Tinghae Long Wok We Yu Gat Long Kristin Kongregesen
Tinghae Long Wok We Yu Gat Long Kristin Kongregesen
“God i mekem bodi blong man we i gat ol naranarafala haf blong hem, olsem we hem i wantem.”—1 KOR. 12:18.
1, 2. (a) ?Wanem samting i soem se evriwan insaed long Kristin kongregesen oli save gat wan wok we oli tinghae long hem? (b) ?Wanem ol kwestin we bambae yumi tokbaot long stadi ya?
LONG taem blong ol man Isrel bifo, Jeova i yusum kongregesen blong givim ol stret save blong hem long ol man blong hem, mo givim advaes blong lidim olgeta. Tingbaot, afta we ol man Isrel oli winim taon ya Eae, “Josua i ridimaot Loa ya wetem ol tok blong hem we i talemaot ol gudgudfala samting we Hae God bambae i givim long olgeta sipos oli stap folem Loa ya, mo ol trabol we bambae oli kasem, sipos oli no folem. Hem i ridimaot ol tok ya stret olsem we i stap long Buk blong Loa ya . . . long olgeta [“kongregesen blong Isrel,” NW].”—Jos. 8:34, 35.
2 Long faswan handred yia K.T., aposol Pol i talem long Kristin elda ya Timoti se, Kristin kongregesen i olsem “famle blong God” mo “bigfala pos blong mekem trutok i stap strong, mo i sapotem trutok.” (1 Tim. 3:15, NW) Tede, Kristin kongregesen i olsem “famle” blong God. Long japta 12 blong faswan leta we Pol i raetem i go long ol man Korin, hem i tokbaot kongregesen se i olsem bodi blong man. Hem i talem se nating we ol wanwan haf blong bodi oli mekem defdefren wok, be olgeta evriwan oli impoten mo yumi nidim olgeta. Pol i talem se: “God i mekem bodi blong man we i gat ol naranarafala haf blong hem, olsem we hem i wantem. Mo ol haf blong bodi ya blong yumi we yumi stap ting se oli no flas, yumi stap flasemgud olgeta.” (1 Kor. 12:18, 23) Taswe, long famle blong God, i no gat wan Kristin we wok blong hem i gud moa no i daon moa long narafala. Wan samting nomo se wok blong olgeta i defdefren. Ale, ?olsem wanem yumi save luksave wok we yumi gat long Kristin kongregesen? ?Olsem wanem yumi save tinghae mo harem gud long wok ya? ?Wanem sam samting long laef blong yumi we oli save gat paoa long wok we yumi mekem long Kristin kongregesen? ?Mo olsem wanem yumi save mekem se ‘olgeta man oli luk we yumi stap gohed gud long laef blong yumi mo long wok blong yumi?’—1 Tim. 4:15.
?Olsem Wanem Yumi Soemaot Se Yumi Tinghae Long Wok We Yumi Gat?
3. ?Wanem wan rod blong luksave wok we yumi gat long kongregesen mo blong soemaot se yumi tinghae long hem?
3 Wan rod blong luksave wok we yumi gat long kongregesen mo blong soemaot long laef blong yumi se yumi tinghae long hem, hemia blong wok wetem “slef ya we i stret mo waes,” mo Hed Kampani blong hem. (Ridim Matiu 24:45-47, NW. *) Yumi mas jekemap yumi wan blong luk sipos yumi stap obei long ol advaes we slef ya i stap givim blong lidim yumi. Long ol yia we oli pas, yumi kasem ol stret advaes long saed blong klos, hea, pleplei mo fasin blong yusum Intenet long rod we i no stret. ?Olsem wanem? ?Yumi stap obei long ol gudfala advaes ya we oli blong protektem yumi long saed blong spirit? ?Yumi tinghae long advaes blong makemaot wan naet blong mekem famle Baebol stadi evri wik? ?Sipos yumi no mared, yumi tektaem blong stadi gud Baebol? Jeova bambae i blesem yumi wanwan mo ol famle tu, sipos yumi folem ol advaes we slef ya i givim.
4. ?Yumi mas tingbaot wanem taem yumi stap jusum ol samting long laef?
4 Samfala oli ting se wanwan Kristin i gat raet blong jusum wanem pleplei, klos mo hea we hem i wantem. Be wan Kristin we i givim laef blong hem finis long Jeova mo we i tinghae long wok we hem i gat long ogenaesesen blong Jeova, hem i no tingbaot samting we hem wan nomo i wantem, taem hem i mekem ol desisen. Defren olgeta, taem hem i mas jusum sam samting we hem i nidim long laef, hem i tingbaot fastaem tingting blong Jeova we i stap long Tok blong hem, Baebol. Tok blong Jeova i ‘olsem laet we oltaem hem i stap soemaot rod blong yumi, mo i stap lidim yumi.’ (Sam 119:105) I waes tu blong tingbaot se ol jus we yumi mekem long laef, oli save gat paoa long wok blong prij we yumi mekem, mo long ol narafala man we oli stap insaed mo afsaed long kongregesen.—Ridim 2 Korin 6:3, 4.
5. ?From wanem yumi mas lukaotgud blong no folem prapa tingting blong yumi?
5 “Spirit ya we i stap mekem wok naoia long ol man we oli no obei long God,” i stap kam bigwan olsem win we yumi stap pulum. (Efes. 2:2, NW) Spirit ya i save pulum yumi blong ting se yumi no nidim we ogenaesesen blong God i lidim yumi. I tru, yumi no wantem kam olsem Diotrefes we i no gat respek nating mo ‘i no save lesin long tok blong aposol Jon.’ (3 Jon 9, 10) Yumi mas lukaotgud blong no folem prapa tingting blong yumi. Yumi neva mas talem mo mekem wan samting we i soem se yumi no gat respek long rod we Jeova i stap yusum tede blong toktok long yumi. (Nam. 16:1-3) Defren olgeta, yumi mas tinghae long janis ya we yumi gat blong wok wetem slef we i stret mo waes. Mo yumi mas traehad blong ona mo obei long olgeta we oli lidim kongregesen.—Ridim Hibrus 13:7, 17.
6. ?From wanem yumi mas lukluk gud long ol samting long laef blong yumi?
6 Wan narafala rod blong soemaot se yumi tinghae long wok we yumi gat long Kristin kongregesen, hemia blong lukluk gud long ol samting long laef blong yumi mo mekem ol samting we yumi naf blong mekem blong soemaot se yumi ‘glad long wok we Jeova i givim long yumi,’ mo we yumi givim ona i go long Jeova. (Rom 11:13) Long olgeta ples blong wol, samfala brata sista oli naf blong mekem wok blong fultaem paenia. Sam narafala oli mekem wok olsem misinari, seket elda, mo oli wok long Betel. Plante brata mo sista oli givhan blong bildim ol Haos Kingdom. Bighaf blong ol man blong Jeova oli mekem bes blong olgeta blong halpem ol famle blong olgeta blong oli gohed blong mekem wok blong Jeova, mo blong oli joen fulwan long wok blong prij evri wik. (Ridim Kolosi 3:23, 24.) Yumi save sua se taem yumi glad blong mekem wok blong God, mo yumi mekem gud wok ya wetem ful laef blong yumi, bambae oltaem yumi gat wan wok blong mekem long Kristin kongregesen.
Sam Samting We Oli Save Gat Paoa Long Wok We Yumi Mekem
7. Eksplenem olsem wanem ol samting long laef blong yumi oli save gat paoa long wok we yumi naf blong mekem long kongregesen.
7 I impoten we yumi lukluk gud long laef blong yumi from we samtaem, ol samting long laef oli save gat paoa long wok we yumi naf blong mekem long kongregesen. Eksampol, wok we wan brata i mekem long kongregesen, i defren long wok we wan sista i mekem. Mo tu ol samting olsem, olfala, nogud helt mo ol narafala nogud samting we oli hapen long laef, oli save gat paoa long wanem we yumi naf blong mekem long wok blong Jeova. Ol Proveb 20:29, i talem se: “Oltaem yumi glad blong luk ol yangfala, from we bodi blong olgeta i strong, mo yumi stap tinghevi long ol olfala, from we hea blong olgeta i waet.” Maet ol yangfala long kongregesen oli naf blong mekem plante strong wok from we oli gat paoa, be ol olfala oli givhan bigwan long kongregesen from we oli waes mo oli gat plante ekspiriens. Mo tu, yumi mas tingbaot se eni samting we yumi naf blong mekem long ogenaesesen blong Jeova, i kamaot from gladhat blong God nomo.—Wok 14:26; Rom 12:6-8.
8. ?Olsem wanem samting we yumi wantem i save gat paoa long wok we yumi mekem long kongregesen?
8 Eksampol blong tu yangfala we tufala i stret sista, i soemaot wan narafala samting we i save gat paoa long wok we yumi gat long kongregesen. Tufala tugeta i kasem setifiket long hae skul. Laef blong tufala i sem mak. Papa mama blong tufala i traehad blong leftemap tingting blong tufala blong mekem wok blong fultaem paenia afta we tufala i finisim skul. Ale, afta we tufala i finisim skul, wan long tufala i mekem wok blong fultaem paenia, be narawan i wok fultaem blong winim mane. ?Wanem samting long saed blong tufala we i defren? Hemia samting we tufala i wantem. Wanwan long tufala i mekem samting we hem i wantem. ?Samting ya i save hapen long yumi evriwan? I gud yumi tingting gud long wanem samting we yumi wantem mekem long wok blong God. ?Olsem wanem? ?Yumi save mekem moa wok i bitim wanem we yumi stap mekem naoia, nating se maet yumi mas jenisim sam samting long laef blong yumi?—2 Kor. 9:7.
9, 10. ?Wanem samting we yumi mas mekem sipos yumi no rili wantem mekem wok blong Jeova?
9 ?Olsem wanem sipos yumi no rili wantem mekem wok blong Jeova, nao yumi traem nomo blong mekem wanem we oli askem yumi blong mekem long kongregesen? Long leta we Pol i raetem long ol man Filipae, hem i talem se: “God i stap wok long laef blong yufala blong mekem yufala i glad blong obei long hem, mo blong givim paoa long yufala blong yufala i save mekem ol samting we hem i wantem.” Yes, Jeova i save wok long laef blong yumi mo hem i save givim paoa long yumi blong yumi wantem mekem wok blong hem.—Fil. 2:13; 4:13, NW.
10 From samting ya, yumi mas askem long Jeova blong i givhan long yumi blong wantem mekem wok blong hem. Long Isrel bifo, King Deved i mekem olsemia nao. Hem i prea se: “Hae God. Plis yu tijim mi long ol fasin blong yu, yu mekem mi mi savegud ol rod blong yu. Yu tijim mi, blong mi save folem trutok blong yu long olgeta laef blong mi, from we yu nomo yu God blong mi we yu stap sevem mi. Oltaem mi mi trastem yu.” (Sam 25:4, 5) Yumi tu, yumi save prea i go long Jeova blong hem bambae i pulum yumi blong yumi wantem mekem samting we hem i glad long hem. Sipos yumi tingbaot we Jeova God mo Pikinini blong hem, tufala i glad long wok we yumi mekem, hat blong yumi bambae i fulap long tangkiu we yumi gat long tufala. (Mat. 26:6-10; Luk 21:1-4) Fasin tangkiu blong yumi i save pusum yumi blong askem strong long Jeova blong hem i pulum yumi blong wantem mekem moa long wok blong hem. Profet Aesea i soemaot tingting we yumi mas gat. Taem hem i harem voes blong Jeova we i askem long hem se: “?Bambae mi mi sanem hu? ?Hu bambae i go talemaot tok blong mifala?” Aesea i ansa se: “!Mi ya, mi save go! !Yu sanem mi!”—Aes. 6:8.
?Yumi Save Mekem Wanem Blong Gohed Gud?
11. (a) ?I nidim moa brata blong mekem wanem wok insaed long ogenaesesen? (b) ?Olsem wanem wan brata i save kasem ol wok insaed long kongregesen?
11 Long seves yia blong 2008, raon long wol, i gat 289,678 man we oli tekem baptaes. I klia se i rili nidim moa brata blong lidim wok insaed long kongregesen. ?Ale ol brata oli save mekem wanem? Oli mas traehad blong kasem ol mak we Baebol i talem blong wan man i naf blong kam man blong givhan mo elda. (1 Tim. 3:1-10, 12, 13; Taet. 1:5-9) ?Olsem wanem wan brata i save traehad blong kasem ol mak we Baebol i talem? Hemia taem hem i wok strong long wok blong prij, mekem gud wok we hem i kasem long kongregesen, traehad blong kamgud moa long fasin blong givim ol ansa long ol Kristin miting, mo soem intres long ol wanwan brata sista. Taem wan brata i traehad blong kasem ol mak ya, hem i soemaot se hem i tinghae long wok we hem i gat long kongregesen.
12. ?Olsem wanem ol yangfala oli save soemaot strong tingting blong gohed gud long trutok?
12 ?Ol yangfala brata, speseli olgeta we oli no kasem 20 yia yet, oli save mekem wanem blong oli gohed gud long kongregesen? Oli save traehad blong kasem ol stret save blong Baebol we i save mekem olgeta oli kam moa ‘waes mo luksave olgeta samting we God i wantem.’ (Kol. 1:9) Blong mekem olsem, oli mas ol man we oli stadi oltaem long tok blong God mo oli mas givim ansa long ol miting blong kongregesen. Mo tu, ol yangfala brata oli save kam naf blong pastru long ‘doa we i open long olgeta blong mekem wan gudfala wok,’ taem oli joen long ol defren haf blong fultaem wok blong God. (1 Kor. 16:9) Ol yangfala oli rili save harem gud long laef mo oli save kasem plante blesing sipos oli mekem wok blong Jeova.—Ridim Prija 12:1.
13, 14. ?Long wanem rod ol sista oli save soemaot se oli tinghae long wok we oli gat long kongregesen?
13 Ol sista tu oli save soemaot se oli tinghae long wok we oli gat long kongregesen, taem oli joen blong mekem tok blong Ol Sam 68:11 (NW) i kamtru. Yumi ridim se: “Ol woman we oli stap talemaot gud nius oli olsem wan bigfala ami.” Wan rod we ol sista oli save soemaot klia se oli tangkiu from wok we oli gat long kongregesen, hemia blong joen long wok blong pulum ol man oli kam disaepol. (Mat. 28:19, 20) Taswe, taem ol sista oli joen fulwan long wok blong talemaot gud nius, mo oli glad blong lego sam samting long laef blong olgeta blong mekem wok ya, oli pruvum se oli tinghae long wok we oli gat long kongregesen.
14 Pol i raetem leta i go long Taetas i se: ‘Ol olfala woman oli mas mekem ol fasin we i stret, . . . blong bambae oli save tijim ol yangfala woman long stret rod blong lavem ol man blong olgeta wetem ol pikinini blong olgeta. Oli mas tijim ol yangfala woman ya blong oli kwaet woman, we laef blong olgeta i klin gud. Oli mas tijim olgeta long fasin blong lukaot gud long haos blong olgeta, mo blong ona long ol man blong olgeta. Nao bambae i no gat man i save tok nogud long tok blong God.’ (Taet. 2:3-5) Ol sista we oli bigman long Kristin fasin oli save givhan gud long kongregesen. Taem oli soem respek long ol brata we oli lidim kongregesen, mo oli mekem waes desisen long saed blong sam samting long laef, olsem klos, hea mo pleplei, oli soem wan gudfala eksampol long ol narafala, mo oli soemaot tu se oli tinghae long wok we oli gat long kongregesen.
15. ?Wanem samting we wan sista we i no mared i mekem blong winim tingting ya se hem i no gat fren?
15 Samtaem, ol sista we oli no mared oli faenem se i had blong luksave wok we oli gat long kongregesen. Wan sista we i harem olsemia i talem se: “Taem yu no mared, samtaem yu harem se yu yu no gat fren.” Taem oli askem long hem se olsem wanem hem i naf blong winim problem ya, hem i talem se: “Prea mo stadi long Baebol i halpem mi blong mi luksave wok blong mi bakegen. Mi lanem olsem wanem Jeova i stap tingbaot mi. Ale, mi traem blong givhan long ol narafala long kongregesen. Samting ya i givhan long mi blong tingbaot moa ol narafala i bitim we mi stap tingbaot mi wan nomo.” Long Sam 32:8, Jeova i talem long Deved se: “Bambae mi stap givim gudfala tingting long yu, mo mi stap lukaot gud long yu.” Yes, Jeova i intres long olgeta man blong hem wanwan, we hemia i minim tu ol sista we oli no mared. Mo hem bambae i halpem olgeta evriwan blong oli luksave wok we oli gat long kongregesen.
!Holemstrong Long Wok Blong Yu!
16, 17. (a) ?From wanem i beswan desisen taem yumi glad blong kam long ogenaesesen blong Jeova? (b) ?Olsem wanem yumi save holemstrong long wok we yumi gat long ogenaesesen blong Jeova?
16 From we Jeova i gat lav, hem i stap pulum ol man blong hem wanwan blong oli kam fren blong hem. Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Long olgeta bilian man we oli stap long wol, Jeova i pulum yumi, yumi kam haf blong ogenaesesen blong hem tede. Sipos yumi glad blong kam long ogenaesesen blong Jeova, hemia beswan desisen long laef. Samting ya i mekem se laef blong yumi i gat mining mo yumi kasem save from wanem yumi stap laef. !Yumi glad mo harem gud from we yumi gat wan wok blong mekem insaed long Kristin kongregesen!
17 Man blong raetem Sam i singsing se: “Hae God, oltaem yu yu stap mekem we mi mi stap sef long olgeta trabol, nao from samting ya bambae mi mi presem yu long fes blong olgeta man blong yu.” (Sam 26:8, 12) Trufala God i givim wan wok long yumi evriwan insaed long ogenaesesen blong hem. Ale, taem yumi gohed blong folem tiokratik rod mo stap bisi long wok blong God, yumi save holemstrong long nambawan wok we yumi gat long ogenaesesen blong Jeova.
[Futnot]
^ par. 3 Matiu 24:45-47, NW: “?Hu ya i rili slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem? Sipos masta blong hem i kamtru mo i faenem se hem i stap mekem wok ya, slef ya i save harem gud. Tru ya, Masta bambae i putumap hem blong lukaot long olgeta samting blong hem.”
?Yu Yu Tingbaot?
• ?From wanem i stret blong talem se olgeta Kristin evriwan oli gat wan wok insaed long Kristin kongregesen?
• ?Olsem wanem yumi soemaot we yumi tinghae long wok we yumi gat insaed long ogenaesesen blong God?
• ?Wanem ol samting long laef blong yumi we oli save gat paoa long wok we yumi mekem long kongregesen?
• ?Olsem wanem ol Kristin we oli yangfala mo olgeta we oli bigman finis oli save soemaot se oli tinghae long wok we oli gat insaed long ogenaesesen blong Jeova?
[Kwestin]