Ol Brata​—!Planem Fasin We Tabu Spirit i Wantem Mo Traehad Blong Kasem Wok!

‘Sipos man i planem fasin we tabu spirit i wantem, tabu spirit bambae i givim kakae long hem, we hemia laef ya we i no save finis.’—GAL. 6:8.

1, 2. ?Olsem wanem Matiu 9:37, 38 i stap kamtru? ?From samting ya, i mas gat hu long ol kongregesen?

!YU YU stap luk wetem prapa ae blong yu, wan samting we ol man bambae oli tokbaot gogo i no save finis! Hemia wok ya we Jisas Kraes i tokbaot, we naoia i stap gohed ful spid. Jisas i talem se: “I gat plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Mat. 9:37, 38) Naoia, Jeova God i stap ansarem ol prea ya long fasin we i bigwan moa i bitim olgeta taem bifo. Long seves yia blong 2009, i gat 2,031 niufala kongregesen blong ol Witnes blong Jeova, mekem se naoia i gat 105,298 kongregesen long ful wol. !Evri dei blong yia ya i gat 757 man mo woman oli baptaes!

² From we i gat plante niufala kongregesen olsem, i mas gat ol brata tu we oli naf blong lidim wok ya blong tijim mo lukaot gud long ol sipsip ya blong God. (Efes. 4:11) Long ol yia we oli pas, Jeova i putumap ol man we oli naf blong lukaot gud long ol sipsip blong hem. Yumi gat strong tingting se bambae hem i gohed blong mekem olsem. Profet tok blong Maeka 5:5 i talem se long ol las dei, bambae i gat ‘ol nambawan lida wetem ol strong soldia blong olgeta,’ we oli stap long medel blong ol man blong Jeova. Profet tok ya i stap talem se bambae i gat plante man blong Jeova we oli naf blong lidim wok insaed long ol kongregesen.

3. ?Wanem mining blong tok ya ‘planem fasin we tabu spirit i wantem’?

³ Sipos yu yu wan man we yu baptaes finis olsem wan Witnes blong Jeova, ?wanem i save givhan long yu blong yu wantem traehad blong kasem wok long kongregesen? Wan stamba samting se yu mas ‘planem fasin we tabu spirit i wantem.’ (Gal. 6:8) Hemia i min se yu mas folem wan fasin blong laef we i openem rod blong tabu spirit i wok fulwan long laef blong yu. Yu mas mekemap tingting blong yu blong no ‘planem fasin we tingting blong yu i wantem.’ Yu no mas letem tingting ya blong wantem wan isi laef, ol pleplei, mo ol samting we yu mekem blong gat gudtaem mo spel, oli daonem tingting ya blong yusum ful paoa blong yu long wok blong God. Olgeta Kristin, ol man mo ol woman tu, oli mas ‘planem fasin we tabu spirit i wantem.’ Be ol brata we oli mekem olsem, sloslo oli kam naf blong kasem wok long kongregesen. Long ol kongregesen tede, i nidim plante moa elda mo man blong givhan. Taswe stadi ya i go long ol Kristin brata. Ale, ol brata, yufala i mas tingting gud long stadi ya mo prea long saed ya.

Traehad Blong Kasem Wan Gudfala Wok

4, 5. (a) ?I gud se ol man we oli baptaes finis oli traehad blong kasem wanem wok long kongregesen? (b) ?Olsem wanem oli traehad blong kasem wok ya?

⁴ Wan Kristin brata i no kam wan man blong lukaot long kongregesen olsem nomo. Hem i mas traehad blong kasem “gudfala wok” ya. (1 Tim. 3:1, NW) Taem hem i stap traehad blong kasem wok ya, hem i rili kea long ol narafala Kristin, i lukaot gud long olgeta mo ol nid blong olgeta. (Ridim Aesea 32:1, 2.) Wan man we stret tingting i pusum hem blong traehad blong kasem wok ya, hem i no hanggri from paoa mo haenem. Hem i no tingbaot hem wan, be hem i tingbaot ol narafala fastaem, mo i wantem givhan long olgeta.

⁵ Wan man we i traehad blong kam naf blong kasem wok blong elda no man blong givhan, hem i traehad blong gat ol fasin we Baebol i talem se ol man ya oli mas gat. (1 Tim. 3:1-10, 12, 13, NW; Taet. 1:5-9, NW) Sipos yu yu wan man we yu givim laef blong yu i go long Jeova finis, traem tingting long ol kwestin ya: ‘?Mi mi stap joen fulwan long wok blong  prij? ?Mi stap givhan long ol narafala tu blong oli mekem olsem? ?Mi mi rili intres long ol Kristin brata sista blong mi, mo mi traem mekem olgeta oli kam strong moa? ?Olgeta oli save mi olsem wan man we i stadi gud long Tok blong God? ?Mi mi stap traehad blong mekem ol ansa blong mi long miting oli kam gud moa? ?Mi mi mekem gud ol wok we ol elda oli putum long han blong mi?’ (2 Tim. 4:5) Yu mas tingting dip long ol impoten kwestin ya.

6. ?Wanem samting i soemaot se wan man i naf blong kasem wok long kongregesen?

⁶ Wan narafala rod blong kam naf blong kasem wok long kongregesen, hemia se ‘spirit blong God i givim paoa long yu, blong mekem yu yu stanap strong oltaem.’ (Efes. 3:16) Taem wan brata i kam man blong givhan no elda long Kristin kongregesen, i no olsem taem ol man oli vot blong putumap wan man long wan hae posisen, nogat. Man i kasem blesing ya from we hem i wokhad blong fren gud wetem Jeova. ?Olsem wanem yu save fren moa wetem Jeova? Wan rod se, ‘tabu spirit i mas stap lidim yu’ oltaem, mo yu mas wokem ol fasin we oli olsem frut blong spirit ya. (Gal. 5:16, 22, 23) Taem yu soemaot ol fasin we yu mas gat blong mekem ol spesel wok, mo taem yu folem ol advaes we yu kasem blong kam gud moa, ‘bambae olgeta man oli luk we yu stap gohed gud long laef blong yu mo long wok blong yu.’—1 Tim. 4:15.

Yu Mas Gat Tingting Ya Blong Lego Samting We Yu Yu Wantem

7. ?Wanem i joen wetem wok ya blong givhan long ol narafala mo lukaot gud long olgeta?

⁷ I no isi blong givhan long ol narafala mo lukaot gud long olgeta, hemia wan hadwok ya. Blong mekem wok ya, yu mas rere blong lego samting we yu yu wantem. Ol elda long Kristin kongregesen oli ol man blong lukaot long ol sipsip blong God. Taswe oli wari bigwan long ol trabol we ol sipsip ya oli gat. Traem luk olsem wanem wok ya blong lukaot long ol sipsip blong God i gat paoa long filing blong aposol Pol. Hem i talem long ol Kristin long Korin se: “Taem mi raetem leta ya long yufala, mi mi harem nogud tumas, tingting blong mi i trabol mo oltaem mi stap krae. Be mi no raetem leta ya blong mekem yufala i harem nogud, mi raetem blong mekem yufala i save we mi lavem yufala evriwan.” (2 Kor. 2:4) I klia se Pol i mekem wok blong hem wetem fulhat blong hem.

8, 9. Tokbaot olsem wanem samfala long Baebol oli lukaot gud long ol narafala.

 ⁸ Long olgeta yia we oli pas, ol man we oli mekem wok blong lukaot long ol man blong Jeova oli gat tingting ya blong lego samting we oli wantem. Tingbaot Noa. ?Yu ting se Noa i talem long famle blong hem se: ‘Bambae yufala i talem long mi taem yufala i finisim sip ya, ale bambae mi kam joenem yufala’? Hem i no talem olsem. ?Yu ting se Moses i talem long ol man Isrel long Ijip se: ‘Bambae yufala i faenem rod blong yufala, mi bambae mi joenem yufala long Red Si’? ?Yu ting se Josua i talem se: ‘Sanem toktok i kam long mi taem stonwol blong Jeriko i foldaon finis’? ?Yu ting se Aesea i poen i go long narafala man mo i talem se: ‘!Man ya i save go, yu sanem hem!’? Nogat.—Aes. 6:8.

⁹ Nambawan eksampol blong man we i folem rod we spirit blong God i lidim hem long hem, hemia Jisas Kraes. Hem i glad blong mekem wok ya we God i givim long hem blong sevem ol man. (Jon 3:16) ?Yu yu harem olsem wanem taem yu tingbaot lav we i pulum Jisas blong lego laef blong hem blong sevem yumi? ?Samting ya i no pulum yu blong wantem lego sam samting long laef blong yu? Wan brata we i wok olsem elda longtaem finis, i tokbaot filing we hem i gat long ol sipsip blong God, i se: “Ol tok we Jisas i talem long Pita—lukaotgud long ol sipsip blong mi—oli tajem hat blong mi bigwan. Taem ol yia oli stap pas, mi kasem save se wan smol tok we yumi talem wetem lav, no wan smol samting we yumi mekem wetem kaen fasin, i save mekem narafala i harem gud bigwan. Mi mi laekem tumas wok ya blong lukaot long ol sipsip blong God.”—Jon 21:16.

10. ?Wanem i save pulum ol Kristin man blong folem fasin blong Jisas blong givhan mo lukaot gud long ol narafala?

¹⁰ Ol man we oli givim laef blong olgeta i go long God mo oli stap lukaot long kongregesen, oli mas gat sem tingting olsem Jisas long saed blong ol sipsip blong God. Jisas i talem se: “Bambae mi tekemaot ol hevi samting ya [we yufala i stap karem], mi mekem we yufala i spel gud.” (Mat. 11:28) Ol Kristin man ya oli bilif strong long God mo oli lavem kongregesen, ale samting ya nao i pulum olgeta blong traehad blong kasem gudfala wok ya. Oli no ting se i had tumas blong lego samting blong mekem wok ya, mo blong yusum taem mo paoa blong olgeta long rod ya. ?Be olsem wanem sipos wan brata i no gat tingting ya blong wantem mekem wok long kongregesen? ?Hem i save wokem tingting ya we hem i wantem givhan mo lukaot gud long ol narafala?

Wokem Tingting Ya Blong Wantem Givhan

11. ?Olsem wanem wan man i save wokem tingting ya blong wantem givhan mo lukaot long ol narafala?

¹¹ Ating yu yu no traehad blong kasem wok long kongregesen from we yu harem se yu no naf blong mekem wok ya. Sipos i olsem, yu mas prea blong askem long Jeova blong i givim tabu spirit long yu. (Luk 11:13) Spirit blong Jeova bambae i givhan long yu blong winim wari ya se yu yu no naf. Jeova nomo i givim tingting ya long man blong i wantem givhan long ol narafala mo lukaot long olgeta. Taswe, spirit blong Jeova i save pusum wan brata blong traehad blong kasem wok long kongregesen, mo biaen, spirit ya i givim paoa long hem blong i mekem tabu wok ya. (Fil. 2:13; 4:13, NW) From samting ya, yu mas askem long Jeova blong i givhan long yu blong wokem tingting ya we yu wantem kasem ol spesel wok.—Ridim Ol Sam 25:4, 5.

12. ?Olsem wanem wan man i save kasem waes we i naf blong mekem wok we i stap long han blong hem?

¹² Maet wan Kristin man i luk se ol sipsip blong God oli nidim plante help, mo se bambae i tekem plante taem mo paoa blong lukaot long olgeta. Ale hem i ting se i moagud we hem i no traehad blong kasem wok ya. Sipos no, maet hem i harem se hem i no gat naf waes blong mekem wok ya. Man olsem i save kasem waes sipos hem i stadi moa long Tok blong God mo ol buk we oli stanap long Baebol. I gud hem i traem skelem se: ‘?Mi mi stap makemaot taem blong stadi long Tok blong God? ?Mi mi stap prea blong askem long Jeova blong i givim waes long mi?’ Disaepol Jemes i raetem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jem. 1:5) ?Olsem wanem? ?Yu yu bilif long tok ya we i kamaot long God? God i ansa long prea blong Solomon, i ‘mekem hem i waes, mo i savegud ol fasin blong rul.’ Nao Solomon i naf blong luksave wanem fasin i stret mo wanem fasin i no stret taem hem i rul long ol man. (1 King 3:7-14) I tru se, wok blong Solomon i spesel. Be yumi tu yumi save gat strong tingting se God bambae i givim waes long ol man we oli gat wok long kongregesen, blong oli naf blong lukaot gud long ol sipsip blong hem.—Prov. 2:6.

13, 14. (a) ?‘Fasin ya we Kraes i lavem yumi tumas’ i mekem wanem long Pol? (b) ?‘Fasin ya we Kraes i lavem yumi tumas’ i mas mekem wanem long yumi?

 ¹³ I gat wan narafala samting we bambae i halpem yumi blong wokem tingting ya blong wantem givhan long ol narafala. Hemia se, yumi mas tingting dip long ol samting we Jeova mo Pikinini blong hem i mekem finis blong halpem yumi. Tingting gud long 2 Korin 5:14, 15. (Ridim.) ?Olsem wanem ‘fasin ya we Kraes i lavem yumi tumas, i stap holemtaet yumi’? Taem Kraes i givim laef blong hem from yumi olsem God i wantem, hem i soemaot se hem i lavem yumi tumas. Taem yumi kasem save long samting ya, bambae i tajem hat blong yumi bigwan. Fasin ya we Kraes i lavem ol man tumas i holemtaet Pol. Taswe Pol i no tingbaot hem wan fastaem. Lav ya i pulum Pol blong putum tingting blong hem fulwan long wok blong God mo wok blong givhan long ol narafala, insaed mo afsaed long kongregesen.

¹⁴ Sipos yumi tingting dip long fasin ya we Kraes i lavem yumi tumas, bambae yumi wantem mekem samting blong talem tangkiu from. Bambae yumi luksave se i no stret nating we yumi ‘planem fasin we tingting blong yumi i wantem.’ Hemia i min se i no stret we yumi tingbaot yumi wan fastaem, mo yumi yusum laef blong yumi blong mekem ol samting we yumi nomo i wantem. Defren olgeta, yumi jenisim sam samting long laef blong yumi blong putum wok we God i givim long yumi, long fasples. Nao yumi harem se yumi wantem ‘givhan’ long ol brata blong yumi from we yumi lavem olgeta. (Ridim Galesia 5:13.) Yumi mas gat tingting ya se yumi olsem ol slef we yumi wok wetem tingting daon blong givhan long ol man blong Jeova. Olsemia, bambae yumi respektem olgeta mo mekem i gud long olgeta. Bambae yumi no gat tingting ya we Setan i stamba blong hem, hemia blong faenem poen long ol man blong God mo jajem olgeta.—Rev. 12:10.

Fulwan Famle i Mas Traehad

15, 16. ?Olsem wanem evriwan long famle oli save givhan blong mekem se hed blong famle i kam naf blong wok olsem man blong givhan no elda?

¹⁵ Long saed blong wan brata we i mared mo i gat pikinini, taem oli skelem ol samting long laef blong hem blong luk sipos hem i naf blong kam man blong givhan no elda, oli lukluk tu long famle blong hem. Oli luk sipos famle blong hem i stap fren gud wetem God, mo sipos i gat gudnem wetem ol narafala mo long kongregesen. Samting ya i save gat paoa long desisen we oli mekem, se bambae oli putumap hem no nogat. Taswe, yumi luksave se i impoten tumas we woman i sapotem man blong hem, mo ol pikinini oli sapotem papa blong olgeta, taem hem i stap traehad blong mekem gud ol wok long kongregesen, olsem wan man blong givhan no wan elda.—Ridim 1 Timoti 3:4, 5, 12.

¹⁶ Jeova i glad taem evriwan long Kristin famle oli wokgud tugeta. (Efes. 3:14, 15) Hed blong famle i mas naf blong skelem gud ol samting, blong hem i save mekem tufala wok ya wantaem, hemia wok long kongregesen, mo wok blong “lukaot gud” long famle blong hem. I impoten we wan elda no wan man blong givhan i stadi Baebol evri wik wetem woman blong hem mo ol pikinini blong hem. Olsem nao, olgeta long famle oli save kasem gudfala samting from naet ya blong Famle Wosip. Hem i mas joen wetem olgeta oltaem long wok blong prij. Long sem fasin, i impoten we olgeta long famle oli wokgud wetem hed blong famle we i stap traehad blong lidim gud olgeta.

?Bambae Yu Mekem Wok Ya Bakegen?

17, 18. (a) ?Sipos wan brata i no moa naf blong mekem wok blong man blong givhan no elda, hem i mas mekem wanem? (b) ?I gud se wan brata we i mekem wok blong elda no man blong givhan bifo, i gat wanem tingting?

¹⁷ Ating yu yu mekem wok blong elda no man blong givhan bifo, be naoia yu no moa mekem. Yu yu lavem Jeova, mo yu save se hem i stap tingbaot yu yet. (1 Pita 5:6, 7) ?Olsem wanem? ?Yu yu bin kasem advaes se yu mas jenisim sam samting? Ale, i gud yu  luksave slak fasin blong yu, mo wetem paoa blong God, yu wok blong winim fasin ya. Yu no mas letem tingting blong yu i kam konkon. Yu mas waes, mo soemaot wan gudfala tingting. Traem ridim tok blong wan brata we hem i wok olsem elda blong plante yia, be biaen hem i lusum wok ya. Hem i talem se: “Mi mi mekemap tingting blong mi blong gohed sem mak olsem bifo, taem mi wok olsem elda. Ale mi gohed blong kam long ol miting, mi joen oltaem long wok blong prij, mo mi ridim Baebol. Mi mi ting se bambae mi kasem wok blong elda bakegen long wan no tu yia nomo, be klosap seven yia i pas, nao mi jes kasem wok ya. Hemia i tijim mi blong gat longfala tingting. Samting we i givhan bigwan long mi long taem ya, hemia ol tok we mi kasem blong leftemap tingting blong mi blong gohed blong traehad blong kasem wok ya, mo blong no kam taed.”

¹⁸ Sipos yu yu wan brata we yu fesem semfala trabol ya, yu no mas letem tingting blong yu i foldaon. Traem tingbaot olsem wanem Jeova i stap blesem wok blong prij we yu mekem, mo olsem wanem i stap blesem famle blong yu. Yu mas wok blong mekem famle blong yu i strong, yu save go luk olgeta we oli sik, mo yu save leftemap tingting blong olgeta we oli no strong long bilif. Antap long evri samting, yu mas tinghae long blesing we yu yu gat blong presem God, mo blong talemaot gud nius blong Kingdom olsem wan Witnes blong Jeova. *—Sam 145:1, 2; Aes. 43:10-12.

Skelem Bakegen

19, 20. (a) ?I gud se olgeta man we oli baptaes finis oli mekem wanem? (b) ?Bambae yumi tokbaot wanem long nekis stadi?

¹⁹ Tede, i gat nid blong plante moa elda mo man blong givhan, i bitim olgeta taem bifo. Taswe, i gud we ol man we oli baptaes finis be oli no gat wok long kongregesen, oli skelem bakegen ol samting long laef blong olgeta, nao oli traem askem se: ‘?From wanem mi mi no elda no man blong givhan?’ Letem spirit blong God i halpem yu blong kasem stret tingting long impoten bisnes ya.

²⁰ Olgeta evriwan long kongregesen oli kasem blesing taem ol Kristin brata blong olgeta oli lego samting we oli wantem, blong mekem samting we God i wantem. Taem yumi no tingbaot yumi nomo, be yumi mekem samting wetem kaen fasin blong givhan long narafala, yumi kasem bigfala glad, from we yumi kam olsem slef blong narafala. Mo tu, yumi planem fasin we tabu spirit i wantem. Nekis stadi bambae i tokbaot samting we yumi no mas mekem, hemia se, yumi no mas mekem tabu spirit i harem nogud. ?Olsem wanem yumi save folem advaes ya?

[Futnot]

?Bambae Yu Yu Ansa Olsem Wanem?

• ?Profet tok blong Maeka 5:5 i talem wanem long yumi?

• Eksplenem samting we man i mekem taem hem i gat tingting ya blong lego samting we hem i wantem.

• ?Olsem wanem wan man i save wokem tingting ya blong wantem mekem wok blong givhan long ol narafala?

• ?From wanem i impoten we famle i wokgud tugeta, blong papa i save kam naf blong mekem wok blong elda no man blong givhan?

[Kwestin]

[Tok blong pija long pej 25]

?Yu yu save mekem wanem blong traehad blong kasem wok long kongregesen?