Yufala i Mas Lavlavem Yufala Moa, Olsem We Yufala i Wan Brata Nomo

“Yufala i mas stap wokbaot long lav, olsem we Kraes i laekem yufala tumas.”—EFES. 5:2, NW.

1. ?Jisas i tokbaot wanem impoten fasin we i makemaot ol man blong hem?

OL MAN oli luksave ol Witnes blong Jeova from we oli talemaot gud nius blong Kingdom blong God long ol haos wanwan. Be Jisas Kraes i tokbaot wan narafala impoten fasin we i makemaot ol trufala Kristin disaepol blong hem. Hem i talem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.”—Jon 13:34, 35.

2, 3. ?Lav blong yumi, i gat wanem paoa long olgeta we oli kam long ol Kristin miting blong yumi?

² I no gat wan narafala grup long wol we oli lavlavem olgeta olsem ol trufala Kristin brata mo sista. Tingbaot wan magnet. Magnet i pulum aean i kam long hem. Long sem fasin, lav i pulum ol wanwan man blong Jeova blong oli joengud, mo i pulum ol man we oli laekem trutok oli kam long trufala wosip. Marcelino i wan man Kamerun we i blaen from wan aksiden we i hapen long ples blong wok blong hem. Afta long aksiden ya, toktok i stap goraon se Marcelino i kam blaen from we hem i wan man blong mekem majik. Pasta mo sam narafala memba blong jos blong hem oli no traem leftemap tingting blong hem, be oli girap oli sakemaot hem long jos. Taem wan Witnes blong Jeova i singaot Marcelino i kam long wan miting, Marcelino i fraet. Hem i ting se bambae ol Witnes oli no wantem hem tu.

³ Marcelino i sapraes long wanem we i hapen long Haos Kingdom. Ol brata sista oli welkamem gud hem, mo ol gudfala tijing blong Baebol we hem i harem long miting oli leftemap tingting blong hem. Ale, hem i stat blong joen long olgeta miting  blong kongregesen, hem i gohed gud long Baebol stadi blong hem, mo hem i baptaes long yia 2006. Naoia hem i stap talemaot trutok blong Baebol long ol famle blong hem mo ol fren raonabaot long hem, mo hem i statem sam Baebol stadi tu. Marcelino i wantem se olgeta we hem i stadi Baebol wetem olgeta oli harem gud long semfala lav ya we hem i kasem long medel blong ol man blong God.

4. ?From wanem yumi mas obei long tok blong Pol se yumi mas “stap wokbaot long lav”?

⁴ Fasin ya we yumi lavlavem yumi olsem wan brata i gud tumas, mo yumi evriwan i mas traehad blong mekem se lav ya i stap oltaem. Lav we yumi gat long ol Kristin brata sista blong yumi i olsem wan faea we i laet gud long taem blong kolkol. Hot blong faea ya i pulum ol man oli kam long hem. Be sipos yu no putum wud long faea ya, sloslo bambae i godaon gogo hem i ded. Long sem fasin, lav i pulum ol memba blong kongregesen blong joen gud. Be sipos wanwan Kristin i no traehad blong mekem se lav ya i kam strong moa, sloslo lav ya bambae i stap lus. ?Olsem wanem yumi save mekem se lav ya i kam strong moa? Aposol Pol i ansa se: “Yufala i mas stap wokbaot long lav, olsem we Kraes i laekem yufala tumas, i letem laef blong hem blong sevem yufala olsem wan presen mo wan sakrefaes long God we i gat gudfala smel blong hem.” (Efes. 5:2, NW) Kwestin we bambae yumi tokbaot hemia se: ?Olsem wanem mi save gohed blong wokbaot long lav?

“Yufala Tu i Mas Go Moa, Blong Mekem Lav Blong Yufala i Bigwan”

5, 6. ?From wanem Pol i talem long ol Kristin long Korin blong oli “go moa” long fasin blong olgeta blong lavlavem olgeta?

⁵ Aposol Pol i raet long ol Kristin long Korin bifo se: “Ol brata sista long Korin. Mifala i talemaot ol tingting blong mifala long yufala, mifala i openem hat blong mifala. Mifala i lavem yufala bigwan long hat blong mifala, be yufala i lavem mifala smol nomo long hat blong yufala. Taswe, from fasin ya blong yufala, mi toktok long yufala olsem we yufala i pikinini. Yufala tu i mas go moa, blong mekem lav blong yufala i bigwan.” (2 Kor. 6:11-13, NW) ?From wanem Pol i talem long ol Kristin long Korin blong oli mekem lav blong olgeta i go moa blong i kam bigwan?

⁶ Tingbaot olsem wanem kongregesen long Korin bifo i stat. Pol i kam long Korin long en blong yia 50 K.T. Taem hem i stat blong prij long Korin, sam man oli agensem hem. Be hem i gohed nomo, hem i no lego. Smoltaem nomo we hem i stap prij long Korin, plante man long taon ya oli bilif long gud nius. Blong “wan yia haf,” Pol i lego plante samting blong hem blong tijim ol man, mo mekem niufala kongregesen ya i kam strong. I klia nomo se Pol i lavem tumas ol Kristin long Korin. (Wok 18:5, 6, 9-11) Ol Kristin long Korin oli gat evri risen blong lavem mo respektem Pol tu. Be defren olgeta, samfala insaed long kongregesen oli gowe long hem. Samfala oli no laekem ol advaes we hem i talem blong stretem olgeta. (1 Kor. 5:1-5; 6:1-10) Maet sam narafala oli lesin long ol giaman toktok blong ol ‘aposol ya we oli talem se oli nambawan.’ (2 Kor. 11:5, 6) Pol i wantem se olgeta brata mo sista oli lavem hem. Taswe, hem i talem long olgeta blong oli frengud wetem hem mo ol narafala Kristin brata mo sista. Long rod ya bambae oli “go moa” long fasin blong olgeta blong lavlavem olgeta.

7. ?Olsem wanem yumi save “go moa” long fasin blong yumi blong lavlavem yumi olsem we yumi wan brata nomo?

⁷ ?Olsem wanem long yumi? ?Olsem wanem yumi save “go moa” long fasin blong yumi blong lavem ol brata mo sista olsem we yumi wan brata nomo? Maet i isi blong lavem ol brata sista we oli gat sem yia olsem yumi no we oli blong semfala laen wetem yumi. Mo tu olgeta we oli laekem semfala spot no pleplei oli spenem plante taem tugeta. Be sipos yumi joen wetem ol Kristin we oli laekem semfala samting olsem yumi, nao yumi no joen wetem ol narafala, yumi mas mekem lav blong yumi i “go moa.” I waes blong askem se: ‘?Wanwan taem nomo, mi mi joen blong mekem wok blong prij mo sam narafala samting wetem ol brata mo sista we mi no stap kampani wetem olgeta oltaem? ?Long Haos Kingdom, mi mi no storian tumas wetem ol niuwan from we mi ting se oli mas pruvum fastaem se oli stret blong kam fren blong mi? ?Mi mi stap talem halo long ol yangfala mo ol olfala tu long kongregesen?’

8, 9. ?Olsem wanem advaes blong Pol long Rom 15:7 i halpem yumi blong lavlavem yumi moa, taem yumi talem halo long ol Kristin brata mo sista blong yumi?

⁸ Long saed blong fasin blong talem halo long ol Kristin brata mo sista blong yumi, tok we Pol i talem long ol Kristin long Rom i save halpem yumi blong wokem wan stret tingting long olgeta. (Ridim Rom 15:7.) Grik tok we oli tanem i kam ‘tekem olgeta oli kam joen wetem yufala’ i minim “soemaot kaen fasin,  tekem olgeta oli kam joen long grup we yumi joen long hem, mo soem fasin fren.” Taem wan man long taem blong Baebol i tekem ol fren oli kam long haos blong hem, hem i soemaot long olgeta we hem i glad tumas blong luk olgeta. Jisas Kraes i mekem sem mak long yumi, taem hem i tekem yumi i kam joen long Kristin kongregesen. Yumi kasem advaes blong folem fasin blong hem taem yumi stap welkamem ol brata mo sista blong yumi.

⁹ Taem yumi talem halo long ol brata mo sista blong yumi long Haos Kingdom mo long ol narafala ples, yumi mas tingbaot olgeta we yumi no luk olgeta longtaem lelebet, mo olgeta we yumi no stap toktok wetem olgeta oltaem. I gud blong spenem smol taem blong storian wetem olgeta. Nekis miting we yumi go long hem, i gud blong mekem sem mak wetem sam narafala. Sipos yumi gohed blong mekem olsem, i no longtaem bambae yumi luk se yumi storian gud wetem olgeta brata mo sista blong yumi. Yumi no nid blong wari sipos yumi no toktok wetem evriwan long semfala dei. I no mas gat wan brata no sista we bambae i kros long yumi from we yumi no talem halo long hem long evri miting.

10. ?Wanem nambawan janis we olgeta long kongregesen oli gat, mo olsem wanem yumi save yusumgud janis ya?

¹⁰ Talem halo long ol narafala i faswan samting we yumi mekem blong tekem olgeta oli kam joen wetem yumi. Hem i wan rod we i lidim yumi blong statem wan gudfala storian tugeta mo blong frengud longtaem. Tingbaot long taem blong ol asembli. Taem olgeta we oli stap long ol asembli oli sekhan long ol narafala, oli talemaot nem blong olgeta mo oli stat blong storian, oli wantem tumas blong luk olgeta bakegen. Plante taem, ol brata sista we oli joen long wok blong bildim ol Haos Kingdom, mo long wok blong givhan long ol brata sista we oli kasem trabol long taem blong disasta, oli kam ol gudfala fren. Hemia from we oli wok tugeta mo oli savegud ol gudfala fasin blong olgeta. Long ogenaesesen blong Jeova, i gat fulap janis blong frengud wetem narafala blong longtaem. Sipos yumi “go moa” long fasin blong yumi blong soemaot lav long plante defren brata mo sista, bambae yumi gat plante gudfala fren, mo bambae yumi bildimap lav ya we i joenem yumi long trufala wosip.

Tekem Taem Blong Storian Wetem Ol Narafala

11. ?Folem Mak 10:13-16, Jisas i soemaot wanem eksampol?

¹¹ Olsem Jisas, olgeta Kristin oli save traehad blong tekem taem blong storian wetem ol narafala. Tingbaot olsem wanem Jisas i tok long ol disaepol blong hem taem oli traem blong stopem ol papa mama blong oli no karem ol pikinini blong olgeta oli kam long Jisas. Hem i talem se: “!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man we God i King blong olgeta.” Afta “hem i putum han blong hem i goraon long ol pikinini ya, mo i putum han blong hem long olgeta, i blesem olgeta.” (Mak 10:13-16) !Traem tingbaot glad we ol pikinini oli kasem taem Bigfala Tija i soemaot se hem i lavem olgeta!

12. ?Wanem i save blokem narafala blong i no storian wetem yumi?

¹² I gud we ol Kristin wanwan oli askem se, ‘?Mi mi tekem taem blong storian wetem ol narafala, no plante taem mi mi bisi tumas?’ Samtaem, yumi mekem sam samting we oli no rong, be oli save blokem narafala blong i no storian wetem yumi. Tingbaot, sipos long taem we sam narafala i stap wetem yumi blong storian be yumi lesin long miusik long mobaelfon no long iafon, maet ol narafala ya oli save ting se yumi no wantem storian wetem olgeta. Sipos  narafala i luk we yumi bisi oltaem blong ridim wan buk, maet hem i save ting se yumi no wantem toktok wetem hem. I tru se i gat “taem blong man i stap kwaet.” Be taem yumi stap long medel blong ol narafala, hem i “taem blong man i tok.” (Pri. 3:7) Maet samfala oli gat tingting ya se, “Mi mi laekem blong stap mi wan” no “Mi no laekem toktok long moning.” Be sipos yu storian gud wetem ol narafala nating se yu no harem se yu wantem toktok, samting ya i soemaot klia lav ya we man “i no save tingbaot hem nomo.”—1 Kor. 13:5.

13. ?Pol i talem long Timoti blong gat wanem fasin long ol Kristin brata mo sista?

¹³ Pol i talem se yangfala Timoti i mas gat respek long olgeta long kongregesen. (Ridim 1 Timoti 5:1, 2.) Yumi mas mekem olsem Timoti. Yumi mas respektem ol olfala Kristin olsem we oli ol mama mo papa blong yumi, mo ol yangfala Kristin olsem we oli stret brata mo sista blong yumi. Taem yumi mekem olsem, olgeta brata sista blong yumi bambae oli no fraet blong joen wetem yumi. Defren olgeta bambae oli kam moa klosap long yumi.

14. ?Wanem sam gudfala samting we i save kamaot taem yu storian gud wetem ol narafala?

¹⁴ Taem yumi storian gud wetem ol narafala, yumi givhan blong bildimap bilif blong olgeta mo mekem olgeta oli harem gud. Wan brata we i wok long wan branj ofis i rimemba wetem glad, fasin blong sam brata sista we oli wok long Betel blong longtaem. Taem hem i jes stat blong wok long Betel, oltaem, ol brata sista ya oli tekem taem blong toktok wetem hem, mo oli leftemap tingting blong hem. From samting ya, hem i harem se ol memba blong Betel famle oli rili lavem hem. Naoia hem i traem blong mekem i sem mak mo hem i storian wetem ol narafala long Betel.

Tingting Daon i Halpem Yumi Blong Mekem Pis

15. ?Wanem i soem se i gat sam taem we ol man blong Jeova oli raorao from oli no agri long sam samting?

¹⁵ Long kongregesen blong Filipae bifo, tufala Kristin sista ya Yuodia mo Sintike, tufala i luk se i hadwok blong stretem wan problem bitwin tufala. (Fil. 4:2, 3) Pol mo Banabas, tufala i rao nao tufala i seraot blong smoltaem. Ol man oli save long samting ya. (Wok 15:37-39) Ol stori ya oli soemaot se i gat sam taem we ol trufala Kristin oli no agri long sam samting. Jeova i givim ol advaes blong halpem yumi blong stretem ol raorao mo blong frengud bakegen. Be blong folem ol advaes ya, i gat wan fasin we Jeova i wantem se yumi folem, hemia tingting daon.

16, 17. (a) ?From wanem i impoten blong gat tingting daon taem yumi wantem stretem wan raorao? (b) ?Olsem wanem stori blong Jekob taem hem i kam mitim Esao i soemaot se tingting daon i impoten tumas?

¹⁶ Tingbaot se bambae yu mo fren blong yu, yutufala i mekem wan trip long trak. Yutufala i go insaed long trak, mo bifo we yutufala i go, yu pusum ki i go, yu tanem, nao yu statem enjin blong trak. Long sem fasin, blong stretem wan trabol bitwin yumi, fastaem i nidim wan ki. Ki ya hemia tingting daon. (Ridim Jemes 4:10.) Eksampol blong Baebol we i kam biaen i soemaot se, tingting daon i mekem se tufala tugeta we i kros, tufala i rere nao blong folem ol rul blong Baebol.

¹⁷ Esao i bin salem raet blong hem olsem fasbon i go long twin brata blong hem Jekob. Biaen hem i kam kros tumas long Jekob nao i wantem kilim Jekob i ded. Ale Jekob i ronwe. Be afta twanti yia i pas, tufala brata ya i mitim tufala bakegen. Long taem ya we bambae tufala i luk tufala bakegen, “Jekob i fraet, mo i stap tingting tumas.” Hem i harem olsem se bambae Esao i mas kilim hem. Be taem tufala i luk tufala, Jekob i mekem wan samting we Esao i no bin tingbaot. Taem Jekob i kam klosap long Esao, hem “i  bodaon . . . we fes blong hem i kasem graon.” ?Wanem i hapen biaen? “Esao i resis, i kam blong mitim hem, i sakem han blong hem i goraon long hem, i holem hem strong, i kis long hem. Nao tufala i stap krae.” Faet i no moa gat. Tingting daon blong Jekob i givhan long hem blong fogetem ol nogud tingting we Esao i gat agensem hem.—Jen. 27:41; 32:3-8; 33:3, 4.

18, 19. (a) ?Taem i gat wan raorao, from wanem i impoten we yumi nao yumi faswan blong folem ol advaes blong Baebol? (b) ?From wanem yumi no mas letem tingting blong yumi i foldaon sipos traehad blong yumi blong mekem pis i no karem gudfala frut kwiktaem?

¹⁸ Baebol i fulap long ol nambawan advaes we i soem olsem wanem blong stretem ol raorao. (Mat. 5:23, 24; 18:15-17; Efes. 4:26, 27) * Bambae i had blong mekem pis wetem narafala sipos yumi no gat tingting daon mo yumi no mekem ol advaes oli wok. Yumi no mas wet se narafala i soem tingting daon fastaem, from we hemia i no rod blong stretem trabol. Yumi mas gat tingting daon tu.

¹⁹ Sipos, from sam risen, traehad blong yumi blong mekem pis wetem narafala we i kros long yumi i no karem gudfala frut, yumi no mas letem tingting blong yumi i foldaon. Maet narafala ya i nidim taem blong fogetem ol nogud filing we hem i gat long saed blong yumi. Ol brata blong Josef oli mekem i nogud long hem. Plante yia biaen, oli jes mitim Josef bakegen, mo long taem ya hem i praeminista blong Ijip. Biaen, ol brata ya blong hem oli tanem tingting blong olgeta mo oli askem long Josef blong i fogivim olgeta. Ale, Josef i fogivim olgeta, mo biaen ol pikinini blong Jekob oli kam wan neson we i gat janis blong karem nem blong Jeova. (Jen. 50:15-21) Taem yumi holemtaet pis wetem ol brata sista, yumi leftemap fasin joengud mo glad long kongregesen.—Ridim Kolosi 3:12-14.

Yumi Mekem Samting Blong Soemaot Se Yumi ‘Lavem Man Tru’

20, 21. ?Yumi lanem wanem long fasin blong Jisas blong wasem leg blong ol aposol blong hem?

²⁰ Smoltaem bifo we Jisas i ded, hem i talem long ol aposol blong hem se: “Mi mi putum wan eksampol blong yufala, blong bambae yufala i save mekem sem fasin ya nomo we mi mi mekem long yufala.” (Jon 13:15) Hem i jes finis blong wasem leg blong ol 12 aposol blong hem. Samting we Jisas i mekem i no jes wan kastom nomo we ol man oli stap folem, mo hem i no jes wan aksen blong soemaot kaen fasin. Nogat. Bifo we Jon i tokbaot stori ya we Jisas i wasem leg blong ol aposol, hem i raetem se: “Oltaem hem [Jisas] i stap lavem ol man blong hem, we olgeta oli stap long wol ya, mo hem i stap lavem olgeta olwe, gogo hem i givim laef blong hem from olgeta.” (Jon 13:1) Lav ya nao i pulum hem blong mekem wok ya blong wan slef, hemia blong wasem leg blong ol man blong hem. Ale, olgeta oli mas mekem sem mak. Oli mas gat tingting daon mo mekem i gud long ol narafala. Yes, trufala lav blong yumi i mas pulum yumi blong soemaot se yumi kea mo yumi intres long ol Kristin brata mo sista blong yumi.

²¹ Aposol Pita, wan long ol aposol ya we Jisas, Pikinini blong God, i wasem leg blong hem, i kasem save gud mining blong samting ya we Jisas i mekem. Hem i raetem se: “Yufala i mekem laef blong yufala i klin finis long fes blong God, from we yufala i obei long trutok, nao yufala i save lavem ol brata blong yufala long fasin we i stret gud. Nao from samting ya, yufala i mas lavlavem yufala long olgeta tingting blong yufala, long fasin we i no save jenis.” (1 Pita 1:22) Aposol Jon, wan narafala aposol we Masta Jisas i wasem leg blong hem, i raetem se: “Ol pikinini blong mi. I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.” (1 Jon 3:18) I gud we hat blong yumi i pusum yumi blong mekem sam samting blong soemaot se yumi lavem ol brata mo sista blong yumi.

[Futnot]

?Yu Yu Tingbaot?

• ?Olsem wanem yumi save “go moa” long fasin blong yumi blong soemaot lav long ol narafala?

• ?Wanem i save halpem yumi blong tekem taem blong storian wetem ol narafala?

• ?From wanem yumi mas gat tingting daon taem yumi wantem mekem pis wetem narafala?

• ?Wanem i mas pusum yumi blong kea long ol Kristin brata mo sista blong yumi?

[Kwestin]

[Tok blong pija long pej 25]

Yumi glad blong tekem ol Kristin brata sista blong yumi oli kam joen wetem yumi

[Tok blong pija long pej 26]

Yumi no mas mestem wan janis blong tekem taem blong storian wetem ol narafala