Wan Giaman Tingting i Mekem Narawan i Kamaot

“YUFALA i lukaot.” Aposol Pol i raetem tok ya i go long ol Kristin we oli laef klosap long yia 100 K.T. * ?Hem i talem se oli mas lukaot long wanem samting? “Blong bambae i no gat wan man i kam karemaot yufala olsem wan samting we hem i stilim. Man olsem i save yusum ol waes tok mo i save talem ol tok we i blong giaman nomo mo we oli stret long ol kastom blong ol man.”—Kol. 2:8, NW.

Nating se Pol i givim woning ya, be samwe long yia 150 K.T., samfala Kristin oli stat blong yusum ol tingting blong ol waes man blong wol, taem oli stap tokbaot bilif blong olgeta. ?From wanem oli mekem olsem? Ol Kristin ya oli wantem se ol man Rom we oli skulgud oli agri long olgeta, nao long rod ya oli save pulum plante long olgeta oli kam Kristin.

Ol man oli savegud wan long ol Kristin ya, we nem blong hem Justin Martyr. Man ya i bilif se long taem bifo, Man we i Karem Tok blong God i kamtru fastaem long ol waes man blong Gris, bifo we hem i kam long wol ya olsem Jisas. Justin mo sam narafala tija oli ting se ol tingting blong ol man Gris mo waes blong olgeta i mekem se Kristin Skul i kam wan jos we i givhan long olgeta man long evri ples.

Ol tingting blong Justin Martyr oli pulum plante man oli kam long Kristin Skul. Be taem ol man ya oli folem wan giaman tingting, hemia i lidim olgeta blong tekem narafala giaman tingting bakegen, gogo olgeta giaman tingting ya oli kam wanem we tede ol man oli kolem ol tijing blong Kristin skul. Long ol haf we oli kam biaen, i gat toktok we i kamaot long sam buk. I gud yu ridim mo yu skelem olgeta wetem wanem we Baebol i rili tijim. Olsem nao, bambae yu luksave ol tingting we oli giaman nomo.

[Futnot]

[Credit Lines long pej 3]

Devil: Barrators​—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence