Soemaot Long Olgeta Man Se Yu Stap Gohed Gud

“Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” —1 TIM. 4:15.

1, 2. ?Yumi save wanem samting long saed blong laef blong yangfala Timoti mo jenis we i kamaot taem hem i gat samwe long 20 yia?

TIMOTI i gruap long Galesia, wan provins we ol man Rom oli rul long hem bifo, we tede oli kolem Teki. Long ol yia afta we Jisas i ded, i gat plante niufala kongregesen blong ol Kristin long provins ya. Long taem ya, yangfala Timoti, mama blong hem, mo bubu woman blong hem, trifala i kam Kristin mo trifala i joen long wan long ol kongregesen ya. (2 Tim. 1:5; 3:14, 15) I sua se Timoti i harem gud long laef blong hem olsem wan yangfala Kristin long ples ya we hem i savegud, mo wetem ol man tu we hem i savegud olgeta. Be wantaem nomo, ol samting oli jenis.

² Jenis ya i kamaot long nambatu taem we aposol Pol i kam long ples blong Timoti. Long taem ya, ating Timoti i gat klosap 20 yia no maet i jes bitim 20 yia blong hem. Taem Pol i kam long eria blong hem mo ating i go long taon ya Listra, hem i harem ol brata long ol kongregesen ya “oli stap talem se Timoti i wan gudfala man.” (Wok 16:2) Nating we Timoti i yangfala nomo, be i klia se hem i gat fasin blong bigman finis. Tabu spirit i lidim Pol mo ol elda long kongregesen blong oli putum han blong olgeta long hed blong Timoti, blong makemaot hem blong mekem wan spesel wok long kongregesen.—1 Tim. 4:14; 2 Tim. 1:6.

3. ?Timoti i kasem wanem wok we i narakaen lelebet?

³ !Aposol Pol i askem long Timoti blong mekem wan wok we i narakaen lelebet, hemia blong wokbaot wetem hem! (Wok 16:3) !Ating Timoti i sapraes bigwan mo i glad tu! Timoti i mas wokbaot wetem Pol blong plante yia, mo maet wetem sam narafala tu. Bambae hem i mekem plante defren wok we ol aposol mo ol elda oli givim long hem. Ale Pol mo Timoti tufala i wokbaot tugeta, nao tufala i go long plante ples blong mekem ol Kristin oli strong long bilif blong olgeta. (Ridim Ol Wok 16:4, 5.) From samting ya, plante Kristin oli savegud se Timoti i wan brata we i stap gohed gud long Kristin laef blong hem. Taem Timoti i wok ten yia finis wetem aposol Pol, Pol i raetem wan leta i go long ol Kristin long Filipae, se: “I no gat narafala man long ples ya we i gat sem tingting we Timoti i gat, we hem i stap tingbaot yufala tumas . . . yufala i save we hem i soemaot fasin blong hem finis, from we hem i wok wetem mi long ol wok blong gud nius blong Kraes, olsem we pikinini i stap wok wetem papa blong hem.”—Fil. 2:20-22.

4. (a) ?Wanem bigfala wok we Pol i putum long han blong Timoti? (b) ?Wanem ol kwestin we yumi save askem long saed blong tok blong Pol long 1 Timoti 4:15?

⁴ Klosap long taem ya we Pol i raetem leta i go long ol Kristin long Filipae, hem i putum wan bigfala wok long han blong Timoti. Wok ya i blong putumap ol elda mo ol man blong givhan. (1 Tim. 3:1, NW; 5:22) I klia se Timoti i wokhad finis blong kam wan elda we Pol i save trastem gud blong mekem bigfala wok ya. Nating se i olsem, long semfala leta ya, Pol i talem long Timoti se ‘olgeta man oli mas luk we hem i stap gohed gud long laef blong hem mo long wok blong hem.’ (1 Tim. 4:15) ?Tok ya i minim wanem? ?Timoti i no soemaot long bigfala fasin finis se hem i stap gohed gud? ?Olsem wanem advaes ya blong Pol i save givhan long yumi?

Samting We i Soemaot Se Hem i Stap Gohed Gud

5, 6. ?Wanem samting i stap mekem we kongregesen blong Efesas i save kam doti long fes blong God? ?Olsem wanem Timoti i save protektem kongregesen ya?

⁵ Bambae yumi traem lukluk gud long ol vas bifo mo afta long 1 Timoti 4:15. (Ridim 1 Timoti 4:11-16.) Bifo we Pol i raetem ol tok ya, hem i wokbaot i go long Masedonia. Be hem i askem long Timoti blong stap nomo long Efesas. ?From wanem? I gat sam man long taon ya we oli stap tijim ol tok we i no  stret, nao kongregesen i stap seraot from. Timoti i mas protektem kongregesen blong i no kam doti from ol giaman tijing ya. ?Olsem wanem hem i save mekem olsem? Wan samting se, hem i mas soemaot wan gudfala eksampol we ol narafala oli save folem.

⁶ Pol i raetem tok ya i go long Timoti se: “Oltaem yu mas soemaot gudfala eksampol long ol Kristin man, blong oli save folem fasin blong toktok blong yu, mo fasin blong yu we i stret, mo fasin blong bilif blong yu, mo fasin blong yu blong lavem ol man, mo fasin we yu stap mekem laef blong yu i klin gud.” Nao Pol i talem se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” (1 Tim. 4:12, 15) I no spesel wok we Timoti i gat we i soemaot se hem i stap gohed gud, be ol Kristin fasin blong hem nao oli soemaot samting ya. Olgeta Kristin oli mas wantem blong gat ol fasin ya, blong olgeta man oli save luk we oli stap gohed gud.

7. ?Olgeta evriwan long kongregesen oli mas mekem wanem?

⁷ Olsem long taem blong Timoti, tede tu samfala oli gat spesel wok insaed long kongregesen. Samfala oli elda no man blong givhan. Samfala oli paenia. Sam narafala oli goraon blong visitim ol kongregesen, wok long Betel, no oli wok olsem misinari. Ol elda oli mekem plante defren wok blong tijim ol Kristin, maet long smol asembli no long bigfala asembli. Nating se i olsem, olgeta Kristin, nomata se oli man, woman, no yangfala, oli naf blong mekem ol fasin we i soemaot long olgeta man se oli stap gohed gud. (Mat. 5:16) Yes, ol Kristin we oli gat spesel wok, olgeta tu oli mas gat ol fasin olsem Timoti, blong olgeta man oli save luk se oli stap gohed gud.

Gudfala Eksampol Long Fasin Blong Toktok

8. ?Olsem wanem toktok blong yumi i save gat paoa long wosip blong yumi?

⁸ Wan samting we Timoti i mas soemaot eksampol long hem, hemia fasin blong toktok. ?Olsem wanem yumi save soemaot se yumi stap gohed gud long saed ya? Ol toktok blong yumi i stap soemaot se yumi wanem kaen man. Jisas i talem i stret nomo, se: “Taem man i tok, hem i stap talemaot ol samting we tingting [“hat,” NW] blong hem i fulap long hem.” (Mat. 12:34) Jemes we i brata blong Jisas, hem tu i luksave se fasin blong toktok i gat bigfala paoa long wosip blong yumi. Hem i raetem se: “Sipos man i ting se hem i man blong God mo i stap ona gud long hem, be hem i no lukaot gud long ol toktok blong hem, man ya i stap giaman nomo. Fasin blong hem blong ona long God i blong nating nomo.”—Jem. 1:26.

9. ?Olsem wanem yumi save soemaot gudfala eksampol long saed blong fasin blong toktok?

⁹ Ol toktok blong yumi i save soemaot long olgeta long kongregesen sipos yumi stap gohed gud no nogat. Taswe, olgeta we oli bigman long ol Kristin fasin, oli no toktok olbaot we oli no soemaot respek, oli no tokbaot nogud saed blong evri samting, oli no tok agensem narafala mo toktok blong spolem narafala. Defren olgeta, oli traehad blong toktok long fasin we i leftemap tingting, i mekem man i harem gud, i daonem trabol, mo i pulum narafala long gudfala rod. (Prov. 12:18; Efes. 4:29; 1 Tim. 6:3-5, 20) Yumi onagud long God sipos yumi rere oltaem blong tokbaot ol gudfala fasin we yumi stap traehad blong folem. Mo taem man i daonem ol fasin we God i laekem, nao yumi no fraet blong toktok blong leftemap ol fasin ya, hemia tu i soemaot se yumi stap onagud long God. (Rom 1:15, 16) Ol man we hat blong olgeta i stret bambae oli luk gudfala fasin blong yumi blong toktok, mo oli save folem eksampol blong yumi.—Fil. 4:8, 9.

Gudfala Eksampol Long Ol Fasin Mo Laef We i Klin

10. ?From wanem yumi mas gat bilif we i no blong giaman, blong yumi save gohed gud?

¹⁰ I no gudfala fasin blong toktok nomo we i mekem se wan Kristin i soemaot gudfala eksampol. Sipos man i toktok gud mo stret be hem i no mekem  ol samting we hem i talem, hem i gat tu fes. Pol i save gud fasin tu fes blong ol Farisi mo ol nogud frut we i kamaot from. Pol i givim sam woning long Timoti se hem i no mas gat bilif we i blong giaman, mo i no mas gat tu tingting. (1 Tim. 1:5, NW; 4:1, 2) Long seken leta we Pol i raetem long Timoti, hem i soemaot se Timoti i no gat tu fes, i se: “Mi stap tingbaot fasin blong bilif blong yu, we i no blong giaman.” (2 Tim. 1:5) Nating se i olsem, Timoti i mas mekem se olgeta man oli save luk we hem i wan trufala Kristin. Hem i mas soemaot gudfala eksampol long ol fasin blong hem.

11. ?Pol i raetem wanem tok i go long Timoti long saed blong mane?

¹¹ Long tufala leta we Pol i raetem i go long Timoti, hem i givim advaes long saed blong plante defren fasin. Wan samting we Timoti i mas blokem, hemia fasin blong ronem mane. Pol i raetem se: “Fasin blong laekem mane tumas, hem i stamba blong olgeta fasin nogud. Mo i gat sam man we oli strong blong folem fasin ya, nao oli gowe finis long fasin blong bilif. Mo oli stap mekem ol samting we olgeta tu oli harem nogud tumas from.” (1 Tim. 6:10) Man we i laekem mane tumas i stap soemaot se hem i slak long saed blong bilif. Be ol Kristin we oli harem gud long smol samting we oli gat, mo oli glad nomo blong ‘gat kakae mo klos blong olgeta,’ oli soemaot se oli stap gohed gud.—1 Tim. 6:6-8; Fil. 4:11-13.

12. ?Olsem wanem yumi save soemaot long laef blong yumi wanwan se yumi stap gohed gud?

¹² Pol i talem long Timoti se i impoten tumas we ol Kristin woman oli ‘putum klos we i stret nomo, i no blong pulum ae blong man, mo i no blong flas.’ (1 Tim. 2:9) Ol woman we oli putum klos mo mekem hea blong olgeta i stret nomo, mo oli mekem ol stret fasin long ol narafala samting long laef blong olgeta, oli soemaot nambawan eksampol. (1 Tim. 3:11) Advaes ya i stret long ol Kristin man tu. Pol i givim advaes long ol elda se oli mas ‘bos long ol fasin blong olgeta, tingting blong olgeta i mas klia, mo i mas gat oda long laef blong olgeta.’ (1 Tim. 3:2, NW) Taem yumi soemaot ol fasin ya evri dei long laef blong yumi, olgeta man bambae oli luk se yumi stap gohed gud.

13. ?Olsem wanem yumi save soemaot gudfala eksampol olsem Timoti, long saed blong laef we i klin?

 ¹³ Timoti i mas soemaot gudfala eksampol tu long saed blong laef we i klin gud. Taem Pol i talem tok ya, hem i stap minim long saed blong seks. Antap moa, taem Timoti i stap klosap long ol woman, hem i mas lukaotgud se fasin blong hem i klin. Hem i mas ‘toktok gud long woman we i olfala, olsem we hem i stret mama blong hem. Mo hem i mas toktok long yang woman olsem we hem i stret sista blong hem, mo we fasin blong hem i klin gud.’ (1 Tim. 4:12; 5:2) Sipos man i haedem ol rabis fasin long saed blong seks we hem i mekem, be God i save long olgeta, mo sloslo ol narafala man tu bambae oli save long ol rabis fasin ya blong hem. Be ol gudfala Kristin fasin tu oli no save haed long fes blong God mo man. (1 Tim. 5:24, 25) Olgeta evriwan long kongregesen oli gat janis blong soemaot se oli stap gohed gud, taem oli mekem ol gudfala fasin mo taem laef blong olgeta i klin.

Yumi Mas Gat Lav Mo Bilif

14. ?Olsem wanem Baebol i makemgud se yumi mas lavlavem yumi?

¹⁴ Wan bigfala fasin blong ol trufala Kristin, hemia lav. Jisas i talem long ol disaepol blong hem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) ?Wanem ol fasin we oli soemaot se yumi gat lav ya? Tok blong God i askem long yumi blong gat longfala tingting long ol narafala from we yumi ‘lavem olgeta,’ mo blong ‘mekem i gud long ol Kristin brata mo sista blong yumi, kaen gud long olgeta mo fogivim olgeta,’ mo ‘tekem olgeta oli kam long haos blong yumi.’ (Efes. 4:2, 32; Hib. 13:1, 2) Aposol Pol i raetem se: “Yufala i mas lavlavem yufala olsem we yufala i wan brata nomo.”—Rom 12:10.

15. ?From wanem yumi evriwan, antap moa ol Kristin elda, i mas lavem narafala?

¹⁵ Sipos Timoti i mekem i strong tumas long ol Kristin brata mo sista blong hem mo hem i no kaen long olgeta, hemia i save mekem se ol gudfala wok blong hem olsem wan tija mo wan elda i blong nating nomo. (Ridim 1 Korin 13:1-3.) Be Timoti i no olsem. Hem i soemaot trufala lav long ol brata blong hem, i tekem olgeta oli kam long haos blong hem mo i mekem i gud long olgeta. Samting ya i soemaot se hem i stap gohed gud. Taswe, i stret nomo we long leta we Pol i raetem long Timoti, hem i talem se lav nao i wan fasin we Timoti i soemaot gudfala eksampol long hem.

16. ?From wanem Timoti i mas soemaot se hem i gat strong bilif?

¹⁶ Taem Timoti i stap long Efesas, wan samting i traem bilif blong hem. Samfala oli stap tijim ol man long ol tingting we oli no stret wetem trutok blong ol Kristin. Sam narafala oli stap talemaot olbaot ‘ol kastom stori we i no tru,’ mo oli stap lukaot ol save we i no givhan nating blong mekem kongregesen i kam strong. (Ridim 1 Timoti 1:3, 4.) Pol i talem se man we i mekem olsem, “hem i no save wan samting nating, mo hem i praod tumas. Man we i wantem askem ol kwestin mo we i wantem mekem tumas toktok long plante samting blong rao nomo, hem i krangke nomo.” (1 Tim. 6:3, 4) ?Olsem wanem? ?I stret we Timoti i lesin smol long ol tingting ya we oli stap spolem kongregesen? Nogat. Pol i talem stret long Timoti se hem i mas faet blong ‘gohed gud long Kristin laef blong hem, olsem man we i traehad long resis blong hem i win.’ Pol i talem tu se Timoti i no mas joen long “ol toktok ya we i no blong ona long God, mo long ol krangke toktok ya we oli talem se i fasin blong man i kam waes. Ol man we oli toktok olsem oli giaman nomo.” (1 Tim. 6:12, 20, 21) Yumi save se Timoti i folem waes advaes ya blong Pol.—1 Kor. 10:12.

17. ?Wanem samting i save traem bilif blong yumi tede?

¹⁷ Samting we i pulum tingting blong yumi, hemia tok we Pol i talem long Timoti se: “Long taem ya we klosap wol i finis, sam man oli save lego fasin blong bilif long God. Bambae olgeta ya oli obei long ol tok blong ol devel we oli blong giaman nomo, mo bambae oli biaen long ol toktok ya we ol devel nomo oli stap tijim olgeta long hem.” (1 Tim.  4:1) Olgeta evriwan long kongregesen, wetem olgeta we oli gat posisen mo wok tu, oli mas soemaot bilif we i strong, i no save seksek, olsem Timoti i gat. Yumi mas stanap strong mo tekem aksen blong agensem ol tingting blong apostasi. * Sipos yumi mekem olsem, olgeta man bambae oli luk we yumi stap gohed gud, mo bambae yumi soemaot gudfala eksampol long saed blong bilif.

Traehad Blong Soemaot Se Yu Stap Gohed Gud

18, 19. (a) ?Olsem wanem yu save soemaot long olgeta man se yu stap gohed gud? (b) ?Bambae yumi tokbaot wanem long nekis stadi?

¹⁸ I klia se i no naes bodi mo fes, no gudhan we wan trufala Kristin i gat, no spesel wok we hem i mekem, we i soemaot se hem i stap gohed gud. Mo i no from we hem i wok plante yia finis wetem kongregesen tu. Yumi rili soemaot se yumi stap gohed gud taem yumi obei long Jeova long ol tingting blong yumi, ol toktok blong yumi, mo ol fasin blong yumi. (Rom 16:19) Yumi mas obei long tok ya blong lavlavem yumi mo blong wokem wan bilif we i strong gud. Yes, yumi mas tingting dip long ol tok we Pol i raetem i go long Timoti, yumi mas putum tingting blong yumi i stap strong blong mekem olgeta wok ya, nao olgeta man bambae oli luk we yumi stap gohed gud long laef blong yumi mo long wok blong yumi.

¹⁹ Wan narafala fasin we i soemaot se yumi stap gohed gud mo yumi bigman long ol Kristin fasin, hemia glad, wan fasin we i kamaot long frut blong tabu spirit. (Gal. 5:22, 23) Nekis stadi bambae i tokbaot olsem wanem yumi save wokem mo holemtaet glad, taem yumi kasem trabol long laef blong yumi.

[Futnot]

?Bambae Yu Yu Ansa Olsem Wanem?

• ?Ol narafala oli save luksave wanem from ol toktok blong yumi?

• ?Olsem wanem ol fasin blong yumi mo laef we i klin i soemaot se yumi stap gohed gud?

• ?From wanem ol Kristin oli mas soemaot gudfala eksampol long saed blong lav mo bilif?

[Kwestin]

[Tok blong pija long pej 12]

Nating se Timoti i yangfala, tingting mo fasin blong hem i olsem bigman finis

[Tok blong pija long pej 13]

?Olgeta man oli save luk we yu yu stap gohed gud?