!Mesaea! !Rod We God i Yusum Blong Sevem Ol Man!
!Mesaea! !Rod We God i Yusum Blong Sevem Ol Man!
“Olgeta man we oli joen long Adam oli save ded, mo long sem fasin, olgeta man we oli joen long Kraes oli save laef bakegen long ded.”—1 KOR. 15:22.
1, 2. (a) ?Wanem tingting blong Andru mo Filip taem tufala i faenem Jisas? (b) ?From wanem yumi talem se yumi gat plante moa save blong pruvum se Jisas hem i Mesaea, i bitim ol man blong hem long faswan handred yia?
ANDRU i talem long brata blong hem Pita, se: “Mifala i faenem Mesaea finis.” Andru i bilif strong se man Nasaret ya Jisas, hem i Man ya we God i Makemaot. Filip tu i bilif long Jisas mo i go faenem fren blong hem Nataniel, i talem long hem se: “Mifala i faenem man ya we bifo Moses i bin raetem ol tok we i tokbaot hem long buk blong Loa. Ol profet bifo tu oli bin raetemdaon tok we i tokbaot hem. Hem i man Nasaret, i pikinini blong Josef nem blong hem Jisas.”—Jon 1:40, 41, 45.
2 ?Olsem wanem? ?Yu yu bilif strong se Jisas hem i Mesaea ya we God i promes blong sanem i kam, ‘Bigfala Man ya we God i yusum blong sevem ol man’? (Hib. 2:10, NW) Tede, yumi gat plante moa save blong pruvum se Jisas hem i Mesaea, i bitim ol man blong hem long faswan handred yia. Yumi gat ol save long Baebol we oli tokbaot taem we Jisas i bon go kasem taem we hem i ded mo i laef bakegen. Ol save ya oli pruvum gud se Jisas hem i Mesaea. (Ridim Jon 20:30, 31.) Baebol i tokbaot tu se, taem Jisas i gobak long heven, hem i gohed blong mekem wok blong hem olsem Mesaea. (Jon 6:40; ridim 1 Korin 15:22.) From ol samting we yu yu lanem finis long Baebol, yu tu yu save talem se yu yu “faenem Mesaea finis.” Be i gud blong tingbaot olsem wanem ol disaepol ya bifo oli save se oli faenem Mesaea finis.
Sloslo “Tabu Tok Haed” Long Saed Blong Mesaea i Kam Klia
3, 4. (a) ?Olsem wanem ol disaepol long faswan handred yia oli “faenem Mesaea”? (b) ?From wanem yu save talem se ol profet tok ya long saed blong Mesaea oli kamtru long Jisas nomo?
3 ?Olsem wanem ol man blong Jisas long faswan handred yia oli save se Jisas i Mesaea? Jeova i yusum ol profet blong talemaot sloslo sam save long saed blong Mesaea, blong ol man oli luksave hem. Wan man blong stadi long Baebol, i talem se samting ya i olsem we wan man i traem joenem ol wanwan pis ston blong oli kam wan naes pija. Tingbaot sipos plante man we oli neva storian tugeta, be oli karem wanwan pis ston oli kam long man ya. Sipos ol wanwan pis ston ya oli joen gud tugeta blong mekem wan naes pija, ating i mas gat wan man we i katem ol pis ya i stret gud. Ol profet tok long saed blong Mesaea oli olsem ol wanwan pis blong pija ya, oli talemaot wanwan save we oli impoten tumas long saed blong Mesaea.
4 Olgeta profet tok long saed blong Mesaea oli kamtru long Jisas. ?Yu ting se samting ya i save kamaot from laki nomo? Wan man blong lukaot save, i talem se i no save hapen from laki nomo. Hem i talem stret se, “long olgeta man long histri, i gat wan man nomo we olgeta profet tok ya oli kamtru long hem, hemia Jisas.”
5, 6. (a) ?Jajmen agensem Setan bambae i kamtru olsem wanem? (b) ?Olsem wanem God i soemaot sloslo, laen we “sid” ya bambae i kamaot long hem?
5 Ol profet tok long saed blong Mesaea oli pulum tingting blong yumi i go long wan “tabu tok haed.” Save long saed ya i impoten long olgeta man long heven mo wol. (Kol. 1:26, 27, NW; Jen. 3:15, NW) Wan haf blong tok haed ya hemia jajmen agens long Setan, “snek ya blong bifo,” we i lidim ol man oli go long sin mo ded. (Rev. 12:9) ?Jajmen ya bambae i kamtru olsem wanem? Jeova i talemaot se bambae i gat wan “sid” we i kamaot long wan “woman.” “Sid” ya bambae i smasem hed blong Setan, i min se bambae i spolem man ya we i stamba blong stronghed fasin, sik mo ded. Be fastaem, God bambae i letem Setan i givim kil long “sid” blong woman, olsem we i kilim bak blong leg blong hem daon.
6 Sloslo Jeova i givim moa save blong soemaot se “sid” ya we bambae i kamtru hem i hu. God i mekem promes long Ebraham se: “Sid blong yu bambae i mekem se olgeta neson long wol oli save kasem blesing sipos oli traehad.” (Jen. 22:18, NW) Moses i talemaot profet tok se bambae Man ya i “wan profet” mo se bambae hem i hae moa long Moses. (Dut. 18:18, 19) God i talem long Deved se bambae Mesaea i kamaot long laen blong hem, mo bambae Mesaea i sidaon long bigfala jea blong King Deved gogo i no save finis. Mo biaen, ol profet tu oli talemaot samting ya.—2 Saml. 7:12, 16; Jer. 23:5, 6.
Save We i Pruvum Se Jisas i Mesaea
7. ?Olsem wanem Jisas i kamaot long “woman” blong God?
7 God i sanem Pikinini blong hem, faswan samting we hem i wokem, i kam long wol olsem “sid” ya we hem i mekem promes long saed blong hem. Stret Pikinini ya blong God, wan nomo we hem i gat, i aot long ogenaesesen blong ol spirit man long heven we i olsem waef blong God, i “lego ol samting blong laef ya” long heven, mo i bon long wol olsem wan man we i stret gud olgeta. (Fil. 2:5-7, NW; Jon 1:14) Tabu spirit i ‘kavremap Meri olsem wan sado’ blong mekem se ‘pikinini ya i tabu, ol man bambae oli save singaot hem, se Pikinini blong God.’—Luk 1:35.
8. ?Olsem wanem Jisas i mekem ol profet tok long saed blong Mesaea oli kamtru taem hem i tekem baptaes?
8 Ol profet tok long saed blong Mesaea oli talemaot weples mo wetaem bambae Jisas i kamtru. Olsem profet tok i talem, Jisas i bon long taon ya Betlehem. (Maeka 5:2) Long faswan handred yia, ol man Jiu oli gat plante tingting long saed blong samting we bambae i hapen. Samfala we oli stap wet long Mesaea, oli talem long saed blong Jon baptaes se: “Ating man ya hem i Mesaea ya, we God i promes bifo finis blong sanem hem i kam blong sevem yumi.” Be Jon i ansa long toktok blong olgeta se: “Man ya we i stap kam, hem i hae moa long mi.” (Luk 3:15, 16) Long lashaf blong yia 29 K.T., taem Jisas i gat 30 yia blong hem, hem i kam long Jon blong tekem baptaes. Hemia i stret taem ya we profet tok i talem se Mesaea i mas kamtru. (Dan. 9:25) Long taem ya, hem i statem bigfala wok blong hem blong prij long ol man, se: “Taem blong hem i stret nao. Taem blong God i kam King blong olgeta man long wol [“Kingdom blong God,” NW] i kam klosap finis.”—Mak 1:14, 15.
9. ?Nating se ol disaepol blong Jisas oli no kasem save long evri samting long saed blong Mesaea, be oli bilif strong long wanem samting?
9 Be ol man Jiu oli mas jenisim tingting blong olgeta long saed blong Mesaea. I stret we oli leftemap Jisas olsem King. Be oli no kasem save fulwan se bambae hem i statem rul blong hem long fiuja, mo bambae hem i stap long heven taem hem i rul. (Jon 12:12-16; 16:12, 13; Wok 2:32-26) Nating se i olsem, taem Jisas i askem long ol man blong hem se, “?Be yufala, yufala i stap tokbaot mi, se mi hu?,” wantaem nomo Pita i ansa se: “Yu yu Mesaea ya. Yu yu Pikinini blong God ya we i laef, i stap we i stap.” (Mat. 16:13-16) Taem plante disaepol blong Jisas oli lego hem from we oli no kasem save long tok blong hem, Pita i talem bakegen ol tok we i klosap sem mak.—Ridim Jon 6:68, 69.
Lesin Gud Long Jisas
10. ?From wanem Jeova i talem se i impoten blong lesin long Pikinini blong hem?
10 Long heven, stret Pikinini ya blong God, hem i wan spirit man we i gat bigfala paoa. Taem Jisas i kam long wol, hem i “wok long nem blong Papa blong hem.” (Jon 16:27, 28, NW) Hem i se: “Ol tok ya we mi stap tijim ol man long hem, oli no blong mi nomo, oli kamaot long God we i sanem mi mi kam.” (Jon 7:16) Tok we Jeova i talem taem trifala man blong Jisas oli luk bodi blong hem i jenis i kam narafala, i soemaot se Jisas i Mesaea. Jeova i givim advaes ya se: “Yufala i mas lesin gud long hem.” (Luk 9:35) Yes ol disaepol oli mas lesin mo obei long Man ya we God i Jusumaot. Blong obei long Jisas, oli mas bilif long hem mo oli mas mekem ol gudfala wok, tufala samting ya nao we man i mas mekem blong God i glad long hem mo blong hem i kasem laef we i no save finis.—Jon 3:16, 35, 36.
11, 12. (a) ?From wanem plante man Jiu long faswan handred yia oli no wantem Jisas olsem Mesaea? (b) ?Hu i bilif long Jisas?
11 Nating se i gat plante samting we i pruvum se Jisas i Mesaea, be bighaf blong ol man Jiu long faswan handred yia oli no bilif long hem. ?From wanem? From we oli gat prapa tingting blong olgeta long saed blong Mesaea. Wan tingting, se hem i wan man blong politik we bambae i mekem olgeta oli fri long strong rul blong ol man Rom. (Ridim Jon 12:34.) Taswe oli no wantem Mesaea ya we ol profet tok oli stret long hem. Hemia Man ya we ol man oli lukluk nogud long hem mo tanem baksaed long hem, hem i harem nogud plante taem, i savegud olgeta samting we i stap mekem man i harem nogud, mo biaen hem i ded. (Aes. 53:3, 5) Sam gudfala disaepol blong Jisas tu oli harem nogud from we Jisas i no mekem ol man Jiu oli fri long gavman blong Rom. Be oli stap tru long Jisas, mo biaen, oli kasem stret save long saed ya.—Luk 24:21.
12 Wan narafala risen from wanem plante man oli no wantem Jisas olsem Mesaea, hemia from ol tijing blong hem. Plante man oli luk se i had blong obei long ol tijing blong hem. Blong wan man i go insaed long Kingdom, hem i mas “blokem ol samting we hem nomo i wantem,” i mas “kakae” mit blong bodi blong Jisas mo dring blad blong hem, i mas “bon bakegen,” mo i no mas “man blong wol.” (Mak 8:34; Jon 3:3; 6:53; 17:14, 16) Ol man Jiu we oli flas, oli rij, mo oli gat fasin tu fes, oli ting se ol samting ya oli strong tumas blong mekem. Be ol man Jiu we oli gat tingting daon, oli bilif se Jisas i Mesaea. Mo sam man Sameria tu oli bilif, oli talem se: “Mifala i save we hem i prapa man blong sevem ol man long wol.”—Jon 4:25, 26, 41, 42; 7:31.
13. ?Olsem wanem Jisas i kasem kil long bak blong leg blong hem daon?
13 Long wan profet tok, Jisas i talemaot se bambae ol jif pris oli jajem hem, mo bambae ol man we oli no laen blong Isrel, oli nilim hem long pos. Be long namba tri dei, bambae hem i laef bakegen. (Mat. 20:17-19) Taem Jisas i stanap fored long Kaonsel blong Sanhedrin, hem i talem se hem i ‘Mesaea, Pikinini blong God.’ From samting ya, ol jif pris oli jajem hem se hem i tok nogud long God. (Mat. 26:63-66) Paelat i luksave se Jisas i “no mekem wan samting we i stret blong hem i ded from.” Be ol man Jiu oli putum tok agens long Jisas se hem i wan enemi blong gavman, nao from samting ya Paelat i “letem Jisas i go long han blong ol soldia blong hem.” (Luk 23:13-15, 25) Olsem nao oli soemaot we oli ‘no wantem Bigfala Man ya we God i yusum blong givim laef,’ mo oli mekem plan blong kilim hem i ded, nating se i gat plante samting blong pruvum se God nao i sanem hem i kam. (Wok 3:13-15, NW) Olsem ol profet oli talemaot, Mesaea i “ded long fasin we i no stret.” Long Dei blong Pasova long yia 33 K.T., oli nilim hem long wan pos. (Dan. 9:26, 27; Wok 2:22, 23) Taem Jisas i ded long nogud fasin ya, i olsem se hem i kasem kil long “bak blong leg blong hem daon,” olsem profet tok long Jenesis 3:15 (NW) i talemaot.
?From Wanem Mesaea i Mas Ded?
14, 15. (a) ?Wanem tufala risen blong Jeova i letem Jisas i ded? (b) ?Taem Jisas i laef bakegen, hem i mekem wanem?
14 Jeova i letem Jisas i ded from tu impoten risen. Faswan se, fasin blong Jisas blong holemstrong long Jeova gogo hem i ded, i soemaot wan impoten samting long saed blong “tok haed” ya. Jisas i pruvum fulwan se man we i stret gud olgeta, hem i save “fasgud long God” mo leftemap hae rul blong God, nating se Setan i traem hem long fasin we i strong tumas. (1 Tim. 3:16, NW) Seken samting, olsem Jisas i talem, ‘Pikinini blong Man i kam blong givim laef blong hem blong pem rod blong plante man oli go fri.’ (Mat. 20:28) Sakrefaes blong Jisas i stret blong ‘pem rod blong olgeta man oli go fri’ long panis blong sin we Adam i pasem long ol pikinini blong hem. Sakrefaes ya i mekem se ol man we oli bilif long Jisas olsem rod we God i yusum blong sevem ol man, oli save kasem laef we i no save finis.—1 Tim. 2:5, 6.
15 Afta we Mesaea i ded tri dei, hem i laef bakegen, mo blong 40 dei, hem i soemaot hem long ol disaepol blong pruvum se hem i laef bakegen, mo blong givim moa save long olgeta blong oli folem. (Wok 1:3-5) Biaen, hem i go antap long heven mo i olsem we hem i givim nambawan sakrefaes ya blong hem i go long Jeova. Hem i wet long ples ya gogo stret taem i kam blong hem i statem rul blong hem olsem Mesaea King. Taem hem i stap wet, hem i gat plante wok blong mekem.
Finisim Wok Blong Hem Olsem Mesaea
16, 17. Talem wok we Jisas i mekem olsem Mesaea afta we hem i go antap long heven.
16 Long ol handred yia we oli pas, stat long taem we Jisas i laef bakegen kam kasem naoia, hem i stap lukaot gud long ol wok we Kristin kongregesen i stap mekem. Hem i rul antap long Kristin kongregesen olsem King blong hem. (Kol. 1:13) Long stret taem, hem i stat blong yusum paoa blong hem olsem King blong Kingdom blong God. Ol profet tok blong Baebol mo ol samting we oli stap hapen long wol, oli pruvum se long yia 1914 hem i sidaon long jea blong King mo se yia ya i makem stat blong “lashaf blong fasin blong laef long wol ya.” (Mat. 24:3, NW; Rev. 11:15) I no longtaem afta we hem i stat blong rul, hem i lidim ol tabu enjel blong hem long wan faet, nao oli sakemaot Setan mo ol nogud enjel blong hem long heven.—Rev. 12:7-10.
17 Wok blong prij mo tijim ol man we Jisas i statem long yia 29 K.T., klosap nao bambae i kasem en blong hem. I no longtaem bambae Jisas i jajem olgeta man we oli laef. Ale, bambae hem i talem long olgeta we oli olsem ol sipsip, hemia olgeta we oli luksave se hem i rod we Jeova i yusum blong sevem ol man, se hem bambae i ‘givim kingdom ya long olgeta we, bifo olgeta, long taem we hem i jes wokem wol ya, hem i mekemrere finis blong givim long olgeta.’ (Mat. 25:31-34, 41, NW) Taem Jisas i lidim ol ami blong hem long heven blong oli finisim olgeta rabis fasin, bambae oli spolem olgeta we oli no wantem Jisas olsem King blong olgeta. Biaen bambae Jisas i fasem Setan mo sakem hem wetem ol nogud enjel blong hem, oli go long “bigfala hol ya we i godaon we i godaon olgeta.”—Rev. 19:11-14; 20:1-3.
18, 19. ?Wanem gudfala wok we Jisas bambae i mekem olsem Mesaea, mo bambae hem i givim wanem blesing long ol man we oli obei?
18 Long Wan Taosen Yia Rul blong Jisas, bambae hem i mekem gud wok blong hem olsem “Nambawan Man blong Givim Advaes, Strong God, Papa blong Olwe, Prins blong Pis.” (Aes. 9:6, 7, NW) Rul blong Kingdom blong hem bambae i mekem ol man oli kam stret gud olgeta, hemia ol man tu we hem i mekem olgeta oli laef bakegen. (Jon 5:26-29) Mesaea bambae i lidim ol man oli go “dring long ol springwota ya we i save givim laef.” Samting ya bambae i mekem se ol man we oli obei, oli save harem gud blong fren wetem Jeova long pis. (Ridim Revelesen 7:16, 17.) Setan bambae i traem ol man laswan, ale olgeta man we oli rebel wetem Setan mo ol nogud enjel blong hem, bambae Jisas i sakem olgeta long “bigfala hol ya blong faea.” Hemia nao taem we hem i smasem hed blong “snek” ya nao i lus olgeta.—Rev. 20:10.
19 !Jisas i mekem wok blong hem olsem Mesaea long fasin we i nambawan mo i stret gud! Wol we i kam paradaes bambae i fulap long ol man we oli fri long sin mo ded. Bambae oli stap laef blong olwe, oli no moa kam sik mo oli glad tumas. Bambae i no moa gat man i sakem doti long tabu nem blong Jeova, mo bambae i klia se hae rul blong hem long heven mo wol i stret gud. !I no longtaem nao, olgeta man we oli obei long Man ya we God i Makemaot, bambae oli kasem nambawan laef ya!
?Yu Yu Faenem Mesaea Finis?
20, 21. ?From wanem yu yu mas tokbaot Mesaea long ol narafala?
20 Stat long yia 1914, yumi stap laef long taem ya we Kraes i stap, no pa·rou·siʹa blong hem. Nomata se yumi no save luk hem wetem prapa ae blong yumi taem hem i stap olsem King blong Kingdom blong God, be yumi luksave samting ya from ol profet tok we oli kamtru. (Rev. 6:2-8) Be plante man tede oli olsem ol man Jiu long faswan handred yia, oli no wantem luksave ol samting ya we oli pruvum se Mesaea i stap. Olgeta tu oli wantem wan man blong politik we i save sevem olgeta, no oli wantem wan man we i yusum ol man blong politik blong mekem wok blong hem. Be yu yu defren. Yu yu kasem save finis se Jisas i stap rul naoia olsem King blong Kingdom blong God. ?Olsem wanem? ?Yu yu glad blong faenemaot samting ya? Olsem ol disaepol long faswan handred yia, yu tu yu bin talemaot se: ‘Mi mi faenem Mesaea finis.’
21 ?Taem yu tokbaot trutok long ol narafala, yu yu pulum olgeta blong tingbaot wok blong Jisas olsem Mesaea? Sipos yu mekem olsem, bambae yu tinghevi moa long ol samting we hem i mekem finis blong givhan long yu, ol samting we hem i stap mekem naoia, mo ol samting we bambae hem i mekem long fiuja. Olsem Andru mo Filip, ating yu yu tokbaot Mesaea finis long ol famle mo fren blong yu. Be i gud yu gat strong tingting blong toktok wetem olgeta bakegen mo givhan long olgeta blong luksave se Jisas Kraes i Mesaea ya we God i sanem i kam, mo hem nao i rod we God i yusum blong sevem ol man.
?Yu Yu Save Eksplenem?
• ?Olsem wanem ol disaepol long faswan handred yia oli save faenem Mesaea?
• Talem tu impoten risen from wanem Jisas i ded.
• ?Long fiuja, bambae Jisas i mekem wanem blong finisim wok blong hem olsem Mesaea?
[Kwestin]
[Tok blong pija long pej 21]
?Olsem wanem ol man long faswan handred yia oli save se Jisas hem i Mesaea ya we God i promes blong sanem?
[Tok blong pija long pej 23]
?Taem yu toktok wetem ol narafala, yu yu pulum olgeta blong tingbaot wok blong Jisas olsem Mesaea?