Kwestin Blong Olgeta We Oli Ridim Magasin Ya . . .

?I Tru Se Jisas Nao Hem i Mikael, Jif Blong Ol Enjel?

▪ Blong ansa long kwestin ya, yumi save talem wan sotfala ansa nomo se yes. Long plante ples, ol man oli gat kastom ya blong singaot wan man long plante defren nem. Hemia i sem mak long ol nem we yumi faenem long Baebol. Tingbaot Jekob we Baebol i tokbaot, hem i karem nem ya Isrel tu. (Jenesis 35:10) Long olfala lanwis we oli raetem Baebol long hem, aposol Pita i gat faef defren nem olsem, Simeon, Saemon, Pita, Kefas, Saemon Pita. (Matiu 10:2; 16:16; Jon 1:42; Ol Wok 15:7, 14) ?Olsem wanem yumi save sua se Mikael hem i narafala nem blong Jisas? Traem tingting gud long ol vas we oli kam biaen.

I gat faef haf long Baebol we oli tokbaot strong enjel ya Mikael. Long buk blong Daniel, nem ya i kamaot tri taem. Long Daniel 10:13, 21 yumi ridim se, Jeova i sanem wan enjel blong mekem wan wok, nao i kasem wan trabol mo Mikael i kam givhan long hem. Mikael hem i “enjel ya we i hae moa long ol narafala enjel,” mo “enjel ya we i stap lukaot long ol laen blong Isrel.” Biaen, long Daniel 12:1, yumi lanem se long taem blong en, “Mikael we i hae we i hae, we i stap lukaot long ol man ples blong yu, bambae hem i kamtru.”

Mo bakegen, yumi faenem nem ya Mikael long buk blong Revelesen 12:7, we i tokbaot “Mikael wetem ol enjel blong hem.” Olgeta ya oli mekem wan bigfala faet long heven mo oli sakemaot Setan mo ol rabis enjel blong hem.

Makem gud se long ol wanwan vas we yumi luk antap, oli tokbaot Mikael olsem wan enjel we i faet blong lukaot gud long ol man blong God. Antap moa, hem i faet agensem bigfala enemi blong Jeova, hemia Setan.

Long Jud 9, Baebol i singaot Mikael se “jif blong ol enjel.” I no gat wan vas long Baebol we i tokbaot se i gat plante jif blong ol enjel. Wan narafala vas we i tokbaot jif blong ol enjel, hemia 1 Tesalonaeka 4:16 (NW). Pol i tokbaot taem ya we Jisas bambae i mekem ol man oli laef bakegen, i se: ‘Masta [Jisas] bambae i aot long heven i kamdaon mo bambae i singaot wetem voes blong jif blong ol enjel, mo wetem pupu blong God.’ Yes, vas ya i soemaot se Jisas Kraes nao hem i jif blong ol enjel.

Folem ol save ya, ?wanem ansa blong kwestin ya long saed blong jif blong ol enjel? Jisas Kraes, hem i Mikael, jif blong ol enjel. Tufala nem ya tugeta, Mikael (we i minim “?Hu i Olsem God?”) mo Jisas (we i minim “Jeova i Sevem Ol Man”), oli pulum tingting blong yumi i go long wok we Jisas i mekem olsem nambawan man blong leftemap hae rul blong God. Filipae 2:9 i talem se: “God i leftemap nem blong hem [Jisas we i kasem hae nem finis] i go antap olgeta, i givim nem long hem we i hae moa long ol narafala nem.”

Makem gud se, laef blong Jisas i stat bifo we hem i bon i kam long wol, olsem wan man. Enjel we i kamtru long Meri, i talem long hem se tabu spirit bambae i mekem we hem i gat bel, nao bambae hem i mas putum nem blong pikinini ya, se Jisas. (Luk 1:31) Taem Jisas i prij, oltaem hem i stap tokbaot laef blong hem bifo we hem i kam long wol.—Jon 3:13; 8:23, 58.

Yes, bifo we Jisas i kam long wol olsem wan man, hem nao i Mikael, jif blong ol enjel. Mo afta we hem i ded mo i gobak long heven, hem i statem wok blong hem bakegen olsem Mikael, jif blong ol enjel, “blong leftemap nem blong God, Papa blong yumi.”—Filipae 2:11.