!Welkam Long Rod Ya We i Beswan Blong Folem Long Laef!

“Sipos yumi stap laef, bambae yumi stap laef blong yumi leftemap nem blong Masta blong yumi [“Jeova,” NW]. Mo sipos yumi ded, bambae yumi ded blong leftemap nem blong Masta blong yumi.”​—ROM 14:8.

1. ?Jisas i tijim wanem long saed blong rod we i beswan blong folem long laef?

JEOVA i wantem se yumi folem rod ya we i beswan long laef mo yumi harem gud long hem. Ol man oli save folem ol defren rod long laef, be i gat wan nomo we i beswan. I no gat wan narafala samting we yumi save mekem long laef, we i moa gud i bitim we yumi folem Tok blong God mo yumi lanem samting long eksampol blong Pikinini blong hem, Jisas Kraes. Jisas i tijim ol man blong hem se oli mas wosip long God wetem spirit mo trutok, mo hem i givim wok long olgeta blong pulum ol man oli kam disaepol blong hem. (Mat. 28:19, 20; Jon 4:24, NW) Taem yumi folem ol tok blong Jisas long laef blong yumi, yumi mekem Jeova i glad mo yumi harem gud from we Hem i blesem yumi.

2. ?Plante man long faswan handred yia oli mekem wanem taem oli harem ol tok blong Kingdom? ?I minim wanem se ol faswan disaepol oli ol man we oli folem “Rod blong Masta”?

² Taem olgeta we oli “stret blong kasem laef blong olwe” oli bilif mo oli tekem baptaes, yumi gat gudfala risen blong talem long olgeta se: “!Welkam long rod ya we i beswan blong folem long laef!” (Wok 13:48, NW) Long ol faswan handred yia K.T. * plante taosen man blong ol defdefren kantri oli bilif long trutok mo oli baptaes blong soemaot long ol man se oli givim laef blong olgeta i go finis long God. (Wok 2:41) Ol faswan disaepol ya oli ol man we oli folem “Rod blong Masta.” (Wok 9:2; 19:23) Toktok ya i stret from we olgeta ya we oli kam man blong Kraes, oli folem wan fasin blong laef we i stanap long bilif blong olgeta long Jisas Kraes, mo oli folem eksampol blong hem.​—1 Pita 2:21.

3. ?Wanem i pulum ol man blong Jeova blong tekem baptaes? ?Mo hamas man oli tekem baptaes long ol ten yia we i pas?

³ Long ol las dei, wok ya blong pulum ol man oli kam disaepol i spid moa, mo naoia i stap gohed long bitim 230 kantri long wol. Long ol ten yia we i pas, bitim 2,700,000 man oli mekem desisen blong kam man blong Jeova mo oli tekem baptaes, blong soemaot we oli givim laef blong olgeta i go long hem. !Hemia i bitim 5,000 man evri wik! Samting we i pulum wan man blong mekem desisen blong baptaes hemia  lav blong hem long God, save we hem i lanem long Baebol, mo bilif blong hem long ol samting ya we hem i lanem. Baptaes i wan mak we i impoten blong kasem long laef blong yumi, from we i makem stat blong wan gudfala fasin fren wetem Jeova. Mo tu taem yumi baptaes yumi soemaot we yumi trastem Jeova se hem bambae i halpem yumi blong stap tru long hem, olsem we hem i halpem ol man blong hem bifo blong oli wokbaot folem rod blong hem.​—Aes. 30:21.

?From Wanem Yu Mas Baptaes?

4, 5. Tokbaot sam gudfala samting we yumi kasem taem yumi baptaes.

⁴ Maet yu lanem plante samting finis long saed blong God, yu jenisim sam samting long laef blong yu, mo naoia yu wan pablisa we i no baptaes yet. I gud tumas blong luk we yu stap gohed gud olsem. ?Be olsem wanem? ?Yu yu prea finis long God blong givim laef blong yu i go long hem, mo yu yu wantem tekem baptaes? Ating long stadi blong yu long Baebol, yu yu lanem finis se samting we i mas stap fastaem long laef blong yu hemia blong presem Jeova, i no blong mekem samting we yu nomo yu wantem mo blong kasem plante sas samting. (Ridim Ol Sam 148:11-13; Luk 12:15.) ?Ale, wanem gudfala samting we yumi kasem taem yumi baptaes?

⁵ Taem yu givim laef blong yu i go long God mo yu kam wan Kristin man, yu yu yusum laef blong yu blong mekem ol samting we oli rili impoten, taswe laef blong yu i no blong nating nomo. Bambae yu glad from we yu stap mekem samting we God i wantem. (Rom 12:1, 2) Tabu spirit blong Jeova bambae i givhan long yu blong wokem ol fasin we God i laekem, olsem pis mo bilif. (Gal. 5:22, 23) God bambae i ansa long ol prea blong yu mo bambae hem i blesem traehad blong yu blong mekem laef blong yu i laenap wetem Tok blong hem. Bambae yu kasem glad long wok blong prij we yu mekem, mo from we yu laef long fasin we God i glad long hem, bambae tingting blong yu i strong moa long promes ya blong laef we i no save finis. Mo tu, taem yu givim laef blong yu i go long Jeova mo yu tekem baptaes, bambae samting ya i soemaot we yu wantem tumas blong kam wan Witnes blong Jeova.​—Aes. 43:10-12.

6. ?Taem yumi tekem baptaes, hemia i soemaot wanem long ol man?

⁶ Taem yumi givim laef blong yumi i go long God mo yumi baptaes, yumi talemaot long ol man se yumi man blong Jeova. Aposol Pol i talem se: “I no gat wan long yumi we laef blong hem i bisnes blong hem nomo, mo ded blong hem i bisnes blong hem nomo. Sipos yumi stap laef, bambae yumi stap laef blong yumi leftemap nem blong Masta blong yumi. Mo sipos yumi ded, bambae yumi ded blong yumi leftemap nem blong Masta blong yumi. Nao from samting ya, nating we yumi laef, no yumi ded, be yumi man blong Masta ya blong yumi.” (Rom 14:7, 8) Jeova i soemaot se hem i tinghae long yumi taem hem i letem yumi fri blong mekem prapa jus blong yumi. Taem yumi lavem God, yumi mekem tingting blong yumi i strong blong folem rod blong laef, mo samting ya i mekem hem i glad tumas. (Prov. 27:11) Baptaes i soemaot se yumi givim laef blong yumi i go long God, mo i soemaot long fored blong ol man se yumi jusum Jeova blong Rulum yumi. Baptaes i soemaot we yumi tekem desisen finis blong stanap long saed blong Jeova blong pruvum we hem nomo i gat raet blong rulum heven mo wol. (Wok 5:29, 32) Mo from we yumi jusum olsem, Jeova i stap wetem yumi. (Ridim Ol Sam 118:6.) Baptaes i openem rod blong yumi save kasem plante narafala blesing tu, ol blesing long saed blong wosip blong yumi naoia mo long fiuja.

Blesing Blong Stap Long Wan Bigfala Famle We i Gat Lav

7-9. (a) ?Jisas i talem wanem long olgeta we oli lego evri samting blong olgeta blong biaen long hem? (b) ?Olsem wanem promes blong Jisas we i stap long Mak 10:29, 30, i stap kamtru?

⁷ Aposol Pita i talem long Jisas se: “?Olsem wanem long mifala? Mifala i bin lego evri samting blong mifala, blong kam biaen long yu. ?Bambae mifala i kasem wanem?” (Mat. 19:27) Pita i wantem save wanem blesing we hem mo ol narafala disaepol blong Jisas oli save kasem long fiuja. Oli lego sam samting we oli impoten, blong oli save mekem wok blong Kingdom fulwan. (Mat. 4:18-22) ?Jisas i mekem wanem promes long olgeta?

⁸ Folem wanem we Mak i talem long buk we hem i raetem, Jisas i tokbaot se ol disaepol blong hem bambae oli joen long wan bigfala famle blong ol Kristin brata. Hem i talem se: “Man we i tinghevi long mi, mo long gud nius blong mi, nao hem i lego haos blong hem, no brata no sista blong hem, no papa no mama blong hem, no pikinini blong hem, no graon blong hem, hem bambae i no save sot long ol samting ya. Tru mi talem long yufala. Long wol ya, wanem samting we hem i lego, olsem haos blong  hem, no brata no sista blong hem, no mama blong hem, no pikinini blong hem, no graon blong hem, bambae hem i save kasem wan handred taem antap bakegen. Be ol man bambae oli mekem i nogud long hem tu. Be long niufala wol ya we bambae i kam, hem bambae i gat laef we i no save finis.” (Mak 10:29, 30) Long faswan handred yia, samfala Kristin olsem Lidia, Akwila, Prisila, Gaeas, mo sam narafala bakegen, oli tekem ol Kristin man oli kam stap long “haos” blong olgeta mo oli kam olsem ‘brata no sista, no papa no mama’ blong olgeta ya, olsem we Jisas i bin talem.​—Wok 16:14, 15; 18:2-4; 3 Jon 1, 5-8.

⁹ Tede, toktok blong Jisas i stap kamtru long wan fasin we i bigwan moa. “Graon” we ol man blong Kraes oli lego, hemia i minim wok blong olgeta blong kasem mane mo ol samting we oli nidim blong laef. Plante Kristin oli rere blong lego wok blong olgeta blong mekem wok blong Kingdom i gohed moa long ol narafala kantri. Samfala oli misinari, samfala oli wok long Betel, mo samfala oli mekem wok blong bildim ol haos wosip no sam narafala wok bakegen. Plante brata mo sista oli lego haos blong olgeta blong mekem laef blong olgeta i no fasfas tumas. Yumi glad tumas blong harem ol stori blong olgeta, olsem wanem Jeova i lukaot long olgeta mo olsem wanem wok blong Jeova i mekem olgeta oli glad. (Wok 20:35) I no olgeta ya nomo we oli harem gud long blesing ya blong “lukaot kingdom mo stret fasin blong [God] fastaem.” Olgeta man blong Jeova we oli baptaes, oli kasem blesing ya mo oli joen long bigfala famle ya blong ol Kristin brata long fulwol.​—Mat. 6:33, NW.

Stap Sef “Aninit Long Han Blong Hem”

10, 11. ?Stap “aninit long han” blong Jeova i minim wanem? ?Mo yumi mas mekem wanem blong stap aninit long han blong hem?

¹⁰ Wan narafala blesing we yumi kasem from we yumi givim laef blong yumi i go long God mo yumi baptaes, hemia se yumi ‘stap aninit long han blong hem, blong hem i lukaot gud long yumi.’ (Ridim Ol Sam 91:1.) Sipos yumi stap aninit long han blong Jeova i olsem we yumi haed long wan ples we i sef. Hemia wan pijatok we i min se Jeova i stap protektem yumi, i stap lukaot gud long yumi long saed blong spirit. Ol man we oli no gat tingting blong God mo oli no trastem God, oli no save long sef ples ya. Taem yumi holem promes we yumi mekem blong givim laef blong yumi i go long God, mo yumi soemaot we yumi trastem Jeova fulwan, i olsem se yumi stap talem long hem se: “Yu yu God blong mi, mo mi mi trastem yu. Yu yu stap lukaot gud long mi, mo yu  stap blokemgud mi.” (Sam 91:2) Jeova God nao we yumi lukluk i go long hem blong hem i lukaot gud long yumi. (Sam 91:9) Tru ya, i no gat wan narafala man we yumi save trastem hem olsem.

¹¹ Sipos yumi stap sef “aninit long han” blong Jeova, i minim tu se yumi kasem spesel blesing ya blong frengud wetem Jeova. Yumi kam “aninit long han” blong Jeova taem yumi givim laef blong yumi i go long Jeova mo yumi tekem baptaes. Biaen, yumi gohed blong mekem fasin fren blong yumi wetem God i kam strong moa taem yumi stadi Baebol, prea wetem fulhat blong yumi, mo obei fulwan long hem. Long rod ya, yumi kam klosap moa long hem. (Jem. 4:8) Jisas i stap klosap moa long Jeova i bitim eni narafala man. Tingting blong hem i neva hafhaf long saed blong Jeova, hem i trastem Jeova fulwan. (Jon 8:29) Taswe, yumi neva mas gat tingting we i hafhaf long saed blong Jeova mo samting we hem i wantem mekem. Mo yumi mas trastem hem fulwan se hem i naf blong halpem yumi blong holem promes we yumi mekem blong givim laef blong yumi i go long hem. (Pri. 5:4) Ol samting we God i mekem blong ol man blong hem blong oli save frengud wetem hem, oli soemaot we hem i lavem yumi tumas mo hem i wantem se yumi holemstrong long wok blong hem.

Tinghae Long Paradaes We Yumi Stap Long Hem Tede

12, 13. (a) ?Paradaes ya we yumi save stap long hem tede, i olsem wanem? (b) ?Olsem wanem yumi save halpem ol niuwan?

¹² Taem yumi givim laef blong yumi i go long Jeova mo yumi baptaes, samting ya i mekem we yumi save kasem wan narafala blesing tu. Blesing ya, se yumi save gat pis wetem God mo ol man blong hem mo yumi joengud wetem olgeta, olsem se yumi stap long wan paradaes finis. Paradaes ya i spesel from we i joen wetem wosip we man i mekem long Jeova, taswe ol man blong Jeova nomo oli harem gud long paradaes ya. (Sam 29:11; Aes. 54:13) I no gat wan samting long wol ya we i olsem paradaes ya. Yumi luksave paradaes ya long ol intenasnal asembli taem ol brata mo sista blong ol defdefren kantri, lanwis, mo laen oli kam wanples mo oli joengud, oli gat pis mo trufala lav.

¹³ Paradaes ya we yumi harem gud long hem tede i defren olgeta long wol ya mo ol rabis fasin blong hem. (Ridim Aesea 65:13, 14.) Taem yumi talemaot ol tok long saed blong Kingdom, yumi gat nambawan wok ya blong singaot ol narafala oli kam insaed long paradaes ya. Mo wan narafala blesing we yumi kasem hemia se yumi save halpem ol niuwan we oli jes joen long kongregesen mo we oli nidim man blong trenem olgeta long wok blong prij. Maet ol elda oli askem long yumi blong mekem nambawan wok ya blong halpem sam niuwan long kongregesen, olsem Akwila mo Prisila oli mekem taem oli “talemaot Rod blong God i klia moa” long Apolos.​—Wok 18:24-26.

Gohed Blong Lanem Samting Long Eksampol Blong Jisas

14, 15. ?Wanem ol gudfala risen we oli mekem se yumi mas gohed blong lanem samting long eksampol blong Jisas?

¹⁴ I gat ol gudfala risen from wanem yumi mas gohed blong lanem samting long eksampol blong Jisas. Bifo we Jisas i kam long wol, hem i wok plante plante yia wetem Papa blong hem long heven. (Prov. 8:22, 30) Hem i save se rod we i beswan blong folem long laef, hemia blong putum wosip blong Jeova i stap long faswan ples long laef blong hem, mo talemaot trutok long ol man. (Jon 18:37) Jisas i save se sipos hem i folem wan narafala rod long laef blong hem, bambae hem i stap mekem samting we hem nomo i wantem, mo i no stap tingbaot fiuja blong hem. Hem i save se bambae i gat sam samting we oli traem hem bigwan mo bambae ol man oli kilim hem i ded. (Mat. 20:18, 19; Hib. 4:15) Hem i Man ya we i givim Eksampol long yumi, hem i tijim yumi olsem wanem blong holemstrong long God.

¹⁵ I no longtaem afta we Jisas i baptaes, Setan i traem pulum Jisas blong lego rod ya we i beswan blong folem long laef. Be Setan i no save winim hem. (Mat. 4:1-11) Samting ya i tijim yumi se nomata wanem samting Setan i mekem long yumi, yumi save holemstrong long God. Ating Setan i stap traehad moa blong traem olgeta we oli wantem kasem mak blong baptaes, wetem olgeta we oli baptaes i no longtaem. (1 Pita 5:8) Maet sam famle blong yumi oli agensem yumi from we oli harem sam giaman stori long saed blong ol Witnes blong Jeova, ale oli wantem protektem yumi long ol Witnes. Ol traem ya oli givim janis long yumi blong soemaot we yumi gat ol gudfala fasin blong Kristin man, olsem respek mo fasin blong toktok gud long ol narafala, taem yumi ansa long kwestin blong olgeta mo talemaot trutok long olgeta. (1 Pita 3:15) Samting we yumi mekem taem yumi kasem fasin agens i save pulum ol narafala we oli lesin long yumi blong wantem save moa long saed blong trutok.​—1 Tim. 4:16.

 !Oltaem Tingting Blong Yu i Mas Strong Blong Folem Rod Ya We i Beswan!

16, 17. (a) ?Dutronome 30:19, 20 i tokbaot wanem trifala samting we yumi mas mekem blong kasem laef? (b) ?Olsem wanem Jisas, Jon, mo Pol oli soemaot we oli agri wetem wanem we Moses i talem?

¹⁶ Samwe 1,500 yia bifo we Jisas i kam long wol, Moses i pulum ol man Isrel blong jusumaot rod we i beswan blong folem long laef long taem ya. Hem i se: “Mi mi singaot heven mo wol, blong tufala ya nao bambae i witnes blong mi, we mi talem long yufala se yufala i mas jus. !Mi mi wantem tumas blong yufala i jusumaot laef! Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. (Dut. 30:19, 20) Ol man Isrel oli no stap tru long God. Be trifala samting ya we Moses i talem se man i mas mekem blong kasem laef, trifala i no jenis. Jisas, mo sam narafala tu, oli talemaot trifala samting ya bakegen.

¹⁷ Faswan samting se, ‘yumi mas lavem Hae God’ Jeova. Yumi soemaot we yumi lavem God taem yumi mekem laef blong yumi i laenap wetem ol fasin blong hem we oli stret gud. (Mat. 22:37) Seken samting se, ‘yumi mas obei long hem.’ Yumi mekem samting ya taem yumi stadi long Tok blong God mo yumi obei long ol loa blong hem. (1 Jon 5:3) Hemia i min se yumi mas stap oltaem long ol Kristin miting tu. Long ol miting ya, yumi harem ol tok blong Baebol. (Hib. 10:23-25) Namba tri samting se, ‘tingting blong yumi i mas strong long’ Jeova. Nomata wanem trabol i kasem yumi, yumi mas soemaot we yumi bilif strong long God, mo yumi biaen long Pikinini blong hem.​—2 Kor. 4:16-18.

18. (a) ?Long 1914, Wajtaoa i tokbaot trutok se i olsem wanem? (b) ?Wanem filing we yumi mas gat long saed blong laet blong trutok tede?

¹⁸ !Tru ya, i wan blesing long yumi blong mekem laef blong yumi i laenap wetem trutok long Baebol! Long 1914, i gat wan impoten toktok we i kamaot long Wajtaoa long Inglis, i se: “Yumi ol man we God i blesem yumi bigwan, mo yumi glad. God blong yumi i no save lego yumi. Sipos eniman i save wan samting we i gud moa long hemia, hem i save folem. Sipos i gat wan long yufala we i faenem wan laef we i gud moa, mifala i wantem we bambae yufala i talem long mifala tu. Be yumi no save wan laef we i gud moa no we i klosap long wanem we yumi faenem long Tok blong God. . . . Ol save we i kam klia long saed blong trufala God i karem plante blesing long yumi, mo i mekem se yumi gat pis mo glad long tingting mo laef blong yumi. I no gat tok we i naf blong eksplenem ol gudfala frut ya blong save blong God, from we oli nambawan tumas. Baebol i talemaot Waes, Stret Fasin, Paoa, mo Lav blong God, long wan rod we i kasem gud samting we tingting mo hat blong yumi i wantem. Yumi no moa lukaot wan narafala rod bakegen. Samting we yumi wantem mekem moa i bitim ol narafala samting, hemia blong mekem ol nambawan Tok blong Baebol oli kam klia moa long tingting blong yumi.” (Wajtaoa, Disemba 15, 1914, pej 377-378) Tingting blong yumi long saed blong trutok mo ol save blong God we i olsem laet, i no jenis. Yumi stap gohed blong tinghae long ol save ya. Tru, tede yumi gat plante moa risen blong stap glad we yumi “wokbaot long delaet ya we Hae God i stap givim.”​—Aes. 2:5; Sam 43:3; Prov. 4:18.

19. ?From wanem olgeta we oli naf blong baptaes, oli no mas wet?

¹⁹ Sipos yu wantem “wokbaot long delaet ya we Hae God i stap givim” be yu yu no givim laef blong yu i go long Jeova yet mo yu no baptaes yet, yu no mas wet. Yu mas mekem olgeta samting we Baebol i talem, blong yu kasem mak ya blong baptaes. Hemia nao beswan rod blong soemaot we yu tinghevi long samting we God mo Kraes tufala i mekem blong yu. Yu save givim long Jeova beswan samting we yu gat, hemia laef blong yu. Yu save soemaot long God se yu wantem mekem samting we hem i wantem, taem yu biaen long Pikinini blong hem. (2 Kor. 5:14, 15) !Tru ya, yumi save sua fulwan se hemia nao rod we i beswan blong folem long laef!

[Futnot]

?Bambae Yu Yu Ansa Olsem Wanem?

• ?Baptaes i soemaot se yu mekem wanem samting?

• ?Taem man i givim laef blong hem i go long God mo i baptaes, wanem ol blesing we hem i kasem?

• ?From wanem i impoten tumas we yumi lanem samting long eksampol blong Jisas?

• ?Wanem bambae i givhan long yumi, blong yumi strong oltaem blong folem rod ya we i beswan?

[Kwestin]

[Tok blong pija long pej 28]

?Yu yu stap “aninit long han” blong God?