Ol Stamba Rod Blong Mekem Famle i Hapi

Joengud Wetem Papa Mo Mama Blong Hasban No Waef Blong Yu

Jenny * i talem se: Mama blong Ryan i no sem nating blong talem stret long mi se hem i no laekem mi. Mo sem samting olsem i hapen long Ryan tu, taem mitufala i visitim papa mama blong mi. !Blong talem stret, mi neva luk papa mama blong mi, tufala i mekem fasin olsem long wan man! Mitufala i faenem i had taem we mitufala i wantem go visitim papa mama blong mitufala.

Ryan i talem se: Tingting blong mama blong mi se, i no gat wan man we i gud inaf long ol pikinini blong hem, ale, hem i mekem ol samting blong soemaot se hem i no laekem Jenny nating, stat long taem we mitufala i fren. Mo papa mama blong Jenny tufala i mekem i sem mak long mi tu. Oltaem tufala i daonem mi. Problem we i kamaot afta, hemia se, mi mo Jenny mitufala i traem blong tekem saed blong papa mama blong mitufala, mekem se mitufala i agensem mitufala bakegen.

PROBLEM wetem papa mo mama blong hasban no waef blong yu, i no olsem ol fani stori long televisin we oli samting blong laf nomo. Reena, wan woman long India, i talem se: “Blong plante yia, mama blong hasban blong mi i stap pusum nus blong hem long bisnes blong mitufala. From we mi no save tok kros long mama blong hem, plante taem mi tok kros long hasban blong mi. I luk olsem se oltaem, hasban blong mi i mas jusum se bambae hem i mekem wok blong hem olsem hasban we i tingbaot mi, no bambae i mekem wok blong pikinini we i mas obei long papa mama blong hem.”

?From wanem sam papa mama oli wantem pusum nus blong olgeta long mared laef blong ol pikinini blong olgeta? Jenny, we yumi tokbaot long stat blong haf ya, i talem wan risen se: “Maet i had long olgeta blong tingbaot se wan yangfala i naf blong mekem wok ya blong lukaot long pikinini boe no pikinini gel blong olgeta.” Hasban blong Reena, nem blong hem Dilip, i talem narafala risen se: “Wan papa mama we tufala i mekem mo givim plante samting long ol pikinini blong tufala, maet tufala i harem se taem pikinini i mared, i olsem we hem i no moa tinghae long tufala. Tufala i save wari bigwan se boe no gel blong tufala i no waes inaf blong mekem se mared blong hem i rongud.”

Blong talem stret, samtaem hasban mo waef nao tufala i pulum papa mama blong i joen insaed long mared laef blong tufala. Eksampol, tingbaot Michael mo waef blong hem Leanne, blong Ostrelia. Michael i talem se: “Leanne i gruap long wan famle we olgeta evriwan oli glad blong tokbaot ol desisen tugeta. Afta we mitufala i mared, taem i gat sam desisen we mitufala i wantem mekem, Leanne bambae i go luk papa blong hem blong tokbaot ol desisen ya. !Papa blong hem i gat plante gudfala tingting blong serem wetem mitufala, be mi mi harem nogud tumas we Leanne i go luk papa blong hem i bitim we hem i kam luk mi!”

 I klia se taem papa mama i joen insaed long bisnes blong pikinini blong tufala we i mared finis, i save gat trabol. ?Olsem wanem long yu? ?Yu tu yu fesem wan samting olsem? ?Yu yu soemaot wanem fasin long papa mama blong hasban no waef blong yu? ?Mo hasban no waef blong yu i soemaot wanem fasin long papa mama blong yu? Tingbaot tu problem we yu save fesem, mo wanem samting we yu save mekem blong winim problem olsem.

PROBLEM 1: Hasban no waef blong yu i tingbaot moa papa mama blong hem i bitim yu. Wan man Spen we nem blong hem Luis i talem se: “Waef blong mi i harem olsem se sipos mitufala i no laef klosap long papa mama blong hem, i olsem we hem i no laekem tufala.” Mo hem i gohed i se: “Be samting we i narakaen, hemia se taem boe blong mitufala i bon, mo papa mama blong mi, tufala i kam visitim mitufala, klosap evri dei, waef blong mi i harem nogud tumas. Samting ya i mekem mitufala i raorao plante taem.”

Impoten samting blong tingbaot: Long saed blong mared, Baebol i talem se taem wan man i mared, hem “i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.” (Jenesis 2:24) Kam olsem “wan bodi” i no minim nomo se tufala i laef tugeta. Be i minim se hasban mo waef tufala i mekem wan niufala famle. Yes, famle ya i no sem mak long faswan famle blong tufala, taem tufala i no mared yet. (1 Korin 11:3) I tru se, wan hasban no waef i mas ona yet long papa mo mama blong hem, mo samtaem hem i mas lukaot long tufala tu. (Efesas 6:2) ?Olsem wanem sipos hasban no waef blong yu i tingbaot moa papa mama blong hem i bitim we i tingbaot yu, nao samting ya i mekem yu yu harem nogud?

Samting we yu save mekem: Tingting gud long samting ya. ?I rili tru se hasban no waef blong yu i tingbaot moa papa mama blong hem i bitim yu? ?No maet yu no kasem save long hem, from we yu yu no fren wetem papa mama blong yu olsem we hem i fren wetem papa mama blong hem? Sipos hemia nao problem blong yu, ?yu ting se maet tingting we yu yu gat long saed ya i kamaot from we yu yu gruap long wan famle we i defren long hemia blong hasban no waef blong yu? ?Maet yu harem nogud from we yu jalus smol?—Ol Proveb 14:30; 1 Korin 13:4; Galesia 5:26.

I impoten we yu jekemgud yu wan, nao yu ansa long ol kwestin ya. Blong talem stret, sipos yu luk se oltaem yutufala i stap raorao long saed blong papa mama blong hasban no waef blong yu, hemia i soemaot se i gat wan problem long mared blong yutufala. Problem i no stap long papa mama blong hasban no waef blong yu.

Plante problem long mared oli kamaot from we hasban mo waef, tufala i no gat sem tingting long saed blong sam samting. ?Olsem wanem long yu? ?Yu yu stap traehad blong kasem save tingting blong hasban no waef blong yu? (Filipae 2:4; 4:5) Hemia nao samting we wan man Meksiko we nem blong hem Adrián i mekem. Hem i talem se: “Waef blong mi i gruap long wan famle we oli no mekem i gud long hem nating, ale, mi no wantem we mitufala i stap joen plante wetem papa mama blong hem. Sloslo mi no moa wantem joen wetem olgeta nating. Mi mekem olsem blong plante yia. Samting ya i mekem se problem i kamaot long mared blong mitufala, from we waef blong mi i wantem yet blong stap klosap long famle blong hem, speseli mama blong hem.”

Sam taem i pas, nao Adrián i skelemgud bisnes ya. Hem i talem se: “Mi save se waef blong mi i harem nogud long filing blong hem taem hem i joen plante wetem papa mama blong hem, be mi save tu se sipos hem i no joen nating wetem tufala, bambae hem i harem nogud tu. Taswe, mi rili traehad blong mekem se  mitufala i gat wan gudfala fasin fren wetem papa mama blong waef blong mi.” *

TRAEM MEKEM OLSEM: Yu mo hasban no waef blong yu, yutufala i raetemdaon wanem we yutufala i ting se i stap mekem yutufala i raorao long saed blong papa mama blong yutufala. I gud yu traem statem olsem, “Tingting blong mi se . . . ” Biaen, givim pepa blong yu long hasban no waef blong yu, mo hem bambae i givim blong hem long yu. Yutufala i mas gat tingting ya blong wok tugeta long problem ya. Ale, yutufala i traem tingbaot sam niufala rod we oli save givhan long yutufala wanwan blong kasem save long tingting blong narawan.

PROBLEM 2: Papa mama blong hasban no waef blong yu, tufala i wantem stap insaed long mared laef blong yutufala, tufala i stap givim ol advaes we yutufala i no askem nating. Nelya, we i wan woman long Kazakhstan, i talem se: “Afta we mitufala i mared, mitufala i stap seven yia wetem famle blong hasban blong mi. I gat raorao oltaem long saed blong olsem wanem blong lukaot long ol pikinini blong mitufala, mo long saed blong kuk mo klinim haos. Mi toktok long hasban blong mi mo long mama blong hem long saed ya, be hemia i mekem problem i go moa nogud.”

Impoten samting blong tingbaot: Taem yu yu mared, yu no moa stap aninit long papa mo mama blong yu. Defren olgeta, Baebol i talem se: “Kraes, hem i hed blong man, mo man, hem i hed blong woman blong hem.” Hemia i min se hasban i hed blong waef blong hem. (1 Korin 11:3) I tru, olsem yumi tokbaot finis, hasban mo waef tugeta i mas ona long papa mo mama blong tufala. Ol Proveb 23:22 (NW) i talem se: “Yu mas lesin long ol tok blong stret papa blong yu, mo yu no mas daonem mama blong yu from we hem i kam olfala.” ?Be olsem wanem sipos papa mama blong yu no blong hasban no waef blong yu, tufala i wantem bos mo tekem desisen long laef blong yutufala?

Samting we yu save mekem: Yu mas traehad blong luksave mo kasem save wanem tingting i pusum tufala blong mekem olsem. Ryan, we yumi tokbaot hem finis, i talem se: “Samtaem papa mama tufala i rili wantem save sipos tufala i impoten yet long laef blong ol pikinini blong tufala.” Maet tufala i no luksave mo tufala i no minim blong bos long laef blong pikinini blong tufala. Yu save winim problem ya taem yu mekem advaes blong Baebol i wok long laef blong yu. Advaes ya se yumi mas gohed blong ‘givgivhan long yumi, mo taem wan long yumi i gat sam poen agens long narawan, tufala ya i mas fofogivim tufala.’ (Kolosi 3:13) ?Be olsem wanem sipos fasin ya we papa mama blong hasban no waef blong yu, tufala i pusum nus long mared blong yutufala, i kam wan problem we yutufala i stap raorao oltaem from?

Sam hasban mo waef oli agri tugeta long sam samting we oli no save letem papa mama blong olgeta oli pusum nus blong olgeta insaed long hem. Sipos yu mekem olsem, i no min se yu putum loa long papa mama blong yu. Nogat. * Plante taem, yu save soemaot nomo long ol fasin blong yu se yu tingbaot hasban no waef blong yu fastaem long ol narafala. Wan man Japan, we nem blong hem Masayuki, i talem se: “Sipos papa mama blong yu, tufala i wantem givim wan advaes, yu no mas agri kwiktaem nomo. Yu mas tingbaot se yu yu stap bildim wan niufala famle. Taswe, fastaem yu mas askem tingting blong waef no hasban blong yu long saed blong advaes ya.”

TRAEM MEKEM OLSEM: Tokbaot wetem hasban no waef blong yu, sam problem we yutufala i stap kasem, from we papa mama blong yu no blong hem, tufala i pusum nus blong tufala insaed long mared laef blong yutufala. Yutufala tugeta i save raetemdaon sam rul we bambae yutufala i folem long saed blong papa mama blong yutufala. Mo tu, yutufala i save raetemdaon wanem rod blong holemstrong long ol rul ya, we long semtaem yutufala i soem ona yet long papa mama blong yutufala.

Yu no save gat plante tumas problem wetem papa mama blong hasban no waef blong yu, sipos yu traehad blong kasem save long tingting blong tufala, mo sipos yu traehad tu blong no letem ol problem olsem oli seraotem yu mo hasban no waef blong yu. Long saed ya, Jenny i talem se: “Taem mitufala i storebaot papa mama blong mitufala, kwiktaem nomo ol storian ya oli save mekem rao i kamaot. Mitufala i luksave se sipos mitufala i stap tokbaot ol mastik blong papa mama blong mitufala, mitufala i save spolem mitufala bigwan. Naoia, mitufala wanwan i lanem blong no moa tokbaot mastik blong papa mama blong narawan, jes blong mekem narawan ya i harem nogud. Defren olgeta, mitufala i lanem blong stretem gud ol problem. From samting ya, mitufala i kam moa klosap long mitufala olsem hasban mo waef.”

[Ol futnot]

TRAEM ASKEM SE . . .

▪ ?Wanem ol gudfala fasin blong papa mama blong hasban no waef blong mi?

▪ ?Olsem wanem mi save soem ona long papa mama blong mi, mo long semtaem mi no fogetem hasban no waef blong mi?