?Jisas i Tijim Wanem Long Saed Blong Kingdom Blong God?

“Jisas i stap wokbaot, i stap pas long ol taon mo long ol vilej. Hem i stap prij, mo i stap talemaot gud nius ya we God i stap kam King blong ol man blong hem [“kingdom blong God,” NW].”—LUK 8:1.

YUMI laekem blong tokbaot ol samting we oli impoten long yumi, ol samting we yumi laekem tumas. Jisas i talem se: “Taem man i tok, hem i stap talemaot ol samting we tingting blong hem i fulap long hem.” (Mat. 12:34) Taem yumi tingbaot ol samting we Jisas i stap tijim ol man long hem, yumi luksave se samting we hem i laekem tumas hemia Kingdom blong God.

?Wanem ya Kingdom blong God? Wan kingdom i wan gavman we wan king i rul long hem. Taswe Kingdom blong God i wan gavman we God i stanemap. Jisas i toktok plante long saed blong Kingdom blong God, hemia nao stamba samting we hem i stap talemaot long ol man. Ol fofala Gospel oli tokbaot Kingdom ya bitim 110 taem. Be Jisas i no toktok nomo blong tijim ol man. Ol aksen blong hem tu oli tijim ol man long saed blong Kingdom blong God mo wanem samting we Kingdom ya bambae i mekem.

?Hu i King? I no ol man long wol ya we oli vot blong putumap King blong Kingdom ya. Defren olgeta, God hem wan i jusumaot King ya. Tijing blong Jisas i soemaot se hem nao i King ya we God i jusumaot.

Jisas i save se ol profet tok oli talemaot se Mesaea ya we God i promes blong sanem, bambae i king blong wan Kingdom we bambae i stanap blong olwe. (2 Samuel 7:12-14; Daniel 7:13, 14; Matiu 26:63, 64) Tingbaot we Jisas i talemaot klia se hem i Mesaea ya, i min se hem i King ya we God i makemaot. (Jon 4:25, 26) I stret nomo we plante taem Jisas i yusum tok ya se “kingdom blong mi.”—Jon 18:36, NW.

Mo tu, Jisas i tijim ol man se bambae i gat sam man we oli rul wetem hem long Kingdom ya. (Luk 22:28-30) Hem i singaotem olgeta ya se “smol kampani blong ol sipsip,” from we oli no plante. Hem i talem long olgeta se: “Papa blong yufala hem i glad tumas blong givim kingdom long yufala.” (Luk 12:32, NW) Las buk blong Baebol i soemaot se bambae i gat 144,000 man we oli gat janis ya blong go rul wetem Kraes.—Revelesen 5:9, 10; 14:1.

?Kingdom ya i stap wea? Jisas i talem long Ponjes Paelat we i hedgavman blong Rom se: “Kingdom blong mi i no blong wol ya.” (Jon 18:36, NW) God bambae i no yusum ol man long wol ya blong rul long bihaf blong Kingdom blong hem. Jisas i talem bakegen mo bakegen se Kingdom blong God i “kingdom blong heven.” * (Matiu 4:17, NW; 5:3, 10, 19, 20, NW) Yes, Kingdom blong God i wan gavman long heven.

Jisas i savegud se bambae hem i gobak long heven taem laef blong hem long wol ya i finis. Hem i talem long ol man blong hem se, bambae hem i  “mekemrere ples” blong olgeta, blong bambae oli go stap wetem hem long heven.—Jon 14:2, 3.

?Kingdom ya bambae i mekem wanem? Jisas i tijim ol man blong oli prea long God se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.” (Matiu 6:9, 10, NW) Samting we God i wantem i kamaot finis long heven. Kingdom ya i tul we God bambae i yusum blong mekem stamba tingting blong hem i kamtru long wol ya. Blong mekem stamba tingting ya i kamtru, Kingdom ya bambae i mekem plante bigfala jenis i kamaot long wol ya.

?Kingdom ya bambae i mekem wanem long wol ya? Jisas i tijim ol man se Kingdom blong God bambae i finisim ol rabis fasin, taem bambae hem i spolem ol man we oli stap mekem ol rabis fasin ya. (Matiu 25:31-34, 46) Hemia i min se olgeta kruked fasin blong brekem loa mo nogud fasin bambae oli finis. Jisas i tijim ol man se wol ya bambae i fulap long ol man we “tingting blong olgeta i stap daon,” oli laekem stret fasin, oli gat sore, “tingting blong olgeta i klin gud,” mo oli man blong mekem pis.—Matiu 5:5-9.

?Yu ting se ol man olsem bambae oli laef long wan wol we graon, win, mo wota blong hem i doti? Nogat. Jisas i promes se Kingdom blong God bambae i mekem plante nambawan jenis long wol ya. Man ya we i hang long pos long saed blong Jisas i talem se: “Jisas, taem we bambae yu kasem kingdom blong yu, plis yu tingbaot mi bakegen. Jisas i talem long hem se: “Tru mi mi talem long yu tede, se bambae yu yu stap wetem mi long Paradaes.” (Luk 23:42, 43, NW) Yes, Kingdom blong God bambae i jenisim wol ya i kam wan naesfala paradaes, sem mak long garen blong Iden bifo.

?Wanem narafala samting we Kingdom ya bambae i mekem long ol man? Jisas i no mekem promes nomo long saed blong wanem we Kingdom blong God bambae i mekem. Hem i soemaot tu, samting we Kingdom ya bambae i mekem. Jisas i mekem plante merikel, hem i mekem ol sikman oli oraet bakegen. Ol merikel ya oli soemaot samting we bambae hem i mekem long olgeta man  long fiuja, taem hem i rul long Kingdom. Gospel blong Matiu i tokbaot Jisas se: “Jisas i stap wokbaot long olgeta ples long Galili, i stap tijim ol man insaed long ol haos blong prea blong olgeta. Hem i stap talemaot gud nius ya we God i stap kam King blong olgeta man long wol [“gud nius blong kingdom blong God,” NW]. Mo i stap mekem olgeta man we oli sik, mo we bodi blong olgeta i nogud, oli gud bakegen.”—Matiu 4:23.

Jisas i hilim plante kaen sik. Hem i “mekem ae blong man we i blaen taem i bon, i kam gud.” (Jon 9:1-7, 32, 33) Jisas i jes tajem nomo wan man we i gat rabis sik ya leprosi, nao man ya i oraet bakegen. (Mak 1:40-42) Ol man oli tekem wan man we “sora blong hem i fas, mo we hem i no save toktok gud,” i kam long Jisas. Nao Jisas i soemaot se hem i save mekem se “man we fastaem sora blong hem i fas, be naoia hem i save harem toktok, mo man we fastaem i no save toktok, be i save toktok.”—Mak 7:31-37.

King ya we God i jusumaot, hem i naf blong finisim ded tu. Baebol i tokbaot tri taem we Jisas i mekem man we i ded i laef bakegen. Hem i mekem boe blong wan wido woman, wan pikinini nomo we hem i gat, i laef bakegen, wetem wan gel we i gat 12 yia blong hem, mo fren blong hem Lasaros.—Luk 7:11-15; 8:41-55; Jon 11:38-44.

Jisas i soemaot long aposol Jon, ol nambawan samting we ol man we oli laef aninit long rul blong Kingdom blong God, bambae oli kasem. Hem i se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 1:1; 21:3, 4) !Traem tingbaot, wan wol we i no moa gat man i krae from sore, i harem nogud, mo i no moa gat soa mo ded! Yes, long taem ya, prea ya bambae i kamtru fulwan se, olgeta samting we God i wantem bambae oli kamtru long wol ya olsem we oli kamtru finis long heven.

?Kingdom blong God bambae i kam wetaem? Jisas i kolem taem we hem i stat blong rul se, taem we hem i “stap.” Jisas i talemaot klia ol samting we bambae oli kamaot, we oli blong soemaot se hem i stat rul. Long taem we hem i sidaon long jea blong King, bambae i gat trabol long olgeta ples long wol, olsem ol faet, hadtaem blong kasem kakae, graon i seksek, ol strong sik, mo ol fasin nogud bambae oli kam bigwan moa. (Matiu 24:3, 7-12, NW; Luk 21:10, 11) Ol samting ya mo plante narafala samting bakegen we Jisas i talemaot, oli kamaot klia stat long yia 1914, hemia yia we Wol Wo Wan i stat. Taswe, naoia Jisas i stap rul olsem King. I no longtaem, bambae Kingdom ya i kam, i min se bambae i rul fulwan long wol, mo mekem samting we God i wantem i kamaot long wol ya. *

?Taem Kingdom blong God i kam, bambae i mekem wanem long yu? Ansa blong kwestin ya i dipen long wanem we yu mekem taem yu harem tijing blong Jisas.

[Ol futnot]