Wokem Lav Ya We i No Save Lus Samtaem
Wokem Lav Ya We i No Save Lus Samtaem
‘Lav i stanap strong tru long olgeta samting. Lav i no save lus samtaem.’—1 KOR. 13:7, 8, NW.
1. (a) ?Wanem ol samting we ol man oli wokem blong leftemap lav? (b) ?Plante man oli lavem hu mo wanem?
OL MAN oli talem plante toktok long saed blong lav. Oli wokem ol singsing blong leftemap fasin ya mo blong tokbaot man mo woman we tufala i lavlavem tufala. Ol stoa oli salem fulap buk mo muvi we ol man nomo oli raetem mo wokem, long saed blong man mo woman we tufala i lavlavem tufala. Be ol stori ya oli no ol trufala stori. I tru yumi evriwan i nidim narafala blong lavem yumi. Be trufala lav long God mo ol narafala man, smol man nomo oli gat. Yumi luk se samting we Baebol i talemaot long saed blong taem blong yumi i stap kamtru. Ol man oli ‘tingbaot olgeta nomo, oli wantem mane tumas, oli wantem tumas ol samting we oli stap harem gud long hem, i winim we oli stap lavem God.’—2 Tim. 3:1-5.
2. ?Wanem woning we Baebol i givim long saed blong ol samting we oli no stret blong lavem?
2 Ol man oli naf blong soemaot lav, be Tok blong God i givim woning se yumi no mas lavem samting we i no stret. Mo Baebol i tokbaot samting we i save hapen sipos man i gat lav olsem long hat blong hem. (1 Tim. 6:9, 10) ?Yu yu tingbaot ol tok we aposol Pol i talem long saed blong Demas? Nating se Demas i stap kampani wetem Pol, be hem i stat blong laekem tumas ol samting blong wol. (2 Tim. 4:10) Aposol Jon i givim woning long ol Kristin se oli mas lukaot long trap ya. (Ridim 1 Jon 2:15, 16.) Man we i lavem wol, ol samting blong wol wetem ol fasin blong hem we oli blong smoltaem nomo, hem i no save lavem God mo ol samting we oli kamaot long hem.
3. ?I no isi long yumi blong mekem wanem? ?From samting ya, wanem ol kwestin we oli stanap?
3 Nating se yumi laef long wol, yumi no joen long ol fasin blong hem. Be i no isi blong blokem rong tingting we wol i gat long saed blong lav. I impoten we yumi no foldaon long trap ya blong lavem samting we i no stret mo blong gat tingting we i no stret long saed blong lav. Yumi mas wokem mo soemaot trufala lav. ?Be yumi mas lavem hu? ?Wanem i save givhan long yumi blong wokem lav we i stanap strong tru long olgeta samting mo we i no save lus samtaem? ?Sipos yumi wokem lav ya, olsem wanem bambae i mekem i gud long yumi naoia mo long fiuja? Yumi mas faenemaot tingting blong God long ol kwestin ya, nao yumi save letem tingting ya i lidim yumi.
Wokem Fasin Ya Blong Lavem Jeova
4. ?Olsem wanem blong mekem fasin blong yumi blong lavem God i gru?
4 Tingbaot wan man blong wokem garen, hem i wok had blong rerem graon mo planem ol sid. Ale tingting blong hem se ol sid ya bambae oli gru. (Hib. 6:7) Fasin blong yumi blong lavem God, hemia tu i mas gru. ?Olsem wanem blong mekem lav ya i gru? Man blong garen i wokem graon gogo i kam sofsof mo i stret blong sid i gru long hem. Long sem fasin, yumi mas mekem hat blong yumi i kam olsem gudfala graon, we sid blong trutok long saed blong Kingdom i save gru long hem. Blong mekem samting ya, yumi mas stadi gud long Tok blong God, nao bambae yumi kasem plante moa save long saed blong God. (Kol. 1:10) Sipos yumi go oltaem long ol miting mo tekpat long olgeta, samting ya tu bambae i givim moa save long yumi. ?Olsem wanem? ?Yu yu stap traehad moa oltaem blong kasem ol dip save blong Baebol?—Prov. 2:1-7.
5. (a) ?Olsem wanem yumi save kasem save long ol bigfala fasin blong Jeova? (b) ?Wanem samting we yu yu save talem long saed blong stret fasin, waes, mo paoa blong God?
5 Long Baebol, Jeova i soemaot fasin blong hem long yumi. Taem yumi stadi long Baebol mo sloslo yumi lanem moa long saed blong Jeova, yumi kasem save moa long ol fasin blong hem, olsem stret fasin, paoa, waes, mo bigfala lav blong hem. Long olgeta samting we Jeova i mekem mo long ol loa blong hem tu, hem i soemaot stret fasin. (Dut. 32:4; Sam 19:7) Yumi save tingting dip long olgeta samting we Jeova i wokem. Oli pulum yumi blong gat bigfala respek long hem, from we waes blong hem i bigwan tumas. (Sam 104:24) Ol samting we Jeova i wokem long wol mo long skae oli pruvum se Hem nao i Stamba blong bigfala paoa, we i no save finis samtaem.—Aes. 40:26.
6. ?Olsem wanem God i soemaot we hem i lavem yumi? Mo samting ya i mekem wanem long yu?
6 ?Olsem wanem long faswan stamba fasin blong God, hemia lav? Lav blong hem i kasem olgeta man mo i gat paoa long yumi evriwan. Hem i soemaot we hem i lavem ol man taem hem i mekem rod blong Jisas i givim laef blong hem olsem wan ransom blong sevem olgeta. (Ridim Rom 5:8.) Olgeta man long wol oli gat janis blong kasem blesing long ransom ya. Be blong mekem olsem, oli mas tekem aksen from lav we God i soem long olgeta, mo oli mas soemaot se oli bilif long Pikinini blong hem. (Jon 3:16, 36) Bigfala samting we God i mekem taem hem i letem Jisas i ded olsem wan sakrefaes blong kavremap ol sin blong yumi, i mas pulum yumi blong lavem hem.
7, 8. (a) ?Yumi mas mekem wanem blong soemaot se yumi lavem God? (b) ?Ol man blong God oli gohed blong folem ol tok blong hem nating se ol man oli mekem wanem?
7 ?Olsem wanem yumi save soemaot se yumi lavem God from ol samting we hem i mekem long yumi? Ansa we Baebol i talem i impoten, i se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Yes, sipos yumi lavem Jeova God, samting ya bambae i pulum yumi blong obei long ol tok blong hem. Hemia wan risen from wanem yumi mekem wok ya we i givhan long ol narafala man, hemia blong talemaot trutok long saed blong nem blong God mo Kingdom blong hem. Taem yumi mekem samting ya long gladhat blong yumi, yumi soemaot se lav nao i pusum yumi blong obei long ol tok blong God.—Mat. 12:34.
8 Ol brata blong yumi long fulwol, oli gohed blong obei long ol tok blong God, nating se plante man oli no wantem lesin long olgeta mo samfala oli agensem stret ol tok blong Kingdom. Ol brata ya oli gohed blong traehad fulwan blong finisim wok we God i givim long olgeta. (2 Tim. 4:5) Yumi tu yumi wantem talemaot save blong God long ol man, mo yumi wantem mekem ol narafala samting tu we hem i talem long yumi.
?From Wanem Yumi Lavem Masta Blong Yumi Jisas Kraes?
9. ?Jisas i stanap strong tru long wanem samting? ?Mo wanem i pulum Jisas blong stanap strong olsem?
9 Antap long fasin ya blong lavem God, i gat plante risen from wanem yumi mas wokem fasin ya blong lavem Pikinini blong hem. Nating se yumi no luk Jisas samtaem, be taem yumi lanem moa long saed blong hem yumi lavem hem moa. (1 Pita 1:8) ?Wanem sam samting we Jisas i stanap strong tru long olgeta? Jisas i mekem samting we Papa blong hem i wantem. Jisas i mekem i stret nomo be ol man oli no laekem hem nating, mo oli agensem hem. Oli talem ol giaman toktok long saed blong hem, oli tok nogud long hem, mo oli mekem plante narafala samting bakegen blong spolem hem. (Ridim Jon 15:25.) Jisas i lavem Papa blong hem long heven, nao samting ya i mekem se hem i stanap strong tru long ol trabol ya. Lav i pulum hem blong givim laef blong hem olsem wan sakrefaes blong sevem plante man.—Mat. 20:28.
10, 11. ?Samting we Kraes i mekem blong givhan long yumi, i pulum yumi blong traehad blong mekem wanem?
10 Samting we Jisas i mekem i gat paoa long yumi. Taem yumi tingting long samting we Kraes i mekem blong givhan long yumi, yumi lavem hem moa. Yumi ol man blong hem, yumi mas traehad blong wokem lav olsem we Kraes i gat mo soemaot lav ya oltaem. Long rod ya, bambae yumi gohed blong obei long tok we hem i talem, se yumi mas talemaot trutok long saed blong Kingdom mo pulum ol man oli kam disaepol.—Mat. 28:19, 20.
11 Lav we Kraes i soemaot long olgeta man i pulum yumi blong wok strong blong finisim wok blong yumi bifo we en i kamtru. (Ridim 2 Korin 5:14, 15.) Lav we Kraes i soemaot i givhan bigwan blong mekem stamba tingting blong God long saed blong ol man i kamtru. Mo taem yumi folemgud eksampol blong Kraes, yumi wanwan i wok blong mekem stamba tingting ya blong God i kamtru. Taswe, yumi mas mekem bes blong yumi blong wokem fasin ya blong lavem God wetem fulhat blong yumi. (Mat. 22:37) Taem yumi folem wanem we Jisas i tijim ol man long hem mo yumi obei long ol tok blong hem, yumi soemaot se yumi lavem hem mo yumi gat strong tingting blong leftemap hae rul blong God, nomata wanem samting i hapen long yumi. Hemia nao wanem we Jisas i mekem.—Jon 14:23, 24; 15:10.
Folem Fasin We i Nambawan, Hemia Lav
12. ?Wanem mining blong toktok blong Pol se i gat “wan fasin we i nambawan blong folem, i winim ol narafala fasin”?
12 Aposol Pol i folem fasin blong Kraes. From we hem i folem gud eksampol blong Kraes, hem i no fraet blong talem long ol brata blong hem se oli mas folem eksampol blong hem. (1 Kor. 11:1) Pol i pulum ol Kristin long Korin blong gohed blong wok strong blong kasem ol paoa no presen we tabu spirit i givim long ol man blong Kraes long faswan handred yia, olsem paoa blong tekemaot sik mo toktok long narafala lanwis. Be Pol i pulum olgeta blong tingbaot se i gat wan narafala samting we oli mas traehad from, we i moagud i bitim ol paoa ya. Long 1 Korin 12:31, hem i talem se: “Mi wantem soemaot long yufala wan fasin we i nambawan blong folem, i winim ol narafala fasin.” Ol vas we oli kam biaen oli soemaot se fasin ya we i nambawan, hemia lav. ?Olsem wanem lav i nambawan, i winim ol narafala fasin? Pol i talem wan pijatok blong givhan long yumi blong kasem save long toktok blong hem. (Ridim 1 Korin 13:1-3.) Sipos hem i gat gudhan blong mekem plante samting mo hem i mekem ol bigbigfala wok, be hem i no gat lav, ?bambae hem i olsem wanem? !Bambae hem i olsem nating nomo! Tabu spirit i pulum hem blong mekem impoten poen ya i klia. !Pol i pulum gud tingting blong yumi i go long impoten trutok ya!
13. (a) ?Wanem stamba vas blong yia 2010? (b) ?From wanem lav i no save lus samtaem?
13 Pol i gohed blong eksplenem fasin blong man we i lavem narafala, samting we hem i mekem mo samting we hem i no mekem. (Ridim 1 Korin 13:4-8.) I gud yu tekem taem blong skelem sipos fasin blong yu blong lavem narafala i olsem. Tingting gud long lashaf blong vas 7 mo fashaf blong vas 8 (NW), se: ‘Lav i stanap strong tru long olgeta samting. Lav i no save lus samtaem.’ Hemia nao stamba vas blong yia 2010. Long vas 8, Pol i tokbaot ol presen we tabu spirit i givim, olsem paoa blong talemaot profet tok mo toktok long ol narafala lanwis, hemia ol presen we ol Kristin oli kasem taem Kristin kongregesen i jes stanap. Ating yu luk we Pol i talem se bambae ol presen ya oli finis, be lav bambae i no save lus samtaem. Evri samting we Jeova i mekem, hem i mekem from lav blong hem. Jeova i stap olwe, taswe lav tu i no save finis, bambae i no save lus samtaem. Bambae lav i stap gogo i no save finis from we i wan fasin blong God blong yumi we hem i stap olwe.—1 Jon 4:8.
Lav i Stanap Strong Tru Long Olgeta Samting
14, 15. (a) ?Olsem wanem lav i save givhan long yumi blong stanap strong tru long ol samting we oli traem yumi? (b) ?From wanem wan yangfala brata i no lego bilif blong hem long Jeova?
14 ?Wanem samting i mekem se ol Kristin oli save stanap strong nomata wanem samting i traem olgeta, nomata wanem hadtaem mo problem oli kasem? Bigfala samting we i mekem se oli stanap strong hemia trufala lav. Lav ya i mekem se yumi rere blong lego sam samting long saed blong bodi. Be i no hemia nomo. Yumi rere blong holemstrong long God go kasem ded from bilif blong yumi long Kraes. (Luk 9:24, 25) Tingbaot ol Witnes long taem blong Wol Wo Tu mo long ol yia biaen. Oli holemstrong long God nating se oli harem nogud long ol rabis kalabus mo ol kamp we oli mas wok strong tumas.
15 Wan yangfala Witnes blong Jemani, nem blong hem Wilhelm, hem i soemaot wan gudfala eksampol long saed ya. Hem i stap tru long Jeova taem ol Nasi oli sutum hem i ded from we hem i no wantem lego bilif blong hem. Bifo we hem i ded, hem i raetem wan leta long famle blong hem, i se: “Olsem Lida blong yumi Jisas Kraes i talem, yumi mas lavem God moa i bitim olgeta narafala samting. Sipos yumi stanap long saed blong hem, bambae hem i blesem yumi.” Long Wajtaoa, wan famle blong hem i talem se: “Long olgeta trabol we mifala i kasem long laef, mifala i meksua oltaem se mifala i lavem God fastaem long ol narafala samting long laef blong mifala.” Plante brata we oli stap naoia long ol kalabus long Amenia, Eritrea, Saot Koria, mo sam narafala kantri bakegen, olgeta tu oli gat strong tingting olsem. Ol brata ya oli gohed blong lavem Jeova mo stanap strong.
16. ?Wanem trabol we ol brata blong yumi long Malawi oli stanap strong tru long hem?
16 Long plante ples, ol brata blong yumi oli no stap long kalabus, be oli kasem ol narafala trabol we oli traem bilif blong olgeta. Long Malawi, ol Witnes blong Jeova oli stanap strong blong 26 yia, taem gavman i putum tabu long wok blong olgeta, ol man oli agensem olgeta, mo oli mekem plante rabis samting long olgeta. Fasin blong olgeta blong stanap strong i karem blesing long olgeta. Taem ol man oli stat blong agensem olgeta i gat samwe long 18,000 Witnes long kantri ya. Toti yia biaen namba blong olgeta i kam antap kasem 38,393, hemia i bitim tu taem antap long namba blong bifo. Long sam narafala kantri tu oli kasem blesing olsem.
17. ?Samfala oli kasem wanem trabol long famle blong olgeta we oli no Kristin? ?Mo from wanem oli save stanap strong taem ol famle oli mekem i no stret long olgeta?
17 Taem ol man oli mekem i nogud long ol man blong God long klia ples, samting ya i no isi nating long olgeta. Be taem wan Kristin i kasem fasin agens long ol famle blong hem, plante taem samting ya i had moa. Ol famle long haos no ol stret famle blong wan Kristin oli save mekem hem i harem nogud. Jisas i talemaot finis se samting ya bambae i hapen. Yes, plante Kristin oli luk se tok ya blong Jisas i kamtru long olgeta. (Mat. 10:35, 36) Sam yangfala, papa mama blong olgeta we oli no Kristin oli agensem olgeta, be ol yangfala ya oli stanap strong. Samfala, papa mama blong olgeta i sakemaot olgeta long haos, be ol Witnes oli gat kaen fasin nao oli tekem olgeta oli kam stap long haos blong olgeta. Sam narafala yangfala, famle i no moa wantem save long olgeta. ?Wanem i givhan long olgeta blong stanap strong taem famle blong olgeta i mekem i no stret long olgeta? Wan samting se oli lavem ol Kristin brata sista blong olgeta. Be samting we i gat moa paoa long olgeta, hemia se oli gat trufala lav long Jeova mo Pikinini blong hem.—1 Pita 1:22; 1 Jon 4:21.
18. ?Olsem wanem lav we i stanap strong tru long olgeta samting, i givhan long ol Kristin we oli mared?
18 Yumi mas gat lav ya we i save stanap strong tru long olgeta samting, blong winim plante narafala trabol tu long laef blong yumi. Long mared, lav i givhan long hasban mo waef blong folem tok ya blong Jisas, se: “From we God i joenem tufala olsem, man i no mas brekem mared blong tufala.” (Mat. 19:6) Taem ol Kristin we oli mared oli kasem “trabol long laef blong olgeta,” oli mas tingbaot se Jeova nao hem i stamba Man insaed long mared blong olgeta. (1 Kor. 7:28) Tok blong hem i talem se ‘lav i stanap strong tru long olgeta samting,’ taswe sipos hasban mo waef tufala i gat lav ya, bambae tufala i gat strong tingting blong stap tugeta mo blong mekem mared blong tufala i stap gud.—Kol. 3:14.
19. ?Ol man blong God oli mekem wanem taem i gat wan disasta?
19 Taem wan hariken no wan narafala disasta i kasem yumi, lav i halpem yumi blong stanap strong tru long olgeta samting ya. Hemia nao wanem i hapen taem graon i seksek long saot blong Peru, mo taem hariken ya Katrina i spolem sam taon klosap long solwota long saot blong Yunaeted Stet. Tufala disasta ya tufala i spolem haos blong plante brata blong yumi mo oli lusum olting blong olgeta. Lav i pulum kongregesen long fulwol blong givim ol samting we ol brata ya oli nidim, mo ol volontia oli givhan blong bildim bakegen ol haos mo mekem ol Haos Kingdom oli gud bakegen. Ol wok ya we ol brata oli mekem i soemaot se oli lavem ol brata blong olgeta mo oli givgivhan long olgeta oltaem, nomata wanem trabol oli kasem.—Jon 13:34, 35; 1 Pita 2:17.
Lav i No Save Lus Samtaem
20, 21. (a) ?From wanem lav hem i nambawan long olgeta fasin? (b) ?From wanem yu yu gat strong tingting blong traehad blong gat lav?
20 Ol man blong Jeova tede oli soemaot se i waes blong wokem lav ya we i nambawan. Tru ya, nomata wanem trabol i kasem yumi, lav i nambawan. Tingbaot olsem wanem aposol Pol i pulum tingting blong yumi i go long trutok ya. Faswan samting we hem i tokbaot se, ol presen no paoa we tabu spirit i givim bambae oli finis, mo se Kristin kongregesen we i jes stat bambae i kam olsem bigman. Biaen hem i talem se: “I gat trifala fasin oli stap: bilif, hop mo lav. Be nambawan long trifala fasin ya, hemia lav.”—1 Korin 13:13, NW.
21 Sloslo ol samting we yumi stap bilif long olgeta, bambae oli kamtru, taswe bambae yumi no moa nid blong bilif long olgeta. Hop blong yumi long ol promes we yumi stap wet long olgeta blong kamtru long fiuja, bambae i finis taem oli kamtru mo olgeta samting oli kam niuwan. ?Be olsem wanem long lav? Lav bambae i no save finis, bambae i no save lus samtaem. Yes lav bambae i stap olwe. Taem yumi laef gogo i no save finis, bambae yumi luksave mo kasem save long plante moa samting long saed blong lav blong God. Sipos yu mekem samting we God i wantem, bambae yu traehad blong gat lav ya we i nambawan blong folem, i winim ol narafala fasin. Lav ya i no save lus samtaem, mo yu tu bambae yu save stap olwe.—1 Jon 2:17.
?Bambae Yu Yu Ansa Olsem Wanem?
• ?From wanem yumi mas lukaot blong no lavem ol samting we oli no stret?
• ?Lav i save givhan long yumi blong stanap strong tru long wanem?
• ?From wanem lav i no save lus samtaem?
[Kwestin]
[Bokis blong makem poen long pej 27]
Stamba vas blong yia 2010 bambae i olsem: ‘Lav i stanap strong tru long olgeta samting. Lav i no save lus samtaem.’ —1 Kor. 13:7, 8, NW.
[Tok blong pija long pej 25]
Lav long God i pulum yumi blong talemaot trutok long saed blong hem
[Tok blong pija long pej 26]
Lav ya we i no save lus samtaem i mekem se ol Kristin brata mo sista blong yumi long Malawi oli stanap strong tru long ol trabol