Samting We Yumi Lanem Long Jisas

Long Saed Blong Trufala Wosip

?God i agri long olgeta kaen wosip?

▪ Jisas i sore long ol man we giaman skul i lidim olgeta oli gorong. Hem i givim woning long saed blong ‘ol giaman profet we oli kam we oli kwaet olsem sipsip nomo, be fasin blong olgeta, oli olsem wael dog stret.’ (Matiu 7:15) ?Yu yu luk finis we sam man oli yusum jos blong haedem ol nogud samting we oli mekem?

Jisas i talem long prea we hem i mekem i go long God, se: “Tok blong yu i tru olgeta.” (Jon 17:17) Taswe God i no agri long wosip we i agensem trutok blong Baebol. Jisas i talemaot tok blong God long sam lida blong skul we oli gat tu fes, se: “Oli stap mekem wosip long mi blong nating nomo, from we taem oli tijim ol man, oli talem se tok ya i blong mi, be i tingting blong man nomo.”—Matiu 15:9.

?I gat wan trufala skul?

▪ Taem Jisas i luk woman Sameria we giaman skul i lidim hem i gorong, hem i talem long hem se: ‘Yufala i stap mekem wosip long God, we yufala i no save hem. . . . ol man we oli stap mekem wosip long Papa blong yumi, oli save mekem long fasin we oli savegud se hem i tru God [“Ol man blong mekem trufala wosip, bambae oli mekem wosip long Papa blong yumi long spirit mo trutok,” NW]. Fasin ya nao, Papa blong yumi i wantem blong yumi mekem wosip long hem.’ (Jon 4:22, 23) I klia nomo se, yumi save faenem trufala wosip.

Jisas i talem se: “Yufala i save we mi mi no mekem wan samting nating mi wan. Mi mi stap talemaot ol samting ya nomo we Papa blong mi i tijim mi finis long hem.” Yes, Jisas i save se jos we hem i tijim ol man long hem, hemia nao jos we i tru wan. (Jon 8:28) From samting ya, hem i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Ol man we oli mekem trufala wosip oli folem wan rod nomo blong wosipim Papa Jeova. Ale, from samting ya oli mas joengud long wan trufala skul.

 ?Olsem wanem yu save luksave ol man we oli mekem trufala wosip?

▪ Wan Kristin i wan man we i folem Jisas Kraes. Tingbaot fo rod blong folem eksampol blong Jisas. Taem man i folem olgeta, bambae samting ya i makemaot hem klia, se hem i man blong Jisas.

1. Jisas i prea long Jeova se: “Mi mi stap talemaot nem blong yu long olgeta.” (Jon 17:6) Ol trufala Kristin oli gohed yet blong mekem olsem.

2. Jisas i go talemaot Kingdom blong Jeova, mo i sanem ol disaepol blong hem blong oli go long ol haos wanwan blong mekem semfala samting. Hem i talem se: “Taem yufala i go long wan taon no wan vilej, yufala i mas faenem wan gudfala man we i glad blong yufala i go stap wetem hem.” Biaen, hem i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi.” (Matiu 10:7, 11; 28:19) Tede, i isi nomo blong luksave ol trufala Kristin, from we oli gohed blong mekem semfala wok ya.

3. Jisas i no wantem joen nating long ol bisnes blong politik. Taswe, hem i tokbaot ol man blong hem, se: “Oli no man blong wol, olsem we mi mi no man blong wol.” (Jon 17:14) Ol man oli mas save se ol man we oli mekem trufala wosip oli no joen nating long politik.

4. Jisas i soemaot lav blong hem taem hem i rere nomo blong lego ol samting we hem i wantem, blong givhan long ol narafala. Hem i talem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Ol trufala Kristin oli keagud long ol brata sista blong olgeta mo oli no joen nating long ol faet.

?Olsem wanem trufala wosip i save givhan long yu?

▪ Yu mas kasem save long Jeova fastaem, blong yu save joen long trufala wosip. Save blong God bambae i halpem yu blong folem beswan rod blong laef mo bambae i mekem se yu lavem God long ful hat blong yu. Jeova i promes se ol man we oli lavem hem bambae oli laef gogo i no save finis. Taswe, Jisas i talem se: “Laef ya hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

Blong save moa long saed ya, lukluk cjapta 15 blong buk ya, ?Wanem Samting We Baebol i Rili Tijim? ol Witnes blong Jeova oli wokem buk ya.

[Tok blong pija long pej 8]

“Yufala i mas lukaot long ol giaman profet, blong oli no kam spolem yufala. Olgeta ya oli save kam long yufala, we oli kwaet olsem sipsip nomo, be fasin blong olgeta, oli olsem wael dog stret.”—Matiu 7:15