Jon 10:16) Nomata wanem samting yumi bin mekem long laef blong yumi, yumi save kasem ona ya blong kam ol fren blong Jisas. I impoten tumas we yumi kam fren blong Jisas, from we sipos yumi fren blong hem, yumi fren blong Jeova tu. Tru ya, sipos yumi no kam klosap long Jisas Kraes fastaem, i no gat rod blong yumi kam klosap long Jeova. (Ridim Jon 14:6, 21.) ?Ale, wanem samting we yumi mas mekem blong kam fren blong Jisas mo gohed blong frengud wetem hem? Fastaem, bifo we yumi tokbaot samting ya we i impoten tumas, bambae yumi stadi long eksampol we Jisas i soem olsem wan gudfala fren. Mo bambae yumi luk se fasin blong Jisas blong fren wetem ol disaepol blong hem, i mekem wanem long olgeta.
Eksampol We Jisas i Soem Olsem Wan Gudfala Fren
3. ?Ol man oli save Jisas olsem fren blong hu?
3 Waes King Solomon i talem se: “Man we i rij, hem i gat plante fren blong hem.” (Prov. 14:20) Samting ya we Solomon i luksave, i soemaot wan slak fasin blong ol sinman. Oli fren wetem narafala from samting we oli save kasem long hem, i no from samting we oli save givim long hem. Jisas i no gat slak fasin ya. Mane mo haenem blong ol man i no pulum Jisas blong fren wetem olgeta. I tru se i gat wan yangfala lida we i rij tumas, we Jisas i lavem hem mo Jisas i singaot hem blong biaen long hem. Be Jisas i talem long man ya blong salemaot olgeta samting blong hem, mo tekem mane blong ol samting ya mo givim i go long ol puaman. (Mak 10:17-22; Luk 18:18, 23) Ol man oli no save Jisas olsem fren blong ol rijman mo haeman. Defren olgeta, oli save hem olsem fren blong ol puaman mo ol man we ol narafala oli ting nogud long olgeta.—Mat. 11:19.
4. ?From wanem yumi save se ol fren blong Jisas oli gat sam slak fasin blong olgeta?
4 I sua se ol fren blong Jisas oli gat sam slak fasin blong olgeta. Samtaem tingting blong Pita long sam samting i no laenap wetem tingting blong God. (Mat. 16:21-23) Taem Jemes mo Jon tufala i askem long Jisas blong putumap tufala olsem haeman long Kingdom, tufala i soemaot we tufala i gat tingting blong kasem haenem. Ol narafala aposol oli kros from samting ya we tufala i mekem, mo plante taem olgeta oli rao, from we oli wantem se bambae oli hae moa long ol narafala. Be Jisas i gat longfala tingting wetem olgeta. Hem i traehad blong stretem tingting blong ol fren blong hem, mo hem i no kros kwik long olgeta.—Mat. 20:20-28.
5, 6. (a) ?From wanem Jisas i gohed blong fren wetem bighaf blong ol aposol blong hem? (b) ?From wanem Jisas i no moa gohed blong fren wetem Judas?
5 Jisas i gohed blong fren wetem ol sinman ya, be i no from we hem i ting nating long ol slak fasin blong olgeta no from we hem i no luksave ol slak fasin ya. Defren olgeta, Jisas i traem blong luksave moa ol gudfala tingting we oli stap long hat blong ol fren blong hem mo ol gudfala fasin we oli gat. Tingbaot samting we i hapen taem Jisas i kasem traem ya we i strong moa long ol narafala traem long laef blong hem. Pita, Jemes, mo Jon, trifala i mas wekap blong givhan long Jisas, be trifala i slip. Samting ya i mekem Jisas i harem nogud tumas. Be nating, hem i luksave gudfala tingting we trifala i gat, i se: “Tru, tingting blong yufala i strong, be bodi blong yufala i slak.”—Mat. 26:41.
6 Jisas i gohed blong fren wetem ol aposol ya we oli gat gudfala tingting, be long saed blong Judas Iskariot, hem i defren. Jisas i no gohed blong fren wetem hem. Nating se Judas i mekem olsem se hem i fren blong Jisas, be Jisas i luksave se man ya we i fren blong hem bifo, i letem hat blong hem i kam nogud. Judas i kam fren blong wol, mo from samting ya hem i kam enemi blong God. (Jem. 4:4) Taswe, taem Jisas i talemaot long ol aposol blong hem se oli ol fren blong Hem, olgeta 11 nomo i stap. Jisas i talem finis long Judas blong i aot long olgeta.—Jon 13:21-35.
7, 8. ?Olsem wanem Jisas i soemaot lav long ol fren blong hem?
7 Jisas i no putum tingting blong hem i stap long ol slak fasin blong ol trufala fren blong hem. Hem i mekem samting we hem i save se bambae i givhan gud long olgeta. Olsem nao, hem i prea long Papa blong hem blong protektem olgeta taem oli kasem traem. (Ridim Jon 17:11.) Jisas i tingbaot ol nid blong olgeta long saed blong bodi. (Mak 6:30-32) Mo hem i no wantem talem tingting blong hem nomo, be hem i wantem harem mo kasem save long tingting mo filing blong olgeta tu.—Mat. 16:13-16; 17:24-26.
8 Ol samting we Jisas i mekem long laef blong hem, mo ded blong hem tu, i blong givhan long ol fren blong hem. I tru, hem i save se hem i mas givim laef blong hem blong folem ol loa blong Papa blong hem long saed blong stret fasin. (Mat. 26:27, 28; Hib. 9:22, 28) Be hem i givim laef blong hem tu blong soemaot lav long ol fren blong hem. Jisas i talem se: “I no gat man we i lavem ol fren blong hem moa, i winim man we i lusum laef blong hem blong i sevem ol fren blong hem.”—Jon 15:13.
?Fasin Blong Jisas Blong Fren Wetem Ol Disaepol Blong Hem, i Mekem Wanem Long Olgeta?
9, 10. ?Fasin blong Jisas we hem i glad blong givim samting, i mekem wanem long ol man?
9 Jisas i glad blong givim taem blong hem, lav, mo olting blong hem. Samting ya i pulum ol man oli kam klosap long hem, mo oli glad tu blong givim samting long hem. (Luk 8:1-3) From samting we Jisas i luk long laef blong hem, hem i talem se: “Yufala i mas givim olting blong yufala i go nomo long narafala man, nao narafala man bambae i givim olting blong hem i go nomo long yufala. Bambae narafala man i givim long yufala olsem we hem i fulumap bag, i seksekem, i ramem gogo i fulap gud, i stap kafsaed i folfoldaon. Fasin we yufala i folem blong givim presen long narafala man, hemia fasin we narafala man bambae i folem blong givim presen long yufala.”—Luk 6:38, Nyutesteman wetem Ol Sam long Bislama, futnot.
10 I tru we samfala oli kampani wetem Jisas nomo from samting we oli save kasem long hem. Ol giaman fren ya oli lego Jisas taem oli no kasem save long wan samting we hem i talem. Oli no trastem Jisas, be oli kwik blong ting nogud long hem mo gowe long hem. Defren olgeta, ol aposol oli stap tru long hem. Plante taem oli kasem ol traem blong pulum olgeta blong lego Jisas Kraes, be oli mekem bes blong olgeta blong stap tru long hem long gudtaem mo hadtaem tu. (Ridim Jon 6:26, 56, 60, 66-68.) Long laswan naet bifo we Jisas i ded, hem i talem tangkiu long ol fren blong hem, i se: “Yufala ya nao, oltaem yufala i stap wetem mi long olgeta hadtaem we mi mi gotru long hem.”—Luk 22:28.
11, 12. ?Jisas i mekem wanem blong soemaot long ol disaepol blong hem se oli ol gudfala fren blong hem yet? ?Mo samting ya i mekem wanem long olgeta?
11 Afta we Jisas i talem gudfala toktok ya long ol disaepol blong hem from fasin blong olgeta blong stap tru long hem, i no longtaem oli lego hem. Blong smoltaem, oli letem fraet long man i winim lav blong olgeta long Kraes. Be bakegen, Jisas i fogivim olgeta. Afta we hem i ded mo i laef bakegen, olgeta oli luk hem. Hem i mekem olgeta oli save se hem i fren blong olgeta yet. Mo tu, hem i putum wan tabu wok long han blong olgeta, hemia blong pulum “ol man long olgeta ples long wol” oli kam disaepol blong hem, mo blong talemaot hem ‘gogo oli finisim olgeta ples long wol.’ (Mat. 28:19; Wok 1:8) ?Ol tok ya blong Jisas mo fasin blong hem i mekem wanem long ol disaepol blong hem?
12 Ol disaepol ya oli mekem wok blong talemaot gud nius blong Kingdom wetem fulhat mo ful laef blong olgeta. Wetem help blong tabu spirit blong Jeova, kwiktaem nomo oli mekem Jerusalem i fulap long ol tijing blong olgeta. (Wok 5:27-29) Nating se oli save ded from, oli obei long tok blong Jisas blong pulum ol man oli kam disaepol, oli no letem wan samting i blokem olgeta long wok ya. Samwe long 25 yia nomo afta we Jisas i givim wok ya long olgeta, aposol Pol i talem se oli talemaot gud nius finis long “olgeta man long wol.” (Kol. 1:23) !Yes, ol disaepol ya oli soemaot klia we oli tinghae long fasin fren blong olgeta wetem Jisas!
13. ?Ol tijing blong Jisas oli mekem wanem long ol disaepol blong hem?
13 Olgeta we oli kam ol disaepol blong Jisas oli letem ol tijing blong Jisas oli jenisim laef blong olgeta wanwan. Plante man oli mas mekem ol bigfala jenis long ol fasin mo tingting blong olgeta. Bifo we samfala oli kam disaepol, oli man blong slip wetem man mo woman blong slip wetem woman, oli mekem i krangke wetem narafala we i no waef no hasban blong olgeta, oli dring lusum hed, mo oli stil. (1 Kor. 6:9-11) Sam narafala oli mas jenisim tingting blong olgeta long saed blong ol man blong narafala kantri mo laen. (Wok 10:25-28) Nating se i olsem, olgeta ya oli obei long ol tok blong Jisas. Oli finis long olfala laef blong olgeta, mo oli mekem laef mo tingting blong olgeta i kam niuwan olgeta. (Efes. 4:20-24) Oli lanem ol “tingting blong Kraes,” oli kasem save long ol tingting mo fasin blong hem mo oli folem olgeta long laef blong olgeta.—1 Kor. 2:16.
Fasin Fren Blong Yumi Wetem Kraes
14. ?Jisas i promes blong mekem wanem long “lashaf blong fasin blong laef long wol ya”?
14 Plante long ol Kristin long faswan handred yia oli save Jisas taem hem i stap long wol, mo oli luk hem afta we hem i laef bakegen. Be i klia se yumi, yumi no gat janis ya. ?Taswe, olsem wanem yumi save kam fren blong Kraes? Wan rod, hemia blong obei long ol advaes we i kamaot long slef we i stret mo waes. Ol brata blong Kraes we tabu spirit i makemaot olgeta mo oli laef yet long wol, olgeta nao oli mekemap grup ya blong slef we i stret mo waes. Jisas i promes se long “lashaf blong fasin blong laef long wol ya,” bambae hem i putumap slef ya “blong lukaot long olgeta samting blong hem.” (Mat. 24:3, 45-47, NW) Tede, bighaf blong olgeta we oli wantem kam fren blong Kraes, oli no ol memba blong grup ya we i olsem slef. ?Olsem wanem fasin blong olgeta blong obei long slef ya, i gat paoa long fasin fren blong olgeta wetem Kraes?
15. ?Wanem samting bambae i soemaot sipos yumi wan sipsip no wan nani?
15 Ridim Matiu 25:31-40. Jisas i singaot olgeta long grup ya blong slef we i stret mo waes, se oli ol brata blong hem. Long parabol blong Jisas long saed blong seraotem ol sipsip mo ol nani, Jisas i talem klia se taem yumi mekem wan samting long ol brata blong hem, i olsem we yumi mekem samting ya long hem tu. Tru ya, hem i talem se fasin we yumi mekem “long wan brata blong [hem], we i daon moa long ol narafala brata blong [hem],” bambae i soemaot sipos yumi wan sipsip no wan nani. Taswe, ol man we oli gat hop blong laef olwe long wol, oli mas wokgud wetem slef ya we i stret mo waes. Hemia bigfala samting we yumi mas mekem blong soemaot we yumi wantem kam fren blong Kraes.
16, 17. ?Olsem wanem yumi save soemaot se yumi wantem fren wetem ol brata blong Kraes?
16 Sipos yu stap tingting strong blong kasem laef long wol aninit long rul blong Kingdom blong God, ?wanem samting we yu save mekem blong soemaot se yu yu fren blong ol brata blong Kraes? Bambae yumi tokbaot tri samting nomo. Faswan se, yumi save mekem wok blong prij wetem fulhat blong yumi. Kraes i talem long ol brata blong hem blong oli talemaot gud nius long olgeta ples long wol. (Mat. 24:14) Be sipos wok ya i blong ol brata blong Kraes nomo we oli laef yet long wol, bambae hem i bigwan tumas. Taswe, evri taem we ol narafala sipsip oli joen long wok blong prij, oli stap halpem ol brata blong Kraes blong mekem tabu wok ya blong olgeta. Slef ya we i stret mo waes, mo Kraes tu, oli gat bigfala tangkiu from kaen fasin ya we ol narafala sipsip oli mekem blong fren wetem olgeta.
17 Seken samting we ol narafala sipsip oli save mekem blong halpem ol brata blong Kraes, hemia se oli save givim presen mane blong sapotem wok blong prij. Jisas i pulum ol man blong hem blong yusum “ol gudgudfala samting blong [olgeta] long wol ya” blong fren wetem ol man. (Luk 16:9) Be samting ya i no min se yumi save givim mane long Jisas mo Jeova blong tufala i fren wetem yumi. Nogat. Defren olgeta, i min se yumi no talem nomo se yumi wantem fren wetem Jisas mo Jeova, mo lavem tufala. Be yumi yusum mane blong yumi mo olting blong yumi blong givhan long wok blong Kingdom, mo long rod ya, yumi ‘mekem samting, blong soemaot’ we yumi lavem tufala tru. (1 Jon 3:16-18) Yumi yusum mane blong yumi mo olting blong yumi blong sapotem Kingdom taem yumi joen long wok blong prij, taem yumi givim presen mane blong bildim ol haos wosip mo lukaotgud long olgeta, mo taem yumi givim presen mane blong wok blong prij we i stap gohed long fulwol. Nating se yumi givim smol no bigwan, i sua se Jeova mo Jisas tufala i gat bigfala tangkiu from we yumi givim samting wetem gladhat.—2 Kor. 9:7.
18. ?From wanem yumi mas obei long ol advaes blong Baebol we ol elda long kongregesen oli givim?
18 Namba tri samting we yumi save mekem blong pruvum se yumi ol fren blong Kraes, hemia blong folem ol advaes we ol elda long kongregesen oli givim. Kraes i yusum tabu spirit blong putumap ol man ya. (Efes. 5:23) Aposol Pol i talem se: “Yufala i mas ona long ol man we oli stap lidim yufala, mo yufala i mas obei long ol tok blong olgeta.” (Hib. 13:17, Nyutesteman wetem Ol Sam long Bislama) Samtaem, maet i no isi blong obei long ol advaes blong Baebol we ol elda long kongregesen oli givim. Ating yumi save ol slak fasin blong olgeta, mo from samting ya, yumi save gat tingting we i no stret long ol advaes we oli givim long yumi. Be Kraes, we i hed blong kongregesen, hem i glad blong yusum ol sinman ya. Taswe, fasin blong yumi blong stap daon aninit long olgeta ya we oli lukaot long kongregesen i gat paoa long fasin fren blong yumi wetem Kraes. Taem yumi traehad blong no tingting tumas long ol slak fasin blong ol elda mo yumi glad blong folem advaes blong olgeta, yumi soem se lav blong yumi long Kraes i tru.
Ples We Yumi Save Faenem Ol Gudfala Fren
19, 20. ?Yumi save faenem hu long kongregesen? ?Mo bambae yumi tokbaot wanem long nekis stadi blong yumi?
19 Jisas i gohed blong yusum ol elda blong lukaot gud long yumi. Oli olsem ol man blong lukaot long sipsip we oli lavem ol sipsip blong olgeta. Mo Jisas i lukaot long yumi long wan narafala rod tu. Hem i givim olgeta long kongregesen we oli olsem ol mama, ol brata mo ol sista blong yumi. (Ridim Mak 10:29, 30.) Taem yu stat blong joen wetem ogenaesesen blong Jeova, ?wanem tingting blong ol famle blong yu? Yumi hop se oli glad we yu stap traehad blong kam klosap long God mo Kraes. Be Jisas i givim woning ya se, samtaem “man i gat ol enemi blong hem, we olgeta oli famle blong hem nomo.” (Mat. 10:36) !Yumi harem gud tumas blong save se long kongregesen, yumi save faenem ol fren we oli mekem i gud moa long yumi, i winim stret brata blong yumi!—Prov. 18:24.
20 Long en blong leta we Pol i raetem long kongregesen long Rom, hem i talem nem blong olgeta we hem i wantem talem halo long olgeta. Samting ya i soemaot se hem i gat plante gudfala fren blong hem. (Rom 16:8-16) Long en blong leta we aposol Jon i raetem, hem i se: “Plis yu talem halo long ol fren blong mifala wanwan longwe.” (3 Jon 15 [14, NW]) I klia se i gat plante man we hem i fren wetem olgeta longtaem. ?Olsem wanem yumi save folem eksampol blong Jisas mo ol faswan disaepol, taem yumi fren wetem ol Kristin brata sista mo taem yumi traem mekem se fasin fren ya i stap gud? Bambae yumi ansa long kwestin ya long nekis stadi blong yumi.
?Bambae Yu Yu Ansa Olsem Wanem?
• ?Eksampol blong Jisas i soem se yumi save mekem wanem blong frengud wetem ol narafala?
• ?Fasin blong Jisas blong fren wetem ol disaepol, i mekem wanem long olgeta?
• ?Wanem ol samting we yumi save mekem blong soem se yumi ol trufala fren blong Kraes?
[Kwestin]
[Tok blong pija long pej 22]
Jisas i wantem save tingting mo filing blong ol fren blong hem
[Tok blong pija long pej 23]
?Olsem wanem yumi save soem se yumi wantem kam fren blong Kraes?