Talemaot Tok Blong God We Yu No Fraet Nating
Talemaot Tok Blong God We Yu No Fraet Nating
“Tabu Spirit i kam fulap long olgeta, nao oli stat talemaot tok blong God we oli no fraet nating.”—OL WOK 4:31.
1, 2. ?From wanem yumi mas traehad blong prij long fasin we i givhan gud long man?
TRI dei bifo we Jisas i ded, hem i talem long ol disaepol blong hem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” Biaen, taem Jisas i laef bakegen mo i rere blong gobak long heven, hem i talem long ol man blong hem blong oli ‘go long ol man long olgeta ples long wol blong pulum olgeta oli kam ol disaepol blong hem. Oli mas tijim olgeta blong folem olgeta samting we hem i talem finis long olgeta.’ Jisas i promes long ol man blong hem se, bambae hem i stap wetem olgeta “evri dei, gogo kasem en blong fasin blong laef blong wol ya.”—Mat. 24:14, NW; 26:1, 2, NW; 28:19, 20, NW.
2 Yumi ol Witnes blong Jeova, yumi joen long wan wok we i bin stat long faswan handred yia. I no gat wan narafala wok we i impoten moa i bitim wok ya blong talemaot Kingdom mo pulum ol man oli kam disaepol blong Kraes, from we wok ya i sevem laef blong man. !Taswe i impoten tumas we yumi prij long fasin we i givhan gud long man! Long stadi ya, bambae yumi luk olsem wanem tabu spirit i save givhan long yumi blong no fraet blong toktok taem yumi prij. Nekis stadi wetem namba tri stadi, tufala bambae i soemaot olsem wanem spirit blong Jeova i save lidim yumi blong gat gudhan taem yumi tij, mo blong joen oltaem long wok blong prij.
Yumi No Mas Fraet Blong Toktok
3. ?From wanem yumi mas gat tingting we i strong mo no fraet blong toktok, taem yumi talemaot Kingdom?
3 Wok ya we God i givim blong talemaot Kingdom, i wan bigfala ona long yumi. Be samtaem i no isi blong mekem wok ya. Sam man oli agri kwiktaem long gud nius blong Kingdom blong God, be plante oli sem mak olsem ol man long taem blong Noa. Jisas i talem se oli “no wantem lesin, ale bigfala wota i ron i tekemaot olgeta, oli ded.” (Mat. 24:38, 39, NW) Mo tu, i gat olgeta ya we oli jikim mo agensem yumi. (2 Pita 3:3) Ol haeman blong gavman mo jos, ol fren blong yumi long skul mo long wok, oli save agensem yumi. Mo samtaem ol memba blong famle blong yumi tu oli agensem yumi. Mo antap long hemia, yumi gat sam slak fasin blong yumi, olsem fasin blong sem, mo fasin ya we yumi fraet se narafala i no glad long yumi. I gat plante samting we oli save mekem se i had long yumi blong talemaot tok blong God. Taswe, blong gohed blong prij, yumi mas gat ‘tingting we i strong’ mo no fraet blong toktok. (Efes. 6:19, 20) ?Wanem i save givhan long yumi blong gat fasin ya?
4. (a) ?No fraet blong toktok i minim wanem? (b) ?Olsem wanem aposol Pol i mekem tingting blong hem i strong blong prij long ol man long Tesalonaeka?
4 Grik tok ya we oli tanem i kam ‘no fraet blong toktok,’ i min se man i “no sem blong talemaot samting we i stap long tingting blong hem, mo i toktok long fasin we i klia mo i tru.” Tok ya i save minim tu se “man i gat strong tingting.” Be hemia i no min se hem i toktok blong spolem narafala mo i no kaen, nogat. (Kol. 4:6) Yumi no fraet blong toktok, be long semtaem, yumi wantem gat pis wetem ol narafala. (Rom 12:18) Taswe, taem yumi stap talemaot gud nius blong Kingdom blong God, yumi no mas fraet blong toktok, be yumi mas lukaot tu blong toktok long fasin we i kaen. Long rod ya, yumi no spolem man we yumi stap prij long hem. Yes, blong lanem stret fasin blong toktok we yumi no fraet nating, yumi nidim sam fasin we oli no isi blong wokem. Taswe, blong wokem gudfala fasin ya blong no fraet blong toktok, yumi no save dipen long save mo prapa paoa blong yumi. “Long Filipae, ol man oli mekem i nogud” long aposol Pol mo ol fren blong hem. ?Afta long hemia, olsem wanem ol aposol ya oli ‘mekem tingting blong olgeta i strong’ blong oli save prij long ol man long Tesalonaeka? Pol i raetem se: “God blong yumi i mekem tingting blong mifala i strong.” (Ridim 1 Tesalonaeka 2:2.) Long sem fasin, Jeova God i save tekemaot fraet blong yumi mo i save mekem tingting blong yumi i strong blong toktok long ol narafala.
5. ?Olsem wanem Jeova i mekem tingting blong Pita, Jon, mo ol narafala disaepol i strong nao oli no fraet blong toktok?
5 Taem “ol haeman blong ol laen blong Isrel, wetem ol elda blong olgeta, mo ol tija blong Loa” oli agensem aposol Pita mo Jon, tufala i talem se: “?Olsem wanem? ?Yufala i ting se i stret long fes blong God blong mifala i obei long yufala, no mifala i obei long hem? Hemia i stap long yufala blong yufala i skelem. Be mifala, bambae mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” Pita mo Jon, wetem ol narafala disaepol oli no prea long God blong i stopem fasin agens ya, nogat. Be oli askem strong long Jeova, se: “Hae God, naoia plis yu makemgud ol strong tok ya we oli stap mekem agens long mifala. Mifala i man blong wok blong yu. Plis yu givhan long mifala, blong bambae mifala i talemaot ol tok blong yu, we tingting blong mifala i strong.” (Wok 4:5, 19, 20, 29) ?Jeova i ansa long prea blong olgeta olsem wanem? (Ridim Ol Wok 4:31.) Jeova i sanem tabu spirit blong hem blong mekem tingting blong olgeta i strong nao oli no fraet blong toktok. Spirit blong God i save mekem sem mak long yumi. ?Olsem wanem yumi save kasem spirit blong God? ?Olsem wanem yumi save letem spirit ya i lidim yumi long wok blong prij?
?Olsem Wanem Blong Lanem Blong No Fraet Blong Toktok?
6, 7. ?Wanem rod ya blong kasem tabu spirit blong God? Tokbaot tu stori.
6 Wan rod blong kasem tabu spirit blong God, hemia blong askem stret long hem. Jisas i talem long ol man we oli lesin long hem, se: “Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.” (Luk 11:13) Yes, yumi mas prea oltaem from tabu spirit. Sipos yumi fraet blong joen long sam haf blong wok blong prij, olsem prij long ol rod, tekem janis blong prij, mo prij long ol stoa mo ofis, ale yumi save prea long Jeova blong askem spirit blong hem. Mo yumi save askem long hem blong i givhan long yumi blong mekem tingting blong yumi i strong, nao bambae yumi no fraet blong toktok.—1 Tes. 5:17.
7 Hemia nao samting we wan Kristin woman we nem blong hem Rosa, i mekem. * Wan dei, Rosa i stap long ples blong wok blong hem, nao wan tija blong ol pikinini we i wok wetem hem i stap ridim wan ripot blong wan narafala skul, we i tokbaot ol pikinini we ol man oli stap mekem i nogud long olgeta. Tija ya i harem nogud tumas long samting we hem i ridim, ale hem i tok strong i se: “!Man, laef tede i kam nogud olgeta!” Rosa i no wantem lusum janis ya blong prij long woman ya. ?Hem i mekem wanem blong hem i no fraet blong toktok? Rosa i talem se: “Mi prea long Jeova mo mi askem long hem blong i givim spirit blong hem blong halpem mi.” Rosa i naf blong givim wan gudfala witnes long tija ya, mo i mekem plan blong tufala i storian bakegen. Tingbaot wan narafala stori tu long saed blong wan smol gel we nem blong hem Milane. Smol gel ya i gat faef yia blong hem mo hem i laef long bigfala taon blong Niu Yok. Milane i talem se: “Bifo we mi go long skul, oltaem mi mo mama blong mi mitufala i prea long Jeova.” ?Tufala i prea from wanem? !Tufala i prea se, bambae Milane i no fraet blong stanap strong long bilif blong hem, mo talemaot trutok long saed blong God blong hem! Mama blong hem i talem se: “Hemia i givhan long Milane blong eksplenem bilif blong hem long saed blong ol lafet blong betde mo ol holide. Mo samting ya i givhan long hem blong no joen long ol lafet ya we ol fren blong hem oli mekem.” Tufala stori ya oli soemaot se prea i save givhan long yumi blong mekem tingting blong yumi i strong, nao yumi no fraet blong toktok.
8. ?Wanem samting we yumi save lanem long profet Jeremaea, long saed blong rod blong kasem fasin ya blong no fraet blong toktok?
8 Mo tu, tingbaot samting we i givhan long profet Jeremaea blong lanem blong no fraet blong toktok. Taem Jeova i jusumaot hem blong i kam wan profet long ol neson, Jeremaea i talem se: “Mi mi no save toktok, from we mi mi yangfala nomo.” (Jer. 1:4-6) Be biaen, taem Jeremaea i stap gohed blong prij, hem i toktok plante mo i toktok strong long ol man, mekem se plante long olgeta oli luk hem olsem wan man blong singaot trabol. (Jer. 38:4) Bitim 65 yia, Jeremaea i no fraet nating blong talemaot ol jajmen blong Jeova. Ol man Isrel oli save gud Jeremaea from fasin blong hem blong no fraet blong toktok, mo blong gat strong tingting long wok blong prij. Samting ya i mekem se samwe long 600 yia biaen, taem Jisas i stap prij we i no fraet nating, samfala oli ting se hem i Jeremaea we i laef bakegen. (Mat. 16:13, 14) Fastaem, profet Jeremaea i fraet blong prij long ol man, ?be olsem wanem hem i winim sem blong hem? Hem i talem se: “Ol tok blong yu i stap bon olsem faea insaed long tingting blong mi. Mi mi traem holem blong mi no talemaot, be mi no save mekem.” (Jer. 20:9) Yes, tok blong Jeova i gat bigfala paoa long tingting blong Jeremaea mo i pulum hem blong toktok.
9. ?From wanem tok blong God i save gat paoa long yumi, olsem we i gat paoa long Jeremaea?
9 Aposol Pol i raetem wan leta i go long ol Hibru Kristin, i se: “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” (Hib. 4:12) Tok blong God i save gat paoa long yumi, olsem we i gat paoa long Jeremaea. Rimemba se, nating we God i yusum ol man nomo blong oli raetem Baebol, be buk ya i no tokbaot waes blong man, nogat. God nao i putum ol tok ya long tingting blong olgeta blong oli raetem. Long 2 Pita 1:21, yumi ridim se: “I no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be Tabu Spirit i stap givim tok long olgeta, nao oli talemaot tok we i kamaot long God.” Yumi mas tekem taem blong stadi gud long Baebol, olsem nao, tingting blong yumi bambae i kam fulap long ol tok we oli kamaot long tabu spirit. (Ridim 1 Korin 2:10.) Ol tok ya oli save “bon olsem wan faea” long tingting blong yumi, ale yumi no moa save holemtaet olgeta.
10, 11. (a) ?Yumi mas stadi Baebol olsem wanem, sipos yumi wantem se yumi no fraet blong toktok? (b) ?Wanem samting we yumi save mekem, blong stadi blong yumi wan i kam gud moa?
10 Sipos yumi wantem se stadi we yumi mekem long Baebol i gat bigfala paoa long yumi, yumi mas stadi long fasin we ol save blong Baebol oli kasem hat blong yumi. Tingbaot profet Esikel. Long wan vison, hem i harem wan tok we i askem long hem blong kakae wan buk. Long buk ya, i gat ol strong tok we hem i mas go talemaot long ol man we oli no wantem lesin. Esikel i mas putum tok ya i go fulwan long hat blong hem, blong i save gat paoa long ol filing blong hem. Sipos hem i mekem olsem, bambae hem i harem se wok blong talemaot ol tok ya i wan gudfala wok, olsem we hem i kakae hani we i swit we i swit.—Ridim Esikel 2:8–3:4, 7-9.
11 Laef blong yumi tede i klosap sem mak long hemia blong Esikel bifo. Tede, plante man oli no wantem lesin long ol tok blong Baebol. Sipos yumi wantem gohed strong blong talemaot tok blong God, i impoten we yumi stadi Baebol long fasin we yumi kasem save fulwan long tok ya, mo yumi bilif long hem. Yumi mas lan blong stadi oltaem, i no wanwan taem nomo. Ol filing blong yumi oli mas olsem filing blong man ya blong raetem Ol Sam, we i singsing se: “Hae God. Yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol tingting blong mi bambae oli stret gud long fes blong yu.” (Sam 19:14) !I impoten tumas we yumi tekem taem blong tingting dip long ol tok we yumi ridim, nao ol trutok blong Baebol oli save go dip insaed long hat blong yumi! Yes, yumi mas traehad blong mekem se stadi blong yumi wan, i kam gud moa. *
12. ?Olsem wanem ol Kristin miting oli givhan blong mekem se tabu spirit i lidim yumi?
12 Wan narafala rod blong kasem tabu spirit blong Jeova, hemia se “yumi no lego ol miting,” be yumi “tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin.” (Hib. 10:24, 25) Yumi mas traehad blong joen oltaem long ol Kristin miting, yumi lesin gud, mo yumi mekem ol samting we yumi harem i wok long laef blong yumi. Hemia nao ol gudfala rod blong letem tabu spirit i lidim yumi. Blong talem stret, kongregesen nao we tabu spirit i yusum blong lidim yumi.—Revelesen 3:6.
Gudfala Samting We Yumi Kasem Taem Yumi No Fraet Blong Toktok
13. ?Wanem samting we yumi save lanem long wok blong prij we ol faswan Kristin oli mekem?
13 I no gat wan paoa long heven mo wol we i strong moa i bitim tabu spirit. Mo hem i save mekem ol man oli naf blong mekem samting we Jeova i wantem. Long paoa blong tabu spirit, ol faswan Kristin oli mekem wan bigfala wok blong prij. Oli talemaot gud nius “long olgeta man long wol.” (Kol. 1:23) Be bighaf blong olgeta oli ‘no gat nem mo oli no skul gud.’ Taswe i klia se i no hemia we i pulum olgeta blong mekem wok ya, be wan paoa we i bigwan moa i pulum olgeta.—Wok 4:13.
14. ?Wanem i save mekem se “tabu spirit i fulap” long yumi?
14 Taem yumi mekem laef blong yumi i laenap wetem samting we tabu spirit i wantem, samting ya tu i save mekem we yumi no fraet nating blong prij. Sipos yumi prea oltaem blong askem spirit blong God, yumi gohed strong blong mekem prapa Baebol stadi blong yumi, yumi prea mo tingting dip long samting we yumi ridim, mo yumi joen oltaem long ol Kristin miting, bambae “tabu spirit i fulap” long yumi. (Rom 12:11, NW) Long saed blong ‘Apolos we hem i laen blong Isrel, mo i wan gudfala man blong toktok,’ Baebol i talem se: “[“Tabu spirit i fulap long hem,” NW.] Nao oltaem hem i stap harem gud blong prij, mo blong tijim ol man long ol trutok blong Jisas.” (Wok 18:24, 25) Sipos “tabu spirit i fulap” long yumi, bambae yumi soemaot moa se yumi no fraet blong toktok taem yumi prij long ol haos wanwan, mo taem yumi tekem janis blong prij.—Rom 12:11, NW.
15. ?Taem yumi lanem blong no moa fraet blong toktok, olsem wanem yumi save kamgud long sam narafala rod tu?
15 Taem yumi lanem blong no moa fraet blong toktok long wok blong prij, samting ya bambae i mekem se yumi kamgud long sam narafala rod tu. Bambae yumi glad moa blong prij, from we yumi kasem save se wok blong yumi i impoten tumas, mo i save givhan long ol man. Bambae yumi wok wetem paoa, from we yumi glad bigwan taem yumi luk gudfala frut we i kamaot. Mo bambae yumi tingting strong moa blong prij, from we yumi luksave se yumi gat smol taem nomo i stap bifo we en i kam.
16. ?Yumi mas mekem wanem sipos yumi no moa gat strong tingting blong prij?
16 ?Be olsem wanem sipos yumi no moa gat strong tingting blong prij? ?Olsem wanem sipos yumi no moa wantem tumas blong prij? Ale yumi mas jekem gud yumi, mo yumi no mas giaman long yumi wan bakegen. Pol i raetem se: “I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot se yufala i stap holem yet fasin blong bilif, no yufala i no moa holem.” (2 Kor. 13:5) Askem ol kwestin ya: ‘?Tabu spirit i fulap long mi yet? ?Mi mi stap prea long Jeova blong askem spirit blong hem? ?Ol prea blong mi oli soemaot se mi mi dipen long paoa blong hem blong mekem samting we hem i wantem? ?Taem mi mi prea, mi talem tangkiu long God from wok ya we hem i givim long yumi? ?Olsem wanem long fasin blong mi blong stadi Baebol? ?Mi mi stap tekem hamas taem blong tingting dip long ol tok we mi ridim mo harem? ?Mi mi joen blong givim ansa long ol miting blong kongregesen?’ Sipos yu tingtinggud long ol kwestin olsem, hemia i save givhan long yu blong faenemaot wanem samting we yu yu slak long hem, ale yu save wok blong stretem samting ya.
Letem Spirit Blong God i Mekem We Yu No Fraet Blong Toktok
17, 18. (a) ?Wok blong prij we i stap gohed tede, i bigwan olsem wanem? (b) ?Wanem i save halpem yumi blong talemaot gud nius blong Kingdom blong God, we ‘tingting blong yumi i no seksek’?
17 Taem Jisas i laef bakegen, hem i talem long ol disaepol blong hem se: “Taem Tabu Spirit i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.” (Wok 1:8) Wok we i stat long taem ya i kam antap bitim mak tede. Klosap seven milian Witnes blong Jeova oli stap talemaot gud nius blong Kingdom long bitim 230 kantri mo aelan, mo oli spenem klosap wan bilian haf aoa long wan yia long wok blong prij. !I nambawan tumas blong wok strong long wok ya we bambae yumi no moa mekem bakegen long fiuja!
18 Olsem long faswan handred yia, spirit blong God i stap lidim wok blong prij we i stap gohed tede long fulwol. Sipos yumi letem spirit ya i lidim yumi, ol toktok blong yumi long wok blong prij bambae i soemaot se ‘tingting blong yumi i no seksek.’ (Wok 28:31) !Taswe, i gud we yumi letem spirit ya i lidim yumi taem yumi stap talemaot gud nius blong Kingdom blong God!
[Ol futnot]
^ par. 7 Mifala i jenisim ol nem ya.
^ par. 11 Blong yu haremgud moa long Baebol riding mo long prapa Baebol stadi blong yu, lukluk buk ya Benefit From Theocratic Ministry School Education (Tirez profit de l’École du ministère théocratique), long ol japta ya “Apply Yourself to Reading” (Appliquez-vous à la lecture”) mo “Study Is Rewarding,” (Les bienfaits de l’étude) pej 21-32.
?Yu Yu Lanem Wanem?
• ?From wanem yumi no mas fraet taem yumi talemaot tok blong God?
• ?Wanem samting i givhan long ol faswan disaepol, blong oli no fraet blong toktok?
• ?Olsem wanem yumi save kasem fasin ya blong no fraet blong toktok?
• ?Taem yumi lanem blong no moa fraet blong toktok, olsem wanem yumi save kam gud long sam narafala rod tu?
[Kwestin]
[Tok blong pija long pej 13]
?Olsem wanem ol papa mama oli save givhan long ol pikinini blong olgeta blong oli no fraet blong toktok?
[Tok blong pija long pej 15]
Wan sotfala prea i save givhan long yu blong no fraet blong toktok long wok blong prij