Wan Kwestin

Jeova i blokem fasin ya blong wosipim aedol, be ?from wanem hem i no panisim Eron taem hem i wokem pija blong bul long gol?

Taem Eron i wokem pija blong bul long gol, olsem we i stap long Eksodas japta 32, hem i brekem loa blong God long saed blong fasin blong wosipim aedol. (Eks. 20:3-5) Jeova i ‘kros we i kros [long Eron], i rere finis blong kilim hem i ded, be [Moses] i prea from Eron, nao Hae God i no kilim hem.’ (Dut. 9:19, 20) ?Olsem wanem? ?Prea blong stret man ya Moses, i “gat paoa” long saed blong trabol we Eron i mekem? (Jem. 5:16) Yes, i luk olsem se Jeova i lesin long prea we Moses i mekem. From prea ya, mo from tu narafala risen bakegen, hem i no givim panis long Eron.

Wan long tufala risen ya, hemia se Eron i holemstrong long God oltaem. Taem Jeova i sanem Moses blong toktok long Fero, mo blong karemaot ol man Isrel long Ijip, Hem i jusum Eron blong i go wetem Moses mo i toktok long nem blong Moses. (Eks. 4:10-16) Tufala man ya oli obei oltaem, nating we oli mas stanap plante taem long fored blong Fero, stronghed king ya blong Ijip. Taswe, taem Eron i stap yet long Ijip, hem i stap tru long Jeova, mo i holemstrong long wok blong Hem.—Eks. 4:21.

Tingbaot tu, samting we i pulum Eron blong wokem pija blong bul long gol. Moses i stap long Hil blong Sinae blong 40 dei. “Taem ol man oli luk we Moses i no moa kamdaon, i stap longtaem tumas antap long hil ya,” oli pulum Eron blong wokem wan aedol blong oli mekem wosip long hem. Eron i folem tingting blong olgeta nao hem i wokem wan pija blong bul long gol. (Eks. 32:1-6) Eron i no mekem samting ya from we hem i agri long fasin blong wosipim aedol. I luk olsem se ol man ya oli fosem hem, nao hem i mekem samting we oli wantem. Tingbaot, taem Moses i givim oda blong kilim i ded ol man ya we oli wosipim aedol, ol pikinini blong Livae wetem Eron tu, oli stanap long saed blong Jeova. Oli kilim tri taosen man oli ded from we olgeta ya nao oli lidim ol man blong wosipim aedol.—Eks. 32:25-29.

Biaen, Moses i talem long ol man se: “!Olgeta! !Sin ya we yufala i mekem i nogud we i nogud!” (Eks. 32:30) Taswe, i no Eron hem wan we i gat fol from trabol ya. Hem wetem ol man Isrel, olgeta evriwan oli kasem bigfala fasin sore blong Jeova.

Biaen long trabol ya, Jeova i givim oda long Moses blong putumap Eron i kam hae pris, i se: “Bambae yu tekem ol spesel klos ya blong Eron, yu putum long hem, mo bambae yu tekem tabu oel ya, yu kafsaedem smol i go long hem, blong makemaot hem i tabu, i pris blong mi blong mekem ol wok blong mi.” (Eks. 40:12, 13) I klia se Jeova i fogivim Eron from slak fasin blong hem. Eron i gat wan gudfala hat. Hem i rili wan man we i holemstrong long trufala wosip, be i no wan man blong wosipim ol aedol nating.