Yumi No Mas Mekem Tabu Spirit Blong Jeova i Harem Nogud
Yumi No Mas Mekem Tabu Spirit Blong Jeova i Harem Nogud
“Yufala i no mas mekem Tabu Spirit blong God i harem nogud, from we Spirit ya, hem i olsem mak we God i putum finis long yufala.”—EFES. 4:30.
1. ?Jeova i mekem wanem long plante milian man? ?Ol man ya oli mas mekem wanem?
JEOVA i mekem samting we i gud tumas long plante milian man we oli laef long rabis wol ya. Hem i mekem se oli save kam klosap long hem tru long stret Pikinini blong hem Jisas Kraes. (Jon 6:44) Sipos yu yu givim laef blong yu i go long God finis mo yu stap holemstrong promes ya, yu yu wan long ol man ya. Yu yu baptaes finis long nem blong tabu spirit, taswe yu mas mekem ol fasin we oli laenap wetem spirit ya.—Mat. 28:19.
2. ?Wanem ol kwestin we bambae yumi tokbaot?
2 Taem yumi ‘planem fasin we tabu spirit i wantem,’ yumi tekem wan niufala fasin blong laef. (Gal. 6:8; Efes. 4:17-24) Be aposol Pol i givim advaes mo woning long yumi, se yumi no mas mekem tabu spirit blong God i harem nogud. (Ridim Efesas 4:25-32.) Bambae yumi lukluk gud long ol advaes ya blong aposol Pol. ?Pol i minim wanem, taem hem i talem se yumi no mas mekem tabu spirit i harem nogud? ?Olsem wanem man we i givim laef blong hem i go long Jeova finis i save mekem tabu spirit i harem nogud? ?Yumi save mekem wanem blong blokem fasin ya blong mekem tabu spirit i harem nogud?
?Pol i Minim Wanem?
3. Traem eksplenem ol tok long Efesas 4:30.
3 Fastaem, i gud yumi ridim ol tok blong Pol long Efesas 4:30. Hem i raetem se: ‘Yufala i no mas mekem tabu spirit blong God i harem nogud, from we spirit ya, hem i olsem mak we God i putum finis long yufala, blong soemaot we hem bambae i mekem yufala i fri olgeta.’ Pol i no wantem we ol Kristin brata sista ya we hem i lavem olgeta tumas oli spolem fasin fren blong olgeta wetem God. Tabu spirit blong Jeova i olsem ‘mak we God i putum finis long olgeta, blong soemaot we hem bambae i mekem olgeta oli fri olgeta.’ Long taem bifo mo tede tu, tabu spirit i olsem wan mak we God i putum long sam man blong hem. Hem i makemaot olgeta wetem tabu spirit “blong soemaotgud we ol promes blong hem bambae oli kamtru” long olgeta, sipos oli holemstrong long Hem. (2 Kor. 1:22) Mak ya i soemaot se oli blong God, mo se bambae oli kasem laef long heven. I gat 144,000 man evriwan we God i putum mak blong hem long olgeta blong olwe.—Rev. 7:2-4.
4. ?From wanem i impoten tumas we yumi no mekem tabu spirit i harem nogud?
4 Sipos wan Kristin i mekem tabu spirit blong God i harem nogud, hemia faswan step we i save lidim hem blong lusum spirit ya fulwan long laef blong hem. Ol tok we Deved i talem taem hem i mekem bigfala sin wetem Batseba, i soemaot se man i save lusum spirit ya. Deved i sore tumas we hem i mekem bigfala sin ya, nao i krae i go long Jeova se: “Plis yu no ronemaot mi mi gowe long yu, mo yu no tekemaot Tabu Spirit blong yu i gowe long mi.” (Sam 51:11) Long olgeta man we tabu spirit i makemaot olgeta, olgeta ya nomo we oli ‘stanap strong gogo oli ded’ bambae oli kasem “praes” we God i givim, hemia laef long heven we i no save kam nogud samtaem. (Rev. 2:10; 1 Kor. 15:53) Ol Kristin we bambae oli laef long wol ya, olgeta tu oli mas gat tabu spirit long laef blong olgeta. Spirit ya bambae i halpem olgeta blong holemstrong long God, nao oli save kasem presen blong laef, from bilif blong olgeta long sakrefaes blong Kraes. (Jon 3:36; Rom 5:8; 6:23) Taswe, yumi evriwan i mas lukaot gud se yumi no mekem tabu spirit blong Jeova i harem nogud.
?Olsem Wanem Wan Kristin i Save Mekem Tabu Spirit i Harem Nogud?
5, 6. ?Olsem wanem wan Kristin i save mekem tabu spirit blong Jeova i harem nogud?
5 Ol Kristin we oli givim laef blong olgeta i go long Jeova finis, oli save blokem fasin ya blong mekem tabu spirit i harem nogud. Blong mekem olsem, yumi mas ‘letem spirit ya i lidim yumi long laef blong yumi.’ Long rod ya, ol nogud tingting blong wantem samting we i no stret bambae oli no winim yumi, mo bambae yumi no mekem ol rabis fasin. (Gal. 5:16, 25, 26) Be samting ya i save jenis. Maet yumi no luksave, be sloslo, yumi save go klosap moa long ol fasin we Tok blong God i agensem. From we Tok ya i kamaot long tabu spirit, yumi save stat blong mekem tabu spirit i harem nogud.
6 Sipos yumi gohed olsem we yumi no wantem folem rod we tabu spirit i lidim yumi long hem, yumi mekem tabu spirit i harem nogud. Mo yumi mekem se Jeova, we i Stamba blong tabu spirit ya, hem tu i harem nogud. Taem yumi stadi gud long Efesas 4:25-32, yumi kasem save long ol fasin we yumi mas mekem. Ol save ya bambae i givhan long yumi blong blokem fasin ya blong mekem tabu spirit i harem nogud.
?Olsem Wanem Blong Blokem Fasin Ya Blong Mekem Tabu Spirit i Harem Nogud?
7, 8. Eksplenem from wanem yumi mas tok tru oltaem.
7 Yumi mas tok tru oltaem. Tok blong Pol long Efesas 4:25 i talem se: “Yufala i mas finis long ol giaman toktok, from we yumi evriwan i olsem ol haf blong wan bodi nomo. Baebol i talem se, ‘Yufala i mas tok tru nomo long yufala.’” From we yumi joengud “olsem ol haf blong wan bodi nomo,” yumi no mas yusum ol tok we i no klia, blong givim wan tingting we i no stret long wan Kristin brata no sista blong yumi. Yumi no mas minim nomo blong lidim tingting blong narafala i gorong. Fasin ya i sem mak nomo long fasin blong giaman. Man we i gohed long rod ya, bambae i kasem mak ya we i no moa fren wetem God nating.—Ridim Ol Proveb 6:16-19.
8 Ol tok mo fasin blong trikim narafala oli save spolem fasin joengud long kongregesen. Yumi mas sem mak long gudfala profet Daniel, we ol man oli save trastem hem. Oli no save faenem poen nating long Daniel, from we hem i mekem i stret oltaem. (Dan. 6:4) Yumi mas tingbaot advaes we Pol i givim long ol Kristin we bambae oli go long heven. Hem i talem se wanwan long olgeta we oli olsem ‘bodi blong Kraes’ oli nidim ol narawan. Mo oli mas joengud oltaem wetem ol narawan ya we tabu spirit i makemaot olgeta, we oli tok tru oltaem. (Efes. 4:11, 12) Sipos yumi wantem kasem laef we i no save finis long Paradaes long wol ya, yumi tu yumi mas tok tru oltaem. Taem yumi mekem olsem, yumi givhan blong mekem se kampani blong ol Kristin brata sista long fulwol i joengud.
9. ?From wanem i impoten we yumi folem ol tok blong Efesas 4:26, 27?
9 Yumi mas agensem Setan, yumi no givim janis long hem blong pulum yumi blong mekem samting we Jeova i no glad long hem. (Jem. 4:7) Tabu spirit i givhan long yumi blong blokem Setan. Yumi blokem Setan taem yumi lukaot gud blong no faerap long kros. Pol i raetem se: “Sipos yufala i kros, yufala i no letem we kros ya i lidim yufala, blong yufala i mekem sin. ‘Mo yufala i no stap kros, gogo kasem san i godaon. Yufala i mas no givim janis long Setan.’” (Efes. 4:26, 27) Sipos yumi kam kros, yumi mas prea kwiktaem long tingting blong yumi. Hemia i sem mak taem yumi kros from wan samting we yumi gat raet blong kros from. Prea bambae i givhan long yumi blong “stap kwaet” mo bos long filing mo tingting blong yumi. Nao yumi blokem fasin we i save mekem tabu spirit i harem nogud. (Prov. 17:27) Yumi no mas stap kros longtaem mo givim janis long Setan blong pulum yumi blong mekem wan nogud samting. (Sam 37:8, 9) Wan rod blong blokem Setan i blong stretem ol rao kwiktaem, folem advaes we Jisas i givim.—Mat. 5:23, 24; 18:15-17.
10, 11. ?From wanem yumi no mas stil mo mekem kruked fasin?
10 Yumi no mas letem wan samting i pulum yumi blong stil no blong mekem kruked fasin. Long saed blong fasin stil, Pol i raetem se: “Man we i man blong stil, hem i mas lego fasin ya. Hem i mas wok had long stret fasin, blong i save gat plante samting blong givhan long hem, nao bambae i save givhan long ol puaman tu.” (Efes. 4:28) Sipos wan Kristin we i givim laef blong hem i go long Jeova finis i stilim samting blong narafala man, bambae hem i ‘spolem nem blong God’ from we hem i sakem doti long nem ya. (Prov. 30:7-9) Nating se man i pua, be hemia tu i no givim raet long hem blong stil. Ol man we oli lavem God mo oli lavem ol man raonabaot long olgeta, oli save se i no gat wan risen we i mekem se i oraet blong stil.—Mak 12:28-31.
11 Pol i no talem samting we yumi no mas mekem nomo. Hem i talem samting we yumi mas mekem tu. Taem tabu spirit i lidim yumi long laef blong yumi, yumi wok had blong lukaot gud long famle blong yumi, mo yumi gat naf blong “givhan long ol puaman tu.” (1 Tim. 5:8) Jisas mo ol aposol oli putum sam mane i stap blong givhan long ol puaman. Be giaman fren blong olgeta, Judas Iskariot, hem i stap stilim mane ya. (Jon 12:4-6) I klia se tabu spirit i no lidim hem. Taem tabu spirit i lidim yumi, ‘oltaem yumi stap mekem i stret nomo,’ olsem Pol. (Hib. 13:18) Long rod ya, yumi no mekem tabu spirit blong Jeova i harem nogud.
Sam Narafala Rod Blong Blokem Fasin Blong Mekem Tabu Spirit i Harem Nogud
12, 13. (a) ?Efesas 4:29 i soemaot se yumi no mas talem wanem kaen tok? (b) ?Ol tok we yumi talem oli mas olsem wanem?
12 Lukaot gud long ol toktok blong yumi. Pol i talem se: “Long ol toktok blong yufala, yufala i no mas talem ol rabis tok we i save spolem man. Yufala i mas talem ol gudfala tok we i save mekem ol man we oli slak oli kam strong moa. Tok olsem i save givhan moa long ol man we oli harem.” (Efes. 4:29) Bakegen, aposol Pol i no talem samting we yumi no mas mekem nomo, be hem i talem samting we yumi mas mekem tu. Taem tabu spirit i lidim yumi, yumi talem ol ‘tok we i save givhan moa long ol man we oli harem.’ Mo tu, yumi no talem ol “rabis tok” we i save spolem man. Grik tok we oli tanem i kam “rabis,” ol man oli yusum blong tokbaot frut, fis, no mit we i rotin, i sting finis. Yumi no wantem stap klosap long kakae olsem, yumi no laekem nating. Long sem fasin, yumi no laekem nating ol toktok we Jeova i talem se oli nogud.
13 Yumi mas talem ol tok we i soem respek, i kaen, i olsem kakae ‘we yumi putum sol long hem blong mekem i tesgud.’ (Kol. 3:8-10; 4:6, NW) Ol tok we yumi talem, i mas mekem ol man we oli lesin oli luksave se yumi defren long ol man blong wol. Taswe, yumi mas “talem ol gudfala tok we i save mekem ol man we oli slak oli kam strong moa.” Long rod ya, bambae yumi rili givhan long ol narafala. Yumi mas harem olsem man blong raetem Sam ya we i singsing se: “Hae God. Yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol tingting blong mi bambae oli stret gud long fes blong yu.”—Sam 19:14.
14. ?Efesas 4:30, 31 i talem se yumi mas sakemaot wanem fasin?
14 Lego olgeta fasin blong kros, no holem kros, no kros kwik, finis long fasin ya blong stap badfren. Fastaem Pol i givim woning se yumi no mas mekem tabu spirit i harem nogud. Biaen, hem i raetem se: “Yufala i mas lego olgeta fasin blong kros, yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala.” (Efes. 4:30, 31) From we yumi evriwan i sinman, yumi mas wok had blong bos long tingting mo fasin blong yumi. Sipos yumi no traem blokem ‘olgeta fasin blong kros, fasin blong holem kros mo kros kwik,’ yumi mekem tabu spirit blong God i harem nogud. Samting ya i sem mak taem yumi holemtaet ol rong we narafala i mekem agensem yumi, mo yumi soemaot oltaem se yumi stap kros long hem, mo yumi no wantem fren bakegen wetem hem. Sipos yumi stat nomo blong no wantem lesin long advaes blong Baebol, yumi save wokem ol fasin we oli lidim yumi blong mekem sin agensem tabu spirit. Long rod ya, yumi save kasem bigfala trabol.
15. ?Sipos narafala i mekem wan samting agensem yumi, yumi mas mekem wanem?
15 Yumi mas kaen gud, gat sore, mo fogivim narafala. Pol i raetem se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” (Efes. 4:32) Maet yumi harem nogud tumas long wan samting we narafala i mekem agensem yumi. Be yumi mas fogivim hem, olsem we God i stap fogivim yumi. (Luk 11:4) Traem tingbaot sipos wan Kristin brata no sista i tokbaot yumi long fasin we i daonem yumi. Ale yumi go luk hem blong stretem trabol ya. Nao hem i talem long yumi se hem i rili sore, mo i askem long yumi blong fogivim hem. Ale yumi fogivim hem. Be hemia nomo i no naf. Levitikas 19:18 i talem se: “Sipos wan man i mekem i nogud long yufala, yufala i no mas mekem wan samting long hem blong givimbak fasin ya, mo yufala i no mas lukluk nogud long man olsem. Yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo. Mi mi Hae God, mi God blong yufala.”
Yumi Mas Lukaot Gud
16. Talem wan eksampol blong soemaot se maet yumi mas jenisim sam fasin blong yumi, sipos yumi no wantem mekem tabu spirit i harem nogud.
16 Taem yumi stap yumi wan nomo we i no gat man i lukluk yumi, maet wan tingting i pulum yumi blong wantem mekem samting we God i no laekem. Olsem nao, maet wan brata i stap lesin long miusik we ol trufala Kristin oli no mas lesin long hem. Sloslo, tingting blong hem i stat blong trabol, from we hem i no folem ol advaes blong Baebol we i stap long ol buk blong ‘slef we i stret mo waes.’ (Mat. 24:45, NW) Nao maet brata ya i prea long saed ya, mo hem i tingbaot tok blong Pol long Efesas 4:30. From we hem i no wantem nating blong mekem tabu spirit i harem nogud, hem i mekemap tingting blong hem blong i no moa lesin long miusik we i no stret. Jeova bambae i blesem brata ya from strong tingting ya we hem i gat. Taswe, oltaem yumi mas lukaot gud blong no mekem tabu spirit blong God i harem nogud.
17. ?Wanem i save hapen sipos yumi no lukaot gud mo prea oltaem?
17 Yumi mas lukaot gud mo prea oltaem. Sipos no, yumi save foldaon long wan fasin we i no klin no wan nogud fasin, nao yumi mekem tabu spirit i harem nogud. Tabu spirit i wok oltaem folem tingting blong Jeova. Taswe, sipos yumi mekem spirit ya, no paoa blong God, i harem nogud, yumi mekem God hem wan i harem nogud. Tru ya, yumi no wantem nating blong mekem olsem. (Efes. 4:30) Long faswan handred yia, sam tija blong Loa long Isrel oli mekem wan bigfala sin. Oli talem se Setan nao i stap givim paoa long Jisas blong mekem ol merikel. (Ridim Mak 3:22-30.) Taem ol enemi ya blong Kraes oli talem olsem, oli ‘tok nogud long tabu spirit.’ Hemia wan sin we God i no save fogivim. !Bambae i nogud we i nogud sipos yumi mekem sin ya!
18. ?Olsem wanem yumi save sipos yumi mekem sin agensem tabu spirit?
18 Yumi no wantem kam klosap nating long wan sin we God i no save fogivim. Taswe, oltaem yumi mas tingbaot ol tok blong Pol, se yumi no mas mekem tabu spirit i harem nogud. ?Be olsem wanem sipos yumi mekem wan bigfala sin? Sipos yumi tanem tingting blong yumi, mo ol elda oli givhan long yumi, ale yumi save bilif se God i fogivim yumi, mo se yumi no mekem sin agensem tabu spirit. Mo tu, God i save halpem yumi blong yumi no moa folem wan fasin bakegen we i mekem tabu spirit ya i harem nogud.
19, 20. (a) ?Wanem sam fasin we yumi mas blokem? (b) ?Yumi mas gat strong tingting blong mekem wanem?
19 God i stap yusum tabu spirit blong givhan long ol man blong hem blong oli lavlavem olgeta, oli glad, mo oli joengud. (Sam 133:1-3) Taswe, yumi mas blokem fasin ya blong tokbaot man blong spolem hem. Mo tu, yumi no mas tok agensem ol man we tabu spirit i putumap olgeta, nao yumi spolem respek we ol narafala oli gat long ol man ya blong lukaot long ol sipsip blong God. Ol fasin ya oli save mekem tabu spirit i harem nogud. (Wok 20:28; Jud 8) I moagud we ol tok blong yumi i pulum evriwan long kongregesen blong oli joengud mo oli gat respek. Tru ya, yumi no mas mekem wan samting blong pulum ol man blong God blong seraot long ol smosmol grup. Pol i raetem se: “Ol brata mo sista. Long nem blong Jisas Kraes ya, Masta blong yumi, mi mi talem strong long yufala, se mi wantem tingting blong yufala i mas kam wan nomo. Bambae yufala i no moa seraot long ol naranarafala grup. Yufala i mas joen gud we yufala i gat wan tingting nomo, mo we fasin blong yufala i wan nomo.”—1 Kor. 1:10.
20 Jeova i wantem halpem yumi blong blokem fasin ya blong mekem tabu spirit i harem nogud, mo hem i naf blong halpem yumi. Yumi mas prea oltaem from tabu spirit, mo yumi mas gat strong tingting se bambae yumi neva mekem spirit ya i harem nogud. Yumi mas gohed nomo blong ‘planem fasin we tabu spirit i wantem,’ mo traehad oltaem blong folem rod we spirit ya i lidim yumi long hem, naoia mo blong olwe.
?Bambae Yu Yu Ansa Olsem Wanem?
• ?Wanem mining blong tok ya se man i mekem tabu spirit i harem nogud?
• ?Olsem wanem wan man we i givim laef blong hem i go long Jeova finis i save mekem tabu spirit i harem nogud?
• ?Yumi save mekem wanem blong blokem fasin ya blong mekem tabu spirit i harem nogud?
[Kwestin]
[Tok blong pija long pej 30]
Stretem ol rao kwiktaem
[Tok blong pija long pej 31]
?Weswan frut ya i soemaot fasin blong yu blong toktok?