?From Wanem Yu Mas Givim Laef Blong Yu i Go Long Jeova?

“Mi mi man blong God mo mi stap mekem wosip long hem.”​—WOK 27:23.

1. ?Wanem sam samting we man i mekem blong hem i kasem mak blong baptaes? ?Wanem ol kwestin we oli stanap long saed ya?

“?FROM bilif blong yu long sakrefaes blong Jisas Kraes, yu yu tanem tingting blong yu from ol sin blong yu, mo yu yu givim laef blong yu i go long Jeova blong mekem ol samting we hem i wantem?” Kwestin ya i wan long tufala kwestin we olgeta we oli rere blong tekem baptaes oli ansa long hem long en blong tok blong baptaes. ?From wanem ol Kristin oli mas givim laef blong olgeta i go long Jeova? ?Wanem ol gudfala samting we yumi kasem taem yumi mekem olsem? ?From wanem God i no glad long wosip blong man we i no givim laef blong hem i go long God? Bifo we yumi faenemaot ansa blong ol kwestin ya, fastaem yumi mas save se i minim wanem blong givim laef blong yumi i go long God.

2. ?I minim wanem blong givim laef blong yumi i go long Jeova?

² ?I minim wanem blong givim laef blong yumi i go long God? Tingbaot wanem we aposol Pol i talem long saed blong fasin fren blong hem wetem God. Taem hem i stap long wan sip we i stap draon long solwota, hem i talemaot long fored blong ol narafala long sip se ‘hem i wan man blong God.’ (Ridim Ol Wok 27:22-24.) Olgeta trufala Kristin oli man blong Jeova. Be ol man blong wol ya, “oli stap long paoa blong Setan.” (1 Jon 5:19) Ol Kristin oli kam man blong Jeova taem oli mekem laef blong olgeta i stret long fored blong Jeova mo oli prea long hem blong givim laef blong olgeta i go long hem. Hemia wan promes we olgeta wanwan oli mekem long Jeova. Biaen oli baptaes long wota.

3. ?Baptaes blong Jisas i soemaot wanem? ?Mo olsem wanem ol man blong hem oli save folem eksampol blong hem?

³ Jisas i givim eksampol long yumi taem hem nomo i jusum blong mekem samting we God i wantem. God i talem se neson blong Isrel i blong hem, taswe taem Jisas i bon, hem i wan man blong God finis. Be Jisas i no mekem samting nomo we Loa i talem se hem i mas mekem. Hem i tekem baptaes tu. Tok blong God i soemaot we hem i talem se: “Mi mi rere blong mekem ol samting ya we yu yu wantem.” (Hib. 10:7; Luk 3:21) Jisas i baptaes blong soemaot long God se hem i rere blong mekem samting we Papa blong hem i wantem. Olsem Jisas, ol man blong hem oli jusum blong tekem baptaes. Be olgeta oli baptaes long wota blong soemaot long klia ples se oli givim laef blong olgeta i go finis long God long prea.

 Gudfala Samting We Yu Kasem Taem Yu Givim Laef Blong Yu i Go Long God

4. ?Long eksampol blong Deved mo Jonatan, yumi lanem wanem long saed blong fasin ya blong frengud wetem narafala?

⁴ Ol Kristin oli mas tinghevi long promes we oli mekem taem oli givim laef blong olgeta i go long God. Promes ya i moa impoten i bitim eni narafala promes we man i mekem. ?Wanem gudfala samting we yumi kasem taem yumi givim laef blong yumi i go long God? Blong kasem ansa blong kwestin ya, yumi save tingbaot ol gudfala samting we yumi kasem taem yumi joen wetem ol narafala man, olsem taem yumi wantem frengud wetem narafala. Blong frengud wetem narafala mo harem gud long fasin fren ya, yu mas rere blong mekem sam samting we oli soemaot se bambae yu yu wan gudfala fren long hem. I olsem se yu mekem wan promes long hem, from we yu harem se yu wantem givhan long hem mo yu tingbaot hem. Wan nambawan eksampol long Baebol long saed blong tufala we i frengud, hemia Deved mo Jonatan. Tufala i mekem wan strong promes long tufala, se bambae tufala i stap frengud. (Ridim 1 Samuel 17:57; 18:1, 3.) Nating se i no gat tumas man tede we oli frengud tugeta olsem, be sipos yumi gat filing ya se yumi wantem givhan long wan narafala olsem we yumi mekem wan promes long hem, bambae yumi frengud wetem hem.​—Prov. 17:17; 18:24.

5. ?Wan man we i wok slef blong wan gudfala masta, hem i save mekem wanem blong wok blong masta ya olwe?

⁵ Loa we God i givim long ol man Isrel i tokbaot wan narafala eksampol we i soemaot ol gudfala samting we ol man oli kasem taem oli mekem promes long narafala. Sipos wan man we i wok slef blong wan masta i luk se masta ya i mekem i gud long hem, ale hem i wantem wok blong masta ya olwe, hem i save mekem wan promes no kontrak wetem masta ya. Loa i talem se: “Sipos hem i talemaot long klia ples we hem i laekem tumas masta blong hem mo woman blong hem mo ol pikinini blong hem, nao i no wantem go fri, ale, masta blong hem bambae i mas tekem hem i go long ples blong mekem wosip, nao long ples ya, bambae i mekem hem i stanap long doa, no long pos blong doa, nao bambae i tekem nil, i stikim sora blong hem i gotru blong mekem hol. Nao man ya bambae i stap wok slef blong masta ya oltaem long laef blong hem.”​—Eks. 21:5, 6.

6, 7. (a) ?Olsem wanem ol promes oli givhan long ol man? (b) ?Samting ya i soemaot wanem long saed blong fasin fren blong yumi wetem Jeova?

⁶ Taem wan man mo woman tufala i mared, tufala i mekem wan strong promes long tufala. Tufala i wokhad blong mekem mared blong tufala i stap gud, i no from we tufala i saenem wan pepa be from we tufala i mekem promes long tufala. Taem wan man mo woman tufala i stap tugeta we tufala i no mared, tufala i no sua gud long fasin fren blong tufala se bambae i stap gud no nogat. Ol pikinini blong tufala tu oli no save harem se oli stap gud. Be taem tufala i mekem wan promes long tufala long mared, Baebol i givim gudfala risen long tufala blong traehad blong winim ol problem blong tufala wetem lav.​—Mat. 19:5, 6; 1 Kor. 13:7, 8; Hib. 13:4.

⁷ Baebol i tokbaot se long taem bifo, ol promes no kontrak oli givhan long ol man we oli mekem bisnes mo long ol wokman tu. (Mat. 20:1, 2, 8) Tede i sem mak. Bifo we yumi mekem bisnes wetem narafala no yumi stat blong wok long wan kampani, yumi waes blong mekem wan promes no wan kontrak we yumi raetemdaon long wan pepa. !Taswe, sipos promes we yumi mekem long wan fren blong yumi, long mared, long wok no long bisnes, i save givhan blong mekem fasin fren blong yumi wetem narafala i kam strong moa, i sua se taem yumi mekem promes blong givim laef blong yumi i go fulwan long Jeova, samting ya bambae i mekem fasin fren blong yumi wetem hem i kam strong moa! I gud yumi luk ol blesing we ol man bifo oli kasem from promes we oli mekem long Jeova God blong kam man blong hem, mo olsem wanem promes ya blong givim laef blong yumi i go long Jeova, i no olsem ol narafala promes.

Ol Man Isrel Oli Kasem Blesing From Promes We Oli Mekem Long God

8. ?Promes we ol man Isrel oli mekem long God i minim wanem?

⁸ Ful neson blong Isrel i blong Jeova taem oli promes blong kam ol man blong hem. Jeova i talem long ol man Isrel blong kam wanples klosap long hil ya Sinae, mo i talem long olgeta se: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol.” Nao olgeta man  Isrel oli toktok wantaem, oli talem se: “Bambae mifala i mekem olgeta samting we Hae God i talem.” (Eks. 19:4-8) Ol man Isrel oli no promes blong mekem wan wok nomo. Promes ya i min se oli kam ol man blong Jeova, mo Jeova i mekem i gud long olgeta olsem ol “nambawan man” blong hem.

9. ?Wanem ol blesing we ol man Isrel oli kasem from promes we oli mekem long God?

⁹ Ol man Isrel oli kasem blesing from we oli kam ol man blong Jeova. Jeova i stap tru long olgeta mo i lukaot gud long olgeta olsem we wan papa i lukaot gud long pikinini blong hem. God i talem long ol man Isrel se: “?Olsem wanem? ?Woman i save fogetem pikinini blong hem? ?Yufala i ting se hem i save tanem baksaed long pikinini blong hem, we hem nomo i bonem? Maet i gat woman we i save mekem olsem, be mi bambae mi no save mekem olsem long yufala samtaem.” (Aes. 49:15) Jeova i givim Loa long olgeta blong lidim olgeta, hem i sanem ol profet blong oli leftemap tingting blong olgeta, mo i yusum ol enjel blong protektem olgeta. Wan man we i wokem plante singsing long Ol Sam i talem se: “Yumi ol laen blong Isrel, mo oltaem Hae God i stap givim tok blong hem long yumi, i stap tijim yumi long rod blong hem, mo long ol tingting blong hem. Hem i no mekem samting ya long ol man blong ol narafala kantri.” (Sam 147:19, 20; ridim Ol Sam 34:7, 19; 48:14.) Long taem bifo, Jeova i lukaot gud long neson ya we i blong hem, mo bambae hem i mekem sem mak long olgeta tede we oli givim laef blong olgeta i go long hem.

?From Wanem Yumi Mas Givim Laef Blong Yumi i Go Long God?

10, 11. ?Taem yumi bon, yumi insaed long bigfala famle blong God? Eksplenem.

¹⁰ Samfala we oli stap tingting blong givim laef blong olgeta i go long God mo tekem baptaes, oli askem kwestin ya se: ‘?From wanem mi mas givim laef blong mi i go long God blong wosipim hem?’ Risen from wanem yumi mas mekem samting ya i kam klia taem yumi kasem save tingting blong God long saed blong yumi. Tingbaot se from sin blong Adam, yumi evriwan i bon afsaed long bigfala famle blong God. (Rom 3:23; 5:12) Blong joen long bigfala famle ya blong God, yumi mas givim laef blong yumi i go long hem. Bambae yumi luk from wanem.

¹¹ I no gat wan long yumi we papa blong hem i save givim laef ya we God i wantem se yumi gat, hemia laef we i stret gud olgeta. (1 Tim. 6:19) Sin blong faswan man mo woman i mekem se, taem yumi bon, yumi no pikinini blong God. I olsem se tufala i karemaot yumi ol man, long Papa blong yumi we i lavem yumi mo we i Wokem yumi. (Skelem wetem Dutronome 32:5.) Stat long taem ya, olgeta man oli stap afsaed long famle blong Jeova, oli stap longwe long hem.

12. (a) ?Olsem wanem ol sinman oli save joen long famle blong God? (b) ?Wanem ol samting we yumi mas mekem bifo we yumi tekem baptaes?

¹² Nating se i olsem, yumi wanwan i save askem long God blong i letem yumi kam insaed long famle blong hem, blong joen long ol man blong wok blong hem we hem i glad long olgeta. * ?Be olsem wanem yumi ol sinman yumi save mekem samting ya? Aposol Pol i talem se: “Fastaem yumi ol enemi blong hem, be from we Pikinini blong hem i ded, hem i mekem yumi kam ol fren blong hem.” (Rom 5:10) Taem yumi baptaes yumi askem long God blong mekem tingting blong yumi i klin gud blong hem i save glad long yumi. (1 Pita 3:21) Be bifo we yumi baptaes, i gat sam samting we yumi mas mekem. Yumi mas traehad blong save gud God, yumi mas lan blong trastem hem, yumi mas tanem tingting blong yumi, mo jenisim ol fasin blong yumi. (Jon 17:3; Wok 3:19; Hib. 11:6) Mo i gat wan narafala samting tu we yumi mas mekem, blong God i tekem yumi i kam long famle blong hem. ?Wanem samting ya?

13. ?From wanem i stret nomo we wan man i mas mekem promes blong givim laef blong hem i go long God, blong hem i save joen long famle blong God?

¹³ Blong man we i stap longwe long God i save joen long famle blong God, fastaem man ya i mas mekem wan impoten promes long Jeova. Blong kasem save from wanem hem i mas mekem promes ya, tingbaot wan gudfala papa we i kaen long wan pikinini we i no gat papa mama blong hem. Papa ya i wantem adoptem pikinini ya i kam long famle blong hem. Ol man oli save se papa ya hem i wan  gudfala man. Be bifo we hem i adoptem pikinini ya blong i kam boe blong hem, hem i wantem se boe ya i mekem wan promes long hem. Ale, man ya i se: “Bifo we mi adoptem yu yu kam boe blong mi, fastaem mi mas save se bambae yu lavem mi mo respektem mi olsem we mi stret papa blong yu.” Sipos pikinini ya i mekem promes ya, ale long taem ya nomo bambae man ya i adoptem hem i kam long famle blong hem. ?Yu luk se samting we man ya i mekem i stret? Yes, i stret nomo. Long sem fasin, ol man we oli wantem se Jeova i tekem olgeta i kam long famle blong hem, oli mas mekem promes blong givim laef blong olgeta i go long hem. Baebol i talem se: “Yufala i mas givim olgeta laef blong yufala i go nomo long hem olsem wan sakrefaes. Hemia i wan sakrefaes we i laef mo i tabu, mo we God i glad blong tekem.”​—Rom 12:1.

Promes We Yu Mekem Blong Givim Laef Blong Yu i Go Long God i Soemaot Lav Mo Bilif

14. ?Olsem wanem promes we yumi mekem blong givim laef blong yumi i go long Jeova, i soemaot we yumi lavem Jeova?

¹⁴ Promes we yumi mekem blong givim laef blong yumi i go long God i soemaot we long hat blong yumi, yumi lavem Jeova. I lelebet olsem promes we yumi mekem taem yumi mared. Wan Kristin brata i soemaot we hem i lavem wan sista taem hem i promes long mared blong tufala, blong stap tru long sista ya nomata wanem i hapen long laef blong tufala. Hem i no promes nomo blong mared wetem sista ya, be hem i promes long sista ya tu. Kristin brata ya i kasem save se hem i no save stap wanples wetem sista ya sipos hem i no mekem promes long taem blong mared. Long sem fasin, yumi no save harem gud long ol blesing blong stap insaed long famle blong Jeova sipos yumi no mekem wan promes blong givim laef blong yumi i go long hem. Taswe yumi givim laef blong yumi i go long God from we, nating se yumi sinman, yumi wantem kam man blong hem mo yumi gat strong tingting blong stap tru long hem, nomata wanem samting i hapen long laef blong yumi.​—Mat. 22:37.

15. ?From wanem yumi soemaot bilif taem yumi givim laef blong yumi i go long Jeova?

¹⁵ Taem yumi givim laef blong yumi i go long God, yumi soemaot bilif tu. ?From wanem yumi talem olsem? From we bilif blong yumi long Jeova i mekem yumi sua se sipos yumi stap klosap long God, samting ya bambae i mekem i gud long yumi. (Sam 73:28) Yumi laef long wan taem we ol man oli “kruked mo krangke nomo,” taswe yumi save se bambae i no isi blong wokbaot wetem God. Be yumi trastem promes blong God se bambae hem i blesem ol traehad we yumi mekem. (Fil. 2:15, NW; 4:13, NW) Yumi save se yumi sinman nomo, be yumi sua gud se Jeova bambae i no mekem i strong tumas long yumi. Taem yumi mestem bambae hem i gat sore long yumi. (Ridim Ol Sam 103:13, 14; Rom 7:21-25.) Yumi bilif se Jeova bambae i blesem yumi from strong tingting we yumi gat blong holemstrong long hem.​—Job 27:5.

Bambae Yu Kasem Trufala Glad

16, 17. ?From wanem yumi kasem trufala glad taem yumi givim laef blong yumi i go long Jeova?

¹⁶ Taem yumi givim laef blong yumi long Jeova, samting ya i mekem yumi harem gud, from we yumi givim taem, paoa mo olting blong yumi blong mekem wok blong hem. Wan trutok we Jisas  i talem, i se: “Man we i stap givim presen i go, hem i save harem gud moa, i winim man we i stap kasem presen blong hem.” (Wok 20:35) Long wok blong prij, Jisas i soemaot fasin ya blong givim presen long narafala, mo hem i harem gud tumas from. Samtaem hem i no spel, i no kakae, mo i lego ol samting we oli save mekem laef blong hem i isi, blong halpem ol narafala blong faenem rod blong laef. (Jon 4:34) Jisas i harem gud blong mekem samting we Papa blong hem i glad long hem. Hem i se: “Oltaem, mi stap mekem ol samting we hem i wantem.”​—Jon 8:29; Prov. 27:11.

¹⁷ Jisas i wantem se ol man blong hem tu oli harem gud long samting we oli mekem long laef blong olgeta, nao i talem long olgeta se: “Man we i wantem kam biaen long mi, hem i mas blokem ol samting we hem nomo i wantem.” (Mat. 16:24) Sipos yumi mekem olsem, bambae yumi kam klosap moa long Jeova. I no gat narafala man we bambae i lukaot gud long yumi moa i bitim Jeova. Yes, yumi wantem kam ol man blong hem.

18. ?From wanem glad blong yumi i bigwan moa taem yumi wok folem promes blong yumi blong givim laef blong yumi i go long Jeova?

¹⁸ Sipos yumi mekem promes blong givim laef blong yumi i go long Jeova mo yumi gohed blong wok folem promes ya, bambae yumi kasem glad we i bigwan tumas from we yumi yusum laef blong yumi blong mekem samting we God i wantem. Glad ya i bigwan moa i bitim glad we yumi kasem sipos yumi yusum laef blong yumi blong mekem wan narafala wok, no blong mekem wan narafala man i glad. Plante man oli yusum laef blong olgeta blong ronem ol sas samting, be oli no kasem trufala glad mo oli no rili harem gud long samting we oli mekem long laef blong olgeta. Be ol man we oli givim laef blong olgeta i go long Jeova oli kasem glad we i stap longtaem. (Mat. 6:24) Oli glad from blesing we oli kasem blong “joen wetem God blong mekem wok blong hem.” Be promes we oli mekem i no go long wan wok, oli givim laef blong olgeta i go long nambawan God blong yumi. (1 Kor. 3:9) Jeova i glad long fasin blong olgeta blong lego samting we olgeta nomo oli wantem. I no gat narafala man we i glad long olgeta olsem hem. Bambae hem i mekem ol man we oli stap tru long hem oli kam yangfala bakegen, olsem nao bambae oli harem gud blong olwe long ol samting we hem i mekem blong lukaot long olgeta.​—Job 33:25; ridim Hibrus 6:10.

19. ?Olgeta we oli givim laef blong olgeta i go long Jeova oli kasem wanem nambawan blesing?

¹⁹ Taem yu givim laef blong yu i go long Jeova, hemia i mekem se yu kam fren blong hem mo yu kam klosap moa long hem. Baebol i talem se: “Yufala i mas stap klosap long God, nao hem bambae i kam stap klosap long yufala.” (Jem. 4:8; Sam 25:14) Long nekis stadi bambae yumi luk from wanem yumi save gat strong tingting blong mekem desisen blong kam man blong Jeova.

[Futnot]

?Bambae Yu Yu Ansa Olsem Wanem?

• ?I minim wanem blong givim laef blong yumi i go long God?

• ?Wanem ol blesing we yumi kasem from we yumi givim laef blong yumi i go long God?

• ?From wanem ol Kristin oli mas givim laef blong olgeta i go long Jeova?

[Kwestin]

[Tok blong pija long pej 12]

Taem yumi wok folem promes we yumi mekem blong givim laef blong yumi i go long God, samting ya bambae i mekem yumi glad blong olwe