Tabu Spirit—Wan Paoa We Yu Yu Nidim Long Laef Blong Yu

“PLIS yu no ronemaot mi mi gowe long yu, mo yu no tekemaot Tabu Spirit blong yu i gowe long mi.” (Ol Sam 51:11) Hemia wan prea we i kamaot long hat blong King Deved. Prea ya, Deved i talem afta we hem i mekem wan bigfala sin.

Paoa blong tabu spirit i givhan plante long Deved. Taem hem i yangfala nomo, tabu spirit i givhan long hem blong winim strongfala soldia ya Golaeat. (1 Samuel 17:45-50) Tabu spirit i pulum hem tu blong wokem sam naesfala singsing blong presem God. Deved i talem se: “Spirit blong Hae God i stap yusum mi blong talemaot ol tok blong hem. Oltaem mi mi stap talemaot ol tok we hem i talem.”—2 Samuel 23:2.

Jisas Kraes tu i tokbaot se tabu spirit i givhan long Deved. Wan dei, Jisas i talem long ol man we oli stap lesin long hem se: “Tabu spirit i givim waes long King Deved blong hem i talem se, ‘Hae God i talem long Masta blong mi se, “Yu sidaon long raet saed blong mi, yu wet. Bambae mi mekem ol enemi blong yu oli stap aninit long paoa blong yu, oli slef blong yu.”’” (Mak 12:36; Ol Sam 110:1) Jisas i save se ol singsing ya blong Deved, tabu spirit i pulum hem blong wokem olgeta. ?Olsem wanem? ?Tede semfala tabu spirit ya i save halpem yumi?

“Yufala i Mas Gohed Blong Askem, Nao Bambae Yufala i Save Kasem”

Ating bambae tabu spirit i no pulum yu blong wokem wan singsing. Be yu save kasem sam trabol we oli bigfala tumas, olsem Golaeat. Tingbaot samting we i hapen long Isabel. * Hasban blong Isabel i lego hem from i laekem wan narafala woman  we i yangfala moa. Isabel mo hasban blong hem, tufala i gat bigfala kaon, be taem hasban blong hem i lego hem, Isabel nao i mas pembak bigfala kaon ya hem wan. Mo hasban blong hem i no givim wan mane long hem nating blong lukaot long tufala smol gel blong tufala. Isabel i talem se: “Hasban blong mi i spolemgud mi olsem se mi mi nating nomo. Be stat long taem ya we hem i lego mi kam kasem naoia, mi luksave se tabu spirit blong God i stap givim paoa long mi.”

?Olsem wanem? ?Isabel i ting se bambae hem i kasem tabu spirit olsem nomo? Nogat. Evri dei hem i askem strong long God blong givim tabu spirit long hem. Isabel i save se hem i nidim paoa blong God blong givhan long hem blong gat strong tingting long saed blong fiuja, mo blong lukaot gud long tufala pikinini blong hem, mo blong hem i gat gudfala tingting bakegen long saed blong hem wan. Hem i folem tok blong Jisas se: “Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.”—Matiu 7:7.

Roberto tu i luksave se hem i nidim tabu spirit blong God. Be risen from wanem hem i nidim tabu spirit i defren long hemia blong Isabel. Roberto i smok tabak mo kanabis, mo hem i kam slef blong ol drag ya. Blong tu yia, hem i traehad blong lego olgeta, be samtaem hem i foldaon bakegen. Roberto i talem se: “Taem wan man i no moa tekem drag, tingting blong hem i trabol bigwan. Evri dei hem i harem se hem i wantem tumas blong tekem drag ya bakegen.”

Roberto i gohed, se: “Be mi mi gat strong tingting blong jenisim laef blong mi, blong God i glad long mi mo blong mi save mekem wok blong hem. Mi traehad blong tingting oltaem long ol gudfala tok blong Baebol. Evri dei mi prea strong, mi askem long God blong givim paoa long mi blong mi save mekem laef blong mi i laenap wetem samting we Hem i wantem. Mi save se mi no naf blong mekem samting ya long paoa blong mi nomo. Mi luk olsem wanem Jeova i ansa long ol prea blong mi, speseli taem tingting blong mi i foldaon from we mi tekem drag bakegen. Mi bilif strong se tabu spirit blong God i mekem tingting blong mi i strong bakegen; sipos mi no gat spirit blong God, bambae mi no save lego ol drag ya.”—Filipae 4:6-8.

“Bambae Oli Girap Olsem We Oli Gat Wing Olsem Bigfala Pijin Ya Igel”

Olsem Isabel mo Roberto, plante plante Witnes blong Jeova oli luksave se tabu spirit i givhan long olgeta. Yu tu yu save kasem tabu spirit blong Jeova, paoa ya we hem i yusum blong wokem olgeta samting long skae mo long wol. Sipos yu askem strong long God blong givim tabu spirit long yu, bambae hem i wantem mo i glad nomo blong givim spirit ya. Be blong kasem spirit ya, yu mas lanem trutok long saed blong hem mo traehad blong mekem samting we hem i wantem.—Aesea 55:6; Hibrus 11:6.

Tabu spirit i save givim paoa long yu blong mekem wok blong God mo blong winim olgeta trabol we yu kasem long laef blong yu. Hemia nao samting we Baebol i promes, i se: “Olgeta we oli taed, [Hae God] i stap givim paoa long olgeta, mo olgeta we oli no strong, hem i stap mekem olgeta oli strong bakegen. . . . Be olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.”—Aesea 40:28-31.

[Futnot]

[Tok blong makem poen long pej 8]

‘Mi prea strong evri dei, mi askem long God blong givim paoa long mi. Mi save se mi no naf blong mekem samting ya long paoa blong mi nomo. Mo mi luk olsem wanem hem i ansa long ol prea blong mi’

 [Bokis blong pija long pej 7]

WOK WE TABU SPIRIT I MEKEM

God i yusum tabu spirit blong wokem wol ya mo olgeta narafala planet mo sta long skae. Man we i wokem plante singsing blong Ol Sam, i talem se: “Hae God. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i waes. Wol ya i fulap long olgeta samting we yu yu mekem. Taem yu givim win (“spirit,” NW) blong yu long olgeta, yu mekem olgeta oli laef.”—Ol Sam 104:24, 30; Jenesis 1:2; Job 33:4.

Tabu spirit i pulum ol man blong God blong raetemdaon ol tok we oli stap long Baebol. Aposol Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud.” (2 Timoti 3:16) Narafala rod blong tanem Grik tok ya we long vas ya oli tanem i kam “putum long tingting,” hemia se, “God i blu long olgeta.” Yes win blong Jeova no spirit blong hem, i lidim tingting blong ol man ya, blong oli raetemdaon “tok blong God.”—1 Tesalonaeka 2:13.

Tabu spirit i givim paoa long ol man blong God blong oli gat stret save long saed blong ol samting we bambae oli kamaot long fiuja. Aposol Pita i eksplenem se: “Wok blong talemaot mining blong tok blong ol profet we i stap long Baebol, hem i no wan wok we man i save mekem, hem wan, from we i no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be Tabu Spirit i stap givim tok long olgeta, nao oli talemaot tok we i kamaot long God.”—2 Pita 1:20, 21; Joel 2:28.

Tabu spirit i givhan long Jisas mo ol narafala man we oli bilif, blong talemaot gud nius blong Kingdom blong God mo blong oli mekem ol merikel. Jisas i talem se: “Hae God i jusumaot mi, mo paoa blong spirit blong hem i kam fulap long mi blong mi talemaot gud nius long ol puaman. Hem i sanem mi blong mi talemaot long ol man we oli stap long kalabus se, ‘Yufala i save go fri,’ mo blong mi talemaot long ol man we oli blaen se, ‘Ae blong yufala i save kam gud.’”—Luk 4:18; Matiu 12:28.

 [Bokis blong pija long pej 9]

WOK WE TABU SPIRIT I SAVE MEKEM BLONG GIVHAN LONG YU

Tabu spirit i save mekem tingting blong yu i strong blong agensem ol nogud samting we oli save pulum yu, mo blong yu save winim ol nogud fasin we oli save spolem bodi blong yu. Aposol Pol i talem se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.”—1 Korin 10:13.

Tabu spirit i save givhan long yu blong wokem ol gudfala fasin we oli mekem God i glad. “Tabu spirit, hem i stap mekem ol man oli gat narafala fasin. Hem i stap mekem we oltaem olgeta oli stap lavem ol man, mo oli stap glad, mo oli gat pis long tingting blong olgeta. Hem i stap mekem we tingting blong olgeta i longfala, mo oli gat sore long man, mo we fasin blong olgeta i gud nomo, mo i stret oltaem we i no save jenis. Hem i stap mekem we olgeta oli kwaet man, mo oli save blokem ol samting we olgeta nomo oli wantem.”—Galesia 5:22, 23.

Tabu spirit i save givim paoa long yu blong stanap strong taem ol samting oli kam traem yu. “Mi mi naf blong mekem evri samting from we hem i stap givim paoa long mi.” —Filipae 4:13, NW.