Sipos Tabu Spirit i Stap Lidim Yu, Bambae Yu Holem Promes Blong Yu
Sipos Tabu Spirit i Stap Lidim Yu, Bambae Yu Holem Promes Blong Yu
‘Mi mi talem long yufala, sipos tabu spirit i stap lidim yufala, bambae yufala i no save mekem ol samting ya we tingting blong yufala nomo i wantem.’—GAL. 5:16.
1. ?Long dei blong Pentekos, wanem baptaes we ol man oli mekem?
LONG dei blong Pentekos long yia 33 K.T., ol man blong Jisas oli baptaes long tabu spirit, nao oli save toktok long ol naranarafala lanwis. Fasin ya we oli save toktok long narafala lanwis i wan paoa, no presen, we spirit ya i givim long olgeta. (1 Kor. 12:4-10) ?Wanem i kamaot from presen ya, mo from tok we aposol Pita i givim? Plante man oli harem we samting ya “i stikimgud olgeta.” Ale oli folem toktok blong Pita, oli tanem tingting blong olgeta from ol sin blong olgeta mo oli baptaes. Stori ya we i stap long Baebol i talem se: “Olgeta we oli bilif long tok blong hem, oli baptaes. Mo long dei ya, samwe long tri taosen man oli joen long grup blong olgeta.” (Wok 2:22, 36-41) Ol man ya oli baptaes long wota long nem blong Papa, long nem blong Pikinini, mo long nem blong tabu spirit, olsem we Jisas i bin talem long ol man blong hem blong mekem.—Mat. 28:19.
2, 3. (a) ?Olsem wanem baptaes long tabu spirit i defren long baptaes long nem blong tabu spirit? (b) ?From wanem olgeta Kristin tede oli mas baptaes long wota?
2 ?Olsem wanem? ?Baptaes long tabu spirit, hem i defren long baptaes long nem blong tabu spirit? Yes, tufala i defren. Ol man we oli baptaes long tabu spirit, oli bon bakegen blong kam pikinini blong God. (Jon 3:3) Tabu spirit i makemaot olgeta blong oli joen wetem Kraes long wok blong king, mo bambae oli wok aninit long hem olsem ol pris long Kingdom blong God long heven. Mo tu, oli joen wetem Kraes olsem wan bodi nomo. (1 Kor. 12:13; Gal. 3:27; Rev. 20:6) Taswe taem Jeova i jusum ol man blong oli rul wetem Kraes stat long dei blong Pentekos i go, hem i baptaesem olgeta long tabu spirit. (Rom 8:15-17) ?Be olsem wanem taem man i baptaes long wota long nem blong tabu spirit? Baptaes ya nao we ol man blong Jeova oli mekem plante taem long ol asembli tede.
3 Baptaes long wota hem i wan samting we olgeta trufala Kristin oli mas mekem. Hem i wan saen we i soem se oli givim ful laef blong olgeta i go long Jeova God. Olgeta we God i jusum olgeta blong go long heven oli mas tekem baptaes long wota. Olgeta milian man mo woman tede we oli gat hop blong laef olwe long wol ya, olgeta tu oli mas baptaes long wota. Nating se man i gat hop blong laef long heven no long wol, be hem i mas baptaes long wota long nem blong Papa, long nem blong Pikinini, mo long nem blong tabu spirit. Hemia wan impoten samting we man i mas mekem blong bambae God i save agri long hem. Olgeta Kristin evriwan we oli baptaes olsem, oli mas letem ‘tabu spirit i lidim olgeta’ oltaem. (Ridim Galesia 5:16.) ?Yu yu stap letem tabu spirit i lidim yu? Sipos yu mekem olsem, bambae yu holem promes we yu mekem blong givim laef blong yu long God.
‘Tabu Spirit i Lidim’ Yu —?Hemia i Minim Wanem?
4. ?Wanem mining blong tok ya se ‘tabu spirit i lidim’ yumi?
4 Taem ‘tabu spirit i lidim’ yumi, i min se yumi agri we tabu spirit i wok long laef blong yumi, mo yumi letem tabu spirit ya i gat paoa long yumi. Olsem nao, long evri ples we yumi go long hem mo nomata wanem samting we yumi mekem, yumi mekem ol samting we oli laenap wetem tabu spirit. Galesia japta 5 i soemaot i klia, olsem wanem man we tabu spirit i stap lidim hem, hem i defren long man we i letem ol samting we tingting blong hem nomo i wantem, i lidim hem.—Ridim Galesia 5:17, 18.
5. ?Sipos yumi letem tabu spirit i gat paoa long yumi, bambae yumi no save mekem wanem samting?
5 Sipos yumi letem tabu spirit i gat paoa long yumi, bambae yumi no save mekem ol rabis samting we tingting blong yumi nomo i wantem. Ol rabis samting ya hemia ol fasin olsem ‘mekem nogud wetem woman, mekem ol samting blong sem mo ol samting we oli nogud olgeta, prea long ol narafala god, mekem ol bisnes blong posen mo kleva, kam enemi, faet, jalus, kros, leftemap yumi wan nomo, rao oltaem, seraot, wantem kasem mak blong narafala man, dring we i lusum hed, mo mekem lafet blong mekem nogud nomo.’ (Gal. 5:19-21) Yes, i olsem we yumi yusum ‘paoa blong tabu spirit blong kilimaot ol rabis fasin ya we i kamaot long tingting blong yumi.’ (Rom 8:5, 13) Samting ya i givhan long yumi blong putum tingting blong yumi i stap long ol gudfala fasin we oli kamaot long tabu spirit. Ale yumi letem tabu spirit i lidim yumi, i bitim we yumi letem ol rabis fasin we tingting blong yumi nomo i wantem, oli bos long yumi.
6. Talem wan pijatok blong soem olsem wanem blong karem frut blong spirit.
6 Taem tabu spirit i wok long laef blong yu, bambae yu soemaot moa ol fasin blong God, ol fasin ya hemia “frut blong spirit.” (Gal. 5:22, 23, NW) Be ating yu luksave se blong gat ol fasin ya, yu tu yu mas traehad. Tingbaot pijatok blong wan fama we i wokem garen blong hem. Fama ya i nidim san mo wota, blong mekem we ol kakae we hem i planem long garen blong hem, oli karem frut. Tabu spirit i mekem wok olsem san long pijatok ya. Tabu spirit nao bambae i mekem we yumi karem frut blong spirit. ?Be olsem wanem sipos fama i no mekem wan wok long garen blong hem? Sipos hem i les, bambae hem i no save karem gudfala frut. (Prov. 10:4) Yes, hat blong yu hem i olsem garen long pijatok ya. Fasin blong yu blong traehad blong wokem ol gudfala fasin long hat blong yu, bambae i mekem we yu karem plante moa frut blong spirit mo ol frut ya bambae oli gud moa. Taswe yu mas tingbaot se: ‘?Mi mi stap wok wetem tabu spirit? ?Mi stap letem hem i wokem frut blong hem long laef blong mi?’
7. ?Sipos yu wantem wokem frut blong tabu spirit, from wanem i impoten blong stadi mo tingting dip?
7 Wan fama i mas wotarem garen blong hem tu sipos hem i wantem we garen ya i gru gud. Wota i olsem trutok we i stap long Baebol mo we yumi stap kasem long Kristin kongregesen tede. Sipos yu wantem karem frut blong spirit, yu mas tekem wota ya. (Aes. 55:1) Yu yu save finis se Jeova i yusum tabu spirit blong pulum ol man blong oli raetem Baebol. (2 Tim. 3:16) Mo yu save tu se, slef we i stret mo waes i givim plante save blong halpem yumi blong kasem save long ol trutok blong Baebol we oli olsem klin wota. (Mat. 24:45-47, NW) Ol samting ya oli soemaot klia nomo se sipos yumi wantem we tabu spirit i gat paoa long yumi, yumi mas ridim Tok blong God mo tingting dip long hem. Sipos yu stap mekem olsem, yu stap folem fasin blong ol profet bifo we oli stap ‘lukaot rod mo oli stap askem kwestin’ blong save moa long saed blong ol save blong God. I gud blong tingbaot se ol enjel tu oli wantem tumas blong save ol trutok long saed blong Sid ya we God i promes blong sanem i kam, mo long saed blong Kristin kongregesen we tabu spirit i makemaot hem.—1 Pita 1:10-12.
?Olsem Wanem Blong Letem Tabu Spirit i Gat Paoa Long Yu?
8. ?From wanem yu mas askem Jeova blong i givim tabu spirit blong hem long yu?
8 Yumi no mas ting se sipos yumi stadi Baebol mo tingting dip long hem, ale wantaem nomo bambae tabu spirit i gat paoa long laef blong yumi. Yumi mas gohed tu blong askem long Jeova blong i halpem yumi mo lidim yumi. Jeova “i save mekem ol bigbigfala wok long laef blong yumi we i bitim mak olgeta, mo i antap moa long olgeta samting we yumi stap askem long hem, mo we yumi stap tingbaot.” (Efes. 3:20; Luk 11:13) Be wanem ansa we bambae yu givim sipos wan man i talem long yu se, “?Sipos God i ‘save finis ol samting we yumi sot long hem’ taem we yumi no askem ol samting ya yet long hem, ale from wanem mi mas gohed blong askem samting long hem?” (Mat. 6:8) Tingbaot se, taem yumi prea long God blong i givim tabu spirit blong hem long yumi, yumi soem se yumi trastem Jeova blong i halpem yumi. I sem mak olsem sipos wan man i kam askem yu blong yu givhan long hem. Bambae yu traem bes blong yu blong halpem hem, from we yu tingbaot se sipos hem i kam luk yu, hemia i min se hem i trastem yu. (Skelem wetem Ol Proveb 3:27.) Jeova tu i glad tumas taem yu askem tabu spirit blong hem, ale bambae hem i mas givim tabu spirit long yu.—Prov. 15:8.
9. ?Olsem wanem ol Kristin miting oli save halpem yu blong yu letem tabu spirit i gat paoa long yu?
9 Wan narafala rod blong letem tabu spirit i gat paoa long yu, hemia taem yu kam long ol miting mo ol asembli blong yumi. I gud yu traehad blong stap long olgeta miting mo asembli ya. Mo i gud yu traehad tu blong lesingud long ol tok we oli kamaot. Samting ya i impoten tumas from we i save halpem yu blong kasem save ol “tingting blong God we man i no save faenemaot.” (1 Kor. 2:10) Mo tu, yu save kasem plante gudfala samting sipos yu traehad oltaem blong givim ansa long miting. Traem tingtingbak long ol miting we yu kam long hem long ol fo wik we oli jes pas. ?Hamas taem we yu leftemap han blong yu blong traem givim wan ansa blong talemaot bilif blong yu? ?Yu luk se maet yu mas traem blong kam gud moa long saed ya? Sipos hemia wan samting we yu mas kam gud moa long hem, ale putum mak se bambae yu traem mekem olsem long ol wik we oli kam. Taem yu rili wantem givim ansa long miting, Jeova bambae i luk samting ya mo bambae hem i givim tabu spirit blong halpem yu. Ale bambae yu harem se ol miting oli givhan moa long yu.
10. ?Taem tabu spirit i lidim yumi, bambae yumi singaot ol man blong oli mekem wanem?
10 Taem tabu spirit i lidim yumi, bambae yumi folem tok ya we i stap long Revelesen 22:17 we i se: ‘Tabu spirit wetem Woman blong Smol Sipsip, tufala i talem se, “Yu kam.” Mo olgeta evriwan we oli harem tok ya, oli mas talem olsem tu se, “Yu kam.” Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.’ Tabu spirit i yusum grup blong ol Kristin we oli olsem woman blong Kraes, blong oli singaotem ol man oli kam tekem wota ya blong laef. Sipos yu yu harem tok ya finis we i talem se “Yu kam,” ale yu mas gat strong tingting blong talem long narafala man tu se “Yu kam.” !Yumi glad tumas blong save joen long bigfala wok ya blong sevem laef blong ol man!
11, 12. ?Olsem wanem tabu spirit i lidim wok blong prij?
11 Bigfala wok ya i stap gohed naoia mo tabu spirit i stap lidim. Yumi ridim finis long ol stori blong Baebol, se tabu spirit i bin givhan bigwan long ol faswan Kristin blong oli go prij long plante kantri. Long taem blong aposol Pol mo ol fren blong hem, ‘tabu spirit i no letem olgeta i go long provins ya Esia blong talemaot tok ya long ol ples ya,’ mo i no letem olgeta oli go long Bitinia tu. Yumi no save stret se tabu spirit i mekem olsem wanem blong blokem olgeta blong oli no go long ol kantri ya. Be i klia se tabu spirit i lidim Pol i go blong prij long Yurop. Pol i luk wan vison we long vison ya, wan man Masedonia i toktok long hem, i askem hem blong kam halpem ol man long ples blong hem.—Wok 16:6-10.
12 Tede, tabu spirit blong Jeova i stap lidim wok blong prij long fulwol. Tabu spirit ya i no mekem we ol man oli save luk vison blong soem long olgeta wanem blong mekem. Nating se i olsem, Jeova i yusum tabu spirit blong hem blong lidim ol tabu Kristin. Mo tu, tabu spirit i mekem we ol brata mo sista oli wantem givim bes blong olgeta long wok blong prij mo tijim man. Ating yu tu yu stap joen long impoten wok ya. Wok ya i givim glad mo i mekem yumi harem gud bigwan. ?Olsem wanem? ?I gat sam samting we yu save mekem blong kasem moa glad long wok ya?
13. ?Olsem wanem yu save letem tabu spirit i lidim yu? Givim wan eksampol.
13 Sipos yu folem ol advaes we i stap kam long olgeta man blong God, i olsem we yu stap letem tabu spirit i lidim yu. Tingbaot wan yangfala sista long Japan we nem blong hem, Mihoko. Hem i jes statem wok blong paenia mo hem i harem se hem i no naf nating blong gobak visitim ol man we hem i prij long olgeta. Hem i ting se hem i no save wanem tok blong talem blong pulum intres blong man. Nao wan Kingdom Wok Blong Yumi i kamaot we i givim ol gudfala advaes long saed blong fasin blong mekem visit long man. Biaen, wan niufala buklet i kamaot we nem blong hem A Satisfying Life—How to Attain It. Buklet ya, oli wokem speseli blong ol man Japan mo i givhan bigwan long ol pablisa long wok blong prij. Mihoko i folem ol advaes we oli talem olsem wanem blong serem buklet ya, mo olsem wanem blong mekem visit. Kwiktaem nomo Mihoko i statem Baebol stadi wetem ol man, we plante long olgeta maet bifo oli no bin wantem stadi. Mihoko i talem se: “Mi faenem plante tumas stadi, ating mi faenem samwe long 12 stadi long wan taem, ale mi mas talem long samfala blong oli wet from we mi no naf blong mekem evriwan.” Tru ya, taem yu letem tabu spirit i lidim yu, min se yu folem ol advaes we ol man blong Jeova oli givim, ale bambae yu save karem plante gudgudfala frut.
Yumi Dipen Long Tabu Spirit Blong God
14, 15. (a) ?Wanem i mekem we yumi sinman, yumi naf blong holem promes we yumi mekem blong givim laef long Jeova? (b) ?Olsem wanem yu save faenem ol gudfala fren?
14 Yu yu wan man blong wok blong God. Taswe yu gat wan bigfala wok blong mekem. (Rom 10:14) Maet yu no ting se yu naf blong holem wan bigfala wok olsem. Be God nao i mekem yu yu naf blong wok, olsem we hem i mekem long ol brata we tabu spirit i makemaot olgeta. (Ridim 2 Korin 3:5.) Taem yu givim beswan blong yu long wok blong Jeova mo yu dipen long tabu spirit, bambae yu naf blong holem promes we yu mekem blong givim laef blong yu long Jeova.
15 I tru se, i no isi long yumi ol sinman blong holem strong long promes we yumi mekem blong givim laef blong yumi long Jeova, God ya we i stret gud olgeta. Wan samting we i save mekem i had long yu, hemia ol man we yu bin joen plante wetem olgeta bifo. Maet oli no kasem save long ol jenis we yu mekem long laef blong yu, mo maet oli ‘tok nogud long yu.’ (1 Pita 4:4) Long taem olsem, yu no mas fogetem se naoia yu gat plante niufala fren finis. Tu long olgeta fren ya we oli moa impoten, hemia Jeova mo Jisas Kraes. (Ridim Jemes 2:21-23.) Mo tu, i gud yu traem save gud ol brata sista long kongregesen blong yu. Olgeta ya oli joen long “kampani blong ol brata” we i stap long fulwol. (1 Pita 2:17, NW; Prov. 17:17) Jeova bambae i givim tabu spirit long yu, blong halpem yu blong gat ol fren we oli save pulum yu blong mekem ol samting we oli gud.
16. ?From wanem yu save harem olsem Pol we, ‘taem hem i no gat paoa, be hem i glad nomo’?
16 Be nating se yu gat plante gudfala fren long kongregesen, samtaem maet yu harem se i had yet blong stanap strong tru long ol defdefren samting we yu fesem evri dei. Ating yu faet agensem ol samting ya gogo yu harem olsem se yu lusum rod, i olsem we yu fas long wan hol we yu no save kamaot long hem. Long taem ya nao yu mas lukluk i go long Jeova. Yu mas askem hem blong i givim tabu spirit blong hem long yu. Aposol Pol i raetem se: “Long taem we mi mi no gat paoa, long taem ya nao, mi mi gat paoa.” (Ridim 2 Korin 4:7-10; 12:10.) Pol i save se taem ol slak fasin blong hem oli mekem we hem i no gat paoa, ale tabu spirit blong God i save givim paoa ya we hem i sot long hem. Taswe paoa blong God i save givim paoa long yu taem yu harem se yu slak mo yu nidim help. Pol i talem se ‘taem hem i no gat paoa, hem i glad nomo.’ Yes, taem hem i slak, hem i haremsave se tabu spirit i stap givhan long hem blong gohed. !Yu tu yu save harem olsem hem!—Rom 15:13.
17. ?Olsem wanem tabu spirit i save halpem yu blong kasem mak blong yu?
17 Yumi mas gat tabu spirit sipos yumi wantem holem promes blong yumi se laef blong yumi i blong Jeova. Tingbaot se yu yu kapten long wan seling bot. Mak we yu wantem kasem hemia blong mekem wok blong Jeova oltaem gogo i no save finis. Tabu spirit i olsem win we i save pulum yu yu go stret long mak blong yu. Yu no wantem win blong wol blong Setan we bambae i saksakem yu olbaot. (1 Kor. 2:12) Ale yu mas faenem stret win ya we bambae i pulum yu yu go long stret rod, mo yu mas letem hem i lidim yu. Long sem fasin, yu mas lukaotem paoa blong tabu spirit mo letem hem i lidim yu. Yu mekem samting ya taem yu ridim Baebol mo wok wetem ogenaesesen blong Jeova we tabu spirit i lidim.
18. ?Wanem strong tingting we yu gat naoia, mo from wanem?
18 Sipos yu yu stap stadi wetem ol Witnes blong Jeova, yu stap joen oltaem wetem olgeta, be yu no tekem desisen yet blong givim laef long Jeova mo baptaes, i gud yu tingbaot se: ‘?From wanem mi no mekem desisen ya yet?’ Sipos yu luksave se tabu spirit i wok blong mekem stamba tingting blong Jeova i kamtru tede, mo yu tangkiu bigwan long wok ya, ale yu mas mekem samting we yu save se i stret blong mekem. Bambae Jeova i blesem yu bigwan. Bambae hem i glad nomo blong givim tabu spirit blong hem long yu. Sipos yu baptaes plante yia finis, ating yu haremsave finis olsem wanem tabu spirit i givhan bigwan long yu. Yu luk finis olsem wanem God i save yusum tabu spirit blong hem blong mekem yu yu strong. Ale, yu save gohed blong kasem paoa blong hem oltaem, gogo i no save finis. Taswe i gud yu mekem tingting blong yu i strong blong letem tabu spirit i lidim yu oltaem.
?Yu Yu Tingbaot?
• ?Sipos ‘tabu spirit i stap lidim wan man’ hemia i minim wanem?
• ?Wanem i save halpem yu blong letem ‘tabu spirit i lidim yu’ oltaem?
• ?Wanem i save halpem yu blong holem promes blong yu blong givim laef blong yu long Jeova?
[Kwestin]
[Tok blong pija long pej 15]
Yu mas traehad blong wokem ol gudfala fasin long hat blong yu
[Tok blong pija long pej 17]
?Yu yu letem tabu spirit blong God i gat paoa long yu?