Ol Tok Blong Baebol Oli Rili Kamaot Long God

?APOSOL POL i minim wanem taem hem i talem se olgeta tok blong Baebol oli “kamaot long God”? (2 Timoti 3:16) Pol i minim se God i yusum tabu spirit blong hem blong lidim ol man we oli raetem Baebol, blong oli raetem ol samting ya nomo we Hem i wantem olgeta blong raetem.

Aposol Pita i talem se taem ol man ya oli raetem Baebol, “be Tabu Spirit i stap givim tok long olgeta, nao oli talemaot tok we i kamaot long God.” (2 Pita 1:21) Aposol Pol i save se ol tok blong Baebol oli ol tabu hanraet, taswe hem i talem se ‘oli  save mekem yu yu waes, mo oli save lidim yu blong yu save stanap strong long bilif blong yu long Jisas Kraes, blong God i save sevem yu.’—2 Timoti 3:15.

Plante man oli no agri nating se ol tok blong Baebol oli kamaot long God. Masta Charles Marston, i talem se ol man ya we oli traem faenem poen long Baebol, oli “lukluk nogud long ol stori blong Baebol mo oli no gat respek nating long olgeta.” Yes, olgeta ya oli talem plante strong toktok blong agensem Baebol. Samfala oli talem se Baebol i “wan olfala buk blong ol kastom stori mo stori blong ol pikinini” nomo.

Tingting Gud Long Ol Pruf

?Olsem wanem nao? ?Yu yu save trastem Baebol? I impoten we yu tingting gud long kwestin ya. ?From wanem? From we sipos God i yusum Baebol blong toktok long yumi, mo yumi tanem baksaed long hem, fasin ya i no waes nating mo maet i mekem we yumi lusum laef blong yumi tu. Sipos yu luk Baebol olsem se i kamaot long man nomo, be i no kamaot long God, bambae yu no moa letem hem i lidim yu long laef blong yu. Mo tu, bambae yu no moa luk Baebol olsem stamba blong bilif blong yu.—1 Tesalonaeka 2:13.

?Bambae yu mekem wanem? Tingbaot, ?taem yu mitim wan man, olsem wanem yu save sipos i oraet blong trastem hem, no nogat? Sipos yu no save gud wan man, bambae i had blong trastem hem. Moa we taem i pas, moa we yu save gud hem, ale bambae yu kasem save sipos hem i no man blong giaman mo sipos yu save trastem hem. Yu save kasem save long Baebol long semfala rod. Yu no mas agri kwiktaem long ol toktok we ol man oli stanemap agensem Baebol, mo ol tingting we oli talem blong spolem bilif blong man long saed blong Baebol. Baebol i talem se ol tok blong hem “oli kamaot long God.” Taswe, i gud we yu tekem taem blong tingting gud long ol pruf we oli soemaot se Baebol i tru.

Ol Hae Man Blong Stadi Oli Agensem Baebol

Sam man we oli stadi long ol tijing blong jos mo sam man we oli tokbaot Baebol long radio mo televisin, oli talem se oli agri long ol tok blong Baebol. Be ol man ya oli tok agensem Baebol tu, oli talem se hem i no tru mo se yumi no save trastem hem. Wan  buk we nem blong hem New Dictionary of Theology, i talem se, tede, bighaf blong ol man we oli tokbaot Baebol long ol niuspepa mo radio, oli talem se oli Kristin, be oli “tokbaot se Baebol i wan buk blong man nomo.”

Plante man we oli stadi long ol tijing blong jos, oli mekem plante toktok long saed blong olgeta we oli raetem ol buk blong Baebol. Olsem nao, samfala oli talem se profet Aesea i no raetem buk blong Aesea. Oli talem se buk ya, ol man oli raetem plante yia afta we Aesea i ded. Tingbaot wan buk we Lowther Clarke i raetem, nem blong hem Concise Bible Commentary. Buk ya i talem se “plante man we oli no laef long semfala taem, oli raetem buk blong Aesea, mo oli tekem plante yia blong finisim buk ya.” Be ol man we oli talem ol tok olsem, oli no tingbaot se Jisas Kraes mo ol disaepol blong hem oli talem plante taem se Aesea nao i raetem buk ya we i karem nem blong hem.—Matiu 3:3; 15:7; Luk 4:17; Jon 12:38-41; Rom 9:27, 29.

Samting we i moa nogud se, ol man we oli toktok blong traem faenem poen long Baebol, olsem man ya J. R. Dummelow, oli talem se ol profet tok we oli stap long buk blong Daniel, “oli ol trufala samting we oli hapen finis long ol yia bifo, ale wan man i raetemdaon olgeta long buk ya, mo i giaman se oli ol profet tok.” Bakegen, taem ol man ya oli toktok olsem, oli fogetem samting we Jisas i talem, blong pruvum se profet Daniel nao i raetem buk ya. Long Matiu 24:15, Jisas i talem se: “Bambae yufala i save luk rabis god blong ol hiten man we hem i nogud we i nogud, we Profet Daniel i bin tokbaot bifo. Olgeta bambae oli go stanemap rabis god ya insaed long haos blong God, long Rum ya we i Tabu.” ?Olsem wanem? ?Yu ting se Jisas i wan man we i save giaman blong trikim man? ?Yu ting se hem i save sapotem tok blong ol profet ya sipos oli no rili profet tok? Nogat, Jisas i no save mekem wan samting olsem.

?I Rili Impoten Blong Save?

Be maet yu askem se: “?I rili impoten blong save se hu i raetem ol buk blong Baebol?” Yes, i impoten tumas. Tingbaot sipos fren blong yu we i ded, i bin raetem ol laswan tingting blong hem long wan leta, blong talemaot se hu bambae i tekem olting blong hem taem bambae hem i ded. Ale biaen, oli faenemaot se i no hem we i raetem leta ya, ?bambae yu yu tingting olsem wanem long leta ya? ?Bambae yu trastem leta ya? Tingbaot sipos ol man we oli gat gud save long saed ya, oli talem long yu se pepa ya i wan giaman leta nomo. Oli talem se sam man we oli wok wetem fren blong yu, oli raetemdaon ol samting we oli ting se hemia nao ol laswan tingting blong fren blong yu. Samting ya bambae i mekem se leta ya i no moa impoten long yu. Bambae yu yu no moa trastem ol toktok long leta ya se oli laswan tingting blong fren blong yu.

Hemia i sem mak long saed blong Baebol. Taswe, yumi no sapraes we plante man, wetem olgeta ya tu we oli talem se oli Kristin, oli no tinghevi long ol tok blong Baebol we oli agensem fasin blong stil mo giaman, ol rabis fasin long saed blong seks, mo sam narafala fasin bakegen. Plante taem, yumi harem ol man oli talem ol tok olsem: “!Be hemia i stap long Oltesteman ya!” olsem se haf ya blong Baebol i olfala mo i no impoten nating. Oli gat tingting ya, nating we aposol Pol i talem se “olgeta tok blong Baebol oli kamaot long God.”

Be maet yu talem se: “Yumi no mas sakemaot evri samting we ol man blong hae save mo ol man blong stadi long ol hanraet blong Baebol oli talem.” !I tru, yumi no mas mekem olsem! Yumi glad tumas we sam man blong hae save oli mekem gud wok blong olgeta, nao oli givhan long yumi blong faenemaot ol faswan hanraet blong Baebol. Blong plante handred  yia, ol man oli raetemdaon plante plante kopi blong Baebol, taswe i klia se oli mekem sam smosmol mastik. Be yumi mas rimemba se hemia sam smosmol mastik nomo, i no minim se ful Baebol i kamaot long tingting blong man.

Gohed Blong Bilif Long “Ol Tok Blong Baebol”

Bifo we Pol i tokbaot long Timoti se ol tok blong Baebol oli kamaot long God, hem i talem from wanem ol tok ya oli impoten tumas. Hem i talem se long ol las dei, “ol man nogud wetem ol man blong giaman, bambae oli save gohed blong mekem i mowas olgeta. Bambae oli save giaman moa long ol man, mo olgeta tu oli save bilif long ol giaman toktok blong olgeta bakegen.” (2 Timoti 3:1, 13) Long taem blong Pol finis, ‘ol man we oli gat waes mo olgeta we oli gat save’ oli stap yusum ‘ol swit toktok blong giaman’ long ol man mo mekem se oli no moa bilif long Jisas Kraes. (1 Korin 1:18, 19; Kolosi 2:4, 8) Blong lukaot gud blong no foldaon long ol giaman tok ya, Pol i pulum Timoti blong i ‘holemstrong ol samting ya we oli tijim long hem bifo, taem hem i pikinini yet,’ hemia tijing blong ‘ol tok blong Baebol’ we oli kamaot long God.—2 Timoti 3:14, 15.

I impoten tumas we yu tu yu mekem olsem long ol ‘las dei’ ya we yumi laef long hem. Plante taem, ol man we oli waesgud oli yusum ol ‘swit toktok blong giaman’ long ol man. Yu no mas ting nating long samting ya, from we hemia i wan denja. Yu mas mekem olsem ol Kristin blong faswan handred yia. Blong lukaot gud long yu, yu mas trastem fulwan ol samting we yu lanem long Baebol, from we hem i rili Tok we i kamaot long God.

Ol Witnes blong Jeova bambae oli glad blong givhan long yu, blong yu bilif long Baebol. Oli save soemaot long yu se nomata we plante handred yia i pas, be yumi save trastem yet ol rul blong Baebol. Oli save soemaot tu olsem wanem Baebol i laenap wetem ol save blong ol saentis, olsem wanem ol tok blong hem oli joengud long stat kasem en blong hem, olsem wanem ol profet tok we hem i talem oli kamtru, mo plante narafala samting bakegen. Sipos yu wantem, yu save raet i go long olgeta we oli wokem magasin ya, blong kasem moa save. Ol save ya oli bin halpem plante milian man we hat blong olgeta i stret, blong oli luk se Baebol i rili Tok blong God.

[Tok blong makem poen long pej 5]

?Taem yu mitim wan man, olsem wanem yu save sipos i oraet blong trastem hem, no nogat?

[Tok blong makem poen long pej 6]

Yumi glad tumas we sam man blong hae save oli mekem gud wok blong olgeta, nao oli givhan long yumi blong faenemaot ol faswan hanraet blong Baebol