Jisas Kraes​—Tijing Blong Hem Mo Laef Blong Yu

“Mi mi kam blong mekem rod blong ol sipsip oli save gat laef, mo blong laef ya blong olgeta i save fulap gud long evri samting.”—JON 10:10.

JISAS KRAES i kam long wol ya blong givim wan samting, be i no blong kasem wan samting. Taem hem i stap prij, hem i givim wan presen we i sas tumas long ol man. Presen ya hemia tijing blong hem, we hem i trutok long saed blong God, mo wanem samting we Hem i wantem ol man blong mekem. Olgeta we oli lesin mo obei long tijing ya oli save gat wan laef we i moagud naoia, olsem plante milian trufala Kristin oli gat finis. * Be samting we i stamba blong tijing we Jisas i givimaot, hemia beswan presen we hem i givim. Hemia laef blong hem we i stret gud olgeta, we hem i givim from olgeta man long wol. Blong yumi save harem gud blong olwe, yumi mas bilif long samting ya we i stamba blong tijing we Jisas i givim long ol man.

?God mo Kraes tufala i givim wanem? Jisas i save se hem i mas harem nogud gogo i ded long han blong ol enemi blong hem. (Matiu 20:17-19) Nating se i olsem, long Jon 3:16, wan vas we ol man oli savegud long hem, Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Jisas i talem tu se hem i kam blong ‘givim laef blong hem blong pem rod blong plante man oli go fri.’ (Matiu 20:28) ?From wanem hem i talem se bambae hem i givim laef blong hem i bitim we hem i talem se bambae ol man oli tekemaot laef blong hem?

From we God i lavem tumas ol man, nao Hem i stanemap wan rod blong sevem ol sinman oli aot long sin mo ded. God i mekem olsem taem hem i sanem stret Pikinini blong hem i kam long wol ya blong i ded olsem wan sakrefaes. Jisas i glad blong mekem olsem we papa blong hem i talem. Hem i givim laef blong hem we i stret gud from yumi. Rod ya we God i stanemap hemia nao ransom. Ransom i beswan presen we God i givim long ol man. * Hemia presen we i save lidim man blong kasem laef we i no save finis.

?Yu mas mekem wanem? ?Yu yu tingbaot ransom olsem wan presen we God i givim long yu stret? Yu wan yu mas ansa long kwestin ya. Traem tingbaot se wan man i givim wan presen long yu we i kavremap gud long wan presen pepa. Presen ya bambae i jes kam presen blong yu, taem yu pusum han blong yu mo yu karem. Long sem fasin, Jeova i givim ransom long yu, be presen ya bambae i blong yu taem yu pusum han blong yu mo yu karem. ?Olsem wanem yu save pusum han blong yu mo karem presen ya?

Jisas i talem se olgeta nomo we oli “bilif” long hem bambae oli gat laef we i no save finis. Fasin blong laef blong yu i soemaot sipos yu gat bilif. (Jemes 2:26) Bilif long Jisas i min se yu mekem laef blong yu i laenap wetem ol samting we Jisas i talem mo i mekem. Blong mekem olsem, yu mas savegud Jisas mo Papa blong hem. Jisas i talem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

Klosap 2,000 yia bifo, Jisas Kraes i tijim ol man long ol trutok we oli jenisim laef blong plante man long wol. ?Yu yu wantem save moa long saed blong tijing ya mo olsem wanem yu mo olgeta we yu lavem olgeta tumas, yufala i save kasem blesing from tijing ya naoia mo blong olwe? Ol Witnes blong Jeova oli glad blong halpem yu.

[Ol futnot]