Stadi Baebol Blong Mekem Ol Prea Blong Yu Oli Kam Gud Moa
Stadi Baebol Blong Mekem Ol Prea Blong Yu Oli Kam Gud Moa
“Plis yu harem prea blong mi.”—NEH. 1:11.
1, 2. ?From wanem i gud blong lukluk sam prea we oli raetem i stap long Baebol?
PREA mo Baebol stadi, tufala samting ya oli impoten tumas long trufala wosip. (1 Tes. 5:17; 2 Tim. 3:16, 17) I tru, Baebol i no wan buk blong ol prea. Be i gat plante prea long hem, wetem olgeta we yumi save faenem long buk blong Ol Sam.
2 Taem yu stap ridim Baebol mo stadi long hem, yu save faenem ol prea we oli stret long ol defren samting we oli hapen long laef blong yu. Yes, taem yu yusum ol tingting we oli stap long ol prea long Baebol, hemia i save mekem prea blong yu i kam gud moa. ?Yu save lanem wanem long olgeta we oli prea long God blong i halpem olgeta, nao God i ansarem prea blong olgeta, mo long ol samting we oli talem long ol prea blong olgeta?
Lukaotem Mo Folem Ol Advaes Blong God
3, 4. ?Man blong wok blong Ebraham i mekem wanem, mo yumi save lanem wanem long samting we Jeova i mekem?
3 Taem yu stap stadi long Baebol, yu lanem se yu mas prea oltaem long God blong hem i lidim yu. Tingbaot taem ya we olfala Ebraham i sanem wan olfala man blong wok blong hem, ating nem blong hem Eliesa, i go long Mesopotemia blong tekem wan woman we i stap onagud long God blong i kam waef blong Aesak. Taem ol woman oli stap kam long wel blong kasem wota, man blong wok ya i prea se: “Hae God, . . . Bambae mi askem long wan long olgeta se, ‘?Plis, yu save givim smol wota long mi, blong mi dring?’ Sipos hem i talem se ‘Ale, yu dring, mo bambae mi go tekem wota blong ol kamel blong yu tu’, plis yu letem we tok ya i saen we yu yu jusumaot gel ya, blong man ya blong yu Aesak bambae i mared long hem. Long fasin ya, bambae mi mi save we yu yu holem promes ya blong yu yet, long masta blong mi.”—Jen. 24:12-14.
4 Jeova i ansarem prea blong man blong wok blong Ebraham taem Rebeka i kam karem wota blong ol kamel blong hem. I no longtaem, Rebeka i folem man blong wok ya i go long Kenan mo i kam waef we Aesak i lavem hem tumas. I tru, yu no mas ting se God bambae i givim wan spesel saen long yu. Be sipos yu prea wetem strong tingting mo letem tabu spirit blong hem i lidim yu, God bambae i lidim yu long laef blong yu.—Gal. 5:18.
Prea i Givhan Blong Daonem Wari
5, 6. ?Wanem impoten samting i stap long prea blong Jekob taem hem i kam blong mitim Esao?
5 Prea i save mekem wari i godaon. Jekob i fraet se brata blong hem, Esao, we tufala i twin, bambae i mekem faet long hem, ale hem i prea se: “Hae God, . . . Fasin blong yu, oltaem yu stap lavem mi tumas, mo oltaem yu stap holem promes blong yu long mi. Mi mi no wan gudfala man, mi man blong wok blong yu nomo, mo i no stret blong yu stap mekem i gud tumas long mi olsem. . . . Hae God, plis yu blokem brata blong mi, yu sevem mi. Mi mi fraet. Mi fraet se hem bambae i kam mekem faet long mifala, nao bambae i spolem mifala evriwan, wetem ol woman ya mo ol pikinini. Bifo, yu yu promes se bambae yu mekem olgeta samting long laef blong mi oli go gud, mo bambae yu mekem olgeta we bambae oli kamaot biaen long mi oli kam plante we plante, we man i no save kaontem olgeta, bambae oli plante olsem sanbij daon long solwota. Plis yu no fogetem promes ya blong yu.”—Jen. 32:9-12.
6 Taem Jekob i prea finis, hem i mekem ol samting blong protektem famle blong hem, mo God i ansarem prea blong hem taem hem mo Esao tufala i frengud bakegen. (Jen. 33:1-4) Ridimgud prea ya we Jekob i mekem, mo bambae yu faenemaot se hem i no askem nomo long God blong i halpem hem. Hem i soem se hem i bilif long promes blong God long saed blong laen blong hem, mo hem i talem tangkiu long God from lav mo kaengud fasin blong Hem. ?Olsem wanem long yu? ?I gat sam samting we oli mekem yu yu “fraet”? (2 Kor. 7:5) Sipos yes, prea blong Jekob i save mekem yu yu tingbaot bakegen se ol prea oli save daonem wari. Be taem yu prea, yu no mas askem samting nomo long God. Ol tok long prea blong yu oli mas soemaot bilif tu.
Prea From Waes
7. ?From wanem Moses i prea blong hem i savegud ol fasin blong Jeova?
7 Tingting ya blong wantem mekem Jeova i harem gud i mas pusum yu blong prea from waes. Moses i prea long God blong hem i savegud ol fasin blong hem. Hem i talem se: “!Yu luk! Yu [Jeova] yu talem long mi finis, se bambae mi mi lidim ol man ya [oli aot long Ijip]. . . . Yu talem long mi finis we yumitufala i fren gud, mo yu glad tumas long mi. Be sipos tingting blong yu i stap olsem long mi yet, plis yu tijim mi long ol fasin blong yu, . . . blong mi save stap mekem yu yu glad long mi olwe.” (Eks. 33:12, 13) God i ansa long prea blong Moses taem hem i mekem se Moses i savegud ol fasin blong hem—wan samting we Moses i nidim blong hem i save lidim ol man blong Jeova.
8. ?Sipos yu tingting dip long 1 King 3:7-14, olsem wanem samting ya i save givhan long yu?
8 Deved i prea tu, se: “Hae God. Plis yu tijim mi long ol fasin blong yu.” (Sam 25:4) Solomon we i pikinini boe blong Deved, i prea blong God i givim waes long hem blong mekem ol wok blong hem olsem king blong Isrel. Jeova i glad long prea blong Solomon, ale hem i givim samting we Solomon i askem. Mo tu, Jeova i mekem hem i rij, mo i mekem we ol man oli ona long hem i bitim ol narafala king. (Ridim 1 King 3:7-14.) Sipos yu harem se yu no naf blong mekem ol wok we yu kasem long kongregesen, i gud yu prea from waes, mo yu soemaot se yu gat wan tingting we i stap daon. Nao God bambae i halpem yu blong gat save mo waes we yu nidim blong mekem ol wok blong yu long fasin we i stret mo i soem lav.
Prea i Mas Kamaot Long Hat
9, 10. ?Long prea blong Solomon long taem ya we oli openem haos blong Jeova, wanem impoten samting we yu save lanem long saed blong hat blong man?
9 Prea i mas kamaot long hat blong yu sipos yu wantem se God i harem yu. Long 1 King japta 8, Solomon i prea wetem fulhat blong hem long fored blong ol man we oli kam wanples long Jerusalem blong openem haos blong Jeova, long yia 1026 B.K.T. * Taem oli putum bokis ya we i saen blong Promes blong Hae God i go insaed long Rum ya we i Tabu we i Tabu, mo klaod i fulumap haos blong God, Solomon i presem God.
10 I gud yu stadi long prea blong Solomon mo luk olsem wanem hem i tokbaot hat blong man. Solomon i talem se Jeova nomo i save hat blong man. (1 King 8:38, 39, NW) Semfala prea ya i soem se man we i ‘tanem tingting blong hem tru’ from ol sin blong hem, i save kambak long God. Sipos ol enemi oli tekem ol man blong God oli go kalabus long narafala kantri, be hat blong olgeta i stap fulwan long Jeova, hem bambae i harem prea blong olgeta. (1 King 8:48, 58, 61, NW) From samting ya, i gud we ol prea blong yu oli kamaot long hat blong yu.
Tok Blong Ol Sam i Save Mekem Ol Prea Oli Kam Gud Moa
11, 12. ?Wanem samting we yu yu lanem long prea blong man Livae, we blong smoltaem hem i no save go long haos blong God?
11 Sipos yu stadi long Ol Sam, hemia i save mekem ol prea blong yu oli kam gud moa, mo i save halpem yu blong wet long God blong i ansa long olgeta. Tingbaot longfala tingting blong man Livae we i stap kalabus. Blong smoltaem hem i no save go long haos prea blong Jeova, be nating, hem i singsing se: “?From wanem mi mi sore tumas olsem? ?From wanem tingting blong mi i trabol tumas? Bambae mi mi putum tingting blong mi i stap [“mi mi wet,” NW] long yu nomo, mo bakegen, bambae mi stap presem yu we yu yu God blong mi, yu sevem mi.”—Sam 42:5, 11; 43:5.
12 ?Wanem fasin we yu save lanem long man Livae ya? Sipos yu kalabus from we yu stap mekem ol samting we God i wantem, ating samting ya bambae i blokem yu blong smoltaem blong yu no joen wetem ol narafala Kristin long ples blong wosip blong olgeta. Ale, yu mas gat longfala tingting blong wet long God blong hem i halpem yu. (Sam 37:5) Tingting dip long ol gudfala taem we yu gat finis long wok blong God. Mo yu mas prea blong yu save stanap strong, taem yu ‘wet long God’ blong mekem yu yu joen bakegen wetem ol man blong hem.
Gat Bilif Taem Yu Prea
13. ?Folem Jemes 1:5-8, from wanem yu mas gat bilif taem yu prea?
13 Nomata wanem samting i kamaot long laef blong yu, oltaem yu mas gat bilif taem yu prea. Sipos wan samting i traem fasin blong yu blong holemstrong long God, i gud yu folem advaes blong disaepol Jemes. Prea long Jeova, mo tingting blong yu i no mas hafhaf se bambae hem i givim waes we yu nidim blong stanap strong. (Ridim Jemes 1:5-8.) God i savegud ol samting we oli stap traem yu, mo hem i save yusum tabu spirit blong lidim yu mo mekem yu yu harem gud. Taem yu talemaot ol filing blong yu long hem, yu mas bilif, ‘tingting blong yu i no mas hafhaf nating.’ Mo yu mas letem tabu spirit i lidim yu mo folem advaes long Tok blong God.
14, 15. ?From wanem yumi save talem se Hana i prea mo i mekem samting we i soemaot se hem i gat bilif?
14 Hana, wan long tufala waef blong man Livae ya we nem blong hem Elkana, i prea mo i mekem samting we i soem se hem i gat bilif. Penina we i narafala waef blong Elkana, i stap karem pikinini. Be Hana i no save gat pikinini, ale Penina i stap jikim hem, mo i mekem hem i harem nogud tumas. Long haos blong God, Hana i mekem wan strong promes se sipos hem i gat wan pikinini boe, bambae hem i givim i go long Jeova. Taem Hana i prea, maot blong hem i stap muvmuv, be voes blong hem i no kamaot, mo from samting ya, Hae Pris ya IIae i ting se hem i drong. Taem hem i save se Hana i no drong, hem i talem se: “Prea blong mi, we God ya blong yumi bambae i givim samting ya long yu we yu yu askem.” Hana i no save wanem samting we Jeova bambae i mekem, be nating, hem i gat strong bilif se God bambae i ansarem prea blong hem. Taswe, hem i no moa harem nogud, mo tingting blong hem i no moa trabol. “Hem i harem gud” nomo.—1 Saml. 1:9-18.
15 Taem Samuel i bon mo i livim titi, Hana i tekem hem i go long haos blong Jeova, blong hem i mekem wok blong God oltaem long laef blong hem. (1 Saml. 1:19-28) Ol prea blong yu bambae oli kam gud moa sipos yu tekem taem blong tingting dip long prea we Hana i mekem long taem ya. Mo prea ya bambae i halpem yu blong luksave se, nating we yu stap harem nogud tumas long wan problem, be yu save harem gud sipos yu prea mo yu gat bilif se Jeova bambae i ansarem prea blong yu.—1 Saml. 2:1-10.
16, 17. ?Wanem i hapen taem Nehemaea i prea mo i mekem samting we i soemaot se hem i gat bilif?
16 Gudfala man ya Nehemaea we i laef long ol yia 400 B.K.T., hem i prea mo i mekem samting we i soemaot se hem i gat bilif. Hem i prea se: “Plis yu harem prea blong mi wetem ol prea blong ol narafala man blong yu tu, we olgeta oli wantem leftemap nem blong yu. Mo plis yu mekem mi mi win tede, mo yu mekem we king ya bambae i gat sore long mi.” ?Hu ya “king ya”? Hemia King Ataksekses we i rul long Pesia. Wok blong Nehemaea i blong lukaot long waen blong king.—Neh. 1:11.
17 Nehemaea i harem nius se ol man Jiu we oli aot long kalabus long Babilon mo we oli gobak finis long ples blong olgeta, ‘oli stap trabol mo ol man afsaed oli stap lukluk rabis long olgeta. Mo bigfala stonwol blong Jerusalem ya we i brokdaon bifo, i stap olsem nomo yet.’ Ale Nehemaea i prea wetem bilif long tutri dei olsem. (Neh. 1:3, 4) Jeova i ansarem ol prea blong Nehemaea taem King Ataksekses i letem hem i go long Jerusalem blong bildim bakegen stonwol blong taon ya. (Neh. 2:1-8) Smoltaem biaen, oli finisim wok ya blong bildim bakegen stonwol blong Jerusalem. Jeova i ansarem ol prea blong Nehemaea from we hem i tingbaot trufala wosip, mo prea we hem i mekem i soemaot se hem i gat bilif. ?Olsem wanem? ?Samting ya i tru long saed blong ol prea blong yu?
Tingbaot Blong Presem God Mo Talem Tangkiu
18, 19. ?Wanem ol risen we i mekem se ol man blong wok blong Jeova oli presem hem mo talem tangkiu long hem?
18 Taem yu prea, yu mas presem Jeova mo talem tangkiu long hem. !I gat plante risen blong mekem olsem! Tingbaot eksampol blong Deved, hem i wantem tumas blong leftemap rul blong Jeova. (Ridim Ol Sam 145:10-13.) ?Olsem wanem? ?Ol prea blong yu oli soemaot se yu glad long janis ya blong talemaot Kingdom blong Jeova? Ol tok blong man ya blong raetem Sam i save halpem yu blong mekem ol prea we oli kamaot long hat, blong talem tangkiu long God from ol Kristin miting mo ol asembli.—Sam 27:4; 122:1.
19 Sipos yu glad we yu gat wan gudfala fasin fren wetem God, bambae yu prea long hem wetem fulhat blong yu. Yu save talem ol tok olsemia: “[Jeova], bambae mi mi talem tangkiu long yu long fes blong olgeta man, bambae mi sing blong presem yu long fes blong ol man blong ol narafala kantri. Fasin ya blong yu we oltaem yu lavem man tumas, hem i hae we i hae, i go kasem skae. Fasin blong yu we oltaem yu stap holem ol promes blong yu, hem i hae tumas, i go antap i kasem ol klaod. God. Mi mi wantem tumas blong yu yu soemaot we yu yu hae we yu hae i bitim skae, mo we bigfala paoa blong yu i kasem olgeta ples long wol.” (Sam 57:9-11) !Yes ol tingting olsemia oli gud tumas! ?Olsem wanem? ?Yu yu agri se tok blong Ol Sam ya i save gat paoa mo mekem ol prea blong yu oli kam gud moa?
Askem Oltaem Wetem Bigfala Respek
20. ?Olsem wanem Meri i soemaot se hem i onagud long God?
20 Yu mas soemaot long ol prea blong yu se yu gat bigfala respek long God. I no longtaem afta we Meri i save se hem bambae i kam mama blong Mesaea, hem i prea wetem respek. Hem i talem ol tok we i klosap sem mak long ol tok we Hana i talem long prea blong hem, taem hem i givim yangfala Samuel long Jeova, blong mekem wok long haos blong God. Ol tok we Meri i talem long prea blong hem i soemaot klia se hem i gat bigfala respek long God. Hem i talem se: “Long olgeta laef blong mi, mi mi stap leftemap nem blong Hae God, mo long tingting blong mi, mi mi glad tumas from God ya we i sevem mi.” (Luk 1:46, 47) ?Yu ting se sipos yu talemaot ol tingting ya we Meri i talem, yu save mekem ol prea blong yu oli kam gud moa? !Naoia yumi luksave from wanem God i jusum Meri, wan woman we i onagud long God, blong i kam mama blong Jisas we i Mesaea!
21. ?Olsem wanem prea blong Jisas i soemaot se hem i prea wetem bigfala respek mo i bilif fulwan se God bambae i harem hem?
21 Jisas i prea wetem bigfala respek mo i bilif fulwan se God bambae i harem prea blong hem. Tingbaot bifo we hem i mekem Lasaros i laef bakegen, hem “i lukluk i go antap, i talem se, ‘Papa. Mi mi talem tangkiu long yu from we yu harem prea blong mi. Mo mi save we oltaem yu stap harem mi.’” (Jon 11:41, 42) ?Olsem wanem long ol prea blong yu? ?Yu prea wetem respek mo yu bilif fulwan se God bambae i harem prea blong yu? Long Lodsprea, Jisas i soemaot bigfala respek long God. Sipos yu stadi long prea ya, bambae yu luk sam samting we oli stap long hem we oli impoten tumas, olsem, mekem nem blong Jeova i tabu, Kingdom blong hem i kam, mo mekem ol samting we hem i wantem oli kamtru. (Mat. 6:9, 10) Nao tingbaot ol prea blong yu. ?Yu yu soemaot long ol prea blong yu se yu intres tumas long Kingdom blong Jeova, blong mekem ol samting we hem i wantem, mo blong leftemap tabu nem blong hem? Yu mas mekem olsemia long ol prea blong yu.
22. ?From wanem yu save sua se Jeova bambae i mekem we yu yu no fraet blong talemaot gud nius?
22 From we yumi stap kasem fasin agens mo ol narafala trabol, plante taem yumi prea mo askem strong long Jeova blong i halpem yumi blong no fraet blong mekem wok blong hem. Taem ol memba blong kaonsel ya Sanhedrin i givim oda long Pita mo Jon blong tufala ‘i no moa yusum nem blong Jisas blong tijim ol man,’ tufala aposol ya i no fraet blong talem se bambae tufala i gohed nomo. (Wok 4:18-20) Afta we tufala i kamaot long kalabus, tufala i go luk ol narafala Kristin, nao tufala i talemaot ol samting we i hapen long tufala. Ale olgeta we oli stap oli prea long God blong i halpem olgeta blong oli talemaot ol Tok blong hem, we oli no fraet nating. !Ol Kristin ya oli mas harem gud tumas taem Jeova i ansarem prea blong olgeta, nao ‘tabu spirit i kam fulap long olgeta, mo oli stat talemaot tok blong God we oli no fraet nating’! (Ridim Ol Wok 4:24-31.) From samting ya, plante man oli kam mekem wosip long Jeova. Prea i save mekem yu yu strong moa blong talemaot gud nius we yu no fraet nating.
Gohed Blong Mekem Ol Prea Blong Yu Oli Kam Gud Moa
23, 24. (a) Talem sam narafala eksampol long Baebol we oli soemaot se stadi long Baebol i save mekem ol prea blong yu oli kam gud moa. (b) ?Yu save mekem wanem blong ol prea blong yu oli kam gud moa?
23 I gat plante narafala eksampol long Baebol we oli soemaot se, taem yu ridim mo stadi Baebol yu save mekem ol prea blong yu oli kam gud moa. Tingbaot Jona, yu save mekem olsem hem, sipos yu soemaot long prea blong yu se ‘Jeova nomo i save sevem man.’ (Jona 2:1-10) Maet yu harem nogud from wan bigfala sin we yu bin mekem mo yu luk ol elda finis blong oli givhan long yu. Ale taem yu prea yu wan, ol filing blong Deved long prea blong hem oli save givhan long yu blong talem ol tok we i soemaot se yu tanem tingting blong yu finis. (Sam 51:1-12) Long sam prea blong yu, yu save presem Jeova olsem Jeremaea i mekem. (Jer. 32:16-19) Sipos yu stap lukaotem wan we yu wantem mared wetem, i gud yu stadi long prea we i stap long Esra japta 9. Ol tingting we i stap long prea ya wetem prea blong yu blong askem God blong halpem yu, i save mekem tingting blong yu i strong moa blong obei long tok blong God se yu mas mared long wan “man blong Masta” nomo.—1 Kor. 7:39; Esra 9:6, 10-15.
24 Gohed blong ridim Baebol, stadi long hem, mo lukaot ol save insaed long hem. Lukaotem ol tingting we yu save yusum long ol prea blong yu. Yu save tekem ol tingting we oli stap long Baebol mo joenem olgeta i go long ol prea blong yu blong askem help blong God, mo blong talem tangkiu, mo blong presem hem. Taem yu stadi Baebol, mo long rod ya yu mekem ol prea blong yu oli kam gud moa, yu save sua se bambae yu kam klosap moa long Jeova God.
[Futnot]
^ par. 9 B.K.T. i minim Bifo Kristin Taem.
?Bambae Yu Yu Ansa Olsem Wanem?
• ?From wanem yumi mas lukaotem mo folem advaes blong God?
• ?Wanem tingting i mas pusum yumi blong prea from waes?
• ?Olsem wanem tok blong Ol Sam i save mekem ol prea blong yumi oli kam gud moa?
• ?From wanem yumi mas prea wetem bigfala respek mo bilif?
[Kwestin]
[Tok blong pija long pej 16]
Famle Stadi i save mekem ol prea blong yu oli kam gud moa