Problem Ya i Stap Long Fulwol, Wan Rod Nomo Blong Tekemaot

LONG evri ples, ol man oli safa, mo plante man oli sore mo oli givhan long olgeta. Olsem nao, olgeta we oli wok long ol hospital oli spenem plante aoa blong givhan long ol man we oli sik mo oli kasem kil. Ol man blong kilim faea, ol polis, ol man we oli stanemap ol loa, mo ol man we wok blong olgeta i blong sevem man long taem blong disasta, oli traehad blong blokem trabol we i mekem ol man oli safa, no blong mekem se oli no safa tumas. Traehad blong olgeta i givhan bigwan long wanwan man nomo, be i no gat wan man no wan grup we i naf blong mekem se olgeta man long wol oli no moa safa. God nomo i save mekem rod blong tekemaot ol trabol we oli stap mekem ol man oli safa long fulwol, mo bambae hem i mekem olsem.

Laswan buk blong Baebol i mekem yumi sua long samting ya, i se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:4) Tingbaot olsem wanem promes ya bambae i gat paoa long plante man. Promes ya i soemaot gud stamba tingting blong God blong finisim olgeta trabol we i stap mekem man i safa. Bambae God i mekem samting ya taem hem i tekemaot faet, hanggri, sik, mo fasin we i no stret long fulwol, wetem ol rabis man tu. I no gat wan man long wol we i naf blong mekem samting ya.

Samting We Kingdom Blong God Bambae i Mekem

God bambae i yusum Man ya we i namba tu long Hem, blong mekem olgeta promes blong Hem oli kamtru. Man ya we i gat bigfala paoa long heven mo wol, hemia Jisas Kraes we i laef bakegen finis long ded. I no longtaem, bambae  Jisas i rul olsem King antap long fulwol, we i no gat wan man i agensem hem. Bambae ol man long wol ya oli no moa stap aninit long rul blong ol man we oli king, presiden, no haeman blong politik. Bambae oli stap aninit long rul blong wan King mo wan gavman nomo, hemia Kingdom blong God.

Kingdom ya bambae i finisim evri gavman blong man. Baebol i talemaot longtaem bifo se: “God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.” (Daniel 2:44) Ol man long evri ples long wol bambae oli joengud aninit long wan gavman nomo we i gat stret fasin long hem, hemia Kingdom blong God.

Taem Jisas i stap long wol olsem wan man, plante taem hem i tokbaot Kingdom ya. Hem i tokbaot Kingdom ya long Lodsprea taem hem i tijim ol man blong hem blong prea, se: “Plis, yu mekem Kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Matiu 6:10, NW) Makemgud se Jisas i soemaot we Kingdom i joengud wetem samting we God i wantem se i kamaot long wol, mo samting we God i wantem hemia blong finisim fasin safa long fulwol.

Gavman ya blong God we stret fasin nomo i stap long hem, bambae i karem ol blesing oli kam long ol man we i no gat wan gavman blong man i naf blong mekem samtaem. Tingbaot se Jeova i givim Pikinini blong hem olsem wan ransom, blong ol man oli save kasem laef we i no save finis. Aninit long gudfala rul blong Kingdom ya, sloslo ol man bambae oli kam stretgud olgeta. ?Wanem frut bambae i kamaot? Jeova “bambae i mekem we ded bambae i go lus olgeta. Bambae hem i ravemaot wota blong ae” blong evri man.​—Aesea 25:8.

Maet samfala oli askem se: ‘?From wanem God i no mekem samting ya bifo finis? ?Hem i stap wet long wanem?’ Longtaem finis i kam, Jeova i save tekem aksen blong tekemaot mo blokem olgeta samting we oli stap mekem man i safa. Be hem i letem ol trabol ya oli gohed, i no from we hem i tingbaot hem wan nomo, nogat. Hem i wantem se ol trabol ya oli givhan long ol pikinini blong hem long wol ya blong oli kasem ol blesing we oli blong olwe. Ol papa mama we oli gat lav, bambae oli letem pikinini blong olgeta i gotru long ol hadtaem sipos oli save se samting ya bambae i givhan long pikinini long ol yia biaen. Long sem fasin, i gat plante gudfala risen we i mekem se Jeova i letem ol man oli stap safa blong smoltaem, mo Baebol i eksplenem ol risen ya. Sam risen oli long saed blong fasin fri we wanwan man i gat, sin, mo kwestin we i stanap long saed blong fasin blong Jeova blong rul. Baebol i eksplenem tu se God i letem wan rabis spirit man i rulum wol blong smoltaem. *

I no gat naf spes blong yumi tokbaot olgeta risen ya evriwan, be i gat tu samting we oli save leftemap tingting blong yumi mo mekem se yumi save putum tingting blong yumi i stap strong long ol gudfala samting long fiuja. Faswan samting se: Ol blesing we Jeova bambae i givim oli plante moa i bitim olgeta samting we oli stap mekem yumi safa tede. Mo tu, God i promes se: “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” (Aesea 65:17) God bambae i tekemaot blong olwe olgeta trabol we oli stap mekem ol man oli harem nogud mo safa. Ol trabol ya oli kamaot from ol rabis fasin we God i letem i stap blong smoltaem.

Namba tu samting se: God i putum wan stret taem finis blong finisim olgeta samting we oli mekem man i safa, mo i no gat wan samting i save mekem we God i jenisim taem ya. Tingbaot profet Habakuk we i askem long Jeova se wetaem bambae Hem i tekemaot raf fasin mo ol faet. Jeova i ansa long hem se: “Vison ya bambae i kamtru long stret taem blong hem nomo. . . . Hem i no save let.” (Habakuk 2:3, NW) Bambae yumi tokbaot long nekis haf se “stret taem” ya i klosap nomo.

[Futnot]

 [Bokis blong pija long pej 7]

Ol Vas Blong Baebol We Oli Tokbaot Nambawan Fiuja

OL FAET OLI FINIS:

“Yufala i kam, yufala i luk ol samting ya we Hae God i mekem. Yufala i luk ol bigbigfala wok ya we hem i mekem long wol. Hem i stap mekem ol faet i finis long olgeta ples long wol.”​—Ol Sam 46:8, 9.

OLGETA WE YUMI LAEKEM TUMAS OLI LAEF BAKEGEN:

“God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”​—Ol Wok 24:15.

BAMBAE OLGETA MAN OLI GAT KAKAE:

“Bambae i gat plante kakae long ples ya, we bambae ol hil oli fulap gud long hem.”​—Ol Sam 72:16.

BAMBAE I NO MOA GAT SIK:

“Bambae i no moa gat man olbaot long kantri ya we i save talem se hem i sik.”​—Aesea 33:24.

BAMBAE OL RABIS MAN OLI LUS:

“Ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.” ​—Ol Proveb 2:22.

STRET FASIN NOMO BAMBAE I STAP:

“!Olgeta! I gat taem i stap kam, we wan king [Jisas Kraes] bambae i stap rul long fasin we i stret olgeta, mo we ol haeman blong hem bambae oli stap mekem i stret nomo.”​—Aesea 32:1.

[Tok blong pija long pej 7]

Kingdom blong God bambae i stretem olgeta trabol we i stap mekem yumi safa