Pruvum Se Yu Wan Prapa Man Blong Kraes

“Gudfala tri, hem i save karem gudfala frut nomo, mo rabis tri, hem i save karem rabis frut nomo.”​—MAT. 7:17.

1, 2. ?Olsem wanem ol trufala man blong Kraes oli defren long ol giaman Kristin, speseli long taem ya blong en?

JISAS i tokbaot ol man we oli giaman se oli mekem wok blong hem, se frut blong laef blong olgeta, hemia ol tijing mo fasin blong olgeta, bambae i soemaot se oli defren long ol trufala man blong hem. (Mat. 7:15-17, 20) Tru ya, ol samting we ol man oli tekem i kam insaed long tingting mo hat blong olgeta i save gat paoa long olgeta. (Mat. 15:18, 19) Ol man we oli kasem giaman tijing bambae oli karem “rabis frut,” be ol man we oli kasem tijing blong trutok bambae oli karem “gudfala frut.”

² Tufala kaen frut ya i kamaot klia moa long taem ya blong en. (Ridim Daniel 12:3, 10.) Ol giaman Kristin oli gat wan tingting we i rong long saed blong God, mo taem oli wosipim God, plante taem oli gat fasin tu fes. Be ol trufala Kristin we oli luksave ol samting long saed blong spirit, oli wosipim God “long spirit mo trutok.” (Jon 4:24, NW; 2 Tim. 3:1-5) Oli traehad blong soemaot ol fasin blong Kraes. ?Olsem wanem? ?Yu wan yu stap traehad blong soemaot ol fasin blong Kraes? Taem yumi tokbaot ol faef mak we oli makemaot ol trufala Kristin, i gud yu tingbaot se: “?Fasin blong mi mo ol samting we mi mi tijim long narafala, oli laenapgud wetem Tok blong God? ?Fasin blong mi mo samting we mi tijim long narafala, i halpem olgeta we oli stap lukaotem trutok blong oli luksave se trutok ya i gud tumas?”

Laef Folem Tok Blong God

3. ?Wanem i mekem Jeova i glad, mo samting ya i minim wanem long ol trufala Kristin?

³ Jisas i talem se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.” (Mat. 7:21) Yes, Jeova i no glad long man we i talem nomo se hem i Kristin. Hem i glad long man we i stap mekem ol samting we wan Kristin i mas mekem. Hemia i min se wan trufala Kristin i gat fasin mo tingting blong Kristin man long evri samting long laef blong hem, olsem mane, wok, pleplei, ol kastom mo lafet blong wol ya, mared mo fasin fren wetem narafala man. Be ol giaman Kristin oli tekem ol tingting mo fasin blong wol, we long taem ya blong ol las dei, i stap gowe moa long God.​—Sam 92:7.

4, 5. ?Olsem wanem yumi save mekem ol tok blong Jeova we i stap long Malakae 3:18 i wok long laef blong yumi?

⁴ From samting ya, profet Malakae i raetem se:  “Bambae yufala i save luk bakegen wanem nao i stap mekem stret man i defren long rabis man, mo wanem nao i stap mekem man blong wok blong God i defren long man we i no wok blong God.” (Mal. 3:18, NW) Taem yu tingting dip long ol tok ya, askem yu wan se: ‘?Mi mi olsem ol man long wol ya, no mi defren long olgeta? ?Taem mi stap long skul no long wok, mi traehad oltaem blong mekem sem samting we ol man blong wol oli mekem, no mi holemstrong long ol stamba rul blong Baebol, mo mi rere tu blong toktok from bilif blong mi taem mi luk se i stret?’ (Ridim 1 Pita 3:16.) I tru yumi no wantem mekem olsem se yumi stret man, be yumi mas soemaot se yumi defren long ol man raonabaot long yumi we oli no lavem Jeova mo we oli no mekem wok blong Hem.

⁵ Sipos yu luk se yu mas kam gud moa long fasin blong yu, i gud yu prea long saed ya mo gohed blong stap strong long saed blong spirit taem yu stadi Baebol, prea, mo go long ol miting. Taem yumi mekem Tok blong God i wok long laef blong yumi bambae yumi karem plante moa “gudfala frut,” olsem “frut blong maot blong yumi we i talemaot nem blong [God] long ol man.”​—Hib. 13:15, NW.

Talemaot Kingdom Blong God

6, 7. ?Long saed blong gud nius blong Kingdom, wanem samting i mekem ol trufala Kristin oli defren long ol giaman Kristin?

⁶ Jisas i talem se: “Mi mas talemaot gud nius blong kingdom blong God long ol narafala taon tu, from we God i sanem mi blong mi mekem olsem.” (Luk 4:43, NW) ?From wanem Kingdom blong God i stamba tijing blong Jisas taem hem i stap prij? Jisas i save se taem bambae hem i King blong Kingdom ya wetem ol tabu brata blong hem we bambae oli laef bakegen mo oli rul wetem hem, bambae olgeta ya nao oli finisim sin mo Devel Setan, we oli stamba blong ol trabol blong man. (Rom 5:12; Rev. 20:10) Taswe, Jisas i givim oda long ol man blong hem blong oli talemaot Kingdom ya gogo kasem taem we rabis wol ya i lus. (Mat. 24:14, NW) Ol man we oli talem nomo long maot blong olgeta se oli biaen long Jisas Kraes, oli no stap mekem wok ya. Tru ya, oli no save mekem. ?From wanem? I gat tri risen: Faswan risen se, oli no save go talemaot samting we oli no kasem save long hem. Nambatu risen se, plante long olgeta oli no gat tingting daon mo oli fraet blong fesem ol man we oli jikim mo agensem olgeta, hemia nao samting we i kamaot taem oli talemaot Kingdom long ol man we oli stap raonabaot long olgeta. (Mat. 24:9; 1 Pita 2:23) Mo namba tri risen se, ol giaman Kristin oli no gat tabu spirit blong God.​—Jon 14:16, 17.

⁷ Defren olgeta, ol trufala man blong Kraes, oli kasem save se Kingdom blong God hem i wanem, mo oli save wanem ol samting we Kingdom ya bambae i mekem. Antap long hemia, oli putum ol wok blong Kingdom fasples long laef blong olgeta, oli go talemaot long olgeta man long fulwol, mo tabu spirit blong Jeova i halpem olgeta. (Sek. 4:6) ?Olsem wanem? ?Yu yu joen oltaem long wok ya? ?Yu stap traehad blong kam gud moa long wok ya blong talemaot Kingdom, maet yu spenem moa taem blong prij no maet yu traehad blong gat gudhan moa long fasin blong yu blong mekem wok ya? Samfala oli traehad blong kam gud moa long wok blong prij taem oli yusum gud Baebol. Aposol Pol we i traehad oltaem blong gat fasin ya blong yusum Baebol blong mekem man i tingting, i raetem se: “Tok blong God i wan samting we i laef, mo i stap wok.”​—Hib. 4:12; Wok 17:2, 3.

8, 9. (a) ?Wanem ol ekspiriens we oli soem se i impoten blong yusum Baebol long minista wok blong yumi? (b) ?Yumi save mekem wanem blong yumi kam gud moa long fasin blong yusum Baebol?

 ⁸ Wan brata we i prij long haos wanwan, i ridim Daniel 2:44 long wan man we i Katolik, mo i eksplenem olsem wanem Kingdom blong God bambae i mekem se i gat trufala pis mo seftaem long wol. Man ya i talem se: “Mi laekem taem yu no talem vas nomo long mi, be yu openem Baebol mo yu soem long mi wanem we vas ya i talem.” Taem wan brata i ridim wan vas long wan woman blong Grik Otodoks jos, woman ya i askem plante gudfala kwestin. Long taem ya tu, brata ya mo waef blong hem, tufala i yusum Baebol blong ansarem ol kwestin blong woman ya. Biaen woman ya i talem se: “?Yu save from wanem mi glad blong toktok wetem yufala? From we yufala i kam long haos blong mi wetem Baebol, mo yufala i rid stret long Baebol.”

⁹ I tru se ol buk blong yumi oli impoten mo yumi mas givimaot ol buk ya taem yumi prij. Be Baebol i stamba buk blong yumi. Sipos i no fasin blong yu blong yusum Baebol oltaem long minista wok blong yu, i gud sipos yu traem putum mak blong kam gud moa long saed ya. Yu save jusum sam stamba vas we i eksplenem wanem ya Kingdom blong God mo olsem wanem bambae Kingdom ya i winim ol problem we ol man long ples blong yu oli stap kasem. Ale yu mas rere blong ridim ol vas ya taem yu stap prij long haos wanwan.

Yumi No Sem Blong Holem Nem Blong God

10, 11. ?Olsem wanem tingting we Jisas i gat long saed blong nem blong God i defren long tingting blong plante man we oli talem se oli Kristin?

¹⁰ Hemia nao tok blong Jeova: ‘Yufala i witnes blong mi mo mi mi God.’ (Aes. 43:12, NW) Jisas Kraes we i beswan Witnes blong Jeova, i luk se i wan ona blong karem nem blong God mo talemaot nem ya. (Ridim Eksodas 3:15; Jon 17:6, 12.) Yes, oli singaotem Jisas se “Trufala Witnes” from we hem i talemaot nem blong Papa blong hem.​—Rev. 1:5, NW; Mat. 6:9.

¹¹ Plante man we oli talem se oli mekem wok blong God mo Pikinini blong hem, oli gat ol fasin we i mekem sem nomo long nem blong God, mo oli karemaot nem ya long Baebol tu. I no longtaem i pas, semfala tingting ya i kamaot long wan oda we i go long ol bisop blong Katolik Jos. Oda ya se oli “no mas yusum no talemaot nem blong God we oli raetem long fo leta ya YHWH,” long wosip blong olgeta. * !Hemia wan tingting we i nogud olgeta!

12. ?Long 1931, ol man blong Jeova oli mekem wanem blong soem klia se oli man blong wok blong Jeova?

¹² Folem eksampol blong Jisas Kraes mo ol ‘witnes we oli plante we plante’ we oli laef bifo long hem, ol trufala Kristin oli no sem blong yusum nem blong God. (Hib. 12:1) Tru ya, long yia 1931, ol man we oli wok blong God, oli karem nem ya ol Witnes blong Jeova blong mekem i klia moa se oli man blong wok blong Jeova. (Ridim Aesea 43:10-12.) Taswe, ol trufala man blong Jisas oli kam wan neson we i “holem nem blong [God].”​—Wok 15:14, 17.

13. ?Yumi save mekem wanem blong soemaot se yumi holem nem blong God?

¹³ ?Yumi save mekem wanem blong soemaot se yumi ol man we oli holem nem blong God? Faswan samting, yumi mas gohed blong givim witnes long nem blong God. Aposol Pol i raetem se: “Olgeta man we oli singaot long mi long nem blong mi, mi bambae mi sevem olgeta. ?Be sipos God i no sanem ol man oli go blong talemaot nius blong hem, bambae ol man oli save go olsem wanem? ?Mo sipos man i no go talemaot nius blong God, bambae ol man oli save harem nius ya olsem wanem? ?Mo sipos ol man oli no harem nius ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem?” (Rom 10:13-15) Wetem waes fasin, yumi mas soemaot klia ol giaman tijing blong ol skul we oli spolem nem blong God ya we i Wokem Yumi, olsem tijing ya blong helfaea we i stap soemaot God ya blong lav olsem se hem i gat ol fasin blong Devel Setan.​—Jer. 7:31; 1 Jon 4:8; skelem wetem Mak 9:17-27.

14. ?Samfala oli harem olsem wanem taem oli save nem blong God?

¹⁴ ?Olsem wanem? ?Yu yu glad blong holem nem blong Papa blong yu long heven? ?Yu yu halpem ol narafala man blong oli save tabu nem ya? Wan woman we i stap long Paris, long Franis, i harem se ol Witnes blong Jeova oli save nem blong God, ale taem hem i luk wan Witnes, hem i askem  long Witnes ya blong soem nem ya long Baebol blong hem. Taem hem i ridim Ol Sam 83:18, samting ya i gat bigfala paoa long hem. Hem i stat blong stadi Baebol mo naoia hem i wan sista we i stap mekem wok blong Jeova long wan narafala kantri. Long Ostrelia, wan woman we i Katolik i luk nem blong God long Baebol nao hem i krae, from we hemia fastaem long laef blong hem we hem i luk nem ya, mo hem i glad tumas. Woman ya i mekem wok blong fultaem paenia blong plante yia nao. I no longtaem i pas, wan Witnes long Jamaika i soem long wan woman, nem blong God long prapa Baebol blong hem. Wota i ron long ae blong hem tu, from we hem i glad. Yes, yumi no mas sem blong holem nem blong God, mo yumi mas folem eksampol blong Jisas taem yumi soemaot nem ya long ol man.

“Yufala i No Mas Laekem . . . Wol”

15, 16. ?Ol trufala Kristin oli tingbaot wol olsem wanem, mo wanem ol kwestin we yumi mas tingbaot?

¹⁵ “Yufala i no mas laekem ol fasin blong wol mo ol samting we oli stap long hem. Man we i laekem tumas ol fasin blong wol, hem i no save lavem Papa blong yumi.” (1 Jon 2:15) Wol mo ol tingting blong hem we i stap long ol samting blong bodi nomo, i agensem Jeova mo tabu spirit blong hem. Taswe, ol trufala man blong Kraes oli no man blong wol ya. Oli no laekem wol ya nating from we oli savegud tok ya we disaepol Jemes i raetem se: “Man we i wantem tumas ol fasin blong wol, hem i kam enemi blong God.”​—Jem. 4:4.

¹⁶ I no isi blong folem ol tok blong Jemes from we wol ya i fulap long plante samting we oli traem man. (2 Tim. 4:10) Taswe Jisas i prea from ol man blong hem se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef. Mi mi no man blong wol ya, mo long sem fasin, olgeta tu oli no man blong wol ya.” (Jon 17:15, 16) I gud yu tingbaot se: ‘?Mi mi traehad blong mi no man blong wol ya? ?Ol man oli save tingting blong mi long saed blong ol lafet mo kastom we oli no stanap long Baebol, mo ol narafala lafet mo kastom we maet oli no kamaot long ol hiten man be oli rili soemaot tingting blong wol?’​—2 Kor. 6:17; 1 Pita 4:3, 4.

17. ?Wanem i save pulum ol man we hat blong olgeta i stret blong oli kam long Jeova?

¹⁷ Tru ya, strong tingting we yumi gat blong holemtaet ol rul blong Baebol bambae i no mekem ol man blong wol oli laekem yumi, be bambae i pulum tingting blong ol man we hat blong olgeta i stret. Yes, taem oli luk se bilif blong yumi i stanap nomo long Baebol, mo ol samting we yumi mekem evri dei i laenap wetem Baebol, bambae oli save talem wan tok olsem tok ya we i go long ol man we tabu spirit i makemaot olgeta se: “Mifala i wantem kam fren blong yufala, from we mifala i harem nius se God i stap givhan long yufala.”​—Sek. 8:23.

Soem Trufala Kristin Lav

18. ?Wanem samting i joen wetem fasin ya we yumi lavem Jeova mo ol man raonabaot long yumi?

¹⁸ Jisas i talem se: “Yu mas lavem Hae God ya [Jeova] we i God blong yu long olgeta hat blong yu, mo long olgeta laef blong yu, mo long olgeta tingting blong yu” mo “yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Mat. 22:37, 39) Lav ya (a·gaʹpe long lanwis Grik) i wan lav we i stret, we i mekem man i tingbaot wok we hem i mas mekem, i stanap long ol rul, mo i pulum man blong gat respek long narafala, mo plante taem, lav ya i joen wetem strong filing. Hem i wan filing we i mekem man i olsem brata, mo long semtaem hem i gat bigfala paoa long tingting blong man. (1 Pita 1:22) Hem i defren olgeta long fasin ya we man i tingbaot hem nomo, from we lav ya i mekem se man i tingbaot narafala long ol tok mo fasin blong hem.​—Ridim 1 Korin 13:4-7.

19, 20. Talem sam ekspiriens we oli soem paoa blong Kristin lav.

¹⁹ Lav i wan fasin we i kamaot long tabu spirit  blong God, mo i mekem we ol trufala Kristin oli naf blong mekem samting we ol narafala i no save mekem. Oli naf blong winim ol samting we i seraotem ol man, olsem kala blong skin, kalja, mo politik. (Ridim Jon 13:34, 35; Gal. 5:22.) Lav ya i pulum tingting blong ol man we oli olsem sipsip. Tingbaot wan yangfala man Jiu long Isrel we i go long faswan Kristin miting blong hem, hem i sapraes blong luk se ol brata we oli man Jiu mo ol brata we oli man Arab oli stap wanples blong wosip long Jeova. From samting ya, hem i stat blong kam oltaem long ol miting mo i agri blong stadi Baebol. ?Olsem wanem? ?Yu soemaot lav ya long ol brata sista blong yu? ?Mo yu traehad blong mekem welkam long ol niuwan we oli kam long Haos Kingdom blong yu, nating se kantri, kala blong skin i defren, mo nating se oli rij no oli pua?

²⁰ Yumi ol trufala Kristin, yumi mas traehad blong soem lav long evri man. Long kantri ya El Salvado, wan yangfala pablisa i stap stadi Baebol wetem wan olfala woman blong 87 yia we hem i wan Katolik mo i strong long jos blong hem. Wan dei, woman ya i sik bigwan mo i go slip long hospital. Taem hem i kambak long haos, ol Witnes oli visitim hem mo oli meksua oltaem se hem i gat kakae. Oli mekem samting ya wan manis. I no gat wan man long skul blong olfala woman ya we i kam luk hem. ?Wanem i kamaot from samting ya? Olfala woman ya i sakemaot ol aedol blong hem, hem i raetem leta blong talem se hem i no moa wan memba blong jos blong hem, mo i gohed bakegen blong stadi Baebol. !Yes, Kristin lav i gat paoa! Hem i save kasem hat blong plante man moa i bitim ol toktok we yumi talem.

21. ?Olsem wanem yumi save meksua se laef blong yumi long fiuja bambae i stap gud?

²¹ I no longtaem, Jisas bambae i talem long ol man we oli giaman se oli man blong hem, se: “Neva mi mi save yufala. Yufala i man blong mekem ol rabis fasin, yufala i gowe long mi.” (Mat. 7:23) I gud yumi gohed blong mekem ol fasin we oli givim ona long Papa blong yumi Jeova mo Pikinini blong hem. Jisas i talem se: “Man we i harem ol tok ya blong mi, nao i stap mekem ol samting we mi mi talem, hem i olsem wan waes man we i wokem fandesen blong haos blong hem antap long wan bigfala ston.” (Mat. 7:24) !Yes, sipos yumi pruvum se yumi wan prapa man blong Kraes, bambae God i glad long yumi, mo yumi sua se laef blong yumi long fiuja bambae i stap gud, olsem we ston i fandesen blong hem!

[Futnot]

?Yu Yu Tingbaot?

• ?Olsem wanem ol trufala man blong Kraes oli defren long olgeta we oli giaman?

• Talem sam “frut” we oli makemaot ol trufala Kristin.

• ?Wanem sam mak we yu save traem kasem blong soemaot ol frut ya we oli makemaot ol trufala Kristin?

[Kwestin]

[Tok blong pija long pej 19]

?Hem i fasin blong yu blong yusum Baebol oltaem long minista wok blong yu?